1 ma le 2 Tesalonia

O Tesalonia o se aai malosi sa avea ma nofoaga autu mo fesoota’iga ma fefaataua’iga. Na fausia le aai i luga o se uafu masani i le Sami Aegean. O se auala televave e fesootai atu ai i isi aai. Ona o lona tulaga, sa avea ai Tesalonia ma nofoaga masani mo le faasalalauina o le talalelei i Maketonia ma Eleni.

Na faavaeina e Paulo ma ana soa, o Sila ma Timoteo, le Ekalesia i Tesalonia i le amataga o lana malaga faafaifeautalai lona lua. Peita’i, na faamalosia e taitai Iutaia ia Paulo ma ana soa e o ese mai le aai. Ina ua mavae sina taimi puupuu i Atenai, na alu atu Paulo i Korinito, lea na toe faatasi ai ma Sila ma Timoteo.

Na toe auina atu e Paulo ia Timoteo i Tesalonia e vaai pe o faapefea mai tagata fou liliu mai. O tusi a Paulo i tagata Tesalonia, na tusia uma mai Korinito, o se tali lea i le lipoti a Timoteo. O le 1 Tesalonia na tusia i le 51 T.A. ma atonu o le uluai tusi lea a Paulo.

O autu tetele i le 1 Tesalonia o le Afio Mai Faalua o Iesu Keriso ma le natura o le Aiga Atua. I lenei tusi, ua ofoina mai ai foi e Paulo viiviiga ma le faamālō mo le Au Paia i Tesalonia.

Na tusia lana tusi lona lua i se taimi puupuu mulimuli ane, pe tusa o le 51 po o le 52 T.A. O lenei tusi sa fuafuaina e faamalosia ai le faatuatua ma talanoaina ai le le malamalama i aoaoga faavae. I totonu, na valoia ai foi e Paulo se “tete’a ese” a o lei oo i le Afio Mai Faalua o le Alii.

I Tesalonia, o le tetee i le savali o le talalelei na sau mai i tagata tetee o Iutaia ma Nuuese. Na tusia e Paulo e faapea, i Filipi, sa faalumaina ai o ia ma ana soa. Ua ta’ua i le King James Version o le Tusi Paia sa latou tali atu i le sauaina ma le lototoa ma le “finafinau tele lava.” E lē faapea o lenei fuaitau sa finau atu pe finauvale Paulo i lana tala’iga. Ae, o loo faa’ata’ata mai ai sa ia aoao atu le talalelei i le feagai ai ma finauga ma teteega. O loo ta’ua i se isi faaliliuga o le Tusi Paia, “Ae e ui lava ua uma ona matou mafatia ma taulimaina ma le faalumaina i Filipi, e pei ona outou iloa, ae sa matou maua le lototele i lo matou Atua e folafola atu ia te outou le talalelei a le Atua e ui lava i teteega tetele.”

E lei toe foi atu Paulo i Tesalonia ina ua tuli ese o ia i le taimi o lana malaga lona lua faafaifeautalai. Sa ia fai mai sa le mafai ona toe foi mai ona sa “faalavelave” Satani ia te ia . E le’i ta’ua e Paulo ni faamatalaga au’ili’ili e faatatau i le auala na faalavelave ai Satani ia te ia mai le toe foi atu i Tesalonia. Peita’i, ua tatou iloa o sauāga mai tagata Iutaia sa faamalosia ai Paulo e uia i le tele o auala i ana galuega faafaifeautalai. E tusa ai ma le tetee i auauna a le Alii, na taua ai e Peresitene Howard W. Hunter, “O loo i ai pea Satani ma o le a ia faia mea uma na te mafaia e taofia ma poloka ai ma faatoilaloina.”

I ona po o Paulo, o sootaga feusuai i fafo atu o le faaipoipoga sa faia ma taliaina e le toatele o tagata o Nuuese. Talu ai o le toatele o tagata fou o le Ekalesia i Tesalonia o Nuuese, sa manatu ai Paulo e tatau ona faamalosia lo latou malamalama i amioga faamoemoeina e faatatau i amioga faalefeusuaiga. Sa ia aoao atu e tatau ona latou “faamamao [outou] ma le faitaaga.” O lefaitaaga ua faaliliuina mai le upu Eleni porneia ma e faatatau i feusua’iga lē mamā. Sa ta’u atu foi e Paulo i le Au Paia ia pulea o latou tino ae aua le gauai atu i tu’inanau o le manao.

E tusa ai ma le tulaga faatonuina o le mama faalefeusuai, na ta’ua ai e Elder David A. Bednar: “O le Ekalesia a Iesu Keriso o le Au Paia o Aso e Gata Ai e tasi lava le tulaga faatonuina e tumau ma mausali o le ola mama faalefeusuai: o sootaga militino e na o le va o se alii ma se tamaitai e tatau ai i sootaga o le faaipoipoga o loo faatonu mai ai i le fuafuaga a le Atua. O na sootaga ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulitulimatagauina ma le manatu faapito. … O i tatou o tagata ua faamanuiaina i le faitalia e filifili ai le mea tonu, ma ua tulaga ese i lo tatou tofi paia o ni fanau a le Atua—ae le o amioga feusuai po o uiga ma tulafono faanei ona po, po o filosofia faalelalolagi.”

I nei fuaitau, ma isi nofoaga i le Feagaiga Fou, o le upu Eleni parousia o loo faaaogaina e faatatau i le Afio Mai Faalua o Iesu Keriso. I le aganuu a Eleni-Roma i aso o Paulo, na faamatalaina le parousia o le taunuu mai o se pule po o “faailoaina mamana o se atua.” Mo se faataitaiga, o le taunuu atu o se emeperoa Roma i se nuu, sa faatalitalia ma le tele o sauniuniga. O le faaaogaina e Paulo o lenei upu na fesoasoani ai ia te ia e faamamafa atu le taua o le tapenaga e tatau ai mo le toe foi mai o Iesu Keriso i le lalolagi.

O aoaoga a Paulo i le 1 Tesalonia 4:13–18 ua faailoa mai ai sa i ai sina fenumiai i le Au Paia i Tesalonia e uiga i le Afio Mai Faalua o Keriso. E foliga mai sa faamoemoe nisi tagata o le Ekalesia i le toe foi mai o le Alii i se taimi vave. Na tulai mai ni atugaluga ina ua le vave ona tupu.

E foliga mai, sa popole nisi o i latou o e le’i leva ona maliliu o le a le avea ma se vaega o le Afio Mai Faalua o le Faaola. Sa i ai foi o latou popolega i le mea o le a tupu i e faamaoni o e na maliliu pe a toe foi mai Iesu Keriso.

Na aoao mai Paulo o i latou o e o loo soifua pe a toe foi mai Iesu Keriso o le a le “‘maua se avanoa e sili atu ai’ … ia i latou o e ua maliliu, aua a toe foi mai Iesu, o i latou o e na maliliu i le faatuatua o le a toetutu muamua ma feiloai ia Keriso. Ona, mulimuli ai lea i lenei mea, e mafai ona aveina i luga i latou o loo ola e feiloai ia Iesu ma o le a latou toe faatasia uma (tagai i le 1 Tesa. 4:16–17).”

O le popole tele o le Au Paia Tesalonia i le Afio Mai Faalua o le Alii e foliga mai na uunaia ai le tusi lona lua a Paulo ia i latou. I le 2 Tesalonia 2:1–12, na tusia ai e Paulo faailoga taua o le a muamua atu i le toe foi mai o le Faaola. Sa ia saunoa foi i “amioga paie a le Au Paia o e na foliga mai o le faamaualuga o se taunuuga o se faamoemoega le talafeagai o se Afio Mai Faalua o loo lata mai (tagai i le 2 Tesalonia 3:6–15).”

Na faatusa e Paulo le Afio Mai Faalua o Keriso i le taunuu mai faafuasei o se gaoi i le po. O lenei faatusatusaga sa faaaogaina muamua e Iesu Keriso ma o loo maua foi i tusitusiga paia i ona po nei. O le talafaatusa ua faaalia ai o le Afio Mai Faalua o le Faaola o le a avea ma se mea faafuasei ma e lei faamoemoeina mo le toatele.

O soo o Iesu Keriso, o “tagata o le malamalama,” o le a vaai i faailoga o le toe foi mai o le Alii ma o le a le tetei ai.

I le avea ai o se vaega o lana fautuaga i le auala e saunia ai mo le Afio Mai Faalua o Iesu Keriso, na lapataia ai e Paulo le Au Paia ina ia “aua le tineia le Agaga.” O leQuench ua faaliliuina mai se upu Eleni o lona uiga o le tapeina, faalavelave, po o le taofia. “O le tapeina o le Agaga o lona uiga o le tetee atu i Lana uunaiga, e pei o le taumafai e taofia se afi. O se tasi o tulafono faavae o le savavali faatasi ma le Atua o le, e le tatau ona tatou fai atu leai i le Agaga o le Atua.”

O le upu Eleni ua faaliliuina o le “tofotofo” i le King James Version o le Tusi Paia o lona uiga o le tofo, suesue, pe iloatino. Sa valaaulia e Paulo le Au Paia i Tesalonia e suesue pe “ia tofotofo i mea uma lava”—o lona uiga ia iloa le lelei ma le leaga—ma ia “taofi mau i le mea lelei.”

O le faatonuga a Paulo mo le Au Paia e faafeiloai e le tasi le isi “i le feasogi paia” sa pei o se faailoga lagolelei ma le masani o le faaaumea i lona talaaga anamua o le Metitirane. Ae i le matalalaga faaleaganuu i Sisifo o Amerika i le vaitaimi o le 1800, sa musuia ai e le Alii ia Iosefa Samita e fetuunai lenei poloaiga o le Feagaiga Fou e ‘faafetaia’ia e le tasi le isi i se faafeiloaiga paia,’ atonu o se auala e faaaoga ai lenei manatu faavae i Lona nuu sa nonofo ai i se isi taimi ma se nofoaga sa lei vaaia ai le feasogi o se ituaiga o faafeiloaiga lelei i totonu o se nuu o le ekalesia.”

E pei o lana tusi muamua i le ‘au Tesalonia, na talanoaina ai e Paulo ni malamalamaga lē lelei e uiga i le Afio Mai Faalua o Iesu Keriso. Sa ia faamalamalama mai a o lei oo i le Afio Mai Faalua o Keriso o le a “muai ona taunuu o le tete’a ese.” O le “tete’a ese” o se faaliliuga o le upu Eleni o le apostasia, o se upu e mafai foi ona faauigaina o le “fouvale” po o le “tetee.” Sa talanoa Paulo e uiga i se taua ua salalau solo, ma le loto i ai e faasaga i le talalelei a le Alii ma Lana Ekalesia.

Na aoao mai Peresitene Russell M. Nelson:

“A o loma Lona Faasatauroga, sa faatuina e le Alii o Iesu Keriso Lana Ekalesia. Sa aofia ai aposetolo, perofeta, fitugafulu, aoao, ma isi. Ma sa auina atu e le Matai Ona soo i le lalolagi e folafola atu Lana talalelei.

“Ina ua mae’a se taimi, sa oo ina mamae faaleagaga le Ekalesia sa faatuina e le Alii. Sa fetuunai Ana aoaoga; sa suia Ana sauniga. Na oo mai le Liliuese Tele e pei ona muai ta’u mai e Paulo, o lē sa iloaina e le toe afio mai le Alii ‘seia muai ona taunuu o le tete’a ese.’(2 Tesalonia 2:3).

“O lenei Liliuese Tele na mulimuli lava i le mamanu na faai’u ai isi tisipenisione muamua. O le uluai liliuese lava o le taimi o Atamu. Ona oo mai ai lea o tisipenisione o Enoka, Noa, Aperaamo, Mose, ma isi. Sa i ai i perofeta taitasi se matafaioi paia e aoao atu ai le paia ma aoaoga faavae a le Alii o Iesu Keriso. I tupulaga taitasi, o nei aoaoga sa faia e fesoasoani ai i tagata. Peitai o lo latou le usiusitai na tulai mai ai le liliuese. O le mea lea, o tisipenisione uma ua mavae atu, sa tapulaa le taimi ma nofoaga. Sa tapulaa le taimi ona sa faaiuina i le liliuese. Na tapulaa foi le nofoaga i sina vaega e matua itiiti lava o le paneta o le lalolagi.

“O le mea la lea, sa manaomia ai se toefuataiga atoatoa. Sa valaau atu le Atua le Tama ma Iesu Keriso i le Perofeta o Iosefa Samita, ina ia avea ma perofeta o lenei tisipenisione. Na tatau ona toefuatai uma mai mana paia uma o tisipenisione ua mavae atu, e ala mai ia te ia. O le a le tapulaaina lenei tisipenisione o le atoaga o taimi, i le taimi po o se nofoaga. O le a le faaiuina foi i se liliuese, ma o le a faatumuina ai le lalolagi.”

Ua faamanino mai i le Faaliliuga a Iosefa Samita sa faasino Paulo ia Satani i nei fuaiupu. O le upu malaia e sau mai le faa-Latina perdere, o lona uiga o le “faafanoga.” O se faalagiga na tuuina atu ia Lusifelo ina ua tuliesea o ia mai le afioaga o le Atua i le muai olaga. O i latou uma o e na mulimuli ia Satani ma fouvale i le Atua i le muai olaga, sa tutuli ese i fafo ma avea ma atalii o le malaia. Sa faamatalaina foi e Paulo le “tagata o le agasala”—o “lē tetee atu, ma faamaualugaina e ia ia te ia e sili i mea uma lava ta’uatuaina.”

Na lapata’i mai Paulo e faapea, o i latou e teena ma le loto i ai le upu moni ma liliu ese mai ai, o le a latou mauaina se manatu sesē malosi pe mamana. A aunoa ma le Agaga Paia, o le a latou talitonu i se pepelo. Na faamatala e le perofeta o Alema le auala e mafai ai e se tagata ona le maua le susulu o le malamalama: “Ma o lea, o ia o lē e faamaaa lona loto, o ia lava lea na te maua le vaega itiiti o ana afioga; ae o ia o lē e lē faamaaaina lona loto, o ia lea e tuuina mai i ai le vaega tele o ana afioga, seia oo ina tuuina mai ia te ia, ia ona iloa mealilo a le Atua, seia oo ina ia iloaina atoatoa ia mea. Ma o i latou o e e faamaaa o latou loto, e tuu mai ia i latou le vaega itiiti o ana afioga, seia oo ina latou lē iloaina se mea e uiga i ana mealilo.”

• Russell M. Nelson, “O Le Lumanai o le Ekalesia: Sauniaina o le Lalolagi mo le Afio Mai Faalua o le Faaola,” Liahona, Ape. 2020, 12–17

• Neil L. Andersen, “Ia Oo Mai Lou Malo,” Liahona, Me 2015, 119–23

• Autu ma Fesili, “Afio Mai Faalua o Iesu Keriso,” Gospel Library

• Autu ma Fesili, “Liliuese,” Gospel Library