Talateu ki he Ngaahi Ako Fakataukeí

ʻE lava ke tokoni ʻa e ngaahi taukei ʻi he maʻuʻanga tokoni ko ʻení ke ako lelei ange ʻe he kau akó ʻa e folofola ʻa e ʻOtuá, mahino kiate kinautolu ʻa e folofolá, ako ʻaki e Laumālié, fakaʻaongaʻi ʻa e ngaahi akonaki ʻo e ongoongoleleí ʻi heʻenau moʻuí, pea vahevahe ʻa e ngaahi moʻoni ʻo e ongoongoleleí mo e niʻihi kehé ʻi ha ngaahi founga ʻoku faka-Kalaisí. ʻOku fakataumuʻa ʻa e akoʻi ʻo e taukei takitaha ke feʻunga mo ha miniti ʻe 10 ki he 20.

ʻOku fakaʻaongaʻi ʻe he ngaahi akoʻi ʻo e taukeí ʻa e sīpinga ko ʻení:

1. Fakaʻuhingaʻi. Tokoni ke mahino ki he kau akó ʻa e taukei te nau fakaangaangá. ʻE lava ke feʻunga ʻeni mo ha miniti ʻe 2–5.

2. Fakatātaaʻi. Fakatātaaʻi ʻa e taukeí. ʻE lava ke feʻunga ʻeni mo ha miniti ʻe 3–5.

3. Fakaangaanga. ʻOange ki he kau akó ha faingamālie ke fakaangaanga ʻa e taukeí. Fakapapauʻi ko e vaeua ʻo e taimi (miniti ʻe 5–10) akó ʻoku fakaʻaongaʻi ia ki he fakaangaangá.

4. Fakaafe pea Toe Vakaiʻi. Poupouʻi ʻa e kau akó ke nau fakaʻaongaʻi ʻa e taukeí ʻi heʻenau ako fakatāutahá. Toe vakaiʻi ʻenau ngaahi aʻusiá pea fakafuofuaʻi pe ʻe tokoni ke fakaangaanga ke lahi ange.

ʻOku fakataumuʻa e ngaahi ako taukeí ke tokoni ki he kau faiako seminelí, ʻinisititiutí, mo e kau faiako ʻo e Siasí mo e kau akó ke nau fakafalala pē kiate kinautolu ʻi heʻenau ako ʻa e folofolá. ʻE lava ke fakaʻaongaʻi ʻa e ngaahi akó ʻi he ngaahi kalasi folofolá mo e ngaahi kalasi pe ako ngāue kehe ʻoku nofotaha ʻi hono ako ʻo e folofolá. ʻE lava foki ke fakaʻaongaʻi ia ʻe he kau faiako ʻi he lotú pe ko e mātuʻá ʻi ʻapi. ʻE lava ke fakafuofuaʻi ʻe he kau faiakó ʻa e ngaahi fiemaʻu ʻa kinautolu ʻoku nau akoʻí pea fili fakataha mo kinautolu ʻoku nau akoʻí pe ko e ngaahi ako fē te nau tokanga taha ki aí pea mo e taimi ke fakahoko aí.