Mataio 21–23; Mareko 11; Luka 19–20; Ioane 12

O le ulufale manumalo o le Faaola i Ierusalema na faataunuuina ai le valoaga o le a tietie atu le Faaola i se tamai asini i Ierusalema o le Mesia folafolaina ma le Tupu o Isaraelu. Na ia ulu atu i Ierusalema i le mamanu a tupu anamua. A o tietie atu le Faaola i luga o se tamai asini i le mauga o le malumalu, sa alalaga tagata, “Osana.” Osana o se upu Eperu o “lona uiga o le ‘faamolemole laveai i matou’ ma o loo faaaogaina i viiviiga ma talosaga.” Sa fola e tagata o latou lavalava ma lala o le pama i le ala o le Faaola. O le aganuu lenei e faafeiloa’i ai se tupu fou. O a latou amioga na faailoa mai ai sa latou “iloaina Keriso o le Mesia ua leva ona faatalitali i ai.”

Sa fai mai faitaulaga o le pule e faavae mai o latou tupuaga; o le au tusiupu e faavae mai lo latou aoaoina; a o toeaina, e faavae i luga o o latou tulaga faaagafesootai ma le tamaoaiga. Sa tautino atu e faitaulaga sili ma toeaina le pule i luga o le malumalu. Sa vaaia e faitaulaga o le malumalu ia fefaatauaiga tupe sa faia i le malumalu. Sa luiina e Iesu lo latou pule ina ua Ia fuli laulau ma faasino atu i le malumalu o Lona maota. Mulimuli ane, ina ua aoao atu Iesu i totonu o le malumalu, sa tuuina atu e taitai Iutaia se lui tele ia te Ia e ala i le fesili, “O le a ea le pule e te fai ai na mea?”

Na fetuuina e Iesu Keriso le mati ona ua “na o lau.” Ona mago lea o le laau ma mate ai. Sa faamalamalama atu e Iesu i Ona soo afai e i ai lo latou faatuatua, o le a latou maua foi le mana e faia ai mea tetele. E ui o lenei mea na tupu ua faaalia ai le mana o le Atua i le lalolagi, ae atonu e i ai nisi faatusa. Mo se faataitaiga, i le Feagaiga Tuai, o le mati o se faatusa mo Iuta ma Isaraelu. Ua fautua mai ai lenei mea o le fetuuina o le mati “o se folafolaga o le faamasinoga i luga o Ierusalema ma Isaraelu.”

Sa ola tagata Iutaia i le uluai seneturi i se aganuu sa faatauaina ai le mamalu. E mafai ona maua e se tagata le mamalu e ala i le fanau mai, tuaa, tulaga, mana, po o fesootaiga faaagafesootai. E mafai foi ona latou le maua le mamalu e ala i luitau lautele. I nei tulaga, sa faatauaina le poto ma le faatosina. Afai e le’i lava le tali lelei a le tagata na lu’iina i mata o tagata na vaavaai atu i ai, o le a leai so latou faatosinaga i totonu o le nuu.

Sa taumafai taitai Iutaia e faavaivaia le mamalu ma le faatosinaga a Iesu e ala i le fesiligia faalauaitele o Iesu. Sa matua loloto tali a le Faaola ma sa gugu ai i latou na molia ma sa latou le’i toe fesili atu i le Faaola i se isi lava mea. Faatasi ai ma lo latou mamalu ua lamatia, na liliu atu ai i latou na tetee i le Alii i se isi auala o le faalumaina o tagata lautele—o le taulimaina o Iesu o se tagata solitulafono ma tausalaina o Ia i le oti.

Sa faaaoga e Iesu Keriso faataoto i atalii e toalua ma le au galulue i vine amioleaga e molimau atu ai i Lona paia o le Alo o le Atua. I faataoto taitasi, e tausalaina ai e le Faaola i latou o e na fesiligia Lana pule ma soona fai lo latou lava pule.

O faaipoipoga a tagata Iutaia anamua na aofia ai le faapotopotoina o tagata e auai i le faaipoipoga. E masani lava, o tagata auai o le faaipoipoga e mulimuli atu i le ulugalii i le fale o le alii faaipoipo mo se taumafataga. O lenei solo e masani lava ona faia i le po. E ono umi le tausamaaga o le faaipoipoga mo ni nai aso. O le faafiafiaga “e ono aofia ai pese, musika, solo o le alofa, ma siva.”

I le faaaogāina o lenei faataoto, na aoao ai e Iesu taitai Iutaia e faapea, na valaaulia Isaraelu i le tausamiga faafaatusa a le Atua. O lenei faataoto na faamamafaina ai le tele o auala na teena ai e Isaraelu le valaaulia a le Atua. Na folafola mai e Iesu o le a valaaulia e le Atua ni malo fou i Lana tausamaaga.

Atonu e foliga mai e matuā sauā le tuliesea o le tamāloa mai le tausamaaga o le faaipoipoga ona o le ofuina o ofu sese. Ae talu ai na o mai nei malo mai auala, atonu la e saunia e le tupu ni ofu talafeagai mo i latou. Na aoao mai Elder David A. Bednar e faapea o le tamaloa “e le na o le leai o se ofu faaipoipo; ae, sa ia filifili e le ofuina se ofu. Sa ia teena lava ma le fouvale e fai faalelei ona ofu mo le faamoemoe. I se isi faaupuga, na faalumaina e le tamāloa le tupu e ala i le teena o le meaalofa a le tupu.

O le Faaliliuga a Iosefa Samita o loo faafesootaia ai le faamatalaga “E toatele ua valaauina, ae toaitiiti ua filifili” e le ofuina le ofusa o le faaipoipoga. Na faamatala e Elder Bednar: “E mafai e se tagata e toatasi ona talia le valaaulia ma nofo ai i lalo i le tausamaaga—ae e le filifilia e ‘ai ona e le o ofuina le ofu talafeagai o le faaipoipoga o le faatuatua liua i le Alii o Iesu Keriso ma Lona alofatunoa paia. O lea la, ua ia i tatou le valaau a le Atua ma la tatou tali taitasi atu i lena valaau, ma e toatele e ono valaaulia ae toaitiiti e e filifilia.”

Na mana’omia e Kaisara po o le pule o Roma, ia tane matutua uma e totogi se lafoga o le faitau aofa’i o tagata. Sa inosia e tagata Iutaia nei lafoga ona sa faaaogāina mo le mamalu o le Nuu o Roma. O le le totogia o le lafoga sa manatu i ai o se fouvalega e faasaga ia Roma; o le totogiina o le lafoga o se solitulafono i tagata Iutaia.

E pei o le au Faresaio na muamua atu ia i latou, sa mananao foi le au Satukaio e maileia Iesu i ana upu. O le mea lea, sa latou fesili atu ai ia Iesu i se fesili e uiga i le faaipoipoga lea sa latou manatu o le a le mafai e Ia ona taliina ma o le a faamaonia ai lo latou talitonuga e leai se Toetu. Sa fesili atu le au Satukaio ia Iesu po o ai le uso o le a faaipoipo i ai se fafine i le Toetu pe ana faapea sa faaipoipo o ia i ni uso se toafitu i le olaga nei. O le fesili lenei e faatatau i le faiga o le faaipoipoga o le auso e nonofo i le fafine pe a oti lana tane i lalo o le tulafono a Mose. O lea ituaiga o faaipoipoga na mafai ai e se fafine ua oti lana tane ona faaipoipo i le uso o lana tane ua maliu e faasaoina le igoa ma le gafa o lana tane. O lenei “faiga… na fatuina se faaipoipoga faaletino e taulima ai manaoga na tulai mai e le oti ae sa le manaomia i le isi lalolagi lea o le a le toe i ai se oti.” O le tali a Iesu e ogatasi ma le aoaoga o loo i le Mataupu Faavae ma Feagaiga 132:15–16. Ua aoao mai nei fuaitau e faapea, a faaipoipo se alii ma se tamaitai mo le “umi lava e i ai o ia i le lalolagi faatasi ma ia, o a latou … faaipoipoga [e] le aoga pe a maliliu.”

Tagai i le faamatalaga “Tusitusiga Paia” i le vaega “O Faaupuga Taua o le Feagaiga Fou” i le folasaga.

Na faasino atu Iesu Keriso i se salamo musuia a Tavita lea na ta’ua ai e Tavita le Mesia o lona Alii. Na valoia e faapea o le Mesia o le a sau mai le gafa o Tavita. Sa talitonu le ‘au Faresaio o le Mesia o le a avea ma tupu i le lalolagi, o lē o le a lavea’iina le nuu o Isaraelu. Ae na iloa e Tavita o le Mesia o le Alo o le Atua, o lea na ta’ua ai e Tavita le Mesia o lona Alii. Sa faaaoga e le Faaola lenei salamo e aoao ai le au Faresaio e faapea e tusa ai ma a latou lava tusitusiga paia, o Keriso sa sili atu i le na o le atalii o Tavita; o Ia foi o le Alo o le Atua.

O le nofoa o Mose e mafai ona faasino i se nofoa moni i le ulu o le sunako. O le nofoa na faatusa iā Mose o se faia’oga o le tulafono. E foliga mai e le’i tetee Iesu i mea na aoaoina e le ‘au tusiupu ma le ‘au Faresaio, ae o le auala na latou ola ai.

O le upu phylactery o se upu Eleni o lona uiga o le “puipui, leoleo.” O filateri o tama’i pusa pa’u e fusi i le muaulu ma le lima. I totonu o pusa o loo i ai ni tama’i ta’aiga o pepa o loo i ai faatonuga faaletusi paia. O tupaao o ofu o faailoga sa tu’u i luga o pito po o tulimanu o lavalava e manatua ai le Atua ma Ana tulafono.

Na faitioina e Iesu le ‘au Faresaio ona o le ofuina o pusa pa’u ua faateleina ma faailoga e faaalialia ai lo latou tautinoga sili atu i le Atua.

O le upu hypocrite o se upu Eleni o lona uiga o le faatino, “faafoliga, le moni pe le faamaoni.” O tagata pepelo o i latou ia o e taufaasese i amioga, po o “taufaasese.” Sa tausalaina e le Alii le au tusiupu ma le au Faresaio ona o le le ola i mea sa latou aoao atu. Na folafola atu e le Faaola mala e valu i luga o le au tusiupu ma le au Faresaio ona o lo latou pepelo. O le malaia o se puapuaga tele lea e taitai atu ai i le faanoanoa.

O tagata liliu mai o Nuuese na liliu mai i le lotu Iutaia. O le faagasologa o le liua na aofia ai le “peritomeina [mo alii], papatisoga, ma se taulaga.”

Sa faia e tagata Isaraelu ni taulaga e fesoasoani e lagolago ai le malumalu ma ositaulaga. O nei taulaga e mafai ona faia i tupe po o fua o faatoaga patino, e aofia ai mea manogi laiti e pei o le mili, aneto, ma le kumina. Na mātauina e Iesu e mafai e le ‘au Faresaio ona totogi sefuluai i ni mea manogi laiti ae lē amana’ia mataupu tāua e pei o le faamasinoga, alofa mutimutivale, ma le faatuatua.

Talu ai o namu sa manatu i ai o ni iniseti lē mamā, o nisi tagata Iutaia na vaimamā a latou meainu ina ia ‘alofia ai le faafuase’i ona ‘a’ai ai. O kamela sa manatu foi e lē mamā i le ai i lalo o le tulafono a Mose. Sa faaaoga e le Faaola faataitaiga o le totogiina o se sefuluai o mea manogi, faamamaina o namu, ma le aai i kamela e aoao ai le au Faresaio sa latou taulai atu i mea sese.

O se tagata e laa atu i luga o se tuugamau sa manatu i ai o se tagata e lē mamā i lalo o le tulafono a Mose. Ina ia puipuia ai mai lenei mea, sa valiina pa’epa’e ai ia tuugamau ina ia faigofie ai ona iloa. O se tuugamau fou na valiina sa foliga mama i fafo, ae o se tino maliu na pala i totonu. E le mafai i le tele o le faaiila o fafo ona suia ai le mea la e tupu i totonu. Sa faaaoga e le Faaola lenei faatusa e faamatala ai le pepelo. O le natura faaletagata le popole i foliga vaaia i fafo, ae e finagalo le Faaola e suia o tatou loto.

I taimi o le Feagaiga Fou, e teuteuina, pe faamatagofie e tagata Iutaia tuugamau o tagata taua e faamamaluina ai i latou.

Na faamaumauina e Mareko ma Mataio e faapea, o se fafine e le’i ta’ua lona igoa na uuina le ulu o Iesu Keriso i le aso a o lumanai le Talisuaga Mulimuli. O lenei fafine e le’i ta’ua lona igoa e pei lava o Maria le Petania. Na faamaumauina e Ioane na uuina e Maria vae o le Faaola a o lei oo i le ulufale manumalo o le Faaola.

O le uuina e Maria o Iesu Keriso na faaalia ai lona talitonu ma le faatuatua o Ia o le Mesia. Na faamaumauina e Mareko na ia tata’e se fagu alapasa, ma ositaulagaina ai se ipu taua ma mea uma o i ai. O le suauu mama o le spikenard, o se fagusausau taugata na aumai mai mauga o Himalaya. O le fagusausau sa silia ma le 300 tenari (pe tusa ma le tausaga e totogi ai le averesi o le tagata faigaluega).

Na ta’ua e Iesu o gaoioiga a le fafine o le a avea ma “se faamanatuga ia te ia” i le lalolagi atoa. O lenei faamatalaga na valoia ai le faasalalauina mulimuli ane o le talalelei i le lalolagi atoa. O Evagelia a Mataio ma Mareko e foliga mai ua faaataata mai ai o lenei fafine o le uluai soo lea na iloaina le maliu o le Faaola o loo lata mai.

E pei o le Luka 14:26, o le upu Eleni ua faaliliuina o le “inoino” i lenei fuaiupu o le miseō. E mafai ona faauigaina o le “matuai le fiafia, le mana’o, po o le le amanaiaina o se tasi po o se mea.” I nei fuaiupu, o le uiga o le le amanaiaina o le tasi mea pe a faatusatusa i le isi. I se isi faaupuga, o loo aoao atu e Iesu Ona soo e le mafai ona latou vaevaeina le faamaoni i le va o Ia lava ma tagata o o latou aiga. E finagalo Iesu ia tatou faatuatuaina o Ia ma faamuamua o Ia i o tatou olaga.

• Ronald A. Rasband, “Osana i le Atua Silisili Ese,” Liahona, Me 2023, 108–12

• David A. Bednar, “Ofu Lou Malosi, E, Siona e,” Liahona, Nov. 2022, 92-95

• Lynn G. Robbins, “Alii [ma Tamaitai] Pe Faapefea La Outou Amio e Tatau Ai?,” Liahona, Me 2011, 103-5