Mataio 1; Luka 1

Valaaulia tagata aoga e mafaufau pe faapefea ona latou faamanatuina le Kerisimasi i o latou aiga po o aganuu. Ona fesili atu lea pe ua latou faalogo i le fesili e fesiligia soo “Ua e sauni mo le Kerisimasi?” Faamatala atu na fautua mai Elder David A. Bednar tatou te fai atu se fesili e ese mai: “Ua e ma o’u sauni ea mo Keriso?” (tagai “Elder Bednar’s Teachings Help Us Find the Savior in Christmas Symbols,” Tes. 20, 2022, newsroom.ChurchofJesusChrist.org).

• E mafai faapefea e le mafaufau loloto i le fesili a Elder Bednar ona fesoasoani ia te oe e avea ai ma se tagata e sili atu ona faatotonugalemu ia Keriso? E mafai faapefea ona fesoasoani ia te oe ia avea le vaitau o le Kerisimasi o se aafiaga e sili atu ona faatotonugalemu ia Keriso?

Faamatala atu e faapea na faaali atu le agelu o Kaperielu ia Maria e ta’u atu i ai o le a avea o ia ma tina o le Alo o le Atua. Ina ua maitaga Maria, sa faaali atu se agelu ia Iosefa i se miti ma ta’u atu ia te ia o le tamaitiiti na tauaveina e Maria e “a le Agaga Paia” (Mataio 1:20). Mai nei aafiaga, sa aoao ai e Maria ma Iosefa ni upumoni tāua e uiga i le soifua mai o Iesu Keriso. O nei upumoni na fesoasoani ia i la’ua ina ia “saunia mo Keriso.” Ina ia fesoasoani i tagata aoga e faailoa mai nei upumoni, mafaufau e tusi i luga o le laupapa ia faamatalaga nei e lei mae’a.

E mafai e le vasega ona fai ni vaega toalaiti ma suesue le Luka 1:28–35 ma le Mataio 1:20–25, ma vaavaai mo auala e faauma ai faamatalaga o i luga o le laupapa. Ona mafai lea ona e valaaulia tagata aoga e tusifaamaumau pe faapefea ona latou faaumaina nei fuaiupu. Fautuaina le vasega e vaavaai mo suafa, faalagiga, ma matafaioi a Iesu Keriso (tagai “Taulai Atu ia Iesu Keriso i Tusitusiga Paia,” Tomai i le Suesuega o Tusitusiga Paia).

A uma ona tusifaamaumau e tagata aoga a latou faamatalaga ua mae’a, fai atu ia i latou e faasoa i a latou vaega mea na latou mauaina. E mafai ona aofia ai faamatalaga e pei o nei: O Iesu Keriso o le Alo o le Atua. O Iesu Keriso o le atalii o se tina faaletino. O Iesu Keriso o le a nofotupu i le aiga o Iakopo e faavavau. O Iesu Keriso o le a laveaiina Lona nuu mai a latou agasala. O Iesu Keriso (Emanuelu) o le a faatasi ma i tatou.

Valaaulia vaega e filifili se faamatalaga se tasi ma talanoaina pe mafai faapefea e le iloaina o lenei upumoni e uiga i le Faaola (1) ona faateleina lo tatou malamalama i Lana misiona paia ma (2) faamalosia lo tatou faatuatua ia te Ia.

E mafai ona e faaiuina lenei gaoioiga i le fesili atu:

• O le a sou manatu na faapefea e le iloaina o nei upumoni ona fesoasoani e saunia ai Maria ma Iosefa ina ia “saunia mo Keriso”?

• E mafai faapefea ona e manatua e “saunia mo Keriso” i le taimi o le Kerisimasi ma le tausaga atoa?

Manatua: Afai e mananao lau vasega e talanoaina le tāua o le tulaga ese o mātua o Iesu Keriso, mafaufau e iloilo faatasi le “Luka 1:31–35. Aisea na manaomia ai e Iesu le i ai o se tina faaletino ma se Tamā tino ola pea?” ma le “Mataio 1:20. O le a se mea ua tatou iloa e uiga i le afuafuaina o Iesu Keriso?” i le Fesoasoaniga o Tusitusiga Paia: Feagaiga Fou.

Toe foi i le ‟Filifiliga o Gaoioiga e Aoao Ai.”

Mafaufau e tuu atu i tagata aoga le iloiloga lenei o le tagata lava ia. Faailoa atu o mea latou te faamaumauina o le a lē faasoaina atu i isi.

Faaali atu le ata lenei. Faamalamalama atu o loo faaalia ai le asiasi atu o Maria i lona tausoga o Elisapeta. Faato’ā iloa lava e Maria mai le agelu o Kaperielu o le a avea o ia ma tina o le Alo o le Atua (tagai Luka 1:26–38). O le taimi lea, ua ono masina o maitaga o Elisapeta ia Ioane le Papatiso (tagai Luka 1:36).

• O le a se mea e mafai e nei tamaitai ona aoao ai i tatou e uiga i le Faaola?

Ina ia aoao mai nei tamaitai ofoofogia, valaaulia nisi o le vasega e faitau upu a Elisapeta i le Luka 1:39–45 ma isi e faitau upu a Maria i le Luka 1:46–55. Pe e mafai foi ona outou matamata i le “Mary and Elisabeth Rejoice Together” (mai le taimi faailo 1:13 i le 5:14).

5:6

Mafaufau e fai atu se fesili se tasi pe sili atu o fesili nei:

• O a ni ou mafaufauga ma lagona na i ai e uiga ia Elisapeta ma Maria a o e suesueina a la molimau?

• O le a se mea e mafai ona tatou aoaoina e uiga i le Faaola mai nei molimau? O le a le eseesega e faia e le taulai atu i le Faaola pe a tatou faasoa atu molimau? (Fesoasoani i tagata aoga ia malamalama tatou te faamalolosia isi a o tatou aoao atu ma molimau atu ia Iesu Keriso.)

• E faapefea ona uunaia oe e ala i molimau a isi e uiga i le Faaola?

E mafai ona tou faitauina faatasi ma faasoa i le saunoaga lenei a Elder Neil L. Andersen:

Faatasi ai ma i latou o siomia i tatou, ia faateleina ona tatou talanoa faamaoni, ma faateleina le naunau e talanoa e uiga ia Keriso. …

Ia atili faamaoni i ala o faasalalauga faaagafesootai i le talanoa e uiga i lou faatuatuaina o Keriso. …

O nisi o ō tatou uso ā Kerisiano e i ai taimi, e lē mautonu ai i o tatou talitonuga ma popole i o tatou faamoemoega. Ia tatou olioli moni faatasi ma i latou i lo tatou faatuatua tuufaatasi ia Iesu Keriso ma i mau o le Feagaiga Fou lea tatou te fiafia uma i ai. …

A o faaitiitia le tautatala o le lalolagi e uiga ia Iesu Keriso, tau ina ia faateleina lo tatou tautatala e uiga ia te Ia. A o faaali atu o tatou lanu (uiga) moni o ni Ona soo, o le toatele o loo siomia i tatou o le a saunia e faalogo. (“Ua Matou Tautalatala e Uiga ia Keriso,” Liahona, Nov. 2020, 90)

Tuu atu i le vasega se minute e mafaufau loloto ai i lenei fesili: O ai atonu e manaomia ona faalogo i lau molimau i le Faaola?

Ta’u i ai o le faasoaina atu o a tatou molimau ia Iesu Keriso o se faailoaga lea o le faatuatua. E mafai ona aofia ai mea ua tatou iloa, talitonu, ma faamoemoe ia moni. Valaaulia tagata aoga e tusi a latou molimau ia Iesu Keriso pe fatu se vitio i luga o a latou telefoni. Ona mafai lea ona latou faasoa mea na latou tusia pe faamaumauina i se isi tagata o le vasega, tesi pe imeli atu i se uo, pe tuu i luga o ala o faasalalauga faaagafesootai.

Toe foi i le “Filifiliga o Gaoioiga e Aoao Ai.”

Valaaulia tagata aoga e mafaufau loloto ma tusi faapuupuu se lu’itau o loo feagai ma i latou i le taimi nei. Fautuaina i latou e tusi ni manatu i le taimi o lenei gaoioiga e aoao ai e mafai ona fesoasoani ia i latou i o latou luitau.

E mafai ona e faaali atu le ata lenei ma faamatala atu ina ua “faufautane Maria ia Iosefa” (Mataio 1:18), sa la’ua ulu atu i se maliega e ta’ua o le faaipoipoga. Ina ia malamalama i matafaioi o le faaipoipoga, mafaufau e toe faamanatu faatasi ma le vasega le “Mataio 1:18. O le a le uiga o le faufautane?” i le Fesoasoaniga a Tusitusiga Paia: Feagaiga Fou.

Mafaufau e tuu tagata aoga i ni paga. E mafai e se tasi tagata ona faitau e uiga ia Iosefa i le Mataio 1:18–25, ae faitau le isi e uiga ia Maria i le Luka 1:26–38. Faaali atu fesili nei, ma valaaulia tagata aoga e talanoaina:

• O le a le luitau na u e lenei tulaga mo Maria? Ae a Iosefa? (tagai “Mataio 1:18–25. O a ni filifiliga na i ai ia Iosefa ina ua ia iloa ua maitaga Maria?” i le Fesoasoaniga a Tusitusiga Paia: Feagaiga Fou).

• O le a se mea e mafai ona tatou aoaoina e uiga i le taulimaina o tulaga faigata mai le ala na tali atu ai Maria ma Iosefa i o laua tulaga? (Atonu e faailoa mai e tagata aoga se upumoni e pei o lenei: E mafai ona tatou faia mea faigata a o tatou saili ia iloa ma gauai atu i le finagalo o le Atua. [Manatua: O le upu “manatunatu” i le Mataio 1:20 e sau mai le upu Eleni enthymeomai, o lona uiga o le manatu pe mafaufau loloto.])

• O a faamanuiaga na oo mai ia Maria ma Iosefa ona sa la filifili e gauai atu o la loto i le Atua?

A uma ona talanoaina e paga nei fesili, valaaulia tagata aoga e faasoa mai o latou manatu i le vasega.

Mafaufau e faasoa atu le tasi po o faamatalaga uma e lua ma fesili e faatatau i ai e fesoasoani ai i tagata aoga e faia faatinoga amiotonu i o latou olaga.

A o tatou mafaufau i tamaitai o o latou faatosinaga amiotonu e galugalu atu i le faavavau, sei o tatou mafaufau ia Maria, le “ipu pele ma filifilia” (Alema 7:10). Na tuuina mai e se agelu se folafolaga maoae ma paia, sa ia gauai atu ma le agalelei i le finagalo o le Alii: “Faauta, o a’u nei o le auauna a le Alii; ia faia ia te a’u e tusa ma lau fetalaiga” (Luka 1:38). O lona faatuatua, usiusitai, ma le lotomaualalo ua faatuina ai se tagavai mo tamaitai uma. (Virginia U. Jensen, “Ripples,” Ensign, Nov. 2000, 93)

• E mafai faapefea e le gauai atu ma le agalelei i le finagalo o le Alii ona fesoasoani ia te oe i se luitau o feagai ma oe?

• O ai se Maria o aso nei e te iloa? O le a se mea ua e aoaoina mai lana faataitaiga?

Ua ta’u mai e Mataio ia i tatou e faapea … O [Iosefa] o se alii faamaoni ma le magafagafa, ma na ta’u atu ia te ia e se agelu i le miti o ai o le a avea ai Iesu, ma sa usitai o ia, ma sa ia tuu atu ia Iesu lona suafa, o lona faauigaina o le faaola. (Tagai Mataio 1.) Ua tatou iloa na ia aveina Maria i Peteleema, lea na fanau ai Iesu. (Tagai Luka 2:4–6.) E lei atoa se lua tausaga mulimuli ane, ae ave e Iosefa lona aiga i Aikupito e sosola ese ai mai ia Herota, ina ua lapataia o ia i se miti. I Aikupito, sa toe ta’u atu foi ia te ia i se miti le taimi e toe foi ai, ma i se isi foi miti na ta’u atu ai ia te ia e o i Kalilaia. (Tagai Mataio 2:13–15, 19–22.) Fa miti mai le Atua! Atonu o Iosefa o se tagata mau faaaliga tulagaese ma se tagata nofouta faaleagaga. (Gerald N. Lund, O Iesu Keriso, o le Ki i le Ata o le Faaolataga [1991], 51)

• E mafai faapefea e le sailia ma le mauaina o faaaliga mai le Tama Faalelagi ona fesoasoani ia te oe i se luitau o feagai ma oe?

• O ai se Iosefa i ona po nei e te iloa? O le a se mea ua e aoaoina mai lana faataitaiga?

Valaaulia tagata aoga e faailoa mai se mea na latou aoaoina mai amioga po o uiga faa-Keriso o Maria po o Iosefa e mafai ona faatatau i o latou tulaga. Ia fautuaina tagata aoga e tusifaamaumau ma galulue i soo se uunaiga latou te maua.

Toe foi i le “Filifiliga o Gaoioiga e Aoao Ai.”