Ko Hono Fakafehokotaki ʻo e Ngaahi Folofolá

Fakamatalaʻi ange ko e fakafehokotakí ko hano fakafekauʻaki ia ʻo ha potufolofola ki ha potufolofola ʻokú na fekauʻaki, ko ha kupuʻi lea mei ha taki ʻo e Siasí, pe ko ha tohi kehe ʻo e Siasí. ʻE lava hono fakafehokotaki pe fakafekauʻaki ʻa e folofolá ʻo fakaloloto ʻetau mahino ki he folofola ʻa e ʻOtuá mo tokoniʻi kitautolu ʻi heʻetau akoʻi mo vahevahe ʻa e ongoongoleleí mo e niʻihi kehé.

Fakamahinoʻi ange ʻoku ʻosi ʻi he ngaahi futinouti ʻo ha ngaahi pulusinga ʻe niʻihi ʻo e folofolá ha ngaahi fehokotakiʻanga ʻaonga pe ngaahi fakafekauʻaki fakafolofola ki ha ngaahi potufolofola kehe mo ha ngaahi maʻuʻanga tokoni fakaako kehe.

Fakatātaaʻi nounou ʻa e taukei ko ʻení ʻaki hano fakaʻaongaʻi ʻa e sīpinga ko ʻení, pe fakaʻaongaʻi haʻo sīpinga pē ʻaʻau:

Lau ʻa e ʻĪsaia 53:3–5. Fakamahinoʻi ange ʻoku akoʻi ʻe he veesi 4 kuo “toʻo ʻe he [Fakamoʻuí] kiate ia ʻa ʻetau ngaahi vaivaí, [mo] ne fua ʻetau ngaahi mamahí.” Fakamahinoʻi ange naʻe akoʻi ʻe ʻAlamā ha foʻi moʻoni tatau ʻo tānaki atu ki ai ha fakamaʻalaʻala fekauʻaki mo e Fakalelei ʻa e Fakamoʻuí. Lau ʻa e ʻAlamā 7:11–12. Fakaʻaliʻali ki he kau akó ʻa e founga te nau lava ai ʻo hiki ʻa e ʻAlamā 7:11–12 ʻi he tafaʻaki ʻo e ʻĪsaia 53:4 ʻi he tafaʻaki ʻo ʻenau folofolá. Pe fakaʻaliʻali ange ʻa e founga ke fakafehokotaki ai ʻa e ongo potufolofola ko ʻení ʻo fakaʻaongaʻi ʻa e konga ke Link ʻi he Gospel Library.

Te ke lava ʻo fakaafeʻi ʻa e kau ako ʻoku nau ʻilo ʻa e founga ke faʻu ai ha fakafehokotaki ʻi he Gospel Library ke nau fakatātaaʻi ʻeni ki honau kaungāakó.

Fakatokangaʻi ange: Te ke lava ʻo maʻu ha ngaahi maʻuʻanga tokoni lahi ange, fanga kiʻi tokoni, mo ha ngaahi vitiō kehe ʻi he konga “Help” (Tokoni) ʻi he polokalama Gospel Library, kau ai ʻa e “Gospel Library User Guide (iOS)” mo e “Gospel Library User Guide (Android).”

Fili ha potufolofola mei he ako folofola ʻo e uike ní. ʻOange ki he kau akó ha potufolofola ʻoku fekauʻaki, ko ha akonaki mei ha taki ʻo e Siasí, pe ko ha fakamatala kehe mei he Gospel Library ke fehokotaki ki ai. Pe ko haʻo fakaʻaongaʻi ha taha ʻo e ngaahi sīpinga ko ʻení ke fakaafeʻi ʻa e kau akó ke nau fakaangaanga ʻa e taukei ko ʻení:

• Lau fakataha ʻa e Siope 19:25 mo e kalasí. Fakaafeʻi ʻa e kau akó ke nau kumi ʻa e “Huhuʻí” ʻi he Fakahinohino ki he Ngaahi Folofolá pea kumi ha potufolofola ʻokú ne akoʻi ʻa e fatongia ʻo Sīsū Kalaisí ʻi Heʻene hoko ko hotau Huhuʻí. ʻE lava ke tānaki atu ʻe he kau akó ha potufolofola naʻa nau maʻu ki he tafaʻaki ʻo ʻenau folofola kuo pākí ʻi he tafaʻaki pē ʻo e Siope 19:25 pe fokotuʻu ha fehokotakiʻanga ʻi heʻenau folofola fakaʻilekitulōniká ke fakafehokotaki ʻa e ongo potufolofolá.

• Fakaafeʻi ʻa e kau akó ke nau lau ʻa e Mātiu 5:48 pe 3 Nīfai 12:48 pea fakaʻilongaʻi ʻa e foʻi lea ko e “haohaoa.” Hili iá pea tuku ke nau ō ki he lea ʻa Palesiteni Lāsolo M. Nalesoni “Perfection Pending” (Ensign, Nov. 1995) pea lau ʻa e konga ko e “Eternal Perfection.” Fakaafeʻi ʻa e kau akó ke nau fili ha palakalafi pe ngaahi palakalafi ʻoku nau pehē ʻoku ʻaonga tahá pea fokotuʻu ha fehokotakiʻanga ki ai.

• Fakaafeʻi ʻa e kau akó ke nau toe vakaiʻi ʻa e Luke 24:1–12 pea fakaʻilongaʻi ʻa e kupuʻi lea “ʻOku ʻikai ʻi heni ia, ka kuo tuʻu hake” ʻi he veesi 6. Pea kole ange leva ke nau ʻalu ki he Easter Videos ʻi he Gospel Library pea fakafehokotaki ha taha ʻo e ngaahi vitiō fekauʻaki mo e Toetuʻú ki he Luke 24:6.

Poupouʻi ʻa e kau akó ke nau fokotuʻu ha ngaahi fehokotakiʻanga lolotonga ʻenau ako ʻa e folofolá. Toe vakaiʻi he lolotonga e kalasi hokó ʻaki hano fakaafeʻi ʻa e kau akó ke nau vahevahe ʻa e founga naʻa nau fakaʻaongaʻi ai ʻa e taukei ko ʻení lolotonga ʻenau ako fakatāutahá. Te nau lava ʻo vahevahe ha fehokotakiʻanga naʻa nau tānaki ki heʻenau folofolá mo fakamatalaʻi ʻa e ʻuhinga naʻa nau tānaki ai iá. Kumi ha ngaahi founga ke hoko atu ai hono toe vakaiʻi mo fakaangaanga ʻa e taukei ko ʻení ʻi he kalasí.