Eperu 7–13

Valaaulia tagata o le vasega e mafaufau e uiga i se taimi na latou popole ai e uiga i se mea. Tuu atu i tagata aoga e tomanatu i fesili nei:

• Na faapefea ona e taulimaina le aafiaga?

• O a au mea na fai na fesoasoani?

• O le a se mea na le fesoasoani?

Ona faitau faatasi lea o le saunoaga lenei a Peresitene Jeffrey R. Holland.

“E tofu i tatou uma ma taimi lea e manaomia ai ona tatou iloa o le a lelei mea uma. … Mo faalogona maloloina ma le malosi faaleagaga, e manaomia tagata uma ia mafai ona vaai i luma i ni avanoa, i se mea faafiafiaina ma faafouina ma faamoemoeina, pe o lena faamanuiaga o lata mai i ou aao ia po o tumau pea le mamao. Ua lava le tau lava ina tatou iloa e mafai ona tatou o’o atu iina, lea po o le a lava se fuatia po o se mamao, o loo iai le folafolaga o “mea lelei o le a o’o mai.” (“An High Priest of Good Things to Come,” Ensign, Nov. 1999, 36)

• E mafai faapefea e le iloaina o loo i ai “mea lelei o le a o’o mai” ona fesoasoani ia te oe e feagai ai ma luitau o le olaga?

Valaaulia tagata aoga e faitau le Eperu 9:11 (po o se tagata aoga se toatasi e faitau leotele) ma vaavaai mo se faalagiga faamatalaina o Iesu Keriso. Tusi ia mau faasino ma fesili nei i luga o le laupapa. Valaaulia tagata aoga e faatulaga i ni vaega toalaiti ma filifili se tasi o fuaitau e suesue faatasi i ai. E tatau i tagata aoga ona vaavaai mo mea e mafai ona latou aoaoina e uiga ia Iesu Keriso o se “faitaulaga sili o mea lelei o le a oo mai.”

Ina ia fesoasoani i tagata aoga ia malamalama i le talaaga ma faatusa o Iesu Keriso o lo tatou Faitaulaga Sili, e mafai ona latou faitauina le “Eperu 9. O le a le mea na fai e le faitaulaga sili i le Aso o le Togiola?” i le Fesoasoaniga mo Mau: Feagaiga Fou.

A uma ona tuu atu i tagata aoga se taimi e suesue ai, valaaulia i latou e faasoa mai mea na latou aoaoina e uiga ia Iesu Keriso o lo tatou Faitaulaga Sili ma le Puluvaga o le feagaiga fou. A o faasoa mai e tagata aoga, atonu e te manao e fesoasoani ia i latou e faailoa mai le upumoni lenei: Ona o Iesu Keriso o le Puluvaga o le feagaiga fou, e mafai ona tatou faamoemoe mo mea lelei o le a oo mai.

E mafai ona e fesili atu:

• O le a le mea ua aoaoina oe e le matafaioi a Iesu Keriso o se puluvaga e uiga i lau sootaga o le feagaiga ma Ia? (Afai e aoga, e mafai ona outou faitau faatasi le palakalafa muamua i le Taiala i Tusitusiga Paia, “Puluvaga,” Gospel Library.)

• O le a se mea e te tulimatai atu i ai ona o lau sootaga o le feagaiga ma Iesu Keriso?

Mafaufau e faasoa atu le saunoaga lenei a Elder Ulisses Soares:

Ou te tatalo ina ia [mafai] ona tatou … olioli i le mea ou te fiafia e ta’ua o le “talitonuga o le feagaiga e ala ia Iesu Keriso.” O lenei mautinoa e filemu ae o le faamautinoaga moni o le mauaina o faamanuiaga ua folafola mai e le Atua mo i latou o e tausia a latou feagaiga ma e matuai manaomia e ui lava i tulaga luitauina o o tatou aso. (“Faatuatuaina o Feagaiga e ala ia Iesu Keriso,” Liahona, Me 2024, 17)

Valaaulia tagata aoga e mafaufau pe faapefea e le “talitonuga o le feagaiga e ala ia Iesu Keriso” ona fesoasoani ia i latou ia iloa ai o loo i ai mea lelei o le a oo mai. E mafai e tagata aoga ona tusifaamaumau o latou manatu ma lagona. Faamalosi’au i ni nai tagata aoga e fa’asoa mai mea sa latou tusia.

Toe foi i le “Filifiliga o Gaoioiga e Aoao Ai.”

Mafaufau e faaali atu ma faitau faatasi ia saunoaga nei a perofeta a le Alii:

O le faatuatua [o] le mataupu faavae muamua lea i le tapuaiga faaalia, ma le faavae o le amiotonu uma. (Aoaoga a Peresitene o le Ekalesia: Iosefa F. Samita [1998], 50)

O o matou manaoga uma lava, ou te manatu o le manaoga silisili o le faatupulaia lea o lo matou faatuatua. (Gordon B. Hinckley, “Lord, Increase Our Faith,” Ensign, Nov. 1987, 54)

Ia outou lototetele. E susulu le lumanai e pei o lou faatuatua. (Thomas S. Monson, “Be of Good Cheer,” Liahona, Me 2009, 92)

O le faatuatua ia Iesu Keriso o le mana silisili lea ua avanoa mo i tatou i lenei olaga. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 104)

• O a ni manatu na e maua ao e faitauina lenei fuaitau?

• O le a le matafaioi a le faatuatua ia Iesu Keriso i lou olaga? (Tu’u atu se taimi i tagata aoga e toeiloilo le leoa ai ma tusifaamaumau o latou manatu.)

Valaaulia tagata aoga e faitau le Eperu 11:1-3, ma vaavaai mo le uiga o le faatuatua. E mafai ona latou faaaogaina se lomifefiloi, le vaega o le Define i le polokalama o le Gospel Library, ma vaefaamatalaga ina ia malamalama lelei ai i le uiga o le faatuatua (tagai i le tomai “Mauaina o le Uiga o Upu ma Fuaitau” i le Tomai mo le Suesueina o Tusitusiga Paia). Ona tuu atu lea i tagata aoga e tusi le faauigaga o le faatuatua i luga o le laupapa. Tuu atu ia i latou se taimi e toe iloilo ai mea na tusia e isi.

• A uma ona vaai i faauigaga o le faatuatua i luga o le laupapa, aisea e te manatu ai o le faatuatua ia Iesu Keriso atonu o lo tatou manaoga sili lea ma le mana silisili?

Atonu e te faamanatu atu i tagata aoga o le Eperu 11 o loo i ai le tele o faataitaiga o tagata o e na faatinoina le faatuatua ia Iesu Keriso. Faaali atu igoa ma mau faasino nei ma tusi i luga o le laupapa le upumoni le uma lenei: Faatasi ai ma le faatuatua ia Iesu Keriso, e mafai ai ona tatou … Valaaulia tagata aoga e filifili se igoa se tasi pe sili atu ma faitau fuaiupu e faatatau i ai. Ona fai atu lea i tagata aoga e faailoa mai ni auala eseese e faauma ai le faamatalaga.

• Apelu (fuaiupu 4)

• Enoka (fuaiupu 5–6)

• Noa (fuaiupu 7)

• Aperaamo (fuaiupu 8–10, 17–19)

• Mose (fuaiupu 23–27)

• Isaraelu (fuaiupu 28–39)

A uma ona tuu atu i tagata aoga se taimi e suesue ai, valaaulia i latou e faasoa mai mea na latou aoaoina e uiga i le faatuatua. Uunaia i latou e faasoa mai foi pe na faapefea ona latou faaumaina le faamatalaga o loo i luga o le laupapa. O a latou tali e ono aofia ai le mea lenei: Faatasi ai ma le faatuatua ia Iesu Keriso e mafai ona tatou onosaia mafatiaga, faataunuu vavega, ma maua ia folafolaga paia.

A o faasoa mai e tagata aoga o latou malamalamaaga ma faamatalaga ua mae’a, mafaufau e fai atu ni fesili e pei o fesili nei e faaloloto ai lo latou aoaoina:

• Na faapefea ona faatino e le tagata i tala taitasi le faatuatua?

• O le a se mea na e aoaoina mai nei tala e mafai ona faamalosia ai lou faatuatua ia Iesu Keriso?

• O a ni mea na e aoaoina e uiga i le Atua ao e suesue i nei fuaiupu?

Mafaufau e faaali atu le saunoaga lea a Peresitene Russell M. Nelson:

O le faatuatua ia Iesu Keriso o le faavae lea o talitonuga uma ma le alātafe o le mana faalelagi. E tusa ai ma le Aposetolo o Paulo, “A aunoa ma le faatuatua e le mafai ona faafiafiaina [le Atua]” [Eperu 11:6]. …

O mea lelei uma i le olaga—o faamanuiaga faapolopolo uma e i ai le taua e faavavau—e amata i le faatuatua. …

E le manaomia e le Alii se faatuatua atoatoa mo i tatou e maua ai Lona mana atoatoa . Ae ua Ia talosagaina i tatou ia talitonu.

O’u uso e ma tuafafine pele, o la’u valaau ia te outou … o le, ia amata nei ona faateleina lou faatuatua. E ala i lou faatuatua, o le a faateleina ai e Iesu Keriso lou tomai e aveese ai mauga i lou olaga, e ui i ni ou lu’itau patino e ono tetelē e pei o le telē o le Mauga o Evaresi.

O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga, ae o le tali i ou lu’itau taitasi o le faateleina lea o lou faatuatua. E manaomia ai galuega. …

Ina ia faia soo se mea ia lelei, e manaomia ai taumafaiga. O le avea ai ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga. (“Ua Toetu Keriso: O le Faatuatua ia te Ia o le a Aveese ai Mauga,” Liahona, Me 2021, 102-3)

• O a taumafaiga na fesoasoani ia te oe e faateleina lou faatuatua ia Iesu Keriso?

Valaaulia tagata aoga e toe mafaufau filemu i le saunoaga a Peresitene Nelson ma tusifaamaumau a latou tali i fesili nei:

• O le a se luitau po o se tulaga patino o loo e feagai i le taimi nei?

• E mafai faapefea e le faateleina o lou faatuatua ia Iesu Keriso ona fesoasoani i lenei luitau po o tulaga?

• O le a se taumafaiga e mafai ona e faia e faateleina ai lou faatuatua ia Iesu Keriso?

Toe foi i le “Filifiliga o Gaoioiga e Aoao Ai.”

Tusi upu nei i luga o le laupapa: aoa’i, faasalaina, faasa’o, aoaiga, sasa.

Afai e manaomia, valaaulia tagata aoga e sue le uiga o nei upu. Ona fesili atu lea:

• Pe na e faafesootaia ea nei upu ma le alofa? Afai o lea, aiseā?

Valaaulia tagata aoga e faitau le Eperu 12:3–11, ma vaavaai mo mea o loo aoao mai e nei fuaiupu e uiga i le mafuaaga e aoa’i ai i tatou e le Atua.

• O le a se mea o aoao atu e fuaiupu 5–11 ia te oe e uiga i le alofa o le Atua?

• O a faamoemoega o le Atua mo le aoa’iina o i tatou? (E mafai ona faailoa mai e tagata aoga se upumoni e pei o lenei: Ona e alofa le Atua ia i tatou, na te aoa’iina, pe faasa’oina i tatou, ina ia mafai ona tatou olioli i le fua filemu o le amiotonu.)

• O a ni auala e aoa’i pe faasa’o ai e le Alii i tatou?

Mafaufau e faasoa atu le faamatalaga lenei mai ia Elder D. Todd Christofferson:

Afai tatou te naunau e talia, o aoaiga manaomia o le a oo mai i le tele o foliga ma mai le tele o punaoa. Atonu e oo mai i le ala o a tatou tatalo, a o fetalai mai le Atua i o tatou mafaufau ma loto e ala i le Agaga Paia (tagai i le M&FF 8:2). Atonu e oo mai e ala i le tatalo ua taliina i le leai pe ese foi nai lo le mea na tatou faamoemoeina. Atonu e oo mai aoaiga a o tatou suesue i tusitusiga paia, ma faamanatu mai ai le le atoatoa, le le usiusitai, po o mea ua tatou faatamala ai.

E mafai ona oo mai faasa’oga e ala mai i isi, aemaise lava [aposetolo, perofeta, peteriaka, epikopo, ma isi] o e ua musuia e le Atua e faalauiloa atu lo tatou fiafia. …

O aoaiga, e faamoemoe ia agamalu, e mafai ona sau mai i se toalua o se tasi. …

E mafai e matua ma e tatau lava ona faasa’o, pe aoa’i foi pe afai e le mananao e tafetafea atu a latou fanau i faiga lē alofa a le tiapolo ma ana ‘au. …

Manatua a tatou teena le faasa’oga, e ono le toe tuuina mai e isi tusa lava po o le a lo latou alolofa ia i tatou. Afai e faifai pea lo tatou lē faatinoina o le aoaiga a se Atua alofa, ona taofia foi lea e Ia. (“Ou Te Aoai Atu ma Sasa ia i Latou Uma Ou te Alofa I Ai,” Liahona, Me 2011, 99–100)

• O le a le mea e sili ona faafiafiaina ai oe e uiga i le savali a Elder Christofferson?

Valaaulia tagata aoga e mafaufau loloto filemu i se taimi na latou lagona ai le aoa’iina e le Alii. Tuu atu i tagata aoga e mafaufau loloto ma tusi faamaumau o latou manatu e uiga i fesili nei:

• E faapefea ona e tali atu i le aoa’iga, po o le faasa’oina?

• O le a le mea sa taumafai le Alii e aoao atu ia te oe?

• O le a se mea e mafai ona e faia ina ia sili atu ai lou taliaina o le aoaiga a le Alii?

Ina ia faaiuina le vasega, e mafai ona tou matamata i le “The Will of God” (3:02) pe faasoa atu le tala a Peresitene Hugh B. Brown e uiga i le laau o le vine (tagai Hugh B. Brown, “Liahona Classic: The Currant Bush,” Liahona, Mat. 2002, 22).

2:59

Toe foi i le “Filifiliga o Gaoioiga e Aoao Ai.”