Luka 22; Ioane 18

Faaali atu ata nei, ma valaaulia tagata aoga e faasoa mai nisi o aafiaga taua na maua e Peteru ma le Faaola.

• O le a le mea na iloa e Peteru e uiga i le Faaola e ala i nei aafiaga?

Faitau faatasi le Luka 22:31–32, ma vaavaai mo mea e sili atu ona manaomia ona tutupu i le olaga o Peteru a o lei mafai ona ia faamalosia isi. Fesoasoani i tagata aoga e faailoa mai le upumoni lenei: A o tatou liua moni, tatou te faateleina lo tatou gafatia e faamalosia ai isi i lo latou faatuatua ia Iesu Keriso. (Afai e manaomia e tagata aoga le fesoasoani e malamalama ai i le fuaiupu e 31, faasino i latou i le “Luka 22:31. O le a le uiga o le lulu e pei o le saito e Satani?” i le Fesoasoaniga o Tusitusiga Paia: Feagaiga Fou.)

• Aisea e taua ai le iloa na tatalo le Faaola mo le faatuatua o Peteru? O le a sou lagona i le iloaina sa tatalo foi le Faaola mo oe? (tagai Ioane 17:20).

• O a ni auala e ono aafia ai lou gafatia e faamalosia ai isi ona o le liua patino?

Mafaufau e faasoa atu le saunoaga lenei mai ia Peresitene Dallin H. Oaks po o le matamata i le “Faamalosia Ou Uso” (1:48).

1:48

Ina ia faamalosiau atu i ona uso—ina ia fafaga ma taitai le lafu a le Atua—o lenei tamalii [Peteru] o le na mulimuli ia Iesu mo le tolu tausaga, o le na tuuina atu i ai le pule o le au aposetolo paia, o le na avea ma se faiaoga lototoa ma molimau o le talalelei Kerisiano, ma o lana molimau na mafua ai ona tautino mai o ia e le Matai o se ua faamanuiaina ae sa manaomia pea ona ‘liuaina.’

O le lui a Iesu ua faaalia ai o le liua Na te manaomia mo i latou o e ulufale atu i le malo o le lagi (tagai Mata. 18:3) e sili atu nai lo le na ona liua e molimau atu ai i le moni o le talalelei. O le molimau atu o le iloa ma ia tautino atu. Ua luitauina i tatou e le talalelei ina ia “liua,” lea e manaomia ai lo tatou faia ma avea ai. Afai e i ai se tasi o i tatou e faalagolago na o lo tatou lava malamalama ma le molimau i le talalelei, o loo tatou i ai i le tulaga lava e tasi e pei o Aposetolo sa faamanuia i ai ae le’i atoatoa lea na luitauina ai e Iesu e ao ina “liua.” Tatou te iloaina uma se tasi o le e i ai se molimau malosi ae e le faatinoina ina ia liuaina. (“The Challenge to Become,” Ensign, Nov. 2000, 33)

• Aisea e taua ai le malamalama i le eseesega i le va o le iloa e uiga ia Keriso ma le liua ia te Ia?

• O a ni faatinoga ua fesoasoani ia te oe e liua atili ai i le Faaola? (Faamanatu i tagata aoga ia aua nei le amanaiaina mea laiti ma faatauvaa e uunaia ai le liua.)

Mafaufau e valaaulia tagata aoga e mafaufau e uiga i se tagata latou te iloa ua liua moni i le Alii. Vaevae tagata aoga i ni faigapaaga po o ni vaega toalaiti, ma valaaulia tagata aoga taitasi e talanoa e uiga i le tagata na latou faailoaina. E mafai ona latou talanoaina pe na faapefea e le liua o lena tagata i le Faaola ona uunaia ai i latou.

Uunaia tagata aoga e faamaumau pe faapefea ona latou faalolotoina lo latou liua ia Iesu Keriso ma Lana talalelei ina ia mafai ona latou saunia lelei e faamalosia isi.

Toe foi i le “Filifiliga o Gaoioiga e Aoao Ai.”

Mafaufau e faaali atu i tagata o le vasega se ata se tasi pe sili atu o ata nei o Iesu Keriso o loo tatalo i le Faatoaga o Ketesemane. Faamalamalama atu faapea i Ketesemane, ma mulimuli ane i Kalevaria, na oo ai Iesu Keriso i puapuaga e le mafai ona malamalama i ai o se vaega o Lana taulaga togiola. Valaaulia ni nai tagata aoga e faasoa mai mea latou te vaaia ma lagonaina pe a latou vaai i nei ata o le puapuagatia o le Faaola.

Valaaulia tagata aoga e faatulaga ni vaega toalaiti e le itiiti ifo ma le toatolu tagata. Tuu atu i tagata taitoatasi o le vaega e faitau le Luka 22:39–46; Mataio 26:36–41; po o le Mareko 14:32–38, ma vaavaai mo mea e mafai ona tatou aoaoina e uiga i le aafiaga o le Faaola. Valaaulia tagata aoga e faasoa atu i le tasi ma le isi mea ua latou maua. Atonu e faailoa mai e tagata aoga ni malamalama’aga e pei o lenei: Sa faamalosia Iesu e se agelu a o Ia puapuagatia. Ina ua tiga, sa tatalo atili Iesu Keriso ma le faatauanau. Sa matua malosi lava mafatiaga o le Faaola ma sa afu ai o Ia i mataua tetele o le toto. Sa gauai atoatoa atu Iesu i le finagalo o le Atua, e tusa lava pe na lofituina o Ia i mafatiaga.

Faailoa atu e ui o nei fuaitau o mau ua aoaoina ai i tatou e uiga i mea na tutupu i Ketesemane, ae o mau o le Toefuataiga ua faaalia mai ai upumoni taua e uiga i mea na ausia e le Faaola. Ina ia iloa nei upumoni, valaaulia tagata aoga e faataitai le tomai o le “Faaaogaina o Tusitusiga Paia o le Toefuataiga e Malamalama ai i le Tusi Paia” i le Tomai mo le Suesueina o Tusitusiga Paia. E mafai ona faaaoga e tagata aoga vaefaamatalaga, le vaega o le sailiga i le Gospel Library, po o le Taiala i Tusitusiga Paia (tagai i le “Toto,” “Togiolaina, Togiola,” po o “Ketesemane”). Pe mafai foi ona e fautuaina tagata aoga e suesue le Mosaea 3:7; 15:9; Alema 7:11–13; ma le Mataupu Faavae ma Feagaiga 19:16–19. Valaaulia tagata aoga e vaavaai mo mea ua faaopoopo e nei mau i lo latou malamalamaaga e uiga i le Togiola a le Faaola.

A uma ona tuu se taimi mo suesuega, valaaulia tagata aoga e faamaumau i luga o le laupapa upumoni na latou mauaina. E mafai ona faailoa mai e tagata aoga upumoni e pei o upumoni nei: Na mafatia Iesu Keriso i tiga e le mafai ona malamalama i ai mo a’u agasala ina ia mafai ona ou salamo (tagai Mosaea 15:9; Mataupu Faavae ma Feagaiga 19:16–19). Sa mafatia Iesu Keriso i tiga o ituaiga uma ina ia mafai ona Ia malamalama mai ia te a’u ma fesoasoani mai ia te a’u i o’u vaivaiga (tagai Mosaea 3:7; Alema 7:11–13).

Mafaufau e talanoaina ia fesili nei:

• E faapefea e nei upumoni mai mau o le Toefuataiga ona uunaia le auala e te vaai ai i le Faaola?

• O le a le uiga ia te oe o le aafiaga o le Faaola i le Faatoaga o Ketesemane, ma mulimuli ane i luga o le satauro?

• E mafai faapefea e le malamalama ma le mafaufau loloto i mea na mafatia ai le Faaola mo oe ona uunaia ou lagona e uiga ia te Ia?

E mafai foi ona e faaali atu ma talanoaina le saunoaga lenei a Peresitene Russell M. Nelson:

A o ou tauivi ma le tiga matuitui na mafua ona o lo’u manu’aga talu ai nei, sa ou lagona loloto atili ai le talisapaiaina o Iesu Keriso ma le meaalofa lemafaamatalaina o Lana Togiola. Mafaufau i ai! Sa puapuaga le Faaola i “tiga ma mafatiaga ma faaosoosoga o ituaiga uma”[Alema 7:11] ina ia mafai ona Ia faamafanafana i tatou, faamalolo i tatou, laveai i tatou i taimi e manaomia ai. (“Mafaufau Faaselesitila!,” Liahona, Nov. 2023, 117)

Valaaulia tagata aoga e mafaufau loloto pe faapefea ona latou faaalia le agaga faafetai mo mafatiaga o le Faaola mo i latou. E mafai ona latou tusia i lalo mea o loo latou mafaufau i ai. Uunaia i latou e faatino uunaiga e oo mai ia i latou. (E mafai ona e taina le viiga “Ou Te Tu ma Ofo” [Viiga, nu. 107] a o latou mafaufau loloto pe tusitusi.)

Toe foi i le “Filifiliga o Gaoioiga e Aoao Ai.”

Fai atu i tagata aoga e faasoa mai ni faataitaiga o mafatiaga na feagai ma i latou po o tagata latou te iloa.

• E mafai faapefea e mafatiaga ona aafia ai o tatou olaga?

• E mafai faapefea e mafatiaga ona aafia ai lo tatou naunau e fai le finagalo o le Atua?

Faamalamalama atu faapea, i le va o Ona puapuaga i le Faatoaga o Ketesemane ma Lona Faasatauroga, sa sauaina ma faasalaina Iesu e Ona fili. E mafai ona e faaali atu nisi o ata o nei mea na tutupu. (Tagai i ata i le vaega o “Ala o Faasalalauga” o le “Luka 22; Ioane 18” i le Fesoasoaniga mo Tusitusiga Paia: Feagaiga Fou.)

Faaali atu mea nei na tutupu, fuaitau o mau, ma fesili. Valaaulia tagata aoga e fai ni vaega toalaiti, filifili se tasi pe sili atu o mea nei na tutupu, faitau fuaiupu e fesootai ai, ona talanoaina lea o fesili o i lalo:

• Ua pu’e faapagotaina Iesu: Mataio 26:47–50; Luka 22:47–48; Ioane 18:1–12

• Ua faamasinoina Iesu i luma o faitaulaga sili: Luka 22:63–71

• Ua tausalaina Iesu e Pilato: Ioane 18:33–40

• O a mafaufauga ma lagona o loo e maua ao e mafaufau loloto i le aafiaga a le Faaola?

• O le a le mea na faagaeetia ai oe i le ala na tali atu ai le Faaola i tagata na sauaina o Ia?

• O le a se mea ua e aoaoina mai le Faaola e uiga i le tali atu i faigata?

A uma ona faitau ma talanoaina e tagata aoga ia fesili, e mafai ona e faaali atu le upumoni lenei: Pe a feagai ma faigata tetele, sa tumau le faamaoni o Iesu Keriso i Lana misiona paia ma Lona valaauga. Ia talanoaina fesili nei faatasi o se vasega:

• Aisea e te manatu na mafai ai e Iesu Keriso ona taulai atu pea i Lana misiona paia e ui lava i faigata na feagai ma Ia? (I le avea ai o se vaega o lenei talanoaga, e mafai ona e valaaulia tagata aoga e suesue le 1 Nifae 19:8–9. E mafai ona latou vaavaai mo mea na aoao mai e Nifae e uiga i le mafuaaga na naunau ai le Faaola e onosaia na ituaiga o faiga saua ma le le tonu.)

• O le ā le mea e fesoasoani iā te oe e taula’i atu ai pea i faamoemoega a le Atua mo oe?

• Na faapefea ona faamanuiaina oe i le filifili e mulimuli i le finagalo o le Tama Faalelagi, e tusa lava pe na e feagai ma mafatiaga?

Valaaulia tagata aoga e mafaufau pe faapefea ona latou mulimuli i le faataitaiga a le Faaola o le faataunuuina o faamoemoega o le Tama Faalelagi e tusa lava pe feagai ma faigata. E mafai ona e tuuina atu i tagata aoga se taimi e tusi ai e uiga i o latou uunaiga faaleagaga ma sini ua latou maua mo i latou lava.

Toe foi i le “Filifiliga o Gaoioiga e Aoao Ai.”