Ko Hono Kumi ha Ngaahi Fehokotaki ʻi he Folofolá

Vahevahe ʻa e fakamatala ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e fakafehokotakí ko ha fetuʻutakiʻanga ʻi he vahaʻa ʻo ha ngaahi fakakaukau, kakai, ʻū meʻa ʻoku hoko pea ʻoku fonu e folofolá ʻi he ngaahi fehokotakiʻangá. (David A. Bednar, “Ko Ha Tānakiʻanga ʻo e Vai MoʻuíFaeasaiti ʻa e Potungāue Ako ʻa e Siasí maʻá e kakai lalahi kei talavoú, 4 Fēpueli 2007], 3, broadcasts.ChurchofJesusChrist.org)

Fakamahinoʻi ange ko e taimi ʻoku tau ʻiloʻi ai ʻa e ngaahi fehokotakí, te tau lava ʻo maʻu ha ʻilo lahi ange ʻaki haʻatau fakatokangaʻi ʻa e ngaahi faitatau mo e faikehekehe ʻi he ngaahi fakakaukaú, kakaí, ngaahi meʻá, pe ʻū meʻa ʻoku hokó. (Fakatokangaʻi ange: ʻE ala tokoni ke fakafekauʻaki ʻa e akó ni ki he “Ko e Kumi ʻo e Ngaahi Sīpinga ʻi he Folofolá.”)

Fakaʻaongaʻi ʻa e sīpinga ko ʻení pe ko haʻo sīpinga pē ʻaʻau ke fakatātaaʻi ʻaki e taukei ko ʻení:

Fakaʻaliʻali ʻa e potufolofola ko ʻení, pea fakamahinoʻi ange ʻa e fehokotaki ʻo e maʻu ha nima maʻá mo ha loto-māʻoniʻoní. (Fakatokangaʻi ange: Kuo tānaki atu ʻa e mataʻitohi fakahihifí ki he fakamatala ʻi laló ke fakaʻilongaʻi ʻa e fehokotakí.)

Saame 24:3–4

“Ko hai ʻe ʻalu hake ki he moʻunga ʻo e ʻEikí? pe ko hai ʻe tuʻu ʻi hono potu māʻoniʻoní?

“Ko ia ʻoku nima maʻa, mo loto māʻoniʻoní; ʻa ia naʻe ʻikai te ne hiki hono laumālié ki he meʻa vaʻingá, pe fuakava ʻi he kākaá.”

Te ke lava ʻo vahevahe ʻa e lea ko ʻeni ʻa ʻEletā Petinaá ke tokoni ke mahino ki he kau akó ʻa e fehokotaki ʻi he maʻu ha nima maʻá mo e loto-māʻoniʻoní:

Te tau malava ke maʻu ha nima ʻoku maʻa kae ʻikai maʻu ha loto-maʻa. Kātaki ʻo fakatokangaʻi ʻoku fakatou fiemaʻu ʻa e nima maʻá mo e loto-maʻá ke ʻalu hake ki he moʻunga ʻo e ʻEikí pea tuʻu ʻi Hono potu māʻoniʻoní.

Tuku muʻa ke u fokotuʻu atu, ʻoku fakamaʻa ʻa e nimá ʻi hono siʻaki ʻo e tangata fakaekakanó mo ikunaʻi ʻa e angahalá pea mo e tākiekina kovi ʻi heʻetau moʻuí ʻo fou ʻi he Fakalelei ʻa e Fakamoʻuí. ʻOku fakamāʻoniʻoniʻi ʻa e lotó ʻi heʻetau maʻu Hono mālohí ke fakaivia kitautolu ke fai leleí pea hoko ʻo lelei ange. (David A. Bednar, “Nima Maʻá mo ha Loto Maʻá,” Liahona, Nōvema 2007, 82)

Fakaafeʻi ʻa e kau akó ke nau kumi ha fehokotaki ʻi heʻenau ako ha potufolofola mei he folofola ke laukonga he uike ní. Pe te ke lava ʻo fili ha taha ʻo e ngaahi potufolofola ko ʻeni ʻi laló ke nau ako. ʻE lava leva ke lekooti ʻe he kau akó ha ʻilo ʻoku nau maʻu ʻaki haʻanau fakakaukau ki ha fehokotaki ʻoku nau maʻu ʻi he potufolofolá. Fakaafeʻi ʻa e kau akó ke nau fevahevaheʻaki mo hanau hoa, pe ʻi ha fanga kiʻi kulupu, pe fakakalasi ʻa e ngaahi fehokotaki mo e ʻilo naʻa nau maʻú.

Ngaahi potufolofola lahi ange ke fakaangaangá:

• Mōsese 5:4–9; Sione 1:29; 1 Pita 1:19 (Sīsū Kalaisi mo ha lami)

• Sione 5:19; 14:6 (Ko e Tamaí mo e ʻAló)

• ʻAlamā 42:9–10, 14–15 (Ko e Hingá mo e Fakalelei ʻa Sīsū Kalaisí; fakamaau totonú mo e ʻaloʻofá)

• Molonai 7:40–44 (Tuí, ʻamanaki leleí, mo e ʻofa faka-Kalaisí)

• Tokāteline mo e Ngaahi Fuakava 130:18–21 (ʻAtamai potó mo e talangofuá)

Poupouʻi ʻa e kau akó ke nau kumi ha ngaahi fehokotaki ʻi he folofolá lolotonga ʻenau ako fakatāutahá. Kole ange ke nau ōmai mateuteu ki he kalasi hokó ke vahevahe ha ngaahi fehokotaki naʻa nau maʻu. Manatuʻi ke toe vakaiʻi pea tuku ha taimi ʻi hoʻomou fakataha hokó ke vahevahe ai ʻe he kau akó ʻa e meʻa naʻa nau ʻiló. Mahalo te ke fie vahevahe mo e kau akó ʻa e founga ʻoku faitokonia ai ʻe he fakaʻaongaʻi ʻo e taukei ko ʻení ʻenau ako e folofolá.