2 Korinito 8–13

O se tasi o taumafaiga faifai pea a Paulo i le taimi o ana misiona o le aoina lea o se fesoasoani mo e matitiva i Ierusalema. Na tusi atu Paulo i le Au Paia i Korinito e uiga i lenei taumafaiga i le 2 Korinito 8–9. Sa foai atu ma le matamau e ekalesia i Maketonia mo le faamoemoe, ma sa fautuaina e Paulo le Au Paia i Korinito ina ia faia foi faapena. E foliga mai sa ia ta’u mai o le Au Paia i Korinito sa i ai i se tulaga tautupe e sili atu ona lelei nai lo i latou sa i Ierusalema. Na tusia mulimuli ane e Paulo e faapea na tali lelei atu tagata o Korinito i lana talosaga.

Na faamatala e Paulo e faapea, e sili atu ona tāua le lotomalie o se tagata e foa’i atu nai lo o lona mafaia ona foa’i atu. Sa ia folafola atu o i latou o e limafoai o le a maua faamanuiaga silisili, ae o i latou o e foai atu le itiiti o le a itiiti se mea e maua. Na sii mai e Paulo se Salamo e uiga i le foa’i atu ma le fiafia. Sa ia lapatai mai e uiga i le foai atu ma le musuā pe ona o se matafaioi. Na folafola mai e Paulo e faapea, o le foa’i atu ma le lē manatu faapito e lē gata na fesoasoani iā i latou o loo mana’omia, ae ua faateleina ai foi le faatuatua i le Atua.

O le popolega o Paulo o le i ai lea o le tutusa i le Au Paia. O le mafuaaga lea na ia faamalosiau atu ai ia i latou o e sa tele mea e foai atu ia i latou e itiiti ni mea sa maua. O faaaliga o aso e gata ai na faamanino mai ai o le tulaga tutusa faaletino e faavae i tulaga o tagata taitoatasi, ma manaoga. I le taimi nei, ua mafai e tagata o le Ekalesia ona faia ni foai limafoai i e matitiva e ala i taulaga anapogi, faapea foi ma foai i tupe o fesoasoaniga alofa a le Ekalesia.

Na aoao mai Paulo e ui lava o loo tatou ola i se lalolagi faaletino, ae o le taua o loo tatou tauina e faaleagaga. O le i’uga, tatou te le faaaogaina auupega faaletino ae o auupega faaleagaga i la tatou taua faasaga ia Satani. O le ata a Paulo o le “toso i lalo o olo malolosi” ma le “lafoina i lalo … mea maualuluga uma” atonu na faasino atu i se olo i luga o le mauga lea e iloa atu ai Korinito i aso o Paulo. Sa faamamafa mai e Paulo e tatau i le Au Paia ona faaaoga a latou auupega faaleagaga e faatoilalo ai le faamaualuga. O le toatele o le Au Paia i Korinito na taliaina manatu, mafuaaga, ma vaaiga faalelalolagi o lo latou nuu. Sa valaaulia i latou e Paulo e auai faatasi ma ia i le talepeina i lalo o soo se mea e liliu ese ai i latou mai le mulimuli i le Faaola.

O nisi na tetee iā Paulo, na latou faitioina ona foliga vaaia ma lona tomai e tautala ai. E lei faafitia e Paulo ona vaivaiga ae sa taumafai e fesoasoani i le Au Paia i Korinito e taofi le faaaogaina o tulaga faatonuina o le lalolagi e fua ai e le tasi le isi.

O loo i ai i tusitusiga paia le tele o faataitaiga o loo faaalia ai le faaaogaina e le Alii o “mea vaivai o le lalolagi” e faataunuu ai Lana galuega. Sa Ia fesoasoani i tagata e pei o Enoka, Mose, Moronae, ma Iosefa Samita e faatoilalo o latou tapulaa ma faataunuu le galuega sa Ia tuuina atu mo i latou e fai.

O le upu Eleni kauchaomai o nisi taimi e faaliliuina o le “mitamita” ma e masani lava ona i ai se uiga le lelei. O le 37 o taimi o loo faaaogaina ai le kauchaomai i le Feagaiga Fou, e 35 o loo maua i tusi a Paulo. Na manatu Paulo o lana mitamita e lelei ona sa taula’i atu iā Iesu Keriso. Ina ua mitamita Paulo e uiga ia te ia lava, sa faatatau moni lava i mea na mafai ona ia faia e ala i le Faaola. “I se faapuupuuga, o le mitamita o Paulo e sau mai le galuega na ia faia mo le Alii. O le mea lea, ua mitamita ai o ia i mea ua faia e Keriso, ae lē o mea ua faia e ia lava.” O le “mitamitavale” a Paulo e mafai ona vaai i ai e pei o le mitamita o Amona i le Alii.

Sa tusi atu Paulo i le Au Paia i Korinito o se tama faafaatusa o se faatoanofotane ua faamau ia Keriso—o se faatoanofotane sa ia lagonaina le tiutetauave mo le tausia o le mamā. Na ia lapata’i mai e uiga i a’oa’o pepelo o ē na foliga mai o ni faifeau amiotonu, ma faatusatusa i latou i le gata na faasesēina Eva i le faatoaga. Na manatu Paulo e pei lava ona mafai e Satani lava ia ona foliga mai o se agelu o le malamalama, o aposetolo pepelo i Korinito na faafoliga i latou lava o ni faifeau o le amiotonu. Sa talai atu e nei tagata “se isi” Keriso. E ui e le o manino pe o a aoaoga faavae patino sa aoao atu e nei aposetolo pepelo e uiga ia Iesu Keriso, ae ua tatou iloa sa i ai le taimi na tatau ai ia Paulo ona teena manatu o Korinito e faapea e lei toetu Iesu mai e ua oti.

E ese mai aposetolo pepelo i Korinito, na molimau atu Paulo o ia o se Aposetolo moni. Sa valaaulia e Paulo tagata o le ekalesia i Korinito e mafaufau pe o ana galuega ia i latou o ni faailoga o se Aposetolo moni ma faamaonia ai lana galuega.

A o galue ai o ia i Korinito, sa faalagolago Paulo i saofaga mai i tagata o le Ekalesia i Maketonia, ae sa galue lava foi o ia e lagolagoina ia lava i mea tautupe. E lei manao o ia i ona lava manaoga faaletino e avea ma avega mamafa i le Ekalesia.

Sa faatatau Paulo ia te ia lava i le tagata lona tolu ina ua ia talanoa e uiga i se tagata na aveina a’e i le lagi tua tolu o le malo selesitila lea. Atonu na faamatalaina e Paulo se vaega o lenei aafiaga e tetee atu ai i faiaoga pepelo ma a latou tautinoga.

E le gata o le a faigata ia Paulo ona faamatalaina lona aafiaga; sa faasā o ia e faia faapea. E mafai e le Alii ona faaali mai i Ona soo mea e le o fuafuaina mo le lalolagi. E pei o Paulo, atonu foi tatou te maua ni aafiaga faaleagaga e tatau ona tatou faasoa atu pe a taitaiina e le Agaga.

O le upu Eleni ua faaliliuina o le mea matuitui e mafai ona faauigaina o soo se mea e faasino mai—o se mea matuitui, o se fasi tuitui, e oo foi, i le faafaatusa, o se faama’i. Na faaaogā e Paulo le faaupuga e ta’u mai ai se vaivaiga e lē o ta’ua lona igoa, lea na faatumauina ai o ia i le lotomaualalo.

O le upu Eleni ua faaliliuina o le “vaivai” e eseese ona uiga. E mafai ona faasino i se tasi e ma’i faaletino pe vaivai. O isi taimi e faaaoga ai le upu mo i latou o e vaivai i amioga mama pe le matutua faaleagaga. Na faaaoga e Paulo le upu i lenei tulaga e tali ai faitioga o lana tautala ma foliga vaaia.

Sa faamatalaina uma e Paulo ma Moronae se faaaliga taua na la maua taitoatasi mai le Alii e faatatau i vaivaiga faaletagata. O le alofa tunoa o le Faaola ua lava lea mo i latou o e iloa o latou vaivaiga ma o mai ia te Ia. O le mana o Keriso e tafe mai e ala i e vaivai e lotomaualalo. O le māfuaaga lea na olioli ai Paulo i lona vaivaiga.

Sa aoao atu e Paulo i le Au Paia i Korinito e ao ona latou aloaia lana pule faaaposetolo aua o lo o ia faaalia galuega a se Aposetolo. Na aoao mai Elder Bruce R. McConkie o faailoga o se Aposetolo “o le faamaloloina o mai, tutuliesea o tiapolo, faatutuina mai o e ua oti; latou te talai atu ma aoao atu ma mafatia ona o le Faamoemoe o Keriso; latou te savavali tonu i luma o tagata ma ua vaetamaina i latou i le aiga o le Atua ua fai ma ona atalii, ma ua avea ai ma e suli faatasi ma lona Alo moni. O faaeega paia lava ia e tasi lea e tatau ona i ai i luga o toeaina uma o le malo, i luga o tagata uma ua maua le aia tatau i le mafutaga faifai pea ma le Agaga Paia.”

Sa ta’u atu e Paulo i le Au Paia i Korinito o le a ia asiasi atu ia i latou mo le taimi lona tolu, ma sa ia folafola atu o le a le avea o ia ma se avega mamafa ia i latou. E foliga mai o loo i ai se leo puipui i lenei tusi, e pei ona fesili Paulo pe tatau ona faaitiitia lona alofagia mo le alofa tele ia i latou. O se tasi o vaega faigata o le saili e avea ma se soo o Iesu Keriso o le fevaevaea’i ma lagona le lelei ia e ono oo mai a o tatou taumafai e faaali atu le alofa mo isi e ala i le faasoaina atu o le upumoni. Sa faaalia e Paulo lona fefe ina ua ia asiasi atu i le Au Paia i Korinito, o le a i ai pea lagona le lelei i lo latou va.

Na aoao mai Peresitene Russel M. Nelson: “O nisi taimi, o i matou o ni taitai o le Ekalesia e faitioina ona o le taofiofi mamau i tulafono a le Atua, puipuia o le mataupu a le Fa’aola, ma le tetee atu i u’una’iga fa’aagafeso’ota’i o o tatou aso. Ae o le poloaiga ia i matou o ni aposetolo faauuina o le “o atu i le lalolagi uma e folafola [Lana] talalelei i tagata uma” [Mataupu Faavae ma Feagaiga 18:28]. O lona uiga ua poloaiina i matou e aoao atu le mea moni.”

• Tagai Linda K. Burton, “Sa Avea Au ma Tagata Ese,” Liahona, Me 2016, 13–15.

• Jeffrey R. Holland, “Pe Le o i Tatou Uma Ea O Ni Tagata Aisi?,” Liahona, Nov. 2014, 40–42

• M. Russell Ballard, “Ia Faaeteete i Perofeta Pepelo ma Faiaoga Pepelo,”,” Ensign,, Nov. 1999, 62-64.