Ko Hono Fakaʻilongaʻi ʻo e Folofolá

Fakamatalaʻi ange ko hono fakaʻilongaʻi ʻa e folofolá ʻi ha ngaahi founga ʻoku ʻuhingamālié ʻe lava ke fakatupulaki ai ʻa hono ako mo e mahino ʻa e ongoongoleleí. ʻOku tokoni ʻa e fakaʻilongaʻí ke fakamamafaʻi ʻa e meʻa ʻoku tau ʻilo ʻoku mahuʻinga tahá pea ʻe lava ke tokoni ia ʻi he taimi ʻoku tau akoʻi ai ʻa e niʻihi kehé. Ko e kakai ʻoku nau fakaʻilongaʻi ʻenau folofolá, ʻe lava ke nau fakahoko ia ʻi ha ngaahi founga kehekehe, hangē ko hano fakaʻilongaʻi ʻaki ha peni lanu maama, laineʻi, siakaleʻi, pe tānaki atu ha fanga kiʻi fakaʻilonga ke fakafaikehekeheʻi ʻa e ngaahi foʻi leá, kupuʻi leá, pe potufolofolá.

Fakatātaaʻi nounou hono fakaʻilongaʻi ʻo e ngaahi folofolá ʻaki hano fakahoko ha meʻa ʻe taha pe lahi ange ʻi he ngaahi meʻa ko ʻení:

• Fakaʻaliʻali ki he kau akó ha ngaahi founga kehekehe ʻe niʻihi te nau lava ai ʻo fakaʻilongaʻi ha potufolofola—hangē ko hano laineʻi, fakaʻilongaʻi ʻaki ha peni lanu maama, pe fakaʻaongaʻi ha ʻū fakaʻilonga pe fakatātā kehe.

• Kole ki ha kau ako ʻe niʻihi ke nau vahevahe nounou ʻa e founga ʻoku nau saiʻia ke fakaʻilongaʻi ai ʻenau folofolá.

• Fakaafeʻi ʻa e kau ako ʻoku nau ʻilo e founga ke fakaʻilongaʻi ai e folofola fakaʻilekitulōniká ʻi he Gospel Library ke nau fakatātaaʻi ʻa e founga ke fakahoko ai ʻení ki honau kaungāakó ʻi ha fanga kiʻi kulupu iiki.

Fakatokangaʻi ange: Te ke lava ʻo maʻu ha ngaahi maʻuʻanga tokoni lahi ange, fanga kiʻi tokoni, mo ha ngaahi vitiō kehe ʻi he konga “Help” (Tokoni) ʻi he polokalama Gospel Library, kau ai ʻa e “Gospel Library User Guide (iOS)” mo e “Gospel Library User Guide (Android).”

Fili ha potufolofola mei he ako folofola ʻo e uike ní pe fakaʻaongaʻi ha taha ʻo e ngaahi sīpinga ʻoku ʻoatu ʻi laló, pea fakaafeʻi ʻa e kau akó ke nau fakaangaanga hono fakaʻilongaʻi ʻa e folofolá. ʻE lava ke fakaʻilongaʻi ʻe he kau akó ha ngaahi foʻi lea, kupuʻi lea, pe ngaahi moʻoni ʻoku mahuʻinga kiate kinautolu. ʻE lava ke nau toki vahevahe ʻi haʻanau ngāue tauhoa pe ʻi ha fanga kiʻi kulupu iiki ʻa e meʻa naʻa nau fakaʻilongaʻí mo e ʻuhinga naʻa nau fakaʻilongaʻi ai iá.

Ngaahi potufolofola lahi ange ke fakaangaangá:

• Saame 23. ʻE lava ke fakaʻilongaʻi ʻe he kau akó ha ngaahi kupuʻi lea mo ha ngaahi potufolofola ʻoku nau manako ai ʻokú ne akoʻi kinautolu fekauʻaki mo e ʻEikí.

• Mātiu 5:38–48. ʻE lava ke fakaʻilongaʻi ʻe he kau akó ʻa e ngaahi akonaki ʻa e Fakamoʻuí ʻoku mahuʻinga kiate kinautolú.

• Mōsaia 18:8–10. ʻE lava ke fakaʻilongaʻi ʻe he kau akó ʻa e ngaahi kupuʻi lea ʻoku nau fakahaaʻi ʻa e ngaahi tukupā ʻoku tau fai ʻi he papitaisó.

• Tokāteline mo e Ngaahi Fuakava 38:1–9. ʻE lava ke fakaʻilongaʻi ʻe he kau akó ʻa e ngaahi foʻi lea pe kupuʻi lea ʻokú ne akoʻi kinautolu fekauʻaki mo Sīsū Kalaisí.

Poupouʻi ʻa e kau akó ke fakaʻilongaʻi ʻenau folofolá ʻi he lolotonga ʻenau ako folofola fakatāutahá pea ʻi he lolotonga ʻa e kalasí. Toe vakaiʻi ʻi he lolotonga e kalasi hokó ʻaki hano fakaafeʻi ʻa e kau akó ke nau vahevahe ha faʻahinga meʻa ʻuhingamālie naʻa nau fakaʻilongaʻi ʻi he lolotonga ʻenau ako fakatāutahá pea mo e ʻuhinga naʻa nau fakaʻilongaʻi ai iá. Te ke lava ʻo fehuʻi ange pe ʻoku tokoni fēfē ʻa hono fakaʻilongaʻi ʻo e folofolá ki heʻenau ako folofolá. Kumi ha ngaahi founga ke hoko atu ai hono toe vakaiʻi mo fakaangaanga ʻa e taukei ko ʻení ʻi he kalasí.