1 Korinito 1–7

Tusi upu nei i luga o le laupapa: uarota (po o le paranesi), aiga, tagata faigaluega, tagata e potu faatasi, ma ala o faasalalauga faaagafesootai. Valaaulia tagata aoga e galulue faatasi ma se paga e filifili se tasi o upu o loo i luga o le laupapa ona talanoaina lea ma a latou paga pe faapefea ona tupu fevaevaeaiga ma finauga i lena nofoaga.

Faaali atu le saunoaga lenei a Peresitene Russell M. Nelson:

Na folafola mai e Iesu Keriso o i latou o e ua i ai “le agaga o finauga” e le mai ia te Ia [3 Nifae 11:29]. … O i latou o ē faaosoina le finauga ua latou faia foi le mea lea e faia e Satani, pe o latou iloaina pe leai foi. (“Ua Manaomia i Latou e Faatupuina le Filemu,” Liahona, Me 2023, 99)

Faamanatu i tagata aoga sa popole le Aposetolo o Paulo, e pei o Peresitene Nelson, i fevaevaeaiga ma finauga i le Au Paia i ona aso. Valaaulia tagata aoga e faitau le 1 Korinito 1:9–17 (tagai foi i le 1 Korinito 3:3–5; 4:6–7; 6:6–8), vaavaai mo mea na fai mai ai Paulo e uiga i fevaevaeaiga ma finauga ma le auala e faatoilalo ai. (E mafai foi ona e faitauina le “1 Korinito 1:10–17: Aisea na i ai fevaevaeaiga i totonu o le Au Paia i Korinito?” i le Fesoasoaniga mo Tusitusiga Paia: Feagaiga Fou mo se talaaga faaopoopo.)

Mafaufau e talanoaina ia fesili nei:

• O a ni mea na e vaaia i nei fuaiupu e mafai ona fesoasoani ia i tatou e faatoilalo ai fevaevaeaiga ma fefinauaiga? (E mafai ona faailoa mai e tagata aoga se mataupu faavae e pei o lenei mai le 1 Korinito 1:9–10: A o tatou sailia le mafuta faatasi ma Iesu Keriso, e mafai ona tatou faatoilaloina fevaevaeaiga ma finauga ma ia lotogatasi.)

• O le a sou manatu i le uiga o le mafuta faatasi ma Iesu Keriso? (O le mafuta faatasi e aofia ai se mafutaga vavalalata.)

• E mafai faapefea e le sailia o le mafuta faatasi ma Iesu Keriso ona fesoasoani ia te oe e lotogatasi ai ma isi tagata o le Ekalesia a le Faaola?

Faitau faatasi le faamatalaga lenei a Peresitene Russell M. Nelson:

I tulaga e maualuga ai le popolevale ma tumu i finauga, ou te valaaulia outou ia manatua Iesu Keriso.

… O le asō ou te valaaulia outou e suesue lou tulaga faaleso’o i totonu o le vaaiga i le auala e te taulimaina ai isi. Ou te faamanuia ia te oe ina ia e faia soo se fetuuna’iga e ono manaomia ina ia malualii, ma faaaloalogia lau amio, ma o se sui lava o se soo moni o Iesu Keriso. (“Ua Manaomia i Latou e Faatupuina le Filemu,” Liahona, Me 2023, 101)

Ina ia fesoasoani i tagata aoga e iloilo mea e mafai ona latou faia e faatoilalo ai fevaevaeaiga ma finauga, valaaulia i latou e faatumu le pepa e tufa atu “Faatoilaloina o Fevaevaeaiga ma Finauga”:

Afai e lava le taimi, e mafai ona e fai atu i nisi o tagata aoga e faasoa mai se savali na latou maua i le lauga o le konafesi aoao sa latou suesueina. Faamalosiau atu ia i latou e faasoa po o le a se mea o le a latou faia ona o mea ua latou aoaoina.

Toe foi i le “Filifiliga o Gaoioiga e Aoao Ai.”

E mafai ona e amataina i le faasoaina atu o le ata faataitai lenei:

Valaaulia tagata aoga e suesue i le 1 Korinito 2:9–16, ma vaavaai mo ni malamalamaaga e mafai ona fesoasoani ia Mati ia malamalama ai pe faapefea ona ia iloa o Iosefa Samita moni lava o se perofeta a le Atua. Mafaufau e fai atu nisi o fesili nei a o faasoa mai e tagata aoga mea na latou mauaina:

• O le a se savali mai nei fuaiupu e ono fesoasoani ia Mati e toe faatulaga ai le auala na te vaai ai i faaaliga, agelu, ma le faaliliuga o le Tusi a Mamona? (E mafai ona faailoa mai e tagata aoga se upumoni e pei o lenei: E mafai ona tatou iloa ma malamalama i mea a le Atua e ala i Lona Agaga.)

• O a upumoni ua e iloaina e ala i le Agaga Paia? Na faapefea e le aoaoina e ala i le Agaga ona uunaia lou faatuatua ia Iesu Keriso? O le a se mea ua e aoaoina e ala i le Agaga e uiga i le misiona a le Perofeta o Iosefa Samita?

• O le a se mea na e aoaoina e uiga i le uunaiga a le “tagata faalenatura” (fuaiupu 14) i a tatou taumafaiga e aoao upumoni faaleagaga? (Afai e aoga, e mafai ona e toe iloiloina le “1 Korinito 2:14–16. O le a le tagata natura?” i le Fesoasoaniga mo Tusitusiga Paia: Feagaiga Fou.)

Faasoa atu le saunoaga lenei mai ia Peresitene Russell M. Nelson, ma uunaia tagata aoga e vaavaai mo ni malamalamaaga faaopoopo e uiga i le auala e aoao mai ai e le Atua ia i tatou le upumoni:

A o e mafaufau loloto ma tatalo e uiga i se mataupu faavae faaleaoaoga faavae, o le a fesootai atu le Agaga Paia i lou mafaufau ma lou loto [tagai i le Mataupu Faavae ma Feagaiga 8:2]. Mai mea na tutupu i tusitusiga paia, o le a oo mai ni malamalamaaga fou ma o mataupu faavae e talafeagai ma lou tulaga o le a faamautu atu i lou loto.

E te atiinaeina ia aafiaga faafaaliga faapena e ala i le ola e tusa ai ma le malamalama ua uma ona tuuina atu ia te oe ma le suesueina o tusitusiga paia ma ni faamoemoega mamā—ma le manatu tonu e “sau ia Keriso” [Iakopo 1:7; Ominae 1:26; Moronae 10:30, 32]. Ao e faia lena mea, “[o le a] solo malosi ai lea o lou lototele i luma o le Atua,” ma o le a avea le Agaga Paia ma au soa e lē aunoa” [Mataupu Faavae ma Feagaiga 121:45–46]. (“Ola i le Taitaiga Faaletusi Paia,” Liahona, Nov. 2000, 18)

E mafai ona e valaaulia tagata aoga e faasoa mai mea latou te sili ona talisapaia mai le saunoaga a Peresitene Nelson.

Mafaufau e valaaulia tagata aoga e mafaufau loloto i aafiaga na latou maua ina ua aoaoina i latou i mea a le Atua e le Agaga Paia. E mafai ona e fautuaina i latou e filifili e fai se gaoioiga se tasi pe sili atu o gaoioiga nei pe fatu se latou lava manatu e faaaoga ai.

• Faasoa atu i se tagata faafesagai po o luga o ala o faasalalauga faa-agafesootai pe na faapefea ona e iloa mea a le Atua e ala i le Agaga Paia.

• Fatu se fuafuaga e mafai ona fesoasoani ia te oe e malamalama atili ai i mea a le Atua e ala i le Agaga Paia.

• Fuafua se taimi e faitau ai le savali a Peresitene Nelson “Faaaliga mo le Ekalesia, Faaaliga mo o Tatou Olaga” (Liahona, Me 2018, 93–96).

Toe foi i le “Filifiliga o Gaoioiga e Aoao Ai.”

E mafai ona e amata i le faaali atu o nisi o ata o malumalu ma faitau le “Malumalu, Maota o le Alii” i le Taiala i Tusitusiga Paia (Potutusi o le Talalelei).

• O le a le mea e avea ai se malumalu o se nofoaga mamalu ma paia?

• O le a se mea e mafai ona e faia e faaali atu ai o le malumalu o se nofoaga paia ia te oe?

Faamalamalama atu na faaaoga e Paulo le faatusa o se malumalu e taulima ai le agasala o le lē mama faalefeusuaiga, lea sa avea o se tauiviga mo nisi o tagata o le ekalesia i Korinito (tagai i le 1 Korinito 6:9–17; tagai foi i le palakalafa muamua o le “1 Korinito 6:13–19. O le a le tala a Paulo e uiga i le amio lē mamā faalefeusuaiga?” i le Fesoasoaniga mo Tusitusiga Paia: Feagaiga Fou).

Valaaulia tagata aoga e faitau le 1 Korinito 6:18–20, ma vaavaai pe na faapefea ona faaaoga e Paulo le faatusa o le malumalu e aoao atu ai le taua o le mama faalefeusuaiga.

• O le a le mea e taua i le faatusatusaina o o tatou tino i se malumalu?

• O le a le uiga o le “e le aiā foi outou ia te outou” ma le “ua faatauina outou i le tau”?

Afai e fesoasoani, atonu e te manao e faaalu sina taimi e faaloloto ai le malamalama o tagata aoga i le tau na totogi e Iesu Keriso e faatau mai ai i tatou. E mafai ona e tusia le upu togiola i luga o le laupapa ma faamatala atu o se tasi o uiga o lenei upu o le “toe faatau mai.” Vavae le laupapa i le afa, ma fai i tagata aoga e lisi mea uma latou te mafaufau i ai na togiolaina pe toe faatau mai e Iesu Keriso (mo se faataitaiga, agasala, oti, mafatiaga, mea sese, vaivaiga, ma isi mea faapena.) Ona valaaulia lea o i latou i le isi itu o le laupapa e tusi le tau na totogi e le Faaola e toe faatau mai ai na mea uma. (Atonu e te manao e faitau le 1 Peteru 1:18–19 ma le Mataupu Faavae ma Feagaiga 19:16–19.)

• E faapefea e le iloaina o le mea na totogi e Iesu Keriso e togiola ai oe ona aafia ai le auala e te vaai ma taulimaina ai lou tino? (Atonu e faailoa mai e tagata aoga se upumoni e pei o lenei: E tatau ona tatou faamamaluina le Atua i o tatou tino aua o i latou o le malumalu o le Agaga Paia ma ua faatauina i tatou i le tau o le Togiola a le Faaola.)

• E faapefea e le iloaina o nei upumoni ona aafia ai le auala e te vaai ai ma taulimaina ai lou tino?

Ina ia fesoasoani i tagata aoga e faaaoga mea o loo latou aoaoina, e mafai ona e faia ni koluma se lua i luga o le laupapa. Faailoga le koluma muamua O Talitonuga Faalelalolagi, Uiga Faaalia, ma Manatu e uiga i o Tatou Tino. Faailoga le koluma lona lua O Upumoni ua Faaalia Mai e le Atua e uiga i o Tatou Tino.

Faatulaga tagata aoga i ni vaega toalaiti. Valaaulia i latou e faasoa mai nisi o manatu o le lalolagi e uiga i le tino, ma tusi a latou tali i le koluma muamua i luga o le laupapa. Ona tuu atu lea i tagata aoga e talanoaina i a latou vaega nisi o upumoni ua faaalia mai e uiga i o tatou tino, e faavae i mea ua latou aoaoina mai ia Paulo. Afai e fesoasoani, e mafai ona latou vaavaai mo upumoni faaopoopo i punaoa a le Ekalesia e pei o nei:

• “E Paia Lou Tino” i le Mo le Malosi o le Autalavou: O Se Taiala mo le Faia o Filifiliga (2022)

• “Mama” i Autu ma Fesili (Potutusi o le Talalelei)

• Matamata le vitio “God’s Greatest Creation” (2:51).

  

  2:47

• Lauga o le konafesi aoao po o tusiga i mekasini a le Ekalesia (e mafai e tagata aoga ona faaaoga le matafaioi o le sailiga i le Potutusi o le Talalelei e su’e ai lauga talafeagai po o tusiga)

E mafai foi e tagata ua maua faaeega paia ona mafaufau pe faapefea e le ofuina o le ofusa o le malumalu ona fesoasoani ia i latou e faaalia ai le faaaloalo mo o latou tino ma manatua ai le Faaola i o latou olaga. E mafai ona latou vaavaai mo upumoni i punaoa a le Ekalesia e pei o nei:

• “Ofusa” i Autu ma Fesili

• “Ofuina o le Ofusa o le Malumalu,” vaega 26.3.3.2 i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai (Potutusi o le Talalelei)

A mae’a ona suesue tagata aoga, valaaulia i latou e faasoa mai mea na latou aoaoina mai a latou talanoaga faalevaega. A o faasoa mai e tagata aoga, e mafai ona e faatumuina le koluma lona lua i luga o le laupapa.

Ina ia faaiu la outou talanoaga, mafaufau e faitau le saunoaga lenei a Peresitene Russell M. Nelson:

O taimi taitasi e te autilo ai i le faaata, vaai i lou tino o lou malumalu. O lena upumoni—e faafouina ma le agaga faafetai i aso taitasi—e mafai ona faatosina ai mo le lelei au filifiliga e uiga i le auala o le a e tausia ai lou tino ma le auala o le a e faaaogaina ai. Ma o na filifiliga o le a fuafua ai lou taunuuga. (“O Filifiliga mo le Faavavau,” Liahona, Nov. 2013, 107)

• O le iloaina o le auala e vaai ai le Tama Faalelagi ma Iesu Keriso i lou tino o se malumalu, o le a se mea ese o le a e faia? (Tuu atu se taimi mo tagata aoga e tusifaamaumau ai o latou manatu ma uunaiga.)

Toe foi i le “Filifiliga o Gaoioiga e Aoao Ai.”