Efeso

Valaaulia tagata a’oga e mafaufau i ni taimi na latou lagona ai po o se tasi latou te iloa e pei e le’i fetaui i latou i le lotu.

• O le a se fautuaga e te tuuina atu i se tasi e lagona faapenei?

Faailoa atu faapea i lana tusi i le au Efeso, na matauina ai e Paulo o nisi tagata o le Ekalesia sa lagonaina e pei o i latou o ni “tagata ese po o e ua aumau” i totonu o le Au Paia Iutaia (Efeso 2:19). Atonu o nei tagata o le Ekalesia o ni Au Paia o Nuuese o e sa le’i lagonaina e fetaui lelei i latou ona o o latou taimi ua tuanai (tagai Efeso 2:1–3).

Valaaulia tagata aoga e galulue ma se paga po o vaega toalaiti. Tuu atu ia i latou e faitau le Efeso 2:11–22, ma vaavaai mo upumoni na aoao mai e Paulo e mafai ona fesoasoani ia i tatou e faateleina ai lo tatou lagona o le aofia faatasi ma isi Au Paia.

• O le a sou manatu i le uiga o le avea ma “nuu faatasi” (Efeso 2:19) i le Ekalesia a le Alii?

• O a upumoni na aoao mai e Paulo e mafai ona fesoasoani e faateleina ai lou lagona o le aofia i le lotu? (E mafai ona faailoa mai e tagata a’oga upumoni e pei o nei: Ona o le Togiola a le Faaola, e mafai ai e tagata uma ona avea ma Au Paia i le aiga o le Atua. Tatou te avea ma ”nuu faatasi” faatasi ma le Au Paia pe a tatou fausia lo tatou faavae i aoaoga a aposetolo ma perofeta ma luga o Iesu Keriso, o le maa tulimanu sili.)

Afai e aoga, e mafai ona e faaali atu le ata lenei o se maatulimanu ma se faavae ma valaaulia tagata a’oga e faasoa mai mea latou te iloa e tāua e uiga i lenei talafaatusa.

Mafaufau e fai atu fesili nei:

• Aisea e te manatu ai tatou te oo i se lagona sili atu o le aofia pe a tatou mulimuli i aoaoga a aposetolo ma perofeta a le Alii?

• E mafai faapefea e le avea o Iesu Keriso ma maatulimanu o lou olaga ona aveesea ai papupuni ua vaaia i lou va ma isi tagata o le Ekalesia? (Afai e aoga, toe iloilo le “Efeso 2:20–21. O le a le taua o se maatulimanu?” i le Fesoasoaniga mo Tusitusiga Paia: Feagaiga Fou.)

E mafai ona e faaali atu ma faitau le saunoaga lenei a Elder Christophe G. Giraud-Carrier:

Ua ou iloa ai o le talalelei toefuataiina a Iesu Keriso o le malosiaga sili lea e faalaugatasia ai eseesega. Ao tatou opoina moni, … o i tatou, faapea foi ma isi, “e le toe tagata ese outou, po o e ua aumau, a ua nuu faatasi ma le au paia, o le aiga foi o le Atua” [Efeso 2:19].

Sa ou faalogo talu ai nei i le peresitene o le paranesi o se tasi o iunite o gagana faaleaganuu eseese o ta’ua le mea lenei, e pei ona sa faia e Elder Gerrit W. Gong, o le i ai i feagaiga. … E tatou te auai i se vaega o tagata o lo’o taumafai uma e tuu le Faaola ma a latou feagaiga i le totonugalemu o ō latou olaga ma ia ola fiafia i le talalelei. … O le faia o lena mea, e amata ai ona tatou tuuitiitia o tatou faailoga tagata faalenatura ma le faaitu’au i isi, lea e fesoasoani ai ia i latou e tuuitiitia foi lo latou faailoga tagata ma le faaitu’au mai ia i tatou, i se faataamilosaga ofoofogia tausimamalu. (“O i Tatou o Ana Fanau,” Liahona, Nov. 2023, 115–16)

• Na faapefea ona fesoasoani le tuuina o lau sootaga o le feagaiga ma le Tama Faalelagi ma Iesu Keriso i le totonugalemu o lou olaga ia te oe e aveese ai ou faailoga tagata po o faaituau i isi tagata o le Ekalesia?

Valaaulia tagata a’oga e mafaufau loloto i mea e mafai ona latou faia e atiinaa’e ai se lagona sili atu o le aofia mo i latou lava ma isi tagata o le ekalesia i a latou uarota.

Toe foi i le “Filifiliga o Gaoioiga e Aoao Ai.”

Valaaulia tagata a’oga e vaai faalemafaufau o loo latou i ai i se aufono a le uarota ma ua faaalia e le epikopo le popole ona o nisi o tagata o le uarota o loo faavaivai i lo latou auai i le ekalesia. O nisi e lagona e pei e le tele ni mea latou te maua mai lo latou auai i le Ekalesia; o nisi e manatu e le manaomia ona latou auai i le lotu ina ia faaleagaga; a’o isi e lagona e pei e sili atu ona faaalu o latou taimi e fai ai se isi mea i le Aso Sa.

I le taimi o le fonotaga, sa talosagaina oe e le epikopo e saunia se lesona o le Aoga Sa mo tagata o le uarota e uiga i faamanuiaga o le auai i le Ekalesia a le Faaola.

Faailoa atu na tusia e Paulo e uiga i le tāua o le Ekalesia a le Alii mo le Au Paia uma. Tuu atu i tagata a’oga le pepa e tufatufa atu ua faaulutalaina “Faamanuiaga o le Auai i le Ekalesia a le Faaola,” ma valaaulia i latou e saunia se otootoga o le lesona.

A uma ona tuu atu i tagata a’oga se taimi e galulue ai i a latou otootoga, fai atu ia i latou e feauaua’i i le faasoaina atu o a latou lesona e tolu i le lima minute ma se paga. E mafai ona e faaiuina lenei gaoioiga i le valaauliaina o nisi o tagata a’oga e faasoa mai mea na latou aoaoina mai lesona a le tasi ma le isi. E mafai foi ona e valaaulia tagata a’oga e faasoa atu a latou lesona i se tasi latou te iloa.

Toe foi i le “Filifiliga o Gaoioiga e Aoao Ai.”

E mafai ona e valaaulia nisi o tagata a’oga e faasoa mai se aafiaga lelei sa latou maua talu ai nei ma se tagata o le aiga. Ona valaaulia lea o tagata a’oga e mafaufau i se mafutaga latou te mananao e faaleleia.

Faailoa atu le tusi a Paulo i le au Efeso, sa ia faamamafa mai ai le auala e mafai ai e le faataitaiga a le Faaola ona taialaina i tatou i a tatou sootaga faaleaiga. Tuu atu i tagata a’oga e faitau le Efeso 5:21–33; 6:1–4, vaavaai mo mataupu faavae e mafai ona fesoasoani e faamalosia ai sootaga faaleaiga.

• O a mataupu faavae na aoao mai e Paulo e mafai ona faamalosia ai a outou sootaga faaleaiga? (E mafai ona faailoa mai e tagata a’oga upumoni e pei o upumoni nei: E tatau i ava ma tane ona alolofa le tasi i le isi e pei ona alofa le Faaola ia i tatou. E faamanuiaina i tatou e le Alii a o tatou faamamaluina o tatou matua. E ao i matua ona tausia a latou fanau i le faafailelega ma le apoapoaiga a le Alii.)

A o faasoa mai e tagata a’oga, e mafai ona e faaaogaina se tasi o manatu aoao atu nei e sili ona ogatasi ma lau talanoaga:

Ina ia faaiuina le gaoioiga, valaaulia tagata a’oga e mafaufau i sootaga faaleaiga latou te mananao e faaleleia. Valaaulia i latou e toe mafaufau i mea ua latou aoaoina mai le faataitaiga a le Faaola ma faailoa mai mea o le a latou faia e faaleleia ai a latou sootaga faaleaiga.

Manatua: Afai e faaalia e tagata a’oga le popole i le gagana na faaaoga e Paulo e faamatala ai le sootaga a se ava ma lana tane, e mafai ona outou faitau faatasi “Efeso 5:21–33. O le a le savali a Paulo e uiga i le gauai atu i le faaipoipoga?” i le Fesoasoaniga mo Tusitusiga Paia: Feagaiga Fou. E mafai foi ona e alu i le “Faaipoipoga” i Autu ma Fesili (Gospel Library) e sue ai aoaoga mai taitai o le Ekalesia i aso e gata ai e uiga i le laugatasia o alii ma tamaitai i faaipoipoga.

Toe foi i le “Filifiliga o Gaoioiga e Aoao Ai.”

E mafai ona e amata e ala i le faitauina o le saunoaga lenei a Elder Ulisses Soares:

O le a faaauau pea le taua o le lelei e tetee atu i le leaga i o tatou olaga atoa, talu ai o le faamoemoega o le fili o le faia o tagata uma ia pagatia e pei o ia lava. O le a taumafai Satani ma ana au e faafenumiai o tatou mafaufauga ma puleaina e ala i le faaosoosoina o i tatou ia agasala. Afai latou te mafaia, o le a latou faaleagaina tagata lelei uma. Ae ui i lea, e taua le malamalama e na o le pau le tulaga latou te maua ai le mana e pulea ai i tatou pe afai lea tatou te faatagaina. (“Ioe, E Mafai ma O Le a Tatou Manumalo!,” Liahona, Me 2015, 75)

• O a ni auala o loo taumafai Satani e faaosooso ai talavou matutua?

• O le a le savali o le faamoemoe na tuuina mai e Elder Soares?

Valaaulia tagata a’oga e faitau filemu le Efeso 6:10–18, ma vaavaai pe faapefea ona tatou maua le mana i luga o le fili.

• E tusa ai ma le faamatalaga a Paulo, e mafai faapefea ona e tatālia faatosinaga leaga o loo siomia ai tatou i o tatou aso? (E mafai ona faailoa mai e tagata a’oga se upumoni e pei o lenei: Afai tatou te ofuina le ofutau atoa o le Atua, o le a Ia puipuia i tatou mai le leaga.)

E faapefea e le ofuina o le ofutau o le Atua ona faaalia ai lou faatuatua ia Iesu Keriso?

• Aisea e te manatu e taua ai le ofu i le ofutau atoatoa o le Atua ae le na o sona vaega? (E mafai ona outou matamata faatasi “O Le Ofutau a le Atua” [2:06]).

2:6

Ina ia fesoasoani i tagata a’oga e faaloloto lo latou malamalama i le faatusa o le ofutau a le Atua, tuu atu ia i latou le pepa e tufatufa atu “Ofuina o le Ofutau a le Atua.” (Mo nisi suesuega faaopoopo, tagai i le “Malamalama i Faatusa i Tusitusiga Paia” i le Tomai mo le Suesueina o Tusitusiga Paia.) E mafai e tagata a’oga ona galulue taitoatasi, i paga, po o vaega toalaiti.

A uma ona maua se taimi e tagata a’oga e faamae’a ai le pepa tufatufa atu, valaaulia i latou e faasoa mai mea na latou aoaoina e uiga i le ofutau o le Atua. I le avea ai o se vaega o la outou talanoaga, mafaufau e fesili atu:

Na faapefea i le ofuina o le ofutau o le Atua ona puipuia oe mai le leaga?

Ina ia fesoasoani i tagata a’oga e faaaoga mea ua latou aoaoina, e mafai ona e faaali atu fesili nei ma valaaulia tagata a’oga e mafaufau loloto i ai. E mafai e tagata a’oga ona tusifaamaumau soo se uunaiga latou te maua.

• O fea o nei vaega o ofutau faaleagaga e te manatu e sili ona e faaaogaina?

• O le fea pito e aupito vaivai o lou ofutau?

• O le a se mea e mafai ona e faia e mautinoa ai lou ofuina o le ofutau atoatoa o le Atua i aso taitasi?

Toe foi i le “Filifiliga o Gaoioiga e Aoao Ai.”