Ko Hono Kumi ha Ngaahi Sīpinga ʻi he Folofolá

Lau ʻa e lea ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e sīpingá ko ha palani, fakatātā pe tuʻunga ʻe lava ke tau fakaʻaongaʻi ke tau toutou fakahoko ʻaki ha meʻa. (David A. Bednar, “Ko ha Tānakiʻanga ʻo e Vai Moʻuí” [faeasaiti ʻa e Potungāue Ako ʻa e Siasí maʻá e kakai lalahi kei talavoú, 4 Fēpueli, 2007], 4, broadcasts.ChurchofJesusChrist.org; vakai foki, Fakahinohino ki he Ngaahi Folofolá, “Sīpinga,” scriptures.ChurchofJesusChrist.org)

Fakamahinoʻi ange ʻoku tau faʻa ʻilo ha ngaahi sīpinga ʻi he folofolá ʻi haʻatau tokanga ki ha ngaahi foʻi lea, ngaahi kupuʻi lea, pe ngaahi fakakaukau ʻoku toutou fakaʻaongaʻi. Ko e taimi ʻoku tau ʻilo mo fakaʻaongaʻi ai ʻa e ngaahi sīpingá, ʻe lava ke mahino lelei ange ai kiate kitautolu ʻa e founga ngāue ʻa e ʻEikí mo e founga ke muimui ai kiate Iá.

Fakatokangaʻi ange: ʻE ala ʻaonga ke aleaʻi fakataha ʻa e taukei ko ʻení mo e taukei “Ko e Kumi ʻo e Ngaahi Fehokotaki ʻi he Folofolá.”

Fakaʻaliʻali ʻa e ngaahi potufolofola ko ʻení, pea fakahinohino ange ʻa e ngaahi foʻi lea ʻoku mataʻitohi fakahihifí ke fakatātaaʻi ha sīpinga ki he founga naʻe tali ʻaki ʻe he ʻEikí ha ngaahi fehuʻi ʻa ha kau faifekau fekauʻaki mo e fakaikiiki ʻo ʻenau fonongá. Te ke lava foki ʻo vahevahe ʻa e fakakaukau ʻi lalo meia ʻEletā Petinaá ke tokoni ke mahino ki he kau akó ʻa e founga ʻe ala tokoni ai ʻa e ngaahi sīpingá ʻi hono kumi ʻa e ngaahi moʻoni mahuʻingá ʻi he folofolá.

(Fakatokangaʻi ange: ʻOku fakafofongaʻi ʻe he sīpinga ʻoku fakatātaaʻi atu hení ʻa e founga pē ʻe taha kuo tali ai ʻe he ʻEikí ha ngaahi fehuʻi fekauʻaki mo e ngaahi fakaikiiki ʻo hono ʻunuki ʻEne ngāué ki muʻá. ʻI he ngaahi taimi kehé, kuó Ne fakahoko ai ha fakahinohino mātuʻaki mahino mo pau [vakai, Tokāteline mo e Ngaahi Fuakava 95:13–16; 136:10–18]).

Tokāteline mo e Ngaahi Fuakava 60:5

• “Ka, ko e moʻoni, te u lea kiate kimoutolu ʻo kau ki hoʻomou fononga ki he fonua naʻa mou haʻu mei aí. Tuku ke foʻu ha vaka, pe fakatau mai, ʻo fakatatau mo e meʻa ʻe hā ngali lelei kiate kimoutolú, ʻoku tatau ai pē kiate au, pea fai fakatoʻotoʻo ʻa hoʻomou fononga ki he potu ʻa ia ʻoku ui ko Sā Luisí.”

Tokāteline mo e Ngaahi Fuakava 61:22

• Pea ʻoku tatau ai pē kiate au, pe te nau ʻalu ʻi he vaitafé pe ʻi ʻuta, hili ha taimi siʻi, ʻo kapau te nau lava ʻa ʻenau ngāue kuo tuʻutuʻuní; tuku ke fai ʻeni ʻo hangē ko e meʻa ʻe fakahā kiate kinautolú ʻo fakatatau ki heʻenau ngaahi fakakaukau lelei taha ʻamuí.”

Tokāteline mo e Ngaahi Fuakava 62:5

• “Pea te mou toki lava ke mou foki mai ke fakamoʻoni, ʻio, ʻa kimoutolu hono kotoa, pe tautau toko ua, ʻo fakatatau ki he meʻa ʻe hā ngali lelei kiate kimoutolú, ʻoku tatau ai pē kiate au; kae tui faivelenga pē, pea fakahā ʻa e ongoongo fakafiefiá ki he kakai ʻo e māmaní, pe ʻi he lotolotonga ʻo e ngaahi haʻofanga ʻo e kau fai angahalá.”

Tokāteline mo e Ngaahi Fuakava 63:40

• “Pea tuku ke ʻohake ʻa e ngaahi paʻanga kotoa pē ʻe lava ke maʻú, ʻoku tatau ai pē kiate au pe ʻe siʻisiʻi ia pe lahi, ke ʻoatu ki he fonua ko Saioné, kiate kinautolu kuó u tuʻutuʻuni ke tali ʻa e paʻangá.”

Naʻe vahevahe ʻe ʻEletā Petinā ʻa e fakakaukau ko ʻení fekauʻaki mo e sīpinga ko ʻeni ʻi he Tokāteline mo e Ngaahi Fuakava 60–63:

Mahalo ʻe hā ngali fakaofo ʻi he kamataʻangá e tali ʻa e ʻEikí “ʻoku tatau ai pē kiate aú.” Ka ʻoku mahino, naʻe ʻikai fakahā ʻe he Fakamoʻuí ki he kau faifekaú ni ʻoku ʻikai tokanga ia pe ko e hā ʻenau meʻa ʻe faí. Ka naʻá Ne fakamamafaʻi ange ʻa e mahuʻinga ke fakamuʻomuʻa ʻa e meʻa ʻoku muʻomuʻá pea mo tukutaha ʻenau tokangá he meʻa ʻoku totonú. … Naʻe fiemaʻu ke nau fakahaaʻi ʻenau tuí, fakaʻaongaʻi ʻenau fakakaukau leleí pea ngāue ʻo fakatatau mo e fakahinohino ʻa e Laumālié. … Ko e meʻa mahuʻingá ʻa e ngāue naʻe ui ke nau fakahokó; naʻe fiemaʻu pē ʻa e founga ia ke nau aʻu ʻaki ki aí ka naʻe ʻikai mahuʻinga ia. (David A. Bednar, “Ko Ha Tānakiʻanga ʻo e Vai MoʻuíFaeasaiti ʻa e Potungāue Ako ʻa e Siasí maʻá e kakai lalahi kei talavoú, ʻaho 4 Fēpueli 2007], 4, broadcasts.ChurchofJesusChrist.org)

Fakaafeʻi ʻa e kau akó ke nau ako ha potufolofola mei he folofola ke laukonga he uike ní, ʻo kumi e ngaahi sīpingá. Pe ko haʻo fili mei he ngaahi potufolofola ko ʻení. ʻE lava ke lekooti ʻe he kau akó ha ʻilo ʻoku nau maʻu ʻaki haʻanau fakakaukau ki ha sīpinga ʻoku nau ʻilo ʻi he folofolá. Te ke ala fakaafeʻi ha niʻihi tokosiʻi ʻo e kau akó ke nau vahevahe mo e kalasí ha sīpinga naʻa nau ʻilo pea mo ha fakakaukau naʻa nau maʻu.

Ngaahi potufolofola lahi ange ke fakaangaangá:

• 2 Ngaahi Tuʻi 2:1–6 (ʻOku ʻomai ʻe he kupuʻi lea ʻoku toutou fakaʻaongaʻi “ʻe ʻikai te u mahuʻí” ha sīpinga ʻo e muimui ki he kau palōfita ʻa e ʻEikí.)

• Mātiu 4:4, 7, 10 (ʻOku ʻomai ʻe he toutou fakamatala ʻa e Fakamoʻuí ki he folofolá mo e kupuʻi lea “Kuo tohí” ha sīpinga ki hono tekeʻi ʻo e ʻahiʻahí ʻaki ʻa e falala ki he folofolá.)

• ʻAlamā 32:27–43 (ʻOku ʻomai ʻe ʻAlamā ha sīpinga ki hono tanumaki ʻo e tuí.)

• Tokāteline mo e Ngaahi Fuakava 50:13–29 (ʻOku ʻomai ʻe he ʻEikí ha sīpinga ke fakaʻehiʻehi mei he kākaá.)

Poupouʻi ʻa e kau akó ke nau kumi ha ngaahi sīpinga ʻi he folofolá ʻi he lolotonga ʻenau ako fakatāutahá. Kole ange ke nau ōmai mateuteu ki he kalasi hokó, ke vahevahe ʻa e ngaahi sīpinga naʻa nau maʻu ʻi he folofolá. Manatuʻi ke toe vakaiʻi pea tuku ha taimi ʻi hoʻomou fakataha hokó ke vahevahe ai ʻe he kau akó ʻa e meʻa naʻa nau ʻiló. Mahalo te ke fie aleaʻi mo kinautolu ʻa e founga naʻe fakatupulaki ai ʻe he fakaʻaongaʻi ʻo e taukei ko ʻení ʻa ʻenau ako e folofolá. Kumi ha ngaahi faingamālie he lolotonga ʻa e kalasí ke fakamanatu mo hokohoko atu hono fakaangaanga ʻa e taukei ko ʻení.