Tusi lesona a le Faiaoga Inisitituti o le Feagaiga Fou

O lesona taitasi e maua ai manatu mo le uunaia o suesuega faaletagata lava ia. Na aoao mai Peresitene Russell M. Nelson:

O le faatofuina i aso taitasi i le afioga a le Atua e taua tele mo le ola faaleagaga, aemaise lava i nei aso o le faatupulaia o suiga faigata. A o tatou taumamafa ai i afioga a Keriso i aso taitasi, o le a ta’u mai e afioga a Keriso ia i tatou le auala e tali atu ai i faigata tatou te le’i mafaufauina o le a tatou fetaia’i. (”Fa’alogo ia te Ia,” Liahona, Me 2020, 89)

Mafaufau i auala e valaaulia ai, uunaia, ma fesoasoani i tagata aoga e suesue a latou tusitusiga paia i le vaiaso atoa. Mo se faataitaiga, e mafai ona e auina atu ni savali e fesoasoani i tagata aoga e suesue ai le poloka mau ua atofaina mo le vaiaso ma o mai i le vasega ua saunia e faasoa mai ni fesili ma ni malamalamaaga. O manatu mo savali o loo maua i le amataga o otootoga o lesona taitasi. E masani ona fesootai ma se tasi o filifiliga o gaoioiga e aoao ai i le lesona.

Mo se faataitaiga, o manatu nei o savali e mafai ona e auina atu i tagata aoga o loo suesueina le Ioane 1:

• Mafaufau loloto i mea e mafai ona e aoaoina e uiga ia Iesu Keriso mai Ana matafaioi ma faalagiga na e faailoa mai i le Ioane 1:1–14.

• Faitau le Ioane 1:35–51 e aoao ai pe aisea e tāua ai le valaaulia o isi e o mai ia Keriso. Mafaufau e valaaulia se tasi lua te auai i le inisitituti i le vaiaso lenei.

E mafai foi ona e iloiloina manaoga o tagata aoga e ala i le valaauliaina o i latou e lafo mai ia te oe ni a latou fesili e uiga i le poloka mau. I isi fesootaiga, e mafai ona e valaaulia tagata aoga e amata ona talanoaina se autu ma tagata o le vasega a o lei amataina le vasega. Mafaufau i ni auala e fesoasoani ai i tagata aoga e ausia a latou sini mo suesuega ma maua ai se alofa loloto atu mo a latou lava suesuega patino o tusitusiga paia.

Tuu atu se taimi mo tagata aoga e fai mai ai fesili ma faasoa mai ni malamalamaaga ma ni aafiaga. E mafai ona fesoasoani lenei mea ia i latou e fesootai ai tusitusiga paia i o latou olaga. E mafai ai foi ona e iloiloina lelei manaoga ma faanaunauga o tagata aoga. Atonu o se taimi lelei lenei e tulitatao ai valaaulia ma aafiaga mai le vasega ua mavae.

O le tuuina atu o se taimi mo tagata aoga e fai mai ai fesili ma faasoa mai ni malamalamaaga e uiga i le poloka mau e mafai ai foi ona latou uunaia le taitaiga o le talanoaga. E tatau ona fetuutuunai le aofaiga o le taimi e faaalu e faasoa atu ai. O le a manaomia ona e iloa le taimi e fesoasoani ai i tagata aoga e agai atu i se tasi o gaoioiga e aoao ai, lea e mafai ona fesoasoani i tagata aoga e faaaoga ai mea o loo latou talanoaina.

Ina ia uunaia fesili ma le faasoaina atu, mafaufau i auala nei e amata ai le gaoioiga:

• Toe iloilo savali na e auina atu i tagata aoga i le aluga o le vaiaso po o soo se fesili na latou auina atu ia te oe.

• Faaali atu ni ata po o ni upu e faaalia ai mea na tutupu po o aoaoga autu i le poloka mau.

• Fesili atu i tagata aoga po o a fesili po o malamalamaaga latou te fia talanoaina.

E mafai ona e valaaulia tagata aoga e fai ni fesili ma faasoa atu ni malamalamaaga o se vasega, i ni vaega toalaiti, faatasi ma se paga, po o isi auala fatufatuai, e pei o le faaaogaina o ala o faasalalauga faaagafesootai. Mafaufau e tuu atu i tagata aoga sina taimi e iloilo ai pe suesue ai le poloka mau ae latou te lei faasoa mai.

Manatua: Afai e i ai se fesili po o se malamalamaaga patino e taitai atu ai i se mea e tatau ona fai, vaavaai mo ni auala e toe faafoi atu ai le talanoaga i upumoni autu o loo i tusitusiga paia. Ma le isi, atonu e sili atu le taliina o nisi o fesili pe a uma le vasega po o le maea ai o se suesuega faaopoopo. E le afaina le faapea atu, “Ou te le iloa. Sei o tatou suesue atili i lenei mea ma vaai po o le a se mea e mafai ona tatou aoaoina a o lei amataina le isi vasega.”

Mafaufau pe faapefea ona suia olaga o tagata aoga a o avea i latou ma tagata aoao o le talalelei e sili atu ona ola tutoatasi. A mafai ona latou aoao mo i latou lava, e mafai ona latou latalata atili atu i le Faaola. O le fesoasoani i tagata aoga e faaleleia atili lo latou tomai e aoao ai mo i latou lava, o le totonugalemu lea o aoaoga faaKeriso.

E fesoasoani lenei kosi i tagata aoga e atiina ae tomai o le a faateleina ai lo latou gafatia e malamalama ai ma talanoa e uiga i tusitusiga paia. E masani lava o nei tomai e tuufaatasia i gaoioiga e aoao ai ina ia aua nei faalavelaveina ai le faagasologa o le lesona. Mo nisi fesoasoani i le faaaogaina o nei tomai, e mafai e faiaoga ma tagata aoga ona o i Tomai mo le Suesueina o Tusitusiga Paia i le Gospel Library. O lenei punaoa ua tuuina mai ai le taitaiga i le auala e faauigaina ai, faatino, ma faataitai ai tomai taitasi.

A o faataitai soo e tagata aoga nei tomai i le kosi atoa, o le a latou lagonaina le talitonuga sili atu i lo latou tomai e aoao ai mai tusitusiga paia. Saili se taimi e tulitatao ai ma valaaulia tagata aoga e faasoa mai o latou aafiaga e faaaoga ai nei tomai.

O lesona taitasi e aofia ai le tele o filifiliga o gaoioiga e aoao ai. Iloilo manaoga o tagata aoga, ma saili le taitaiga a le Agaga Paia a o e filifilia filifiliga o gaoioiga e aoao ai o le a sili ona lelei mo i latou. Faaalu se taimi e tatau ai e faaloloto ai le malamalama o tagata aoga ina ia mafai ona latou lagonaina le moni ma le taua o mea o loo latou aoaoina. E masani lava ona tele atu filifiliga o gaoioiga e aoao ai nai lo le mea e mafai ona aofia ai i se vasega se tasi, o lea aua nei e manatu e tatau ona e faaaogaina uma.

O le lesona muamua i anomea a faiaoga e mafai ona faaaoga i le aso muamua o le vasega i soo se taimi e te amata ai i le aluga o le tausaga. E mafai ona fesoasoani lenei lesona i tagata aoga e fatu ai se siosiomaga saogalemu e aoao ai, faatu ni sini mo a latou lava aoaoga, ma suesue se vaaiga aoao o Evagelia po o Galuega e oo i le Faaaliga.

Pe a aoao atu le anomea i le faasologa, filifili i le va o gaoioiga e aoao ai e tutusa ma le poloka suesue mo le vaiaso. Mo se faataitaiga, i le vaiaso 4, e mafai ona e faaaogaina gaoioiga e aoao ai e aofia ai upumoni o loo maua i le Mataio 19–25 i anomea a faiaoga.