Mataio 27; Mareko 15; Luka 23; Ioane 19

E mafai ona e amataina le vasega i le faaali atu o ni nai ata o mafatiaga o le Faaola e tau atu ma i le taimi o le Faasatauroga. Valaaulia tagata aoga e faasoa mai o latou manatu ma lagona a o latou mafaufau i mea na Ia mafatia ai.

Tusi mau faasino nei i luga o le laupapa: Mataio 27:26–50; Mareko 15:15–37; Luka 23:33–46; Ioane 19:16–30. Tuu atu i tagata aoga e vaevae i ni vaega toalaiti. Valaaulia tagata taitoatasi o le vaega e faitau se fuaitau se tasi pe sili atu.

A uma ona tuu atu i tagata aoga se taimi e suesue ai, tuu atu i tagata o le vaega e talanoaina e le tasi ma le isi o latou manatu ma lagona a o latou faitau e uiga i mafatiaga o le Faaola.

Mafaufau e faasoa atu ma talanoaina se mea e pei o le ata faataitai lenei:

• E faapefea ona e tali atu i lenei fesili?

• O a ni mau atonu e sili ona fesoasoani e tali ai lenei fesili?

Faamalamalama atu o nisi o fuaitau e sili ona malamalama i ai e uiga i le mafuaaga na puapuagatia ma maliu ai Iesu Keriso, e mafai ona maua i tusitusiga paia o le Toefuataiga (tagai i le “Faaaogaina o Tusitusiga Paia o le Toefuataiga e Malamalama ai i le Tusi Paia” i le Tomai mo le Suesueina o Tusitusiga Paia). Tusi mau faasino nei i luga o le laupapa: 2 Nifae 9:21–23; Alema 7:12–14; Helamana 14:15–18; 3 Nifae 11:11–14; Mataupu Faavae ma Feagaiga 19:16–19.

Valaaulia tagata o le vaega e faitau se tasi o fuaitau, ma vaavaai mo mea o loo aoao mai e fuaiupu e uiga i le mafuaaga na mafatia ma maliu ai Iesu Keriso. A uma ona tuu atu i tagata aoga se taimi e suesue ai, fai atu i tagata o le vaega e faasoa atu i le tasi ma le isi mea na latou maua.

Mafaufau e talanoaina o se vasega le fesili lenei:

• Aisea e taua ai le faaaofia ai o mau o le Toefuataiga i la tatou suesuega o le soifuaga o le Faaola?

• O a upumoni na e mauaina i nei fuaitau o mau o le Toefuataiga e uiga i le mafuaaga na mafatia ma maliu ai Iesu Keriso? (O tali e mafai ona aofia ai upumoni e pei o nei: Sa mafatia Iesu Keriso i tiga ma puapuaga o ituaiga uma ina ia iloa ai e Ia le auala e fesoasoani ai, faamalolo, ma faamalosia ai i tatou. Sa puapuagatia Iesu Keriso ma maliu ina ia faataunuuina le Toetu o e ua maliliu. Na puapuagatia Iesu Keriso ina ia mafai ona tatou salamo ia tatou agasala.)

• E faapefea e nei upumoni ona uunaia le auala e te mafaufau ma lagona ai e uiga i mafatiaga ma le Faasatauroga o le Faaola?

Mafaufau e faaali atu le saunoaga lenei a Epikopo Gérald Caussé:

E ui e le iu ma e lautele lona aafiaga, ae o le Togiola a le Alii o se meaalofa ofoofogia patino ma vavalalata, e talafeagai mo i tatou taitoatasi. E pei lava ona valaaulia e Iesu soo taitoatasi o sa Nifae ia tagotago i Ona manu’a, sa faapea foi ona Ia maliu mo i tatou taitoatasi, patino, e peiseai na o oe po o a’u le tagata na i ai i le lalolagi. Ua Ia tuuina mai ia i tatou se valaaulia patino ia o atu ia te Ia ma utuvai mai faamanuiaga ofoofogia o Lana Togiola. (“O Se Molimau Ola o le Keriso Soifua,” Liahona, Me 2020, 40)

• Aisea e taua ai le malamalama na puapuagatia ma maliu Iesu Keriso mo oe lava ia?

• O le a se mea e mafai ona e faia e faaalia ai lou lotofaafetai mo le puapuagatia o le Faaola mo oe? (Fautuaina tagata aoga e tusifaamaumau o latou manatu ma uunaiga.)

Toe foi i le “Filifiliga o Gaoioiga e Aoao Ai.”

Valaaulia tagata aoga e mafaufau i le taimi mulimuli na latou oo ai i se tulaga atuatuvale. Ona fai atu lea ia i latou e mafaufau i mea e mafai ona tatou aoaoina e uiga i o tatou lava uiga pe a tatou feagai ma faigata.

Mafaufau e faaali atu le ata lenei o le Faasatauroga o le Faaola. Atonu e te manao e faasoa puupuu atu pe na faape’i le faasatauroga e ala i le toe iloiloina o le “Mataio 27:22–50. O le a se mea ua tatou iloa e uiga i le faasatauroga?” i le Fesoasoaniga mo Tusitusiga Paia: Feagaiga Fou.

Faailoa atu o amioga ma fetalaiga a le Faaola a o Ia oo i le atuatuvale ma mafatiaga e le mafaatusalia i luga o le satauro e aumaia ai ia i tatou se malamalamaaga i Lona uiga paia.

Tusi mau faasino nei i luga o le laupapa. (aua nei aofia ai upu o loo i totonu o puipui). Valaaulia tagata aoga e suesue i fuaitau nei o mau ma faailoa mai fetalaiga mulimuli a le Faaola. Tuu atu i ni nai tagata aoga e tusi fetalaiga a le Faaola i luga o le laupapa i talaane o a latou mau faasino e faatatau i ai.

• Luka 23:34 (“Lou Tamā e, ia e faamagaloina atu ia te i latou; auā ua latou le iloa le mea ua latou faia.”)

• Luka 23:43 (“E moni, ou te fai atu ia te oe, o le asō ta te faatasi ai ma oe i parataiso.”)

• Ioane 19:26–27 (Sema e, faauta, o lau tama! … Faauta, o lou tinā”)

• Mataio 27:46 (“Lo’u Atua e, lo’u Atua e, se a le mea ua e tuulafoai mai ai a’u?”)

• Faaliliuga a Iosefa Samita, Mataio 27:54 (i le Mataio 27:50,vaefaamatalagaa) (“Tama e, ua mae’a, ua faia lou finagalo.”)

• Ioane 19:28 (“Ou te fia inu.”)

• Ioane19:30 (“Ua taunuu.”)

• Luka 23:46 (“Lo’u Tama e, ou te tuuina atu lo’u nei agaga i ou aao.”)

Valaaulia tagata aoga e faasoa mai mea latou te iloa e taua e uiga i fetalaiga mulimuli na faamaumauina a le Faaola. (O faamatalaga nei i Fesoasoaniga o Tusitusiga Paia: Feagaiga Fou e mafai ona fesoasoani e faatamaoaigaina ai la outou talanoaga: “Mataio 27:46. Aisea na lagona ai e Iesu le tuulafoaiina?” ma le “Ioane 19:30. O le a le mea e taua i le folafolaga a le Faaola, ‘Ua maea’?”)

• O le a se mea e mafai ona aoao atu e fetalaiga a le Faaola ia te oe e uiga i Lona uiga a o puapuagatia o Ia i luga o le satauro? (E mafai ona faailoa mai e tagata aoga upumoni e pei o nei: E ui lava ina sa feagai o Ia ma mafatiaga matautia, ae sa mafaufau Iesu Keriso i manaoga o isi. I le feagai ai ma faigata, sa tumau ai Iesu Keriso e oo i le iuga.)

• E faapefea e le iloaina o nei mea e uiga i le Faaola ona aafia ai ou lagona mo Ia?

Ina ia fesoasoani i tagata aoga ia malamalama i le uiga o le i ai o se uiga faaKeriso pe a feagai ma faigata, faitau ma talanoaina le saunoaga lenei a Elder David A. Bednar.

O uiga o tagata e faaalia i le vaavaai atu, liliu atu, ma le aapa atu i fafo atu ae o le tali masani o le tagata faalenatura o loo i totonu ia i tatou taitoatasi o le manatu o le tagata ia te ia lava ma ona manaoga faaloloto. … I Lana galuega atoa i le tino, aemaise lava i le taimi o mea na tutupu e tau atu i le taulaga togiola ma e aofia ai le taulaga togiola, na liliu atu ai le Faaola o le lalolagi i fafo—ae o le alii po o le tamaitai faalenatura o le toatele o i tatou semanu e taulai atu i totonu. (i le Sarah Jane Weaver, “Elder Bednar Urges Mission Leaders to Seek to Develop ‘Essential Elements of a Christlike Character,’” Church News, Iulai 9, 2019, newsroom.ChurchofJesusChrist.org)

E mafai ona e valaaulia tagata aoga e faailoa mai ni auala e mafai ona latou taulai atu ai i fafo a o latou feagai ma luitau o o latou olaga.

Toe foi i le “Filifiliga o Gaoioiga e Aoao Ai.”

Faaali atu le saunoaga lenei a Elder Ulisses Soares:

O le tamaitusi Mo Le Malosi o le Autalavou o loo i ai le fautuaga lenei … : “Ia i ai le lototele i amioga mama e tu mausali ai i le usiusitai i le finagalo o le Atua, e tusa lava pe e te tu na o oe” ([tamaitusi, 2011], 2). (“Ioe, E Mafai ma O Le a Tatou Manumalo!,” Liahona, Me 2015, 75)

• Aisea e taua ai le ola ma se lototele i amioga mama?

Faamalamalama atu e mafai ona tatou aoaoina ni lesona taua e uiga i le lototele i amioga mama e ala i le faatusatusaina o faatinoga a Iesu Keriso ma Ponotio Pilato (tagai i le “Vaavaai mo Faatusatusaga i Tusitusiga Paia” i le Tomai i le Suesueina o Tusitusiga Paia). Tuu atu i tagata o le vasega le pepa e tufa atu o loo avatu i i. E mafai ona latou galulue ma se paga pe ma se vaega toalaiti.

Faaali atu le upumoni lenei: Tatou te mulimuli i le faataitaiga a le Faaola o le lototele i amioga mama pe a tatou taumafai e fai le finagalo o le Atua i tulaga uma lava.

Valaaulia tagata aoga e faaaoga lenei upumoni e ala i le faia e i latou lava o se tasi pe sili atu o mea nei, i ni vaega toalaiti, po o se vasega:

• Fai se lisi o luitau faaagafesootai, aganuu, po o amioga mama e te feagai e ono manaomia ai le lototele i amioga mama.

• Talanoaina pe mafai faapefea ona e mulimuli i le faataitaiga a le Faaola ma atiina ae le lototele i amioga mama e fai ai le mea sa’o pe a feagai ma tulaga faigata.

• Faasoa atu ni aafiaga na fesoasoani ia te oe e atiina ae ai le lototele i amioga mama e fai ai le mea sa’o pe a feagai ma tulaga faigata.

• Faasoa atu ni faataitaiga o talavou matutua e te iloa o e na faaalia le lototele i amioga mama ina ua feagai ma tulaga faigata.

Ina ia uunaia tagata aoga e faatino mea ua latou aoaoina, e mafai ona e tuuina atu ia i latou se taimi e mafaufau loloto ai ma faamaumau pe faapefea ona latou faamaeaina le faamatalaga lenei: O le a ou mulimuli i le faataitaiga a le Faaola o le lototele i amioga mama e ala i le …

Toe foi i le “Filifiliga o Gaoioiga e Aoao Ai.”