Ko Hono ʻEke ha Ngaahi Fehuʻi ʻOkú Ne Fakaafeʻi ʻa e Ako Fakamātoató

Te ke ala vahevahe ʻa e fakamatala ko ʻeni naʻe fai ʻe Palsiteni Henelī B. ʻAealingí:

“Ko hono ʻeke ha ngaahi fehuʻi mo talí, ko e uho ia ‘o e ako kotoa pē.” (Henry B. Eyring, “The Lord Will Multiply the Harvest” [address to Church Educational System religious educators, Feb. 6, 1998], ChurchofJesusChrist.org)

Fakamatalaʻi ange ko e ʻeke ha ngaahi fehuʻi lolotonga ʻetau ako ʻa e folofolá ʻoku fakaiku ia ki ha mahino lahi ange ʻa e folofola ʻa e ʻOtuá pea ʻokú ne fakaafeʻi ha ueʻi fakalaumālie fakataautaha. Fakakaukau ki he folofolá ko hano fakaafeʻi ia koe ke ke talanoa mo kinautolu. Ko e hā ha ngaahi fehuʻi te ke lava ʻo ʻeke ke ke maʻu ai ha mahino lelei ange kiate kinautolu? Ko e hā ha ngaahi fehuʻi ʻoku nau ʻeke ʻe ala tokoni atu ke ke hoko ai ʻo lelei ange? ʻE lava ʻa e faʻahinga fehuʻi ko ʻení ʻo tokoni ke fakaafeʻi ʻa e ako fakamātoató:

• Ngaahi fehuʻi ʻoku nau ueʻi ke tau kumi ʻi he folofolá ha fakamatala fekauʻaki mo e puipuituʻa pe kakano ʻo e folofolá

• Ngaahi fehuʻi ʻoku fiemaʻu ai ke tau ʻanalaiso ʻa e folofolá ke mahinó

• Ngaahi fehuʻi ʻoku nau fakaafeʻi ke tau fakalaulauloto mo fakaʻaongaʻi ʻa e meʻa ʻoku tau ako ʻi he folofolá

Ke fakatātaaʻi ʻa e taukei ko ʻení, fakakaukau ke fakaʻaongaʻi ʻa e fakakaukau ko ʻení pe ko haʻo fakakaukau pē ʻaʻau.

Lau fakakalasi ʻa e Mātiu 7:1–5. Fakakaukau ke fakaʻaliʻali ʻa e ngaahi fehuʻi te ke ala ʻeke pē kiate koe ʻi hoʻo ako ʻa e potufolofola ko ʻení. Hangē ko ʻení:

• Ngaahi Fehuʻi ʻOku Nau Ueʻi Ha Fekumi ki ha Fakamatala: Ko hai ʻoku leá, ko e leá kia hai, pea ko e hā hono ʻuhingá? Ko e hā ʻa e malamalaʻi ʻakau mo e fuʻu ʻakau? Ko e hā ʻa e mālualoi?

• Ngaahi Fehuʻi ʻOku Nau Fakaloloto ʻa e Mahinó: Ko e hā e meʻa ʻoku akoʻi mai ʻe he ʻEikí fekauʻaki mo e fakamāú ʻaki hono fakaʻaongaʻi ʻa e fakatātā ʻo e malamalaʻi ʻakaú mo e fuʻu ʻakaú? Ko e hā ʻa e faikehekehe ʻo e fakamaau taʻe-māʻoniʻoní mo e fakamaau māʻoniʻoní? (Vakai, Liliu ʻa Siosefa Sāmitá, Mātiu 7:1–2.)

• Ngaahi Fehuʻi ʻOku Nau Poupouʻi ʻa e Fakalaulaulotó mo Hono Fakaʻaongaʻí: ʻOku ʻi ai nai ha fuʻu ʻakau ʻi hoku matá ʻokú ne uesia ʻa e founga ʻoku ou vakai ai ki he kakai kehé? Ko e hā ha meʻa te u lava ʻo fai ke u fakaʻehiʻehi ai mei he fakamaau taʻe-māʻoniʻoní?

Mahalo te ke fie vahevahe ʻa e founga ʻe tokoni ai hono tali ʻo e ngaahi fehuʻi ko ʻení ke mahino lelei ange ʻa e ngaahi akonaki ʻa e Fakamoʻuí mo fakaafeʻi ʻa e ueʻi fakalaumālie fakafoʻituituí mo hono fakaʻaongaʻí.

Fili ha potufolofola mei he lau folofola ʻo e uike ní, pe te ke fili ha taha mei he ngaahi sīpinga ʻoku ʻoatu ʻi laló. Fakaʻaliʻali pe hiki ʻa e ngaahi ʻuluʻi tohi ko ʻení ʻi he palakipoé:

• Ngaahi Fehuʻi ʻOku Nau Ueʻi ha Fekumi ki ha Fakamatala

• Ngaahi fehu‘i ʻOku Nau Fakaloloto ʻa e Mahinó

• Ngaahi Fehuʻi ʻOku Nau Poupouʻi ʻa e Fakalaulaulotó mo Hono Fakaʻaongaʻí

Fakaafeʻi ʻa e kau akó ke nau lau ʻa e potufolofolá pea lekooti ha fehuʻi ʻe taha ki he ʻuluʻi tohi takitaha. Fakaafeʻi ʻa e kau akó ke nau vahevahe ʻa e fakamatala ko ʻení mo hanau hoa: (1) ngaahi fehuʻi naʻa nau tohí mo e (2) founga ʻe lava ke fakaloloto ai ʻe he tali pe fakalaulauloto ki he ngaahi fehuʻi ko iá ʻa e mahinó mo fakaafeʻi ʻa e ueʻi fakalaumālie fakafoʻituituí mo hono fakaʻaongaʻí.

Ngaahi potufolofola lahi ange ki hono fakaangaanga ʻo e taukei ko ʻení:

• ʻĪsaia 53:4–5

• 1 Kolinitō 13:1–3

• Hilamani 5:12

• Tokāteline mo e Ngaahi Fuakava 58:27–29

Fakaafeʻi ʻa e kau akó ke nau fakaʻaongaʻi ʻa e taukei ko ʻeni ʻo hono ʻeke ha ngaahi fehuʻi ʻoku fakaafeʻi ai e ako fakamātoató ke fakatupulaki ʻenau ako folofola fakatāutahá. Manatuʻi ke toe vakaiʻi pea tuku ha taimi ʻi haʻamou toe fakataha ke vahevahe ai ʻe he kau akó ʻa e ngaahi fehuʻi naʻa nau ʻeke lolotonga ʻenau ako ʻa e folofolá. Te ke lava foki ʻo fakaafeʻi ke nau vahevahe ʻa e founga ʻoku faitokonia ai ʻe he ʻeke fehuʻí ʻa e lava ke mahino kiate kinautolu mo nau saiʻia ʻi he ako folofolá.