Filipi ma le Kolose

Na tusi atu Paulo i tagata Filipi ma Kolose a o iai o ia i le falepuipui po o le faapagotaina. E ui i nei tulaga, ae o loo iai i nei tusi nisi o tusitusiga e sili ona mautinoa ma faalaeiauina a Paulo.

O Filipi o se aai taua i Maketonia. O le uluai paranesi lea o le Ekalesia na faatuina i lenei itulagi. Ina ua mavae lana asiasiga muamua i le pe tusa o le 50 T.A., sa toe asiasi atu Paulo i le Au Paia i Filipi i le taimi o lana malaga faafaifeautalai lona tolu i le pe tusa o le 56 T.A. I lana tusi, na faaalia ai e Paulo le agaga faafetai mo le alofa ma le fesoasoani tautupe na tuuina atu e le Au Paia i Filipi ia te ia i lana malaga faafaifeautalai lona lua ma lona faafalepuipuiina.

Na tusia e Paulo e faapea o tagata Filipi e “anaana mai e le aunoa” i taimi e iai o ia ma i latou ma i lona toesea. Na matauina e se tasi o tagata atamai: “O le a se isi tusi i se ekalesia na faia ai se faamatalaga faapena? Sa lē mafai e Paulo ona fai atu se tala faapena i Kerisiano i Korinito po o Kalatia, o lea na tutu maualuga ai tagata Filipi i le pito i luga o le faamaoni. O le mea o le a aoao atu e Paulo ia i latou e sili ona faaalia mai i le mataupu o le auala e maua ai le faaeaga.”

O Kolose sa i ai pe tusa ma le 100 maila i sasae o Efeso. Sa avea muamua le aai ma se tasi o aai e sili ona lauiloa i le eria. E oo atu i le taimi o Paulo “ua avea ma se tamai taulaga o tagata faatauoloa i le ala o fefaatauaiga mai Roma i sasae.” E foliga mai e lei asiasi atu Paulo i le Au Paia i Kolose a o lei tusia lana tusi ia i latou.

“O le savali i le au Kolose e mafai ona aoteleina i ni autu maualuga se tolu: o le silisili o Keriso, o aoaoga faavae sese o loo saili e faavaivaia ai le aoaoga faavae a Keriso, ma mataupu faavae o le a fesoasoani ia i tatou e avea ai e faapei o Keriso.”

Na faamalamalama mai e Paulo o lona faafalepuipuiina sa aoga e faalautele ai le talalelei. O lana ta’ua o le fale i le fuaiupu e 13 atonu o se faatatau i le leoleo o le maota ma isi tagata asiasi na faalogo i le talaiina atu e Paulo o le talalelei mai le falepuipui. E le gata i lea, sa maua e isi tagata o le Ekalesia le lototele mai le faataitaiga a Paulo ma “ua atili ai ona latou faamalosi e tautala i le upu”

I le faaaogaina o se viiga Kerisiano, na uunaia ai e Paulo le au paia i Filipi e mulimuli i le faataitaiga a le Faaola o le usiusitai ma le lotomaualalo. Ua faaalia mai i le viiga e faapea, i le muai olaga, sa i ai Iesu Keriso i le “foliga o le Atua.” Sa i ai sona natura paia, e pei o le Atua. O le faia o Lona uiga faatasi ma le Atua, o Iesu Keriso e “le’i faoa le Atua mai Lona paia.”

Sa alu ifo i lalo Iesu Keriso ma le lotomaualalo mai Lona Tulagaatua i le muai olaga ma “ua uiga o ia faatasi ma le pologa.” I se isi faaupuga, sa faamaualalo ma le naunautai Iesu Keriso mai Lona mamalu i le muai olaga e tauave tulaga o le olaga faaletino. Na aoao mai Paulo o le laugatasia o Iesu Keriso ma le Atua na tulaga ese ai lona agavaa e avea ma o tatou Faaola. Ina ua uma ona mafatia i le maliu i luga o le satauro, o le a faaeaina e le Atua ia Iesu Keriso ma tuuina atu ia te Ia “se suafa e silisili i suafa uma lava.”

O le savali a Paulo e talitutusa lava ma aoaoga a Nifae e uiga i “le faamaualalo o le Atua.”

O le “ta’uta’u atu” i lenei fuaiupu ua faaliliuina mai se upu Eleni o lona uiga o le ioe, tautino atu, po o le vivii. Mulimuli ane o le a iloa e tagata uma o Iesu o le Keriso, pe na latou filifili e mulimuli ia te Ia i o latou olaga pe leai. Ua aoao mai le Tusi a Mamona ma le Mataupu Faavae ma Feagaiga e faapea, o lenei aloaiaina lautele o le a oo mai i le Aso Faamasino.

I le Filipi 2:4–12, na aoao mai ai Paulo e faapea o Iesu Keriso na “faamaualaloina o ia lava” ma mafatia i le “oti [i luga] o le satauro” ina ia mafai ona avea o Ia ma o tatou Faaola. I le mafaufau ai i le alofa ma le usiusitai na faaalia e Iesu Keriso, ua apoapoai mai ai Paulo ia i tatou ina ia “galulue aiai ma le mata’u atoa ma le gatete ina ia faaolaina [i tatou].”

O le upu Eleni ua faaliliuina o le “galueaiina” e le o lona uiga o le “galue mo [lou] olataga” i le uiga o loo tatou maua lo tatou faaolataga e ala i galuega lelei. Nai lo o lea, e aofia ai taumafaiga faifai pea o le avea ma soo. I le faatatau ai i le fuaiupu e 12, na fesili ai Peresitene Dallin H. Oaks, “Pe o lona uiga ea o le aofaiga atoa o lo tatou lava amiotonu o le a maua ai e i tatou le faaolataga ma le faaeaga?” Leai, na ia faamatala, e tusa pe “o le a lo tatou usitai uma ma a tatou galuega lelei, e le mafai ona faaolaina i tatou mai a tatou agasala e aunoa ma le alofa tunoa ua aumaia e le togiola a Iesu Keriso.”

O le “mata’u” ua faaliliuina mai le upu Eleni phobos, lea e mafai ona i ai uma uiga le lelei (fefe, matafefe, po o le fefevale) ma uiga lelei (faaaloalo, migao, po o le maofa). I le tulaga lea, o le uiga o le migao lea i le Alii. I le fuaiupu e 13, ua faailoa mai ai e Paulo o le “Atua, o ia le galue i totonu ia te outou … ina ia outou loto ma galulue i ai.”

O le upu ulī i tusitusiga paia e masani lava ona faasino i se tagata e le agavaa. O “uli” na ta’ua e Paulo o tagata na faa-Iutaia—o tagata na aoao mai e tatau i tagata liliu mai i le faa-Kerisiano ona mulimuli i ni aganuu faapitoa a Iutaia, e aofia ai le peritomeina. I le faaupuga faatauemu, na faasino atu ai Paulo i tagata na faa-Iutaia o i latou o e faaleagaina le tino, po o “katatomeina.ī I le isi itu, sa faasino atu Paulo i tagata o le feagaiga a le Atua o i latou o “le au peritomeina.ī Sa aoao atu Paulo o i latou o e tapuai i le Atua ma olioli ia Keriso o “peritomeina” moni ia, po o tagata o le feagaiga.

Na lafoaia e Paulo le tele o mea ina ua avea o ia ma soo o Iesu Keriso, e aofia ai lona tulaga iloga o se Faresaio Iutaia. Nai lo le taulai atu i ana osigataulaga ma aafiaga ua tuanai, na saunoa Paulo e uiga i le tausisi atu “i le faailoga, ia maua ai le taui na valaauina ai a’u mai lugā e le Atua.ī

Na maua e Paulo le faamafanafanaga ia Iesu Keriso, ma tulimatai atu i le faitauina faatasi ma “ia faatasi a’u i ona tiga.ī Na aoao mai Elder Neal A. Maxwell: “Pe a tatou tauaveina le amo a Iesu i o tatou luga, o lenei mea e tautino mai ai ia i tatou i le mea na ta’ua e Paulo o le ‘faatasi a’u i tiga [o Keriso]’ [Filipi 3:10]. Pe o se ma’i po o le tuuatoatasi, le tonu po o le teenaina, ma isi mea faapena, o o tatou mafatiaga e faatusatusa i ni fua itiiti, pe afai tatou te agamalu, o le a magoto i le ivi o le agaga. Ona tatou talisapaia lea e le gata i mafatiaga o Iesu mo i tatou, ae faapea foi Ona uiga e le mafaatusalia, ma uunaia ai i tatou i le faamemelo sili atu ma e oo lava i le faataitai.”

O se tasi o faiga sese na taliaina e nisi o le Au Paia Kolose o le tapuai atu lea i agelu. O lenei mea na taunuu ai i le le malamalama e uiga i le paia o Iesu Keriso. O le savali a Paulo na faamamafa manino mai ai le taua o Iesu Keriso, i foafoaga a le Tama Faalelagi ma le avea ai ma ulu o le Ekalesia.

Na molimau mai Paulo e faapea “e mau le tumu atoatoa” ia Iesu Keriso. Na manao Paulo i le Au Paia i Kolose ia malamalama o Iesu Keriso ma Lana talalelei e silisili i lo isi filosofia ma tapuaiga uma.

O le faamatalaina o le Atua e le vaaia, o le uiga o le faamatalaga a Paulo, e le vaaia o Ia ae e le faapea o le a le iloa o Ia. O le manatu o le Aposetolo e faapea, e le o vaaia le Atua i le taimi nei e o tatou mata faaletagata, o le faaali mai o Iesu Keriso ma ona uiga ua faapupula mai ai foliga o le Tama. Na aoao mai Peresitene Jeffrey R. Holland, “I mea uma na afio mai Iesu e fetalai ma fai, e aofia ai aemaise lava i Ona puapuaga togiola ma le taulaga, sa Ia faaali mai ai ia i tatou po o ai ma pe faapeī le Atua lo tatou Tama Faavavau.”

“O Iesu o le ulumatua o fanau agaga a lo tatou Tama Faalelagi, o le Alo Pele e Toatasi o le Tama na fanaua i le tino, ma o le uluai toetu mai e ua oti i le Toetutu.”

Na aoao mai Elder David A. Bednar: “Na apoapoai atu le Aposetolo o Paulo i e talitonu o e na taliaina le Alii: ‘Ia savavali ai outou o ia te ia’ [Kolose 2:6].

“O le savavali ai ma faatasi ma le Faaola ua faamamafaina mai ai itu taua se lua o le avea ai ma soo: (1) o le usitai i poloaiga a le Atua, ma le (2) o le manatuaina ma faamamaluina ia feagaiga paia ia e fesootai ai i tatou i le Tama ma le Alo.”

Tagai i le “Filemoni 1:10–17. O le a se mea ua tatou iloa e uiga i le nofopologa i taimi o le Feagaiga Fou?”

• David L. Frischknecht, “The Condescension of Jesus Christ,” Ensign, Dec. 2011, 51–55

• Dallin H. Oaks, “What Think Ye of Christ?,” Ensign, Nov. 1988, 65–68

• Bonnie H. Cordon, “Aua Lava Nei Fiu i se Avanoa e Molimau atu ai ia Keriso,” Liahona, Me 2023, 10–12

• Jeffrey R. Holland, “O Le Silisiliese o le Atua,” Liahona, Nov. 2003, 70-73