Mataio 8; Mareko 2–4; Luka 7

Mafaufau e faaali atu le faamatalaga lenei: “Aua faauta, o A’u o le Atua; ma o A’u o se Atua o vavega” (2 Nifae 27:23). Ona faaali atu lea o faamatalaga nei ma valaaulia tagata aoga e fua mai pe o le a le moni o faamatalaga taitasi mo i latou e faaaoga ai se fuafaatatau mai le 1 i le 5 (1 = matua le ioeina; 5 = ioeina malosi).

• E mafai ona ou iloaina vavega na faia e le Faaola i lo’u olaga po o olaga o isi.

• Ou te talitonu e mafai e Iesu Keriso ma o le a Ia faia vavega i lo’u olaga.

Faamatala atu e faapea o le Mataio 8 o loo i ai ni tala o vavega a le Faaola. Vaevae tagata aoga i ni vaega taito’afa. Valaaulia tagata taitasi o le vaega e suesue se tasi o vavega nei ma ia saunia e talanoaina fesili o loo mulimuli mai.

(E mafai ona e fautuaina tagata aoga e faaaoga le tomai o le “Malamalama i Tusitusiga Paia i le Talaaga” i Tomai o Suesuega o Tusitusiga Paia e ala i le iloiloina o fuaiupu a o lei faia ma pe a uma a latou fuaitau filifilia. E mafai foi e tagata aoga ona toeiloilo vaega talafeagai i Scripture Helps: New Testament [Fesoasoaniga o Tusitusiga Paia: Feagaiga Fou].)

• Mataio 8:1–4

• Mataio 8:5–13

• Mataio 8:14–15

• Mataio 8:23–27

• O le a sou manatu na faapefea ona aafia tagata o loo i le tala na e faitauina i le vavega a le Faaola?

• O le a se mea e mafai ona tatou aoao ai e uiga i le Faaola mai lenei vavega?

• O le a sou manatu o le a le sāvali mo i tatou i lenei tala?

A uma ona tuuina atu se taimi mo suesuega faaletagata lava ia, valaaulia vaega e faaaoga fesili na muamua atu e faafaigofie ai se talanoaga e uiga i mea sa latou aoaoina mai nei tala.

Afai e aoga, e mafai ona e valaaulia nisi o tagata aoga e faasoa mai i le vasega mea e sili ona fiafia i ai pe faagaeetia ai i latou mai a latou talanoaga faavaega. A o latou faasoa mai, e mafai ona e tusia o latou manatu i luga o le laupapa. O ō latou malamalamaaga e ono aofia ai upumoni e pei o nei: E mafai e le Faaola ona faamamāina i tatou. O le faatuatua ia Iesu Keriso e valaaulia ai Lona mana faavavega i o tatou olaga. E mafai ona tatou maua le filemu e ala ia Iesu Keriso i taimi o afā o le olaga.

A o faasoa mai e le vasega o latou manatu, vaavaai mo avanoa e valaaulia ai i latou e faasoa mai o latou aafiaga ma molimau i le tosinaga ma le mana faavavega a le Faaola. Mafaufau pe aoga fesili nei e fesoasoani e faaloloto ai le talanoaga:

• Na faapefea ona e lagonaina le mana ma faatosinaga a le Faaola i lou olaga?

• O a ni mea ua aoaoina ai oe e nei aafiaga e uiga i le Faaola? Na faapefea ona latou faatosinaina lou faatuatua ia te Ia?

• O anafea na e maua ai le filemu e ala ia Iesu Keriso i taimi o afā o lou olaga?

Toe foi i le “Filifiliga o Gaoioiga e Aoao Ai.”

Mafaufau e faasoa atu le tulaga faataitai lenei:

Valaaulia nisi o tagata aoga e faasoa mai pe faapefea ona latou tali atu i le fesili a Emi. Ona faamatala atu lea o le Mareko 2:23–28; 3:1–6, ua tuuina mai ai e Iesu le taitaiga mo mea e talafeagai ona fai i le aso Sapati. Fesoasoani i tagata aoga ina ia malamalama pe aisea na faaosoina ai e amioga a le Faaola ma Ona soo i le Sapati le tele o fe’ese’eseaiga. O se tasi o auala e mafai ona e faia ai lenei mea o le faasoa atu lea o le “Mareko 2:23–28. Aisea na tetee ai le au tusiupu ma le au Faresaio i amioga a le au soo i le Sapati?” i le Scripture Helps: New Testament [Fesoasoaniga o Tusitusiga Paia: Feagaiga Fou].

Valaaulia le vasega e faitau le Mareko 2:23–28; Faaliliuga a Iosefa Samita, Mareko 2:26–27 (i le Mareko 2:28, vaefaamatalagaa); ma le Mareko 3:1–6. Ona valaaulia lea o i latou e faasoa mai mea na latou aoaoina mai le faataitaiga a le Faaola ma aoaoga e uiga i le aso Sapati.

A o faasoa mai e tagata aoga mea na latou mauaina, fesoasoani ia latou faailoa mai se upumoni e pei o lenei: O le Sapati o se aso e vivii atu ai i le Atua ma faia ai mea lelei.

• E mafai faapefea e le malamalama i lenei upumoni ona fesoasoani ia Emi e filifili ai po o le a le mea e tatau pe lē tatau ona ia faia i le aso Sapati?

• O a nisi o auala e mafai ona e mulimuli ai i le faataitaiga a le Faaola o le faia o mea lelei i le Sapati?

Ina ia fesoasoani i tagata aoga e filifili pe faapefea ona faaaoga o latou taimi i le aso Sapati, mafaufau e faasoa atu le saunoaga lenei a Peresitene Russell M. Nelson:

A o o’u laitiiti, sa ou suesue i lisi na faia e isi e faatatau i mea e fai ma mea e lē faia i le Sapati. O se taimi mulimuli ane sa ou iloa ai mai tusitusiga paia o la’u amio ma o’u uiga i le Sapati o le a avea ma se faailoga i le va o a’u ma lo’u Tama Faalelagi [tagai Esoto 31:13; Esekielu 20:12, 20]. Faatasi ai ma lena malamalamaaga, sa ou lē toe manaomia ni lisi o mea e faia ma mea e lē faia. Pe a manaomia ona ou faia se filifiliga pe o se gaoioiga talafeagai pe leai foi mo le Sapati, e na o lo’u fesili lava ia te a’u, “O le a le faailoga ou te manao e avatu i le Atua?” O lena fesili e matuā manino mai ai lava a’u filifiliga e uiga i le aso Sapati. …

… O le a se faailoga o le a e avatu i le Alii e faaalia ai lou alofa mo Ia? (“O Le Sapati o se Aso Fiafia,” Liahona, Me 2015, 130)

Ona mafai lea ona e fai i le vasega e mafaufau e uiga i se aso Sapati lea na latou viia ai le Atua (faamamaluina o Ia) pe faia ni mea lelei i isi. Valaaulia i latou e faasoa mai o latou aafiaga.

Valaaulia tagata aoga e iloilo lo latou lava tausiga o le Sapati ma mafaufau i ni auala e mafai ai ona lelei atili lo latou viia o le Atua ma faia mea lelei i lena aso. E mafai ona e valaaulia i latou e tusifaamaumau o latou manatu i se api talaaga.

Toe foi i le “Filifiliga o Gaoioiga e Aoao Ai.”

Ina ia amata lenei talanoaga, e mafai ona e faasoa atu le saunoaga lenei a Elder Joseph B. Wirthlin:

O soo moni o Iesu Keriso sa popole i taimi uma mo le toatasi. O Iesu Keriso o lo tatou faataitaiga sili. Sa siomia o Ia e motu o tagata ma talanoa atu i le faitau afe, ae sa i ai lava Lona popolega mo le toatasi. (“Popole mo le Tasi,” Liahona, Me 2008, 18)

Valaaulia tagata aoga e faitau le Luka 7:11–16 pe matamata le vitio “Widow of Nain” (2:26) ma mafaufau pe faape’i le tulaga o le avea ai faapei o lenei fafine ua oti lana tane. (Mafaufau e faasoa atu le “Luka 7:11. O a taumafaiga na faia e le Faaola ia oo atu ai le nuu o Naina?” ma le “Luka 7:12. O a ni luitau atonu na feaiai ma le fafine Naina ua oti lana tane ina ua oti lana tama tama e toatasi?” i le Scripture Helps: New Testament [Fesoasoanigao Tusitusiga Paia: Feagaiga Fou] mo nisi malamalamaaga faaopoopo.) Ona mafai ai lea ona e fai atu fesili nei:

2:26

• Faamata o a ni ou lagona pe ana faapea o oe o le fafine ua oti lana tane mai Naina? O le a se mea ua aoaoina ai i tatou e lenei aafiaga e uiga i le Faaola?

• O anafea na e lagona ai le agaalofa o le Faaola mo oe?

I le avea ai ma se vaega o le talanoaga, e mafai ona e faasoa atu le saunoaga lenei a Elder Ulisses Soares:

Sa lagonaina e Iesu e le gata i le mafatia matuitui o lena tina mativa, ae o tulaga faigata o lona olaga ma sa faaosofia ai o Ia i le mutimuti alofa moni mo ia [tagai i le Luka 7:11–15].

E faapei lava … o le fafine Naina ua oti lana tane, e toatele foi tagata i totonu o lo tatou li’o o tosinaga o loo sailia le mafanafana, gauaiga, amanaiaina, ma soo se fesoasoani e mafai ona tatou ofo atu ia te i latou. E mafai ona avea i tatou uma ma ni meafaigaluega i a’ao o le Alii ma galulue ma le mutimuti alofa ia i latou e lē tagolima, e faapei lava foi ona faia e Iesu Keriso. (“O le Mutimuti Alofa Tumau o le Faaola,” Liahona, Nov. 2021, 14)

Mafaufau e faaali atu le mataupu faavae lenei: E mafai ona tatou mulimuli i le faataitaiga a Iesu Keriso e ala i le faaalia o le agaalofa mo isi.

• O a nisi o tauiviga atonu o feagai ma oe i le atiina a’e o le agaalofa faa-Keriso? E mafai faapefea ona e faatoilaloina nei tauiviga?

• Na faapefea ona e lagonaina le agaalofa mai isi? O le a se mea ua e aoaoina mai nei aafiaga e uiga i le agaalofa faa-Keriso?

Faaali atu tulaga faataitai nei, ma valaaulia tagata aoga e talanoaina i ni vaega toalaiti pe faapefea ona latou mulimuli i le faataitaiga a le Faaola i tulaga nei:

1. E te lua faigaluega faatasi ma se tasi ua maua lona tina i se gasegase ua leai se fofo.

2. Ua e matauina se uo sa foliga mai sa fiafia e alu i le lotu ua lē toe alu.

3. Ua ta’u atu e se tagata o le uarota ia te oe na te le o lagonaina o loo i ai se nofoaga mo ia i le lotu ona e i ai ana fesili ma masalosaloga e uiga i talitonuga autu.

4. O loo e tauivi ma le auala e faaali atu ai le agaalofa ma ia faaaofia ai i latou i le faapotopotoga o LGBTQ e aunoa ma le fetuuna’ia o ou talitonuga e uiga i aoaoga a le Atua i le faaipoipoga ma le aiga.

E mafai ona e tuu atu i tagata aoga se taimi e mafaufau ai ma le agaga tatalo pe mafai faapefea ona latou agaalofa atili e pei o le Faaola. Fautuaina i latou e tusifaamaumau o latou manatu ma uunaiga.

Toe foi i le “Filifiliga o Gaoioiga e Aoao Ai.”

Fuafua e faaali atu le ata lenei ma valaaulia se tagata aoga e aotele faapuupuu mai le tala o loo i le Luka 7:36–50.

Mulumuluina o Aao o Iesu, saunia e Brian Call

Valaaulia le vasega e fai ni vaega toalaiti ma faaaoga le pepa e tufa atu lenei e taiala ai a latou talanoaga o le Luka 7:36–50. Fai i tagata aoga e tusifaamaumau ia uiga o Simona ma le fafine na faaali atu i le Faaola, le ala na laua taulimaina ai o Ia, ma upumoni na Ia aoao atu ia i la’ua taitoatasi. Valaaulia tagata aoga e tusi foi ni auala e mafai ona tatou faatatauina ai lenei tala i o tatou olaga. A uma ona faatumu e tagata aoga ia le pepa e tufa atu, valaaulia i latou e faasoa i le vasega mea na latou aoaoina.

A o faasoa mai e tagata aoga auala e faatatau ai lenei tala, mafaufau e tusi i luga o le laupapa upumoni latou te faailoa mai. Atonu e faailoa mai e tagata aoga upumoni e pei o nei: O lo tatou alolofa mo le Faaola e mafai ona musuia ai i tatou e salamo i a tatou agasala. E faateleina lo tatou alolofa ma le faananau mo le Faaola a o tatou lagonaina le faamagaloga faalelagi. O le faamaualuga e faatauaso ai i tatou i lo tatou manaomia o le salamo ma le fesoasoani a le Faaola.

Mafaufau e faaali atu le ata o loo avatu faatasi ai ma talanoaina le sootaga i le va o le alofa mo Iesu Keriso ma le salamo ma le faamagaloga faalelagi.

Ina ia faaiu, e mafai ona e faaali atu le saunoaga lenei a Peresitene Dieter F. Uchtdorf, a o avea i lena taimi ma se tasi o le Au Peresitene Sili. Valaaulia tagata aoga e manatunatu i ana fesili.

O ai o nei tagata e toalua e sili ona tatou soo i ai?

O pei tatou o Simona? Pe o tatou to’a ea ma lagolelei i a tatou galuega lelei, i le faalagolago i lo tatou lava amiotonu? Pe masalo foi o fai sina o tatou le lavā onosai ia i latou e le o ola e tusa ma o tatou tulaga faatonuina? O tatou i ai ea i se tulaga otometi o faatinoga, faatino e aunoa ma le mafaufau i ai, auai i a tatou fonotaga, tau tulimoe i vasega o Mataupu Faavae o le Talalelei, ma atonu o fai ma siaki a tatou telefoni feaveai i taimi o sauniga faamanatuga?

Pe o pei i tatou o lenei fafine, o lē sa manatu sa matuā leiloa atoa ma leai se faamoemoe ona o le agasala?

Pe tatou te alofa tele ea?

O tatou malamalama ea i lo tatou nofoaitalafu ai i le Tama Faalelagi ma aioi atu ma o tatou loto atoa mo le alofa tunoa o le Atua?

A tatou tootutuli e tatalo, pe ina ia toe ta’u atu vaega sili o lo tatou lava amiotonu, po o le ta’uta’u atu o tatou faaletonu, aioi atu mo le alofa mutimutivale o le Atua, ma maligi loimata o le loto faafetai mo le fuafuaga ofoofogia o le togiolaina? (“O Le Meaalofa o le Alofa Tunoa,” Liahona, Me 2015, 109.)

Toe foi i le “Filifiliga o Gaoioiga e Aoao Ai.”