Ko Hono Tag ʻo e Ngaahi Folofolá mo e Ngaahi Akonaki Kehe ʻo e Ongoongoleleí

Fakamatalaʻi ange ko e fakakulupú ko ha founga ʻaonga ia ke fokotuʻutuʻu maau ai ʻa e ngaahi potufolofola ʻoku tau saiʻia taha aí, ngaahi akonaki mei he kau taki ʻo e Siasí, mo e ʻū tohi kehe ʻa e Siasí. ʻOku hanga ʻe he fakakulupú ʻo ʻai ke tau lava ʻo faʻu ha laipeli fakataautaha ʻo e ngaahi tefito ʻo e ongoongoleleí koeʻuhí ke tau lava ʻo maʻungofua ʻa e ngaahi potufolofola mo e ngaahi akonaki ʻoku tau saiʻia taha aí ʻi he taimi ʻoku tau fiemaʻu ai kinautolú. ʻE ala tokoni ʻa hono fekumi ʻetau ngaahi fakakulupú ʻi he taimi ʻoku tau ako pe vahevahe ai ʻa e ongoongoleleí pea mo e taimi ʻoku tau teuteu ai ke fai ha lea pe lēsoní.

Fakatātaaʻi nounou ʻa e founga ke fakakulupu ai ʻa e folofolá ʻaki hano fakaafeʻi ʻa e kau ako ʻoku nau ʻilo e founga ke fakakulupu ʻa e folofolá ʻi he Gospel Library, ke nau fakatātaaʻi ʻa e taukei ko ʻení ki honau kaungāakó ʻi ha fanga kiʻi kulupu tokosiʻi.

Fakatokangaʻi ange: Te ke lava ʻo maʻu ha ngaahi maʻuʻanga tokoni lahi ange, fanga kiʻi tokoni, mo ha ngaahi vitiō kehe ʻi he konga “Help” (Tokoni) ʻi he polokalama Gospel Library, kau ai ʻa e “Gospel Library User Guide (iOS)” mo e “Gospel Library User Guide (Android).”

Fehuʻi ki he kau akó ʻa e founga ʻe lava ai ʻe ha taha ʻokú ne fakaʻaongaʻi ʻa e ngaahi folofola kuo pākí ʻo fakakulupu ʻa e ngaahi potufolofolá ʻaki ʻa e tefitó. ʻE ala kau ʻi he ngaahi fakakaukau te nau vahevahé ha niʻihi ʻo e ngaahi meʻa ko ʻení:

• Hiki ʻa e ngaahi tefitó ʻi he tafaʻaki ʻo e ngaahi vēsí

• Fakaʻilongaʻi pe hiki ʻa e ngaahi fakamoʻoni folofolá ʻi he Fakahinohino ki he Ngaahi Tefitó

• Fakaʻaongaʻi ha kiʻi tohi (pe ʻū peesi ʻoku ʻikai tohi ai ha meʻa ʻi heʻenau folofolá) ke fakafaʻahinga ʻa e folofolá mo e ngaahi kupuʻi leá

• Fakapipiki ha fanga kiʻi laʻipepa fakalanulanu pe ngaahi sitika (ke fakafofongaʻi ha ngaahi tefito pau) ʻi he tuliki ʻo e ʻū laʻipēsí.

Fili ha potufolofola mei he ako folofola ʻo e uike ní pe fakaʻaongaʻi ha taha ʻo e ngaahi fakakaukau ko ʻení ke fakaafeʻi ʻa e kau akó ke nau fakaangaanga ʻa e taukei ko ʻení. ʻE lava ke fakaʻilongaʻi ʻe he kau akó ʻa e ngaahi foʻi lea, kupuʻi lea, pe ngaahi moʻoni ʻoku mahuʻinga makehe kiate kinautolú pea toki faʻu ha kulupu ki he potufolofolá pe tānaki ʻa e potufolofolá ki ha fakakulupu kuo ʻosi faʻu. ʻE lava ke vahevahe tautau toko ua ʻe he kau akó ʻa e meʻa naʻa nau fakakulupú mo e founga naʻa nau fakakulupu ai iá.

Ngaahi fakakaukau lahi ange ki hono fakaangaanga ʻa e taukei ko ʻení:

• Fakaafeʻi ʻa e kau akó ke nau fakakaukauloto kuo kole ange ke nau fai ha lea fekauʻaki mo e fakatomalá. Kole ange ke nau faʻu ha kulupu ʻoku ui ko e “Fakatomalá” pea tānaki atu ki ai ha potufolofola ʻe ua pe lahi ange pea mo ha fakamatala ʻe taha ʻa ha taki ʻo e Siasí. ʻE lava ke kumi ʻe he kau akó ʻa e “fakatomalá” ʻi he Fakahinohino ki he Ngaahi Folofolá pe Gospel Library.

• Fakaafeʻi ʻa e kau akó ke nau faʻu ha kulupu ʻo ui ko e “Ngaahi Huafa mo e Tuʻunga ʻo Kalaisí.” ʻOange kiate kinautolu ha lisi ʻo ha ngaahi potufolofola ʻoku ʻi ai ha niʻihi ʻo e ngaahi huafa mo e ngaahi tuʻunga ʻo Sīsū Kalaisí (hangē ko ʻení, Siope 19:25; ʻĪsaia 7:14; Sione 15:1; 1 Tīmote 4:10; Hepelū 9:15; Fakahā 1:8; Mōsaia 3:8; mo e Tokāteline mo e Ngaahi Fuakava 93:8–9). Kole ki he kau akó ke nau fili ha potufolofola ʻe fā pe nima ke nau lau, pea fakaafeʻi ke nau fakakulupu ʻa e huafa mo e ngaahi tuʻunga ʻo Sīsū ʻoku nau saiʻia taha aí. ʻE lava leva ke nau vahevahe ha taha ʻo e ngaahi huafa pe tuʻunga naʻa nau fakakulupú pea fakamatalaʻi ʻa e meʻa ʻe lava ke akoʻi mai ʻe he huafa pe tuʻunga ko iá fekauʻaki mo Iá.

• Kole ki he kau akó ke nau ō ki he sēsini fakamuimuitaha ʻo e konifelenisi lahí ʻi he Gospel Library. Fakaafeʻi ke nau fili ha lea ʻoku nau manako ai pea lau ha konga ʻo e lea ko iá. Poupouʻi ke nau fakakulupu ha faʻahinga fakamatala pē ʻoku nau pehē ʻoku mahuʻingamālie ʻaupito. Te nau lava ʻo vahevahe mo ha taha ʻi he kalasí ʻa e meʻa naʻa nau fakakulupú pea mo hono ʻuhingá.

Poupouʻi ʻa e kau akó ke nau faʻu ha ngaahi fakakulupu he lolotonga ʻenau ako folofola fakatāutahá pea ʻi he lolotonga ʻa e fealeaʻaki fakakalasí. Manatuʻi ke toe vakaiʻi ʻi he ngaahi kalasi ka hokó ʻaki hano fakaafeʻi ʻa e kau akó ke nau vahevahe ha ngaahi potufolofola mo ha ngaahi akonaki mei he kau taki ʻo e Siasí kuo nau ʻosi fakakulupu. Te ke lava foki ʻo kole ki he kau akó ke nau vahevahe ha ngaahi founga kuo nau fakaʻaongaʻi ai ʻa e fakakulupú ʻi heʻenau ako fakatāutahá pea ʻi hono vahevahe pe akoʻi ʻo e ongoongoleleí. Kumi ha ngaahi founga ke hoko atu ai hono toe vakaiʻi mo fakaangaanga ʻa e taukei ko ʻení ʻi he kalasí.