Ioane 7–10

E mafai ona e amata i le faaali atu o fesili nei ma valaaulia tagata aoga e faamaumau a latou tali:

• O a nisi o aoaoga a Iesu Keriso o loo i ai sau molimau?

• O le a se aoaoga e i ai ni au fesili?

• E mafai faapefea ona tatou iloa le moni o aoaoga a le Faaola?

Valaaulia tagata aoga e faitau le Ioane 7:10–18, ma vaavaai mo mea na aoao mai e Iesu e uiga i le auala e iloa ai le moni o Lana aoaoga faavae. (Fesoasoani i tagata aoga e faailoa mai se mataupu faavae e pei o lenei: A o tatou faia le finagalo o le Tama Faalelagi ma tausi Ana poloaiga, o le a tatou iloa ai e moni Lana aoaoga faavae. Afai e i ai ni fesili a tagata aoga e uiga i le uiga o le aoaoga faavae, e mafai ona e matamata ma talanoaina le “O Le A Le Aoaoga Faavae?” [3:42]).

3:42

• Aisea e mafai ai ona luitauina le ola i se upumoni o le talalelei tatou te le malamalama atoatoa i ai?

• E mafai faapefea e le ola ai i upumoni o le talalelei ona fesoasoani i se tasi o loo tauivi e talitonu i se aoaoga faavae faapitoa o le talalelei?

Mafaufau e faasoa atu le saunoaga lenei mai ia Peresitene Bonnie L. Oscarson:

O le liua moni o lona uiga ua tatou faatinoina mea ua tatou talitonu ai. … O nisi taimi tatou te taumafai ai e fai agai i tua. Mo se faataitaiga, atonu tatou te faia le auala lenei: O le a ou fiafia e ola i le tulafono o le sefuluai, ae e tatau ona ou iloa muamua pe moni. Atonu foi tatou te tatalo ina ia maua se molimau i le tulafono o le sefuluai ma faamoemoe o le a faamanuia i tatou e le Alii i lena molimau ae tatou te lei faatumuina lava se lisiti o le sefuluai. E le faapena le auala e fai ai. O loo faamoemoe le Alii ia i tatou ina ia faatino le faatuatua. E tatau ona tatou totogi ma le faamaoni e le aunoa se sefuluai atoa ina ia maua ai se molimau i le sefuluai. O lenei lava mamanu e faatatau i mataupu faavae uma o le talalelei. (“Ia Liua Outou,” Liahona, Nov. 2013, 76–77)

E mafai ona e valaaulia tagata aoga e toe iloilo a latou tali i le fesili muamua na e faaali atu (“O a nisi o aoaoga a Iesu Keriso o loo i ai sau molimau?”).

• Na faapefea e le ola ai i aoaoga a le Faaola ona faamalosia ai lau molimau ma le liua?

Valaaulia tagata aoga e toe iloilo a latou tali i le fesili lona lua (“O le a se aoaoga e i ai ni au fesili?”). Tuu atu i tagata aoga se taimi e mafaufau ai pe faapefea e le faatinoina o lenei aoaoga ona uunaia ai a latou molimau. E mafai ona latou tusia i lalo se fuafuaga faigofie e faaaoga ai lena aoaoga po o le upumoni i o latou olaga.

Mafaufau e faaali atu le ata ma le tala faataitai lenei.

O a’u o se tagata leaga. O le mea sa ou faia e matuai maasiasi lava. Afai e iloa e isi le mea na ou faia, o le a latou vaai faatauvaa ia te a’u. Ou te mautinoa e leai se mea e finagalo le Atua e faaaoga i ai a’u.

Aisea e ono oo ai i se tasi ni lagona faapea?

E mafai faapefea e nei lagona ona aafia ai i tatou?

Faamalamalama atu a o aoao atu le Faaola i le malumalu, sa aumai e le au tusiupu ma le au Faresaio ia te Ia se fafine ma tautino atu faalauaitele sa latou maua o ia o mulilua. (Atonu o se nofoaga lelei lenei e faaali atu ai le ata o i lalo ma faataitai le tomai suesue “Vaai Faalemafaufau i Tusitusiga Paia” i le Tomai mo le Suesueina o Tusitusiga Paia.)

• O le a sou manatu i lagona o lenei fafine a o tuuaia faalauaitele o ia i se agasala matuia?

Faitau faatasi le Ioane 8:1–11, e aofia ai le Faaliliuga a Iosefa Samita, Ioane 8:11 (i le Ioane 8:11, vaefaamatalagai). Pe mafai foi ona e matamata i le “Alu, Aua E Te Toe Agasala” (3:18). Valaaulia tagata aoga e vaavaai pe na faapefea ona fesoasoani le Faaola i lenei fafine e faatoilalo ona lagona o le le agavaa ma faamamaluina le Atua. Mafaufau e fai atu nisi o fesili nei e fesoasoani ia faalolotoina ai le malamalama o tagata aoga.

3:18

• O le a le savali a le Faaola i le au tusiupu ma le au Faresaio? E mafai faapefea ona tatou faaaogaina lenei savali ia i tatou lava ma isi?

• O le a se mea na e maitaua mai le auala na taulimaina ai e le Faaola lenei fafine? O le a le savali a le Faaola ia te ia? (E mafai ona faailoa mai e tagata aoga se upumoni e pei o lenei: E ui e le taliaina e le Faaola le agasala, ae ua Ia ofoina mai ia i tatou le alofa mutimutivale e ala i le salamo.)

• Na faapefea ona fesoasoani le salamo ia te oe e lagona ai le alofa ma le alofa mutimutivale o le Faaola? E mafai faapefea e le taulai atu i le Faaola ona fesoasoani ia i tatou e faatoilalo ai lagona o le le agavaa? (E mafai ona e matamata i le “E Faapefea Ona Ou Suia le Maasiasi i le Faamoemoe?” [3:25] ma talanoaina pe faapefea ona fesootai i upumoni na tou talanoaina i le asō.)

Mafaufau e talanoaina le saunoaga lenei mai ia Sister Amy A. Wright:

O le tali a Keriso i lenei afafine faapelepele o le Atua o le … “Alu ia oe, aua e te toe agasala” [Ioane 8:11]. O se isi auala e fai atu ai, “alu ia oe, aua e te toe agasala” o le “agai i luma ma ia suia.” Sa valaaulia e le Faaola o ia ia salamo: ia suia lana amio, ana faigapaaga, le ala sa ia manatu ai ia te ia lava, lona loto.

Ona o Keriso, o la tatou faaiuga e “agai i luma ma suia” e mafai foi ona tatou “agai i luma ma faamaloloina,” aua o Ia o le pogai o le faamaloloina o mea uma ua gauia i o tatou olaga. (“E Faamaloloina e Keriso Mea ua Gauia,” Liahona, Me 2022, 82)

Valaaulia tagata o le vasega e mafaufau loloto pe o a mea e mafai ona latou fai e talia ai le alofa mutimutivale o le Faaola.

Tusi le faamatalaga lenei i luga o le laupapa:

• Malamalama faasaga i le pouliuli

• Upumoni faasaga i Pepelo

• Saolotoga faasaga i le Nofopologa

Faamalamalama atu faapea o nisi taitai Iutaia sa faaauau pea ona tetee ia Iesu Keriso ma Ana aoaoga. I le Ioane 8, na fetaiai ai Iesu ma i latou sa teena o Ia ma aoao atu upumoni mamana e uiga i manatu faafeagai o loo tusia i luga o le laupapa. E mafai ona e matamata i le “Ua Folafola Mai e Iesu: O A’u o le Malamalama o le Lalolagi; o le Upumoni o le a Faasaolotoina ai Oe” (4:26) ma tuu atu i tagata aoga e faalogologo ma tusi i lalo upu ma fasifuaitau e maua ai se malamalama’aga e uiga i nei faafeagai. Pe mafai foi e tagata aoga ona feauauai i le faitauina leotele o le Ioane 8:12–58 ma faailoga upu ma fasifuaitau e fesoasoani ia i latou ia malamalama lelei ai i manatu faavae o loo i luga o le laupapa.

4:26

A uma ona matamata pe faitau tagata aoga i le tala, valaaulia i latou e tusi i luga o le laupapa soo se upu, fasifuaitau, po o upumoni e fesoasoani ia i latou ia malamalama ai i nei manatu faavae. Ona tuu atu lea i tagata aoga o se taimi e feauauai ai i le fesili atu o le tasi i le isi e uiga i mea na latou tusia i luga o le laupapa. Afai e manaomia, e mafai ona e fai atu se tasi pe sili atu o fesili nei.

• E faapefea i upu malamalama, upumoni, ma le saolotoga ona fesootai i le Faaola ma Lana misiona?

• E faapefea ona aumaia e Iesu Keriso ia i tatou le saolotoga? (Fesoasoani i tagata aoga ina ia taula’i atu i afioga a le Faaola, “Afai tou te tumau pea i la’u mataupu o o’u soo moni outou; e iloa foi e outou le mea moni, e tuu saoloto foi outou e le upu moni” [Ioane 8:31–32].)

• O a ni aafiaga ua aoaoina ai oe e faapea, o le mulimuli ia Iesu Keriso ma ola i Ana aoaoga e faasaolotoina ai i tatou?

• E faapefea ona fesootai upu pogisa, pepelo, ma le pologa i le fili?

• E faapefea ona taunuu le agasala i le nofopologa?

Tuu atu i tagata aoga se taimi e mafaufau loloto ai i mea sa latou aoaoina mai lenei talanoaga. E mafai ona outou faaaluina ni nai minute e faataitai ai ona tauloto le upu moni musuia: “Afai tou te tumau pea i la’u mataupu o o’u soo moni outou; e iloa foi e outou le mea moni, e tuu saoloto foi outou e le upu moni” (Ioane 8:31–32). Uunaia tagata aoga e mafaufau i lenei upumoni i le vaiaso atoa.

Manatua: Sa mitamita tagata Iutaia i le avea ai ma suli po o fanau a Aperaamo. Sa latou lagonaina na latou maua ai se tulaga faaleagaga faapitoa. Sa luiina e Iesu o latou talitonuga i le tautino atu o Ia o le Atua o Aperaamo (tagai Ioane 8:58). Afai e i ai ni fesili a tagata aoga e uiga i le uiga o lenei mea, faitau faatasi le “Ioane 8:58–59. Aisea na mananao ai tagata Iutaia e fetogi Iesu i maa ina ua Ia fetalai mai, ’Sa a’u i ai, a o lei leai se Aperaamo’?” i le Fesoasoaniga o Tusitusiga Paia: Feagaiga Fou.

Mafaufau e tusi le faamatalaga le atoatoa lenei i luga o le laupapa: E tupu le tauaso faaleagaga pe a … Valaaulia ni nai tagata aoga e faasoa mai pe faapefea ona latou faamae’aina le faamatalaga. Uunaia tagata aoga e vaavaai mo mea e mafai ona latou aoaoina e uiga i le faatoilaloina o le tauaso faaleagaga a o latou suesueina le tala i le Faaola o loo faamaloloina se tagata na fanau mai o tauaso.

Faitau le Ioane 9:1–7, pe matamata i le vaega muamua o le “Ua Faamalolo e Iesu se Tagata na Fanau Mai o Tauaso” (mai le taimi faailo 0:00 i le 3:38).

7:51

Faamalamalama atu o loo faamaumauina i le Ioane 9:8–38 e faapea, o le tagata na fanau mai o tauaso sa fesiligia soo e uiga i le auala na faamaloloina ai o ia. Vaevae tagata aoga i ni vaega se ono. (A toalaiti lau vasega, e mafai ona galulue taitoatasi tagata.) Tofi vaega taitasi e suesue se mau o mau faasino nei: Ioane 9:8–12; Ioane 9:13–16; Ioane 9:17–20; Ioane 9:24–25; Ioane 9:26–29; Ioane 9:30–34. Fai atu i vaega taitasi e saunia se faamatalaga puupuu (tasi pe lua ni fuaiupu) e uiga i mea o loo latou faitau ai ma sue ia tali i fesili nei. E mafai ona e faaalia ia fesili nei pe tufatufa ni kopi i tagata aoga:

• Na faapefea ona tali atu le tamaloa i fesili e faatatau i le auala na faamalolo ai o ia? O le a se mea na ia ta’u atu e uiga ia Iesu i lana tali?

• Na faapefea ona tali atu tagata na fesili i le tali a le tamaloa?

A uma ni nai minute, valaaulia se tagata aoga mai vaega taitasi e faitau le latou faamatalaga puupuu ma faasoa mai a latou tali i fesili.

A uma ona faasoa mai vaega taitasi, mafaufau e fai atu fesili nei:

• O le a se faamaoniga o i ai iina e faapea sa faateleina le pupula faaleagaga o le tagata lea? O a ni auala na tauaso ai faaleagaga le au Faresaio?

• O le a se mea ua tatou aoaoina e uiga i le Faaola mai lenei tala o tusitusiga paia? (E mafai ona faailoa mai e tagata aoga se upumoni e pei o lenei: E pei lava ona tuuina atu e Iesu Keriso le vaai ia i latou o e sa tauaso, e mafai foi e Ia ona tuuina atu le vaai faaleagaga ia i latou o e talitonu ia te Ia.)

• O a ni auala o e ono tauaso ai faaleagaga? E mafai faapefea e le Faaola ona fesoasoani ia te oe e faatoilalo le tauaso faaleagaga?

E mafai ona faaiu faatasi ma le saunoaga lenei mai ia Peresitene Thomas S. Monson. Ona mafai lea ona e valaaulia tagata aoga e faasoa mai ni faataitaiga o le auala na fesoasoani ai le Faaola ia i latou po o se tasi latou te iloa e faaleleia atili ai la latou vaai faaleagaga.

O i latou na lagonaina le pai atu o le aao o le Matai i se isi itu e le mafai ona faamatalaina le suiga e oo mai i o latou olaga. O loo i ai se manao e ola sili atu, auauna atu ma le faamaoni, ia savavali ma le faamaualalo, ma ia ola atili e pei o le Faaola. O le mauaina o la latou vaaiga faaleagaga ma iloa atu folafolaga o le faavavau, ua latou tautatala ai foi i upu a le tagata tauaso lea na toe faapupulaina e Iesu, lea na fai mai, “O le mea e tasi ua ou iloa, sa ou tauaso, a o lenei ua ou vaai” [Ioane 9:25]. (“Auai ma le Naunautai,” Liahona, Nov. 2004, 58)

Mafaufau e faaali atu le ata lenei ma faamatala atu e faapea, o leoleo mamoe anamua e tausia a latou mamoe i le po i se fale e ta’ua o le faamoega o mamoe. E leoleoina e se leoleo mamoe lelei le faitotoa o le faamoega o mamoe mai i tagata faataumaoi ma tagata gaoi. Pe mafai foi ona matamata le “Sheepfold” (0:41).

0:41

Valaaulia le vasega e faitau le Ioane 10:1–5, ma vaavaai ma talanoaina faatusa e ono i ai.

Tuu atu i tagata aoga le pepa e tufatufa atu “Suesueina o le Faataoto i le Leoleo Mamoe Lelei,” ma valaaulia i latou e faataitai le tomai “Faia o Fesili e Valaaulia ai le Aoaoina ma le Filiga” i Tomai mo le Suesueina o Tusitusiga Paia.

A uma ona suesue e tagata aoga le Ioane 10:7–15 ma faamaumau a latou fesili, valaaulia i latou e talanoaina i ni paga po o ni vaega toalaiti pe faapefea ona latou taliina a latou fesili.

A uma ona maua se taimi e talanoaina ai e vaega, e mafai ona e faaali atu le upumoni lenei: Ua silafia e le Leoleo Mamoe Lelei (Iesu Keriso) Ana mamoe ma tuuina atu Lona soifua mo i latou.

Mafaufau e faaali atu le ata lenei o mamoe o loo aveesea mai le mauga a o le’i oo mai le tau mālūlū. Faailoa atu i lenei tala na faamatala e Elder Gary E. Stevenson, e silia ma le 200 mamoe na leiloloa.

O le tele lava o mamoe leiloloa sa le’i leiloloa ona o le mama’i po o le mamate faanatura ae ona o manufeai e pei o liona o le mauga po o luko. O nei manufeai e masani lava ona latou maua tamai mamoe o se ese mai le saogalemu o le lafu, ua aveese i latou lava mai le puipuiga a a latou leoleo mamoe.” (“Leoleoina o Agaga,” Liahona, Nov. 2018, 111)

Mafaufau e fai atu se fesili se tasi pe sili atu o fesili nei:

• O a tulaga lamatia tatou te feagai pe a tatou o ese mai le saogalemu o le Leoleo Mamoe Lelei ma Lana lafu?

• O le ā sou lagona o le saogalemu i le tumau ai i le latalata atu i le Leoleo Mamoe Lelei? Na faapefea ona faamanuiaina oe i le avea ai ma se tasi o Lana lafu?

• O le a se mea e mafai ona tatou faia e faataitai ai i le faataitaiga a le Faaola ma avea ai ma leoleo mamoe lelei i isi? (E mafai ona faailoa mai e tagata aoga se tasi e mafai ona avea ai i latou ma leoleo mamoe. E mafai ona e matamata i le “This Is Church: Troy’s Story” [3:16].)

E mafai ona tou faaiu i le faitauina, usuina, poo le faalogologo i le viiga “Pele i le Leoleo Mamoe” (Viiga, nu. 135). E mafai e tagata aoga ona faamaumau o latou manatu, lagona, ma uunaiga.