Talateú

ʻOku ʻi he folofolá ʻa e fakakaukau mo e finangalo ʻo e ʻOtuá ʻo hangē ko hono fakahā ki Heʻene kau tamaioʻeikí. Ko e tefitoʻi pōpoaki ʻo e folofola kotoa pē ke fakamoʻoni kia Sīsū Kalaisi mo fakaafeʻi ʻa e kakai kotoa pē ke nau maʻu ʻa e fakamoʻuí ʻo fakafou ʻiate Ia.

Neongo ʻoku ʻi he folofolá ha moʻoni fakalangi, ka ko e taimi ʻe niʻihi ʻe lava ke fakapuliki ʻa e ngaahi moʻoni ko ʻení ʻe ha ngaahi liliu taʻemahino, ngaahi heliaki, fakalea faingataʻa, ngaahi faʻu ‘oku fakakuongamuʻa, pea mo ha ngaahi anga fakafonua ‘oku foʻou. ʻOku fakataumuʻa ʻa e maʻuʻanga tokoni ko ʻení ke tokoni ke mahino lelei ange ki he kau akó ʻa e folofolá. Te ne ʻoatu ʻa e ngaahi tokoni ko ʻení:

• Fakamatala puipuituʻa. Ngaahi ‘ilo fakahisitōlia, fakafonua, mo fakasiokālafi ʻoku nau ʻomi ha puipuituʻa ki he ngaahi talanoá, ngaahi akonakí, mo e tokāteline ʻo e ngaahi folofolá

• Ngaahi fakamatala ʻo e lea fakafonuá. Fakamahinoʻi ha ngaahi fakalea faingataʻa, ngaahi lea fakakuongamuʻa, mo ha ngaahi liliu ʻoku fakapuputuʻu

• Tokoni ʻi he ngaahi potufolofola faingataʻa pe puputuʻú. Ngaahi folofola ʻo e Fakafoki Mai ʻo e Ongoongoleleí, ngaahi lea ʻa e kau palōfita mo e kau ʻaposetolo ʻo onopōní, ngaahi ʻilo falalaʻanga ke tokoni ʻo fakamahino e ʻuhinga ʻo e ngaahi potufolofola faingataʻá

• Ngaahi leá mo e ngaahi fakamatalá. Ko ha konga “Ako Lahi Ange” mo ha ngaahi pōpoaki mei he kau taki ʻo e Siasí pea mo ha ngaahi fakamatala naʻe faʻu ʻe he Siasí ʻoku fekauʻaki mo e ngaahi talanoa mo e ngaahi akonaki ʻoku ʻi he ngaahi folofolá

• Mītiá. Ngaahi ʻīmisi mo e ngaahi vitiō ʻe lava ʻo tokoni ki he kau laukongá ke nau siloto mo mahino kiate kinautolu ʻa e feituʻú, ngaahi meʻá, fakataipé, mo e ngaahi talanoa ʻo e folofolá

Ko e maʻuʻanga tokoni ko ʻení ko ha meʻangāue ia ke tokoni ki he kau akó ke nau ʻiloʻi ʻa e moʻoní mo ako fekauʻaki mo e Fakamoʻuí ʻi heʻenau ako ʻa e folofolá. ʻOku fakataumuʻa ia ke tokoni ʻi he ako folofolá kae ʻikai fetongi ia.

ʻI hoʻo feinga ko ia ke mahino lelei ange ʻa e folofolá, manatuʻi ʻa e mahuʻinga ʻo hono toe ako ʻo e ngaahi meʻa ʻoku ʻakoʻi ʻe he kau palōfita mo e kau ʻaposetolo moʻui ʻa e Fakamoʻuí. ʻI hoʻo akó, feinga ke ke ʻilo ʻa e founga ʻoku fakaʻuhingaʻi, fakamatalaʻi, mo fakaʻaongaʻi ai ʻe he kau tamaioʻeiki ʻa e ʻEikí ʻa e folofolá (vakai, Ngaahi Taukei Ako Folofolá, “Ko Hono Fakaʻaongaʻi ʻo e Ngaahi Akonaki ʻa e Kau Taki ʻo e Siasí ke Mahino ʻa e Ngaahi Folofolá”).

Kamata hoʻo ako ʻo e folofolá ʻaki ha lotu. Kole e fakahinohino ʻa e Laumālie Māʻoniʻoní. ʻOku ʻikai ke lava ʻo liʻaki ia ʻi hoʻo kumi ki he moʻoní. ʻI he hoko ʻa e Laumālie Māʻoniʻoní ko e mēmipa ʻo e Toluʻi ʻOtuá, ʻokú Ne fakamoʻoniʻi ʻa e Tamaí mo e ʻAló, akoʻi ʻa e moʻoní, mo fakamāʻoniʻoniʻi kitautolu. ʻOkú Ne fakamanatu mai ha ngaahi meʻa, fai ha fakafiemālie, fakafonu kitautolu ʻaki ha ʻamanaki lelei, mo fakahā mai ʻa e founga ke fakaʻaongaʻi ai ʻa e meʻa ʻoku tau akó.