Ngāue 10–15

Fakaʻaliʻali e fakamatala ko ʻení: “ʻOku ʻikai pē ke u fetaulaki au mo kimoutolu ʻi he Siasí.”

• Ko e hā e ʻuhinga ʻe ala ongoʻi peheni ai ha taha?

Fakamatalaʻi ange ko e ʻekitivitī ako ko ʻení, ʻe ako ʻa e kau akó mei he aʻusia ʻa Koniliusi mo Pitá fekauʻaki mo e mahuʻinga ʻo hono tali mo poupouʻi ʻa kinautolu mei he ngaahi anga fakafonua mo e puipuituʻa kehé.

Tohiʻi e hingoa ko e Koniliusi ʻi he palakipoé. Fakaafeʻi e kau akó ke nau ako e meʻa kotoa te nau lavá fekauʻaki mo Koniliusí ʻaki hono lau e Ngāue 10:1–8 mo e “Ngāue 10:1–8. Ko e hā e meʻa naʻe mahuʻinga fekauʻaki mo e ului ʻa Koniliusi ki he tui faka-Kalisitiané?” ʻi he Ngaahi Tokoni Fakafolofolá: Fuakava Foʻoú.

• Ko e hā ha ngaahi ʻā vahevahe fakafonua ʻe ala fehangahangai mo Koniliusi ʻi heʻene feinga ke ului ki he tui faka-Kalisitiané?

Fakamatalaʻi ange naʻe maʻu ʻe Pita ha meʻa-hā-mai ke tokoni ʻi hono teuteu e hala ki he kau papi ului Senitailé hangē ko Koniliusí ke nau kau kakato ʻi he Siasi ʻo e Fakamoʻuí. Ke tokoni ke mahino ki he kau akó ʻa e mata meʻa-hā-mai ʻa Pitá, ʻoange kiate kinautolu ʻa e laʻipepa tufa “Ko e Mahino ʻa e Mata Meʻa-Hā-Mai ʻa Pitá.” ʻE lava ke ngāue ʻa e kau akó mo ha hoa pe ʻi ha fanga kiʻi kulupu.

Hili hono ʻoange ha taimi feʻunga ki he akó mo e fealēleaʻakí, fakaafeʻi e kau akó ke vahevahe e founga ne nau tali ʻaki e ngaahi fehuʻi ʻi he laʻipepa tufá. Fakapapauʻi ʻoku nau ʻiloʻi ha moʻoni hangē ko ʻení mei he Ngāue 10:34–35: Koeʻuhí ʻoku ʻikai ke filifilimānako ʻa e ʻOtuá ki he kakaí, ʻokú Ne foaki ʻa e fakamoʻuí ki he kotoa ʻo ʻEne fānaú. Ke tokoni ke fakaloloto ʻe he kau akó ʻa ʻenau mahino ki he moʻoni ko ʻení, fakakaukau ke fai e ngaahi fehuʻi ko ʻení:

• ʻOkú ke pehē ʻoku ʻuhinga ki he hā ʻa e ʻoku ʻikai filifilimānako ʻa e ʻOtuá ki he kakaí? (Te ke lava ʻo lau e 2 Nīfai 26:33.)

• Ko e hā ha ngaahi ʻulungaanga ʻo e Tamai Hēvaní mo Sīsū Kalaisi ʻoku fakatātaaʻi ʻe he moʻoni ko ʻení? ʻOku tākiekina fēfē ʻe he ngaahi ʻulungaanga ko ʻení hoʻo ongo kiate Kinauá?

• ʻE tākiekina fēfē ʻe hono ʻiloʻi e moʻoni ko ʻení ʻa e founga hoʻo fakafeangai kiate kinautolu mei he ngaahi anga fakafonua mo e puipuituʻa kehé?

Fakakaukau ke lau pea aleaʻi ʻa e lea ko ʻeni ʻa Palesiteni Tieta F. ʻUkitofa, ʻa ia naʻe hoko he taimi ko iá ko ha mēmipa ʻo e Kau Palesitenisī ʻUluakí:

Mahalo ʻe pehē ʻe ha niʻihi, “ʻOku ʻikai pē ke u fenāpasi au mo kimoutolu, kakai ʻi he Siasí.” …

Mahalo ʻe kehe ho tupuʻangá pe ko hoʻo tupu haké mei he meʻa ʻokú ke fakatokangaʻi ʻi ha Kāingalotu tokolahi ʻo e Ngaahi ʻAho Kimui Ní, ka ʻe ala hoko ia ko ha tāpuaki. Kāinga, kaungāmeʻa ʻofeina, ʻoku mau fie-maʻu homou ngaahi talēnití mo e ngaahi fakakaukau makehé. ʻOku hoko e kehekehe ʻo e kakai fakafoʻituituí mo e kakai he funga māmaní ko ha ivi ʻo e Siasí ni. (“Haʻu ʻo Kau mo Kimautolu,” Liahona, Nōvema 2013, 23)

Te ke lava ʻo ʻai ke vahevahe ʻe he kau akó ha ngaahi taimi naʻe talitali fiefia ai kinautolu pe ko ha taha mei ha anga fakafonua pe puipuituʻa kehe, ki he Siasi ʻo e ʻEikí.

Fakaʻaliʻali e fehuʻi ko ʻení, pea fakaafeʻi e kau akó ke nau fakalaulauloto mo lekooti ʻenau ngaahi fakakaukaú mo e ongó:

• Ko e hā te u lava ʻo fai ke u tali mo poupouʻi ange ai e kakai mei he ngaahi anga fakafonua mo e puipuituʻa kehé?

Kapau te ke pehē ʻe ala tokoni, ʻe lava ʻa e kalasí ʻo mamata ʻi he “Is There a Place for Me?” (3:59).

4:0

Foki ki he “Ngaahi ʻEkitivitī Ako ke Fili Mei Aí.”

Te ke lava foki ʻo kamata ʻaki hono vahevahe ʻa e fakamatala ko ʻeni ʻa Palesiteni Lāsolo M. Nalesoní:

“Koeʻuhí ʻoku kei hokohoko atu pē ʻa hono Fakafoki Mai ʻo e ongoongoleleí, ʻe kei hokohoko atu pē ʻa e liliu ʻi he tuʻutuʻuní.” (“The Love and Laws of God” [Brigham Young University devotional, Sept. 17, 2019], 4, speeches.byu.edu)

Ko ha konga ʻo e hokohoko atu hono Fakafoki Mai ʻo e ongoongoleleí, ʻoku faʻa fanongonongo ʻe he kau taki ʻo e Siasi ʻo e ʻEikí ha ngaahi liliu ʻi he Siasí. Faʻu fakakalasi ha ngaahi sīpinga kimuí ni ʻo e ngaahi liliu ko ʻení, hangē ko e ngaahi liliu ki he founga ngāue pe tuʻutuʻuni ʻa e Siasí.

• Ko e hā ʻe ala faingataʻaʻia ai ha kāingalotu ʻe niʻihi ʻi he taimi ʻoku hoko ai e ngaahi liliu ʻi he Siasí?

Fakamatalaʻi ange naʻe maʻu ʻe Pita ʻi he Ngāue 10, ha meʻa-hā-mai mei he ʻEikí naʻá ne teuteu ʻa e hala ki ha liliu lahi ʻi he Siasí ʻo fakafekauʻaki mo e kau Senitailé. Ke tokoni ke mahino ki he kau akó ʻa e founga naʻe hoko ai ʻa e liliú, ʻoange kiate kinautolu ʻa e laʻipepa tufa “ʻE Lava Nai ʻa e Kau Senitailé ʻo Hoko ko ha Konga ʻo e Siasi ʻo e Fakamoʻuí?” Kimuʻa pea kamata ʻa e kau akó ʻi he laʻipepa tufá, te ke lava ʻo toe vakaiʻi nounou ʻa e taukei ko e “Ko e Mahino ʻa e Folofolá ʻi hono Puipuituʻá” ʻi he Ngaahi Taukei Ako Folofolá.

Hili hono maʻu ʻe he ngaahi kulupú ha taimi ke aleaʻi ai ʻa e founga naʻe hoko ai ʻa e liliú, fakakaukau ke fai ange ʻa e ngaahi fehuʻi ko ʻení:

• Ko e hā e moʻoni naʻe fakahā ʻe he ʻEikí kia Pitá naʻá ne teuteuʻi e hala ki ha liliu fekauʻaki mo e kau Senitailé? (Mahalo te ke fie fakamamafaʻi ʻa e Ngāue 10:34–35.)

• Ko e hā ʻoku akoʻi mai ʻe he fakamatala ko ʻení fekauʻaki mo e founga ʻoku tataki ʻaki ʻe he ʻEikí ʻa Hono Siasí? (ʻE ala ʻiloʻi ʻe he kau akó ha moʻoni hangē ko ʻení: ʻOku tataki ʻe Sīsū Kalaisi Hono Siasí ʻi he fakahā ʻo fakafou ʻi he kau palōfita moʻuí.)

• Ko e hā ʻoku mahuʻinga ai ke tau takitaha maʻu ʻetau fakamoʻoni ʻoku tataki ʻa e Siasi ʻo e Fakamoʻuí ʻi he hokohoko atu ʻa e fakahaá? (Te ke lava ʻo fakaafeʻi e kau akó ke vahevahe ha ngaahi aʻusia fakataautaha ʻo e founga kuo nau falala ai ʻoku tataki ʻa e Siasi ʻo Sīsū Kalaisí ʻi he fakahā.)

Fakamahinoʻi ange ne aʻu ki he hili hono maʻu ʻe Pita ʻa e fakahā ne fakahinohinoʻi ai ia ke ne tali e kau Senitailé ki he Siasí, naʻe kei faingataʻa pē ki ha kau mēmipa ʻe niʻihi ke nau tali e liliu ko ʻení (vakai, Ngāue 15:1–5). Naʻe fakahoko ha fakataha alēlea ʻi he Siasí ke talanoaʻi ai e ngaahi hohaʻa ko ʻení (vakai, Ngāue 15:6–31). Neongo ne ʻosi ʻomai ha toe fakamahino lahi ange, ka naʻe kei fakafepakiʻi pē ʻe ha kau mēmipa ʻe niʻihi ʻa e liliu ko ʻení (vakai, Kalētia 5:2–10; 6:13).

Fakaafeʻi e kau akó ke nau fili ha akonaki, founga ngāue, pe tuʻutuʻuni ʻa e Siasí ʻoku nau fefaʻuhi mo ia pe ko ha taha ʻoku nau ʻiloʻi. Hili iá pea ʻoange ki he kau akó ʻa e laʻipepa tufá mo fakaafeʻi kinautolu ke nau fakakaukau ki he founga ʻe lava ke fakaʻaongaʻi ai ʻa e ngaahi sitepu ʻi he laʻipepa tufa ko ʻení ki he tūkunga ʻoku nau fakakaukau ki aí.

Foki ki he “Ngaahi ʻEkitivitī Ako ke Fili Mei Aí.”

Fakaafeʻi e kau akó ke vahevahe ha ngaahi sīpinga ʻo e founga ne nau aʻusia ai pe ko ha taha ʻoku nau ʻiloʻi ʻa e fakafepakí lolotonga ʻenau feinga ke vahevahe ʻa e ongoongoleleí. Te ke lava leva ʻo tohi e moʻoni ko ʻení ʻi he palakipoé: ʻI heʻetau fakaʻaongaʻi e tui kia Sīsū Kalaisí, te tau maʻu e mālohi ke fakahoko ʻEne ngāué.

Hiki ʻa e ngaahi potufolofola ko ʻení ʻi he palakipoé. Fakaafeʻi e kau akó ke fili ha potufolofola ʻe taha pea lau ia, ʻo kumi e meʻa ko ʻeni fekauʻaki mo e kakai ʻi he talanoá: (1) ko e fakafepaki ne nau aʻusiá, (2) founga ne nau fakaʻaongaʻi ai e tui kia Sīsū Kalaisí, mo e (3) founga naʻe fakamālohia ai kinautolu ʻe he Fakamoʻuí.

• Ko e tuku pōpula ʻa Pitá: Ngāue 12:1–11

• Ko e fehangahangai ʻa Paula mo Pānepasa mo ha tokotaha fie maná: Ngāue 13:1–13

• Ko e fakaʻau ke loto-toʻa ʻa Paula mo Pānepasá: Ngāue 13:42–52

• ʻOku fakatupu ʻe he kau Siu taʻetuí ʻa e fakafepakí: Ngāue 14:1–7

• Ko e tolomakaʻi ʻa Paula ʻe ha kau Siu ʻe niʻihi mei ʻAniteoke mo ʻIkoniume: Ngāue 14:19–28

Hili hono ʻoange ha taimi feʻunga ke ako ai ʻe he kau akó ʻenau potufolofola kuo filí, fakaafeʻi ke nau faʻu ha fanga kiʻi kulupu iiki mo kinautolu ne nau ako ha potufolofola kehe pea vahevahe e meʻa ne nau akó.

Fakakaukau ke lau fakataha ʻa e fakamatala ko ʻeni ʻa Palesiteni Sefilī R. Hōlaní pe mamata ʻi he “Defend Your Beliefs” (0:57):

0:57

ʻAi ke mou toʻa. Moʻui faivelenga ʻaki ʻa e ongoongoleleí neongo ʻoku ʻikai pehē ʻa e niʻihi ʻoku mou feohí. Taukaveʻi hoʻomou tuí ʻaki ʻa e fakaʻapaʻapa mo e angaʻofa, ka ke mou taukaveʻi kinautolu. … Ka ʻi hoʻo hoko atu loto-toʻa ʻi he hala peheé, te ke maʻu ha tui taʻe-ueʻia, te ke malu mei he ngaahi matangi koví, pea naʻa mo e kafukafu ʻi he ʻahiohió, mo ke ongoʻi ʻa e ivi ʻo hotau Huhuʻí ʻoku hangē ko e maká, ʻa ia kapau te ke langa ai ʻa e tuʻunga fakaākonga mateaki, he ʻikai lava ke ke hinga. (“Ko e Mahuʻinga—mo e Tāpuaki—ʻo e Tuʻunga Faka-ākongá,” Liahona, Mē 2014, 9)

ʻE lava ke vahevahe ʻe he kau akó ha ngaahi sīpinga ʻo e founga kuo tokoniʻi ai kinautolu ʻe he Fakamoʻuí pe ko ha taha ʻoku nau ʻiloʻi ke taukaveʻi ʻenau tuí ʻi he loto-toʻa mo e manavaʻofa. ʻE lava ke hoko ʻeni ko ha ngaahi aʻusia ne nau maʻu ʻi he mītia fakasōsialé, ʻi heʻenau hoko ko ha faifekaú, pe fengāueʻaki mata ki he mata mo e kaungā-ngāué, kaungāmeʻá, pe fāmilí.

Fakaafeʻi e kau akó ke nau fakalaulauloto mo lekooti e founga te nau lava ai ʻo ngāue ʻaki ha tui lahi ange ki he Fakamoʻuí ʻi he taimi ʻoku nau fehangahangai ai mo e fakafepakí.

Foki ki he “Ngaahi ʻEkitivitī Ako ke Fili Mei Aí.”