Ngaahi Fakakaukau ki he ʻUluaki ʻAho ʻo e Kalasí

Te ke lava ʻo fakaʻaliʻali ʻa e ʻū fakatātā ko ʻeni ʻo e Fakamoʻuí (pe ʻū fakatātā tatau mo ia) pea fakaafeʻi e kau akó ke nau vahevahe pe naʻe mei fēfē nai Haʻane akoʻi kitautolu.

Fakaafeʻi e kau akó ke nau lau ʻa e Sione 13:34–35 mo e 2 Nīfai 26:33, ʻo kumi e ngaahi moʻoni ʻe lava ʻo tokoni ki he kalasí ke nau fokotuʻu ha ʻātakai ako faka-Kalaisi. Ke tokoni ke fakamālohia e mahino ʻa e kau akó, te ke lava ʻo ʻeke:

• Ko e hā ha ngaahi faingataʻa ʻe ala fehangahangai mo ha taha ʻi heʻene fuofua haʻu ki he ʻinisititiutí? Ko e hā ha meʻa kuó ne tokoniʻi lahi taha koe ke ke ongoʻi ʻoku talitali lelei koe ʻi he ʻinisititiutí?

• Ko e hā nai e finangalo ʻo e Fakamoʻuí ki he founga ʻetau fakafeangai kiate kinautolu ʻoku loto ke nau kau mai ki heʻetau kalasí? (ʻE lava ke ʻiloʻi ʻe he kau akó ha tefitoʻi moʻoni hangē ko ʻení: ʻOku totonu ke tau talitali lelei kotoa ʻa kinautolu ʻoku haʻu ki he kalasí pea ʻofaʻi kinautolu ʻo hangē ko e ʻofa ʻa e Fakamoʻuí ʻiate kitautolú.)

• Ko hai ʻe finangalo ʻa e Fakamoʻuí ke ke fakaafeʻi ke kau ki he kalasi ko ʻení? (ʻE lava ke text pe pōpoaki ʻa e kau akó ki ha taha lolotonga ʻenau ʻi he kalasí pe fakakaukau ki he founga te nau aʻu atu ai kiate kinautolu kimuʻa ʻi he kalasi hokó.)

Mahalo ʻe ʻaonga ki he tokotaha ako takitaha ke fakalaulauloto mo lekooti ha ngāue pau te nau fai ke tokoni ʻi hono fokotuʻu ha ʻātakai ʻo e fakaʻapaʻapá, kau atú, mo e ʻofa faka-Kalaisí. Te mou lava foki ʻo aleaʻi fakakalasi ʻa e meʻa te mou lava ʻo fai ke fakatupulaki ai ha aʻusia māfana mo talitali lelei maʻá e kau ako kotoa pē.

Foki ki he “Ngaahi ʻEkitivitī Ako ke Fili Mei Aí.”

Te ke lava ʻo fakaafeʻi ha ongo tamaiki ako ke na lau ʻa e fetalanoaʻaki ko ʻení:

• Te ke fakamatalaʻi fēfē ʻa e founga ako ʻa Maliá?

Fakaafeʻi e kau akó ke nau lau ʻa e Mātiu 7:7–8, pea aleaʻi ʻa e founga ʻe lava ke tokoni ai hono fakaʻaongaʻi e folofola ʻa e Fakamoʻuí ke fakaleleiʻi ʻe Malia ʻene aʻusia ʻi he ʻinisititiutí. Te ke lava ke ʻeke ange:

• ʻOku founga fēfē ʻetau kole, kumi, mo tukitukí? ʻOku hoko fēfē ʻa e kolé, fekumí, mo e tukitukí ko hano fakahaaʻi ia ʻo e tuí?

• ʻE lava fēfē ke tāpuekina kitautolu ʻi heʻetau fekumi ke ako ʻi he tuí? (ʻE lava ke ʻiloʻi ʻe he kau akó ha moʻoni hangē ko ʻení: Te tau lava ʻo maʻu ha fakahā ʻi heʻetau ngāue ʻi he tuí ʻaki ʻetau kole , kumi, mo tukituki.)

• Kuo tokoniʻi fēfē koe ʻe hoʻo feinga ke ke fatongia ʻaki hoʻo akó ke ke maʻu ha fakahā fakatāutahá? (Poupouʻi e kau akó ke nau vahevahe ha ngaahi sīpinga, pe ko hono vahevahe haʻo sīpinga pē ʻaʻau.)

Mou lau fakataha ʻa e lea ko ʻeni meia ʻEletā Tēvita A. Petinā:

ʻOku fakaʻatā ʻe ha tokotaha ʻokú ne fakaʻaongaʻi ʻa e tauʻatāina ke filí mo ngāue ʻo fakatatau mo e ngaahi tefitoʻi moʻoni totonú, ʻa hono lotó ki he Laumālie Māʻoniʻoní—pea fakaafeʻi ai ʻa Hono mālohi ke akoʻí, mālohi fakamoʻoní, mo e fakapapauʻi ʻo e fakamoʻoní. ʻOku fie maʻu ki he ako ʻi he tuí ha ivi fakalaumālie, fakaʻatamai, pea mo fakatuʻasino kae ʻikai ko e fanongo ʻataʻatā pē taʻefai ha meʻa. ʻI heʻetau ngāue fakamātoato mo tuʻu ʻaliʻaliaki ʻi he tuí, ʻoku tau fakahaaʻi ai ki heʻetau Tamai Hēvaní mo Hono ʻAlo ko Sīsū Kalaisí ʻa ʻetau loto fie ako mo fie tali ʻa e fakahinohino mei he Laumālie Māʻoniʻoní. (“Ko e Ako ʻi he Founga ʻa e ʻEikí,” Liahona, ʻOkatopa 2018, 52)

Fakaafeʻi e kau akó ke nau hiki ha ngaahi ngāue ʻe niʻihi ʻoku ueʻi ʻe he tuí te nau fie fakahoko lolotonga e kalasi ko ʻení ke fakahaaʻi ki he ʻEikí ʻa ʻenau loto ke ako meiate Iá. (Te ke lava ʻo fokotuʻu ange ke lekooti ʻe he kau akó ʻenau ngaahi fakakaukaú ʻi heʻenau telefoní pe ʻi ha kiʻi tohi.)

ʻOange ki he kau akó ha ngaahi miniti siʻi ke fokotuʻu haʻanau ngaahi taumuʻa ako ki he kalasi ko ʻení ʻo fakatefito ʻi he meʻa ne nau fakakaukau mo ongoʻi lolotonga e kalasí. Te ke lava ʻo fakaafeʻi ha niʻihi ʻo e kau akó ke nau vahevahe ʻa e meʻa te nau fai ke tokoni ke fakatupu ha ngaahi fakakaukau ʻo e ngaahi faʻahinga kehekehe ʻo e taumuʻá. Poupouʻi e kau akó ke nau fokotuʻu ha palani ke lavaʻi ai ʻenau ngaahi taumuʻá. Fakakaukauʻi e founga te ke lava ʻo tokoniʻi ai e kau akó ke nau toe vakaiʻi ʻenau ngaahi taumuʻá ʻi he lolotonga ʻa e kalasí.

Foki ki he “Ngaahi ʻEkitivitī Ako ke Fili Mei Aí.”

Fakatokangaʻi ange: Te ke lava ʻo fakaʻaongaʻi ʻa e fokotuʻu ko ʻeni ki hono akoʻí kapau ʻokú ke kamata ako ʻa e Ngaahi Kosipelí. Kapau ʻoku teu ke ke kamata ako ʻa e Tohi ʻa Ngāué ʻo aʻu ki he Fakahaá, fakakaukau ke fakaʻaongaʻi e fokotuʻu hono hoko ki hono akoʻí (vakai, “ʻOku Hoko Atu e Ngāue ʻa e Kau Ākonga ʻa e Fakamoʻuí: Ngāue ʻo aʻu ki he Fakahaá”).

Fakaafeʻi ha niʻihi ʻo e kau akó ke nau vahevahe ha ongoongo fakafiefia naʻa nau toki maʻu.

Kumi fakataha ʻa e “Ngaahi Kosipelí” ʻi he Fakahinohino ki he Ngaahi Folofolá (Gospel Library), pea aleaʻi pe ko e hā ʻa e Ngaahi Kosipelí pea mo e meʻa ʻoku ʻi aí. Te ke lava ke ʻeke ange:

• Ko e hā leva ʻa e ongoongo fakafiefia ʻo e ongoongoleleí? (Tokoni ke ʻiloʻi ʻe he kau akó ha moʻoni tatau mo e meʻá ni mei he meʻa naʻa nau laú: Ko e ongoongo fakafiefia ʻo e ongoongoleleí ko hono hanga ʻe Sīsū Kalaisi ʻo fakahoko ha fakalelei te ne huhuʻi ʻa e kakai kotoa pē mei he maté mo fakapaleʻi ʻa e niʻihi fakafoʻituitui takitaha ʻo fakatatau ki heʻenau ngāué.)

• Ko e hā e ʻuhinga ʻoku ʻikai hoko ai e pōpoaki ko ʻeni fekauʻaki mo e Fakamoʻuí ko ha ongoongo fakafiefia pē ka ko e ongoongo lelei tahá ia?

Te mou lava ʻo mamata ʻi he “The Good News” (2:18) pea aleaʻi ʻa e pōpoaki ʻokú ne vahevahé.

2:18

Ke tokoniʻi e kau akó ke nau ako fekauʻaki mo e fakakaukau makehe ʻa e tokotaha naʻá ne hiki ʻa e Kosipeli takitaha, te ke lava ʻo fai ʻa e ʻekitivitī ko ʻení:

Fakaʻaliʻali ʻa e ngaahi fehuʻi ko ʻení, pea fakaafeʻi e kau akó ke nau fakaʻaongaʻi ʻa e Scripture Helps: New Testament [Ngaahi Tokoni Fakafolofolá: Fuakava Foʻoú] ke tali ʻaki ʻa e ngaahi fehuʻí ʻi heʻene fekauʻaki mo e tokotaha tohi ʻo e Kosipelí naʻa nau filí:

• Ko e hā ʻa e puipuituʻa ʻo e tokotaha ko ʻeni naʻá ne hiki ʻa e Kosipelí?

• Ko hai naʻe fakataumuʻa ki ai ʻene tohí?

• Naʻe tākiekina fēfē ʻe heʻene kau fanongó ʻene fakamatala ki he moʻui ʻa e Fakamoʻuí?

• ʻE lava fēfē ke tāpuekina kitautolu ʻi heʻetau ako e fakamatala ko ʻeni ki he moʻui ʻa e Fakamoʻuí?

Hili hono ʻoange ha taimi feʻunga ke nau ako aí, fakaafeʻi ʻa e kulupu takitaha ke nau vahevahe ʻa e meʻa naʻa nau akó. Pea aleaʻi fakakalasi ʻa e founga ʻe lava ai ʻe he fakakaukau ʻa e tokotaha naʻá ne hiki tohi ʻa e Kosipeli takitaha ʻo ʻomi ha mahino lahi ange kiate kitautolu ʻo kau ki he moʻui mo e misiona ʻo Sīsū Kalaisí.

Fakakaukau ke fakaafeʻi e kau akó ke nau fakaava ʻa e “Harmony of the Gospels” ʻi he Study Helps ʻi he Gospel Library pea vakai ki hono fakahokohokó. Aleaʻi e founga ʻe lava ke tokoniʻi ai kitautolu ʻe he maʻuʻanga tokoni ko ʻení ʻi heʻetau ako e moʻui ʻa e Fakamoʻuí. (Fakatokangaʻi ange: Kapau ʻe tokoni, vahevahe mo e kau akó “ʻi he ʻilo ʻoku maʻu he taimi ní, ʻoku ʻikai malava ke maʻu ha faaitaha haohaoa ʻo e Faaʻi Kosipelí koeʻuhí he ʻoku ʻikai ke loto-taha maʻu pē ʻa e kau faʻutohi ʻo e Kosipelí ki he fakahokohoko ʻo e taimi ne hoko ai e ngaahi meʻá” [Bible Dictionary, “Gospels”]).

Ke fakaʻosi e kalasí, ʻoange ha taimi ki he kau akó ke nau fakalaulauloto pe vahevahe ʻa e meʻa ʻoku nau ʻamanaki ke ako ʻi heʻenau feinga ke ofi ange ki he Fakamoʻuí ʻaki haʻanau ako ʻa e Ngaahi Kosipelí.

Foki ki he “Ngaahi ʻEkitivitī Ako ke Fili Mei Aí.”

Ke tokoni ki hono fakafehokotaki ʻo e Ngaahi Kosipelí mo e Tohi ʻa Ngāué ʻo aʻu ki he Fakahaá, te ke lava ʻo fakaʻaliʻali ha ʻū fakatātā kehekehe ʻo e ngāue fakafaifekau ʻa e Fakamoʻuí ʻi he māmaní, ko ʻEne pekiá, Toetuʻú, mo e Hāʻele Hake ki he langí pea aleaʻi ʻa e meʻa ʻoku nau fakatātaaʻí. Te ke lava leva ʻo ʻeke ange:

• Naʻe uesia fēfē ʻe he ngaahi akonaki, ngaahi mana, mo e Toetuʻu ʻa e Fakamoʻuí ʻa Hono kau muimuí?

Fakamatalaʻi ange ko e konga hono ua ʻo e Fuakava Foʻoú (Ngāue ʻo aʻu ki he Fakahaá) ko ha lekooti ia ʻo e meʻa naʻe fai ʻe he kau ākonga ʻa e Fakamoʻuí ke hokohoko atu ʻEne ngāué hili ʻEne pekiá mo e Toetuʻú. Fakaafeʻi e kau akó ke nau lau ʻa e Mātiu 28:19–20 mo e Ngāue 1:8, pea aleaʻi ʻa e meʻa naʻe ʻamanaki ʻe Sīsū Kalaisi [ke fakahoko] Heʻene kau tamaioʻeikí.

Te ke lava ʻo fakaʻaliʻali ʻa e fakatātā ko ʻení ke fakahaaʻi ʻa e meʻa naʻe fai ʻe he kau ʻAposetolo ʻa e ʻEikí ke ʻave ʻa e ongoongoleleí ki Siutea, Samēlia, pea ope atu ai.

Fakamatalaʻi ange ʻoku ʻomi ʻe he Ngāue 1:8 ha vakai fakalūkufua ki he tohi ʻa Ngāué pea mo e ʻū tohi ʻa e kau ʻAposetoló. ʻOku fakamatalaʻi ʻi he Ngāue 1–7ʻa e tupulaki ʻa e Siasí ʻi Selusalemá; ʻoku hā ʻi he Ngāue 8–9 ha ngaahi fakamatala ki he ngāue ʻa e kau ʻAposetoló ʻi Siutea mo Samēliá; pea ko e Ngāue 10–28, fakataha mo e ngaahi ʻipiselí mo e tohi ʻa Fakahaá, ʻoku felāveʻi ia mo e ngāue fakafaifekau ʻa e kau ʻAposetoló ki he kau Senitailé.

Fakamahinoʻi ange ko e kau ʻAposetolo ko Pita, Paula, mo Sioné ʻa e toko tolu naʻe lahi taha ʻenau tohi ʻa e konga hono ua ʻo e Fuakava Foʻoú. Te ke lava ʻo hiki ʻa e ngaahi fakamoʻoni fakafolofola ko ʻení ʻi he palakipoé pea fakaafeʻi e kau akó ke nau lau ia, ʻo kumi e founga naʻe fakamoʻoni ai ʻa e kau ʻAposetolo ko ʻení ki he Fakamoʻuí: Pita: Ngāue 2:22–24, 32–33, 36; Paula: 1 Kolinitō 15:3–8, 19–22; Sione: 1 Sione 1:7; 2:1–2; 3:5, 16.

• Ko e hā ha meʻa naʻá ke fakatokangaʻi fekauʻaki mo e ngaahi fakamoʻoni ko ʻení? ʻOkú ke pehē naʻe tākiekina fēfē ʻe he ngaahi fakamoʻoni ʻa e kau tangatá ni ʻa e founga ʻenau faitohí? (Mahalo te ke fie vahevahe mo e kau akó ha moʻoni ʻoku mei faitatau mo ʻení, ko ha konga ʻo hoʻomou fealeaʻakí: ʻOku ʻi he ngaahi tohi naʻe hiki ʻe he kau ʻAposetolo kimuʻá ʻa ʻenau ngaahi akonaki mo e fakamoʻoni kia Sīsū Kalaisí.)

• ʻE lava fēfē ke tākiekina kitautolu ʻi heʻetau laukongá ʻi heʻetau ʻiloʻi naʻe nofotaha e ngaahi tohi ʻa e kau tangatá ni ʻia Sīsū Kalaisí? Ko e hā ha meʻa te ke lava ʻo fai ke ke hoko ai ko ha tokotaha laukonga ʻoku fakatefito ʻia Kalaisi ʻi hoʻo ako ʻa e Fuakava Foʻoú?

Ke fakaʻosi e kalasí, ʻoange ha taimi ki he kau akó ke nau fakalaulauloto pe vahevahe e meʻa te nau fai ke ʻunu ke ofi ange ki he Fakamoʻuí ʻi heʻenau lau ʻa e tohi Ngāué ʻo aʻu ki he Fakahaá.

Foki ki he “Ngaahi ʻEkitivitī Ako ke Fili Mei Aí.”