Mataio 2; Luka 2

Faaali atu le ata lenei o Iesu Keriso o le Foafoa. Valaaulia tagata aoga e faasoa mai mea ua tatou iloa e uiga ia Iesu Keriso mai le muai olaga ma i le avea ai ma Ieova, le Atua o le Feagaiga Tuai.

O Keriso le Foafoa, saunia e Robert T. Barrett

Ona faaali atu lea o se ata o Iesu o se pepe, ma valaaulia le vasega e faitau le Luka 2:1–7, ma vaavaai mo tulaga o Lona soifua mai.

Afai e aoga, e mafai ona e matamata i le “The Christ Child” mai le taimi 1:00 i le 6:00 pe toe faamanatu le “Luka 2:1–7. O a tulaga o le soifua mai o le Faaola?” i le Fesoasoaniga o Tusitusiga Paia: Feagaiga Fou.

17:56

• I le mafaufau ai i le mana, maoae, ma le mamalu o Iesu Keriso, o le a se mea e tāua ia te oe e uiga i tulaga o Lona soifua mai?

Faamatala atu e faapea i se faaaliga o le soifua mai o le Faaola, sa fesiligia ai le perofeta o Nifae o le Tusi a Mamona, “Pe ua e iloa ea le faamaualalo o le Atua?” (1 Nifae 11:16). (Manatua: O le upu faamaualalo i lenei faaaogaaga o lona uiga o le alu ifo ma le lotofuatiaifo mai se tulaga maualuga atu i se vaega po o se tulaga e maualalo ifo.) Fai atu i tagata aoga e faitau e uiga i le faaaliga a Nifae i le 1 Nifae 11:13–23, ma vaavaai mo mea na malamalama i ai Nifae e uiga i le faamaualalo o le Atua.

• O le a se mea e ono aoao mai e le afio ifo o Iesu Keriso ia i tatou e uiga i Lona uiga? O le a se mea e ono faaalia mai ai e uiga i Ona lagona mo i tatou? (Fesoasoani i tagata aoga e faailoa mai se upumoni e pei o lenei: O le faamaualalo o Iesu Keriso ua faaalia ai Lona lotomaualalo ma le alofa mo i tatou.)

• O a isi auala na faamaualalo ai Iesu Keriso ina ia mafai ona Ia faamanuiaina o tatou olaga? (E mafai e tagata aoga ona faitau le 1 Nifae 11:26–33 mo ni malamalamaaga faaopoopo.)

• E mafai faapefea e le malamalama i le faamaualalo o le Faaola ona tosina ai le ala e te vaai ai ma taulima ai ou luitau patino?

Ina ia fesoasoani i tagata aoga ia lagonaina le tāua o le faamaualalo o le Faaola, e mafai ona outou iloiloina faatasi upu o le viiga “Sa Fanau Maulalo Iesu” (Viiga, nu. 110) pe matamata i le “Jesus Once of Humble Birth” (5:37). Valaaulia tagata aoga e mafaufau i le sāvali o le viiga ma tusifaamaumau soo se manatu po o lagona uunai latou te maua.

Toe foi i le “Filifiliga o Gaoioiga e Aoao Ai.”

Mafaufau e faaali atu le saunoaga lenei mai ia Peresitene Dieter F. Uchtdorf, o lē sa avea o se sui o le Au Peresitene Sili:

Mo i latou uma lava e fia malamalama po o ai i matou i le avea ai ma tagata o Le Ekalesia a Iesu Keriso o le Au Paia o Aso e Gata Ai, ou te fia ofoina atu se amataga ua faamatalaina e nei upu e tolu: Matou [te] Sailia Keriso. Matou te saili ia aoao ia te Ia. Ia mulimuli ia te Ia. Ia avea atili e faapei o Ia. O aso taitasi i le tausaga atoa, matou te sailia ai o Ia. (Dieter F. Uchtdorf, “Sailia o Keriso i le Kerisimasi,” Liahona, Tes. 2017, 4)

Tuu atu i tagata aoga ni nai minute e toe manatunatu ai ma tusifaamaumau mea sa latou faia i lenei vaiaso e saili ai Keriso. Ona tusi lea i luga o le laupapa le faamatalaga le uma lenei: E mafai ona ou sailia Iesu Keriso e ala i le …

Faamalamalama atu e mafai ona maua e tagata aoga ni auala eseese e faauma ai lenei faamatalaga e ala i le vaavaai mo upumoni o loo faaātaāta mai pe faapupula mai i tala nei. A o faitau e tagata aoga nei tala, e mafai ona latou fesili: O le a se mea e mafai ona tatou aoao mai i le faataitaiga a le tagata po o tagata i lenei tala? (Afai e mafai ona faaaoga e tagata aoga ni aoaoga faaopoopo i lenei tomai, e mafai ona e iloiloina le “Faailoaina o Upumoni o le Talalelei i Tusitusiga Paia” i Tomai i le Suesuega o Tusitusiga Paia.)

Valaaulia tagata aoga e faamaumau pe faapefea ona latou faaumaina le faamatalaga e lei mae’a e faavae i mea ua latou aoaoina mai tala taitasi nei:

• Mataio 2:1–2, 7–11 (o le Au Makoi)

• Luka 2:8–16 (o leoleo mamoe)

• Luka 2:25–32 (Simeona), pe matamata i le “The Christ Child is Presented at the Temple” (2:04)

  

  1:54

• Luka 2:36–38 (Ana)

A uma ona tuu atu se taimi mo suesuega, valaaulia tagata aoga e faasoa mai mea na latou aoaoina mai ia i latou sa latou faitau i ai. Ona valaaulia lea o tagata aoga e tusi i luga o le laupapa auala eseese na latou faaumaina ai le faamatalaga. O faamatalaga ua mae’a atonu e talitutusa ma upumoni nei: E mafai ona ou sailia Iesu Keriso e ala i le aoao ia te Ia ma vaavaai mo faailoga o Lona afio mai. E mafai ona ou sailia Iesu Keriso e ala i le tapuai atu ia te Ia. E mafai ona ou sailia Iesu Keriso e ala i le vave ona ou alu atu ia te Ia. E mafai ona ou sailia Iesu Keriso e ala i le auauna atu ma le loto i ai i le malumalu. E mafai ona ou sailia Iesu Keriso e ala i le mulimuli ma le filiga i uunaiga a le Agaga. E mafai ona ou sailia Iesu Keriso e ala i le anapogi ma le tatalo faamaoni.

A o faasoa mai e tagata aoga a latou faamatalaga ua mae’a, mafaufau e valaaulia i latou e faasoa mai foi pe na faapefea e nei ituaiga o amioga ona aumaia i latou, po o se tasi latou te iloa, e latalata atili i le Faaola.

Valaaulia tagata aoga e filifili se faamatalaga se tasi mai le laupapa, po o se tasi o a latou lava faamatalaga, ma fai se fuafuaga faigofie o le auala o le a latou faaaogaina ai e saili ai le Faaola.

Manatua: E mafai ona e valaaulia tagata aoga i le amataga o lau vasega e sosoo ai e faasoa mai mea na latou faia e mulimuli ai i la latou fuafuaga.

Toe foi i le “Filifiliga o Gaoioiga e Aoao Ai.”

E mafai ona e tusia i luga o le laupapa ia upu alofa, faamemelo, migao, auaunaga, ma le tuuto. Valaaulia tagata aoga e mafaufau i taimi na latou mananao ai e faaali atu pe tuuina atu nei mea i le Tama Faalelagi ma Iesu Keriso. Tusi le upu tapuai i luga atu o upu o loo i luga o le laupapa, ma faamatala atu o nei upu o loo i le fatu o le tapuai moni (tagai i Autu ma Fesili, “Tapuai,” Gospel Library).

Valaaulia le vasega e suesue le tala i le Au Makoi i le Mataio 2:1–12 ma vaavaai mo auala na tapuai ai nei alii i le Alii. Atonu e fesoasoani le faaali atu o le “The Christ Child” mai le taimi faailo 13:44 i le 17:16.

17:56

• O le a le mea na fai atu ma faia e le Au Makoi e tapuai ai i le Alii?

• O le a se mea e mafai ona tatou aoaoina i le uiga o le tapuai mai le Au Makoi? (Atonu e faailoa mai e tagata aoga se upumoni e pei o lenei: Tatou te tapuai i le Alii e ala i le faaali atu o le alofa ma le migao ia te Ia i a tatou upu ma amioga.)

• E mafai faapefea e faailoaga laiti ma faigofie o le tapuai faamaoni ona faalatalata atili atu ai i tatou i le Tama Faalelagi ma Iesu Keriso? (Mafaufau e matamata i le “Returning to Prayer” [4:43] e fesoasoani e tali ai lenei fesili.)

  

  4:43

Ina ia fesoasoani i tagata aoga ia faia faatinoga mataalia, amiotonu, faaali atu ma faitau faatasi le saunoaga lenei a Peresitene Dieter F. Uchtdorf, a o avea ma sui o le Au Peresitene Sili:

O le Kerisimasi ma nisi o tu ma aga faapelepele o le vaitau ua faamanatu mai ai ia i tatou, e tatau ia i tatou, faapei o Le Au Makoi anamua, ona saili atu i le Keriso ma tuu atu i Ona luma meaalofa e sili ona pele: o se loto momomo ma se agaga salamo. E tatau ona tatou ofo atu ia te Ia lo tatou alofa. E tatau ona tatou avatu lo tatou naunautaiga e tauave i o tatou lava luga Lona suafa ma savavali i le ala o le so’o. E tatau ona tatou folafola atu e manatua pea o Ia, e mulimuli i Lana faataitaiga, ma o atu ma faia mea lelei [taga’i i le Galuega 10:38; Mataupu Faavae ma Feagaiga 20:77, 79]. (“Of Curtains, Contentment, and Christmas” [Faigalotu o le Kerisimasi a le Au Peresitene Sili, 4 Tes., 2011], Gospel Library)

E mafai e tagata aoga ona faasoa mai ni auala eseese sa latou tapuai ai i le Tama Faalelagi ma Iesu Keriso e ala i le ofoina atu ia i La’ua o ō latou loto momomo, alofa, ma le loto. (Mafaufau e tusi faataitaiga a tagata aoga i luga o le laupapa.)

Tuu atu i tagata aoga ni nai minute e manatunatu filemu ai. Fautuaina i latou e faailoa ma tusifaamaumau se mea e mafai ona latou faia i lenei vaiaso e tapuai faamaoni ai i le Alii.

Toe foi i le “Filifiliga o Gaoioiga e Aoao Ai.”

Mafaufau e faaali atu le ata lenei o Iesu i Lona talavou.

Fesili i le vasega pe o le a so latou manatu pe na faape’i Iesu a o laitiiti o Ia. Atonu e te valaaulia i latou e mafaufau pe faape’i le tausia o Ia o se atalii pe ola a’e faatasi ma Ia o se uso/tuagane.

Valaaulia le vasega e toe faamanatu le Luka 2:40–52 ma le Faaliliuga a Iosefa Samita, Mataio 3:24–26 (Gospel Library), ma faasoa mai faamatalaga mai le olaga faatamaitiiti o Iesu ma le talavou lea e sili ona tulaga’ese ia i latou. Ta’u i ai o le Faaliliuga a Iosefa Samita o le Luka 2:46 o loo ta’u mai ai, “Ma sa latou faalogo ia te ia, ma fesili atu ia te ia ni fesili” (Gospel Library).

• O a mea ua faaalia mai e nei fuaitau e uiga i le ituaiga tagata ma uiga o Iesu o se talavou?

Afai e lē ta’ua maia e tagata aoga, e mafai ona e ta’u i ai na tuputupu a’e le Faaola i le āluga o taimi (tagai Luka 2:40; Mataupu Faavae ma Feagaiga 93:12–13) ma i se ala paleni (tagai Luka 2:52). Afai e manaomia, e mafai ona outou talanoaina po o a vaega o le tuputupu a’e o loo faapupula mai i faaupuga “poto,” “tino,” ma le “alofagia e le Atua atoa ma tagata” (fuaiupu 52).

Mafaufau e faaali atu le upumoni po o le ata lenei: E mafai ona tatou mulimuli i le faataitaiga a Iesu e ala i le atiina a’e o le faaleatamai, faaletino, faaleagaga, ma faaleagafesootai.

• Aisea e ono tāua ai le galulue i nei vaega taitasi a o tatou saili ia faapei o le Faaola?

• O le a se mea e ono tupu pe afai tatou te faatuatuana’i i soo se tasi o nei vaega?

Valaaulia tagata aoga e filifili se vaega se tasi latou te mananao e talanoa auiliili atili. Fai atu ia i latou e fai ni vaega toalaiti ma i latou e tutusa o latou naunauga. Faaali atu uunaiga nei, ma valaaulia vaega e filifili se tasi pe sili atu e talanoaina.

• Faailoa mai ni auala na e atiina a’e ai po o isi e te iloa i lenei vaega.

• Mafaufau pe mafai faapefea e le atiina a’e i lenei vaega ona fesoasoani ia te oe ia avea atili e faapei o le Tama Faalelagi ma Iesu Keriso.

• Suesue pe mafai faapefea e le atiina a’e i lenei vaega ona fesoasoani ia te oe e faia ni saofaga anoa i le aiga, i le galuega, i le aoga, i le lotu, po o le nuu.

• Faailoa mai faafitauli e ono faalavelaveina ai oe mai le atiina a’e i lenei vaega ma le auala e faatoilalo ai.

Ina ia fesoasoani i tagata aoga e faatino mea ua latou aoaoina, mafaufau e faasoa atu le faamatalaga lenei mai ia Peresitene Russell M. Nelson:

Fefautuaa’i ma le Alii e uiga i le auala e mafai ona e tuputupu a’e ai i se auala paleni. … O le a manaomia ona e saili atu i faaaliga patino. O le a manaomia ona e filifili mo oe lava pe faapefea ona e faatinoina. O nisi taimi e ono uunaia oe e le Agaga e fai ni mea faigata. Ou te manatu ua e mafaia le lu’i. E mafai ona e faia ni mea faigata. (i le “Faailoa Atu e Taitai le Taumafaiga Fou mo Tamaiti ma le Autalavou,” Liahona, Nov. 2019, 124)

Tuu atu i tagata aoga ni nai minute e filemu ai ma faalogo i le Agaga Paia. Fautuaina i latou e faamaumau mea ua uunaia i latou e fai. Afai e lagona e nisi tagata aoga le lofituina e uiga i le taliaina o lenei luitau e faia mea faigata, mafaufau e matamata ma talanoaina le “Self-Care Made Simple” (3:40).

3:40

Toe foi i le “Filifiliga o Gaoioiga e Aoao Ai.”