Mataio 21–23; Mareko 11; Luka 19–20; Ioane 12

E mafai ona e amata i le tusia i luga o le laupapa o le upu tuuto. Faamalamalama atu o lenei upu o lona uiga o le alofa mo, faatuatuaina, ma le faaaloalogia ma le faamaoni i se tagata po o se faamoemoega. Valaaulia tagata aoga e faasoa mai mea ua tuuto atu i ai tagata i o tatou aso.

• E te manatu e faape’ī foliga o le olaga o se tagata pe a tuuto atu o ia ia Iesu Keriso?

Mafaufau e faaali atu ata o loo i lalo. Faamalamalama atu a o lei ulufale atu ma le manumalo o Ia i Ierusalema, sa tu Iesu Keriso i Petania, lea na u’u ai e Maria Ona vae. O nei mea e tutupu e mafai ona tatou maua ai ni malamalama’aga taua e uiga i le auala e faaali atu ai le tuuto i le Faaola i le na o i tatou ma faalauaitele.

Faaali atu filifiliga nei o gaoioiga e aoao ai. Valaaulia tagata aoga e galulue ma se paga po o ni vaega toalaiti ma filifili se tasi o filifiliga nei:

• Filifiliga 1: Faitau le Ioane 12:1–8, ma talanoaina mea e mafai ona aoao mai e amioga a Maria ia i tatou e uiga i le tuuto. E mafai foi ona e suesueina le “Ioane 12:1–8. O le a le mea na taua i le u’uina e Maria o Iesu Keriso?” i le Fesoasoaniga mo Tusitusiga Paia: Feagaiga Fou.

• Filifiliga 2: Faitau le Mataio 21:1–11, ma talanoaina po o le a se mea e mafai ona aoao mai e lenei mea na tupu ia i tatou e uiga i le faaalia o le tuuto i le Faaola. E mafai foi ona e suesueina le “Mataio 21:1–11. O le a se mea na tulaga ese e uiga i le ulufale manumalo atu o le Faaola?“ i le Fesoasoaniga o Tusitusiga Paia: Feagaiga Fou.

A uma ona tuu atu i tagata aoga se taimi ia lava e faamaea ai la latou gaoioiga filifilia, valaaulia i latou e faasoa mai mea sa latou aoaoina e uiga i le tuuto atu i le Faaola. A o faasoa mai e tagata aoga a latou faamatalaga, mafaufau e fai atu nisi o fesili nei e fesoasoani e faaloloto ai lo latou malamalama:

• I lenei tala, o le a se mea ua faaalia mai e upu ma amioga a tagata e uiga i o latou lagona mo le Faaola? (E mafai ona faailoa mai e tagata aoga se upumoni e pei o lenei: E mafai ona tatou faaalia lo tatou alofa ma le tuuto ia Iesu Keriso e ala i a tatou upu ma amioga.)

• O a nisi o upu ma amioga e mafai ona faaalia ai lo tatou alofa ma le tuuto i le Faaola?

• O a ni ou lagona ina ua e faaalia le alofa ma le tuuto i le Faaola?

Mafaufau e tuu atu i tagata aoga se taimi e mafaufau ai i se mea se tasi e mafai ona latou faia e faailoa atu ai le tuuto sili atu i le Faaola i nofoaga faitele ma mo na o i latou lava.

Toe foi i le “Filifiliga o Gaoioiga e Aoao Ai.”

Mafaufau e talanoaina luitau o loo tuuina mai i le tala faataitai lenei:

A uma ona talanoaina le vaaiga faataitai ma tagata aoga, valaaulia i latou e faitau le Mataio 22:34–40, ma vaavaai mo upumoni na aoao mai e le Faaola e ono fesoasoani ia Maria. Mafaufau e fai atu se fesili se tasi pe sili atu o fesili nei:

• O a upu moni na aoao mai e le Faaola? Aisea e taua ai i latou? (Atonu e tau mai e tagata aoga se mea e talitutusa ma lenei: O le poloaiga muamua ma le sili o le alofa i le Atua ae o le lona lua o le alofa i o tatou tuaoi.) E mafai faapefea ona faatatauina nei upumoni i le tulaga o Maria?

• Aisea e te mafaufau ai mai poloaiga uma o loo i tusitusiga paia, atonu na ta’ua ai e le Faaola nei poloaiga e lua o poloaiga silisili?

• O le a se mea e ono tupu pe afai tatou te faamuamua le poloaiga lona lua nai lo le poloaiga muamua?

E mafai ona e vaevaeina tagata aoga i ni vaega toalaiti ma tuu atu ia i latou le pepa e tufatufa atu “Alofa i le Atua ma Isi.” Faailoa atu o lenei talanoaga e ono faailoa mai ai nisi o autu ma’ale’ale. Afai e manaomia, e mafai ona e iloiloina le tomai “Faasoaina Atu o Upumoni o le Talalelei ma le Alofa ma le Nofouta” i le Tomai mo le Suesueina o Tusitusiga Paia.

Mafaufau e tuu atu i tagata aoga se taimi e faasoa mai ai mea na latou aoaoina mai a latou talanoaga faalevaega ma fai mai ni fesili faaopoopo. Valaaulia tagata aoga e mafaufau loloto i mea e mafai ona latou faia e alolofa atili ai i le Atua ma o latou tuaoi.

Toe foi i le “Filifiliga o Gaoioiga e Aoao Ai.”

Mafaufau e faasoa atu le aafiaga lenei:

• O le a sou manatu i le iloiloga faaletagata lava ia a Damon?

Faamalamalama atu faapea i le Mataio 23, na fetalai ai Iesu Keriso ma le lototoa e uiga i taunuuga faaleagaga o le pepelo (tagai “Mataio 23:13–33. O le a le pepelo?” i le Fesoasoaniga mo Tusitusiga Paia: Feagaiga Fou). Valaaulia tagata aoga e faatulaga ni vaega toalaiti, ma tuu atu ia i latou le pepa e tufatufa atu “Ua Lapatai Mai le Faaola e uiga i le Pepelo” ina ia mafai ona latou faalolotoina lo latou malamalama i mea na aoao mai e le Faaola.

E mafai ona e valaaulia vaega taitasi e tusi i luga o le laupapa ia le itiiti ifo ma le tasi se upumoni po o se malamalama’aga na latou mauaina. O nisi o upumoni po o malamalama’aga e mafai ona aofia ai mea nei: O le pepelo o le le faatinoina lea o mea tatou te aoao atu. O le pepelo o le faaaogāina lea o faatusa faalelotu ina ia foliga mai e sili atu nai lo isi. O le pepelo o le taula’i atu lea i mea e lē taua ina ia ’alofia ai le faia o mea e sili ona tāua. O le pepelo o le faafoliga lea e sili atu ona amiotonu nai lo o le tulaga o loo tatou i ai. O le pepelo o le le amanaiaina lea o le tulaga moni o o tatou agaga.

Tuu atu i tagata aoga se taimi e mafaufau ai po o le fea upumoni e sili ona talafeagai i o latou olaga ma mafaufau pe faapefea ona latou faaaogaina. Valaaulia tagata aoga e mafaufau pe faapefea e le faataitaiga a le Faaola ona fesoasoani ia i latou e aloese ai mai le pepelo.

Valaaulia tagata aoga e toe iloilo le vaaiga faataitai mai le amataga o le gaoioiga ma talanoaina pe sa sa’o Damon i lana iloiloga faaletagata lava ia. E mafai ona e faasoa atu le saunoaga lenei a Brother Bradley R. Wilcox:

E le o oe o se tagata pepelo ona sa i ai sau mausa leaga o loo e taumafai e motusia. O oe o se tagata pepelo pe afai e te nanaina, e te talapepelo e uiga i lea mea, pe e te taumafai e faatalitonu oe lava ua i ai i le Ekalesia le faafitauli o le tausisia o ia tulaga faatonuina maualuluga na’ua. O lou faamaoni i au amioga ma faia laasaga e agai ai i luma e le o se tagata pepelo lena. O le avea lena ma se soo. (“O Le Agavaa E Le o le Atoatoa,” Liahona, Nov. 2021, 62)

Toe foi i le “Filifiliga o Gaoioiga e Aoao Ai.”

E mafai ona outou amata e ala i le faaali atu o le saunoaga lea a Sister Carol F. McConkie, sa avea ma Fesoasoani Muamua i le Au Peresitene Aoao o Tamaitai Talavou. Talanoaina faapuupuu pe na e lagonaina po o se tasi e te iloa le faamasinoina pe le taliaina i le lotu, aoga, galuega, po o le nuu:

Ou te iloa ni tagata e o mai i le lotu i Aso Sa uma ina ia mafai ona musuia ma faagaeetia, ma ua na o lo latou savavali ese atu ma lagona ua faamasinoina ma le lē alofagia ma e le manaomia, e pei e leai se avanoa mo i latou i le lotu. (“Siitiaina o Isi” [vitio], Gospel Library)

Faailoa atu faapea i le Feagaiga Fou, sa vaai faatauvaa tagata i telona e pei o Sakaio. (Ina ia aoao atili e uiga i le au telona, e mafai ona tuu atu i tagata aoga e iloilo le “Luka 5:27–30. Aisea na inosia ai telona e tagata Iutaia?” i le Fesoasoaniga mo Tusitusiga Paia: Feagaiga Fou.)

Valaaulia tagata aoga e faitau le Luka 19:1–10, ma vaavaai pe na faapefea ona taulimaina e Iesu ia Sakaio. Ina ia faalolotoina le malamalama o tagata aoga, mafaufau e fai atu ni fesili e pei o fesili nei:

• O le a se mea e mafai ona tatou aoao mai upu ma amioga a le Faaola e uiga i le auala e taulima ai i latou o e lagonaina le inosia, le alofaina, pe faamasinoina?

• O anafea na e vaai ai i se tasi o taulimaina se isi tagata i le alofa faaKeriso? O le a sou lagona i le mea na e vaaia?

• O le a se mea e mafai ona tatou aoao mai ia Sakaio e uiga i le mea e fai pe a tatou le lagonaina le alofagia pe taliaina e isi? (Fesoasoani i tagata aoga ia malamalama, e faapea, e tusa lava po o le a lo tatou tulaga faaagafesootai, afai tatou te sailia le Faaola, o le a tatou iloaina e silafia e Ia i tatou.)

E mafai ona e faitau ma talanoaina le saunoaga lenei mai ia Sister Sharon Eubank, o le sa avea muamua ma Fesoasoani Muamua i le Au Peresitene Aoao o le Aualofa:

Mo ni mafuaaga eseese, tatou [te lē] lagonaina le taliaina po o le talisapaiaina. O loo faaalia i le Feagaiga Fou taumafaiga tetele na faia e Iesu e aapa atu ai i ituaiga uma o tagata. … I le toetoe lava o tala uma, o loo Ia aapa atu i se tasi e le masani ona taliaina i faapotopotoga. …

… Na tuuina mai e Iesu lea lava ituaiga o valaaulia e tasi ia i tatou lea na Ia tuuina atu ia Sakaio: “Faauta, ou te tu atu i le puipui ma tuitui atu: [afai e te] faalogo mai i lo’u leo, ma tatala mai le puipui, ou te ulufale atu ia te [oe], ma te tali sua foi ma [oe], o [oe] foi ma a’u.” [Faaaliga 3:20]. E silafia i tatou e Keriso i la tatou laau. (“O Keriso: O Le Malamalama e Susulu i le Pogisa,” Liahona, Me 2019, 74)

Mafaufau e tuu atu i tagata aoga se taimi e mafaufau ai i se tasi latou te iloa atonu e le o lagonaina le taliaina. Valaaulia tagata aoga e mafaufau i mea e mafai ona latou faia e fesoasoani ai i lenei tagata ia iloa e silasila mai ma e silafia o ia e le Faaola. Pe afai foi e le lagona e tagata aoga le taliaina e isi, e mafai ona latou mafaufau i mea e mafai ona latou faia e iloa ai o loo silasila mai ma e silafia i latou e le Faaola.

Toe foi i le “Filifiliga o Gaoioiga e Aoao Ai.”