1 ma le 2 Timoteo, Tito, Filemoni

O Timoteo o se tasi o uo sili ona faatuatuaina a Paulo. O ia o le atalii o se tamā Eleni ma o se tinā Iutaia. Ua aoao mai tusitusiga paia e faapea, o lona tina o Eunike, sa talitonu i le molimau a Paulo e uiga ia Iesu Keriso. Sa fesoasoani le tina o Timoteo ma lona tinamatua o Loi ia te ia e tuputupu ae i lona faatuatua ma lona fiafia i tusitusiga paia. Sa auauna atu Timoteo o se soa faifeautalai ia Paulo i le taimi o lana misiona lona lua. Mulimuli ane, sa faaauau pea ona avea Timoteo ma se faifeautalai ma se taitai faamaoni o le Ekalesia.

O tusi a Paulo ia Timoteo ma Tito e masani ona ta’ua o Tusi faafaifeau aua o loo i ai fautuaga a Paulo i faifeau po o taitai i le Ekalesia. O le upufaifeau e sau mai le upu Latina mo le leoleo mamoe.

Na tusia e Paulo lenei tusi a o auauna atu Timoteo o se taitai o le Ekalesia i Efeso. O nisi tagata o le ekalesia e foliga mai sa masalosalo i tomai o Timoteo ona sa talavou o ia. Na tusi Paulo e fesoasoani iā te ia ina ia malamalama i ona tiute ma tuuina atu se faalaeiauga mo ia. E foliga mai na tusia lenei tusi i le va o le 62 ma le 66 T.A., a o iai Paulo i Maketonia.

Sa fautua mai e Paulo ni taiala e fesoasoani ai ia Timoteo ia iloa ai tagata e agavaa e avea ma epikopo po o tiakono. Sa fesoasoani nei taiala e faamamafaina ai le tiutetauave o taitai o le Ekalesia e tuu atu mea o manaomia e tagata o le ekalesia i le faaletino ma le faaleagaga. Sa talanoaina foi e Paulo le manatu pepelo masani o le faafitia o oe lava—o le talitonuga faapea e tele atu le faaleagaga e mafai ona maua i lou faafitia mauai o oe lava. Ina ia tetee atu i lenei mea ma isi taa’iga faalotu, na fautuaina ai e Paulo ia Timoteo ina ia a’oa’o atu ni a’oa’oga faavae lelei.

O iinei, ma i lana tusi ia Tito, na lapatai mai ai Paulo e uiga i a’oa’o pepelo o e o le a faalauiloaina talafatu (“tala faafagogo”) ma gafa e leai ni ona gataaga. Na tusia e se tasi o tagata atamai o le Tusi Paia: “Pe a faalogo le Au Paia o Aso e Gata Ai i le upu gafa, latou te mafaufau i le galuega o talafaasolopito o aiga, ae e le o le mea lea sa mafaufau i ai Paulo. I le faaiuga o lenei tusi, na faatonuina ai e Paulo ia Timoteo e aloese mai ‘finauga i mea ua igoa pepelo ai o le poto’ (1 Timoteo 6:20). O le upu ua faaliliuina o le ‘saienisi’ o le upu Eleni gnosis, o lona uiga o le ‘poto.’ O lea, sa popole ai Paulo ona o nisi Kerisiano sa latou mauaina ma aoaoina atu le malamalama faapitoa, lea na taitai atu ai i ‘finauga’ po o i se isi faaupuga, o fevaevaea’iga. O le lapataiga e faasaga i talafatu ma gafa atonu o se faasino i tala taumatemate ma gafa i tusitusiga apokerifa a Iutaia (Tito 1:14; 3:9).”

Tatou te le iloa po o le a le mea na uunaia ai Paulo e faatonu tamaitai ia “a’oa’oina [le fafine], a ia le tautala” ma aua le “pule i le tane.” Atonu o se taumafaiga lenei e faasa’o se faafitauli po o se finauga patino i Efeso, lea sa nofo ai Timoteo. O lea, o se mea lē atamai le aveina o lenei faatonuga patino ma tuu atu i ai le faaaogaina lautele.

Ina ia lagolagoina lana faatonuga e faatatau i fafine, na ta’ua ai e Paulo e faapea, i le faato’aga, na solitulafono ai Eva ina ua ia ai i le fua faasāina. I le fuaiupu e 14, o le upu Eleni ua faaliliuina o le “solitulafono” (parabasis) ua faaliliuina i ni auala eseese, e aofia ai le “sopoia.” Atonu na fai mai Paulo e pei lava ona “sopoia” e Eva ona tuaoi ina ua ia ai i le fua, atonu foi na sopoia e nisi o tamaitai i Efeso o latou tuaoi.

E tusa lava po o le a le faamoemoega autu o Paulo, ae o ana upu ua saofaga i se vaaiga le lelei i le matafaioi a Eva i le Pau. O se vaaiga faapena e le o tauamiotonuina e tusitusiga paia o le Toefuataiga. Mo se faataitaiga, na aoao mai Liae o le Pau o Atamu ma Eva na aumaia ai le faateleina o le faitalia, aiga, ma le avanoa mo le olioli e faavavau. I le tusi a Mose, na molimau mai ai Atamu ma Eva i le taua o le Pau i le ata o le faaolataga. Ma i lana faaaliga vaaia o le lalolagi o agaga, na vaaia ai e Peresitene Iosefa F. Samita “lo tatou Tina mamalu o Eva” i totonu o e amiotonu i le lalolagi o agaga.

O le taua o le matafaioi a Eva i le Pau ua faamaonia atili e perofeta ma aposetolo o ona po nei. Na aoao mai Peresitene Dallin H. Oaks, “O Eva na muamua solia tapulaa o Etena ina ia mafai ona amatalia tuutuuga o le olaga faitino. O lana gaoioiga, po o le a lava lona natura, sa o se solitulafono i lea taimi ae o le faavavau o se mea alagatatau matagofie e tatala ai le faitotoa e agai atu ai i le ola faavavau.” Na maitauina e Peresitene Russell M. Nelson e faapea, “O lo tatou Tina mamalu o Eva—faatasi ma lana vaai mamao i le fuafuaga a lo tatou Tama Faalelagi—na amatalia le mea ua tatou ta’ua ‘o le Pa’ū.’ O lana filifiliga atamai ma le lototele ma le faaiuga lagolagosua a Atamu na agai ai i luma le fuafuaga o le fiafia a le Atua.”

I le mafaufau ai i mau o le Toefuataiga ma upu a perofeta ma aposetolo o ona po nei, ua tatou maua ai se mafuaaga e olioli ai i le matafaioi a Eva i le faaauauina i luma o le ata o le faaolataga a le Tama Faalelagi.

Ua aoao mai perofeta o aso e gata ai e faapea, o le leo ma le taitaiga a tamaitai e taua tele i le galuega o le faaolataga a le Alii. A o saunoa atu i tamaitai o le Ekalesia, sa aoao atu ai Peresitene Russell M. Nelson: “Matou te … manaomia lo outou malosi, lo outou liua, lo outou talitonuga maumaututu, lo outou tomai e taitai ai, lo outou poto, ma o outou leo. E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua!”

I le 1 Timoteo 3:1 na faasino ai Paulo i le tofi, po o le tofiga, o se epikopo. I lenei fuaitau, o le “epikopo” e faatatau i se tagata e vaavaaia se faapotopotoga. Ua tuuina mai e Paulo agavaa ma fautuaga mo i latou o loo auauna o ni epikopo. E ala mai i tusitusiga paia o le Toefuataiga, ua tatou aoao ai o se epikopo o se tofi faauuina i le Perisitua Arona.

O le upu tiakono e sau mai le upu Eleni o lona uiga o le “auauna” po o le “faifeau.” O le tofi o le tiakono e foliga mai o se tofi sauniuni, aua e lei faasaina e Paulo “se [tagata] faatoa lotu (tagata faatoa liliu mai) mai le tofia e avea o se tiakono ae na ia faasaina se tagata fou mai le tofia e avea o se epikopo. O isi agavaa mo tiakono na tutusa lava ma agavaa mo epikopo, e aofia ai tulaga manaomia faapea “o tiakono, ia taitasi ma lana avā e toatasi.” E ala mai i mau o le Toefuataiga, ua tatou aoao ai o se tiakono o se tofi faauuina i le Perisitua Arona.

Na aoao mai Paulo e faapea, i le faatusatusa atu i le atiina ae o uiga faaleatua, o faamalositino faaletino ma aoaoga e na o se taimi puupuu lava e taua ai. I se isi faaupuga, e ui o aoaoga faaletino e taua tele, ae o aoaoga faaleagaga e faamanuiaina ai i tatou i le taimi nei ma le faavavau.

O lenei eseesega semanu e faapitoa lava le talafeagai i tagata o le Ekalesia i Efeso. Sa matuā tāua tele taaloga tamomo’e ma taaloga i aganuu a Roma. E pei lava o aso nei, e mafai ona soona faatauaina le malosi faaletino ma oo ai i le ogaoga. Na aoao mai Paulo e tatau ona faamuamua le suesueina o le talalelei, mafaufau loloto, ma le atiina ae o meaalofa faaleagaga.

Na tusia e Paulo lenei tusi i le taimi o lona uluai faafalepuipuiina i Roma. Sa ia tusia lenei tusi e faamalosia ai ma faamalosiauina ai Timoteo. Sa talitonu Paulo ua latalata ina uma lona ola ma sa manao o ia e vaai ia Timoteo, o lē na ia ta’ua o “lo’u atalii pele.” I le iuga o lana tusi, sa talosagaina ai e Paulo ia asiasi atu Timoteo ma Mareko ia te ia ma avatu ni nai mea sa ia tuua i Teroa. I le faasologa, o le 2 Timoteo ua foliga mai o le tusi mulimuli a Paulo i le Feagaiga Fou.

Sa faaaoga e Paulo le ata faatusa o se fitafita lelei, o se tagata taalo manumalo, ma se faifaatoaga galue malosi e faapupula ai le manaomia o le tumau ina ia maua ai le mamalu e faavavau. Sa ia faaiuina lana tusi i le faatusatusaina o ia lava i se tagata taalo ma se fitafita manumalo. Sa ia “tau le taua lelei.” O le upu Eleni ua faaliliuina o le “tau” o lona uiga “ia tauivi.” E mafai ona faasino le upu i le tauvaga i se tauvaga taalo po o le auai i taua faamiliteli. Ona sa faamaoni o ia e oo i le iuga, sa faamoemoe ai Paulo e maua se “pale o le amiotonu.” Atonu e faasino atu le pale i se pale manumalo na tuuina atu i ē na manumalo i tauvaga taaloga a Eleni anamua.

I nei fuaiupu, na valoia ai e Paulo le amioleaga o aso e gata ai. Sa ia faamatalaina tulaga o ni tulaga “faigata.” O le siata o loo i lalo o loo tuuina mai ai le fesoasoani i upu po o fasifuaitau atonu e le malamalama i ai le au faitau i ona po nei:

I le avea ai o se vaega o lana lapataiga e faatatau i aso e gata ai, na faamamafa mai ai e Paulo se vaega na ia ta’ua o ni tamaitai “valelea” pe “faalogogata” . O le upu Eleni o lona uiga o le “vaivai, po o le faatauvaa” E foliga mai, o nei tamaitai sa uunaia e a’oa’o pepelo i Efeso. Atonu o se faasinomaga faaagafesootai lenei mai aso o Paulo lea ua leai se talaaga faaleaganuu i o tatou aso ma o lea e faigata ai ona malamalama i ai.

Na fanau Tito i ni matua Eleni ma sa faaliliuina mai o ia i le talalelei e Paulo. Ina ua mavae lona liua, sa o faatasi Tito ma Paulo i lana malaga faafaifeautalai lona tolu. Sa fesoasoani o ia e ao mai foai mo e matitiva i Ierusalema ma sa tuuina atu ia te ia lava e aumai le lotogatasi sili atu i paranesi i Korinito. Sa tusi atu Paulo ia Tito e faamalosia o ia i lona tofiga e taitai le Ekalesia i le motu Eleni o Kereta. Sa feagai Tito ma teteega mai tagata faatuiese ma a’oa’o pepelo. E foliga mai na tusia e Paulo le Tusi ia Tito ina ua uma ona tusia le 1 Timoteo, i le va o le 63 ma le 65 T.A.

Na ta’ua e Paulo e faapea o tagata Kereta e lē lelei. Sa lauiloa i latou i le mauaina o tupe i le lē faamaoni. Na faapena foi ona lipotia mai e tusitala anamua e faapea, sa matape’ape’a tagata o Kereta. O le uiga o le upu Kereta o lona uiga o se tagata lē faamaoni.

Sa faaaoga e Paulo le upu Eleni o lona uiga o le “toe fanauina” po o le “faafouina” pe a talanoa e uiga i le meaalofa o le Agaga Paia. I le papatisoga, e ulu atu ai se tagata i se sootaga o le feagaiga ma Keriso, ma avea ai ma se tagata fou. E pei lava ona tuuina atu i se pepe fou se igoa, o i latou o e papatisoina e tauaveina i o latou luga le suafa o Iesu Keriso ma faafouina e le Agaga a o latou taumafai e ola e faapei o Ia.

O Filemoni o se tagata liliu mai Eleni atonu sa nofo i Kolose. Talu ai ona sa ia faatagaina tagata o le ekalesia e feiloai i lona fale, atonu sa avea o ia ma se taitai i le paranesi a Kolose. Sa umia e Filemoni se alii faapologaina e igoa ia Onesemo, o lē sa malaga atu i le nofoaga sa iai Paulo—atonu o se tagata na sola ese—ma sa faaliliuina e Paulo ia Iesu Keriso. Sa toe auina atu e Paulo ia Onesemo ia Filemoni ma aioi atu ia te ia e aua le faasalaina Onesemo, ae ia toe talia o ia “e le toe faapei o se pologa” ae o se “uso pele.” Na tusi atu Paulo iā Filemoni a o iai i le falepuipui, e ui e na te le’i ta’u maia po o fea. Atonu na ia tusia le tusi i se taimi i le va o le pe tusa o le 55 ma le 59 T.A.

O faapotopotoga na a’oa’oina ma tusi atu i ai Paulo, sa masani ona aofia ai ia matai ma pologa. O le nofo pologa o se vaega taliaina o le sosaiete lea sa ola ai tagata Iutaia ma Kerisiano anamua. O nisi pologa na faasa’olotoina e o latou matai pe mafai foi ona faaputuina ni tamaoaiga e faatau ai lo latou lava sa’olotoga. O nisi pologa sa fiafia i avanoa faaleaoaoga ma avea ma faufautua faatuatuaina ma paaga faapisinisi i o latou matai. Peita’i, mo le toatele, o le nofo pologa sa faalumaina ma sauāina. O nisi o le au faigaluega a Paulo sa avea ma pologa.

E le’i taliaina pe teenaina foi e Paulo le faatulagaga o le nofo pologa i ana tusi. Na ia faalaeiauina pologa Kerisiano ina ia usiusitai i o latou matai ma uuna’ia matai Kerisiano ina ia agalelei i a latou pologa. Sa talitonu Paulo e mafai ona o mai faatasi tagata uma ia Iesu Keriso, lea e “leai se pologa po o se saoloto.”

I la tatou tisipenisione, ua folafola mai e le Alii e faapea “e le sa’o ona tatau ona nofo pologa soo se tagata o le tasi i le isi”

O Onesemo atonu o se pologa ua sola ese. I tulafono a Roma i lea taimi, e faalagolago lava pologa sosola ese i le alofa o o latou pule. O pologa ua pu’ea e mafai ona faailogaina i muaulu, sasaina, auina atu e fai galuega mamafa, ma faamalosia e ofuina ni kola u’amea.

Afai o Onesemo o se tagata sola ese, o lona uiga o le talosaga a Paulo ia Filemoni o le aua le faaoo atu ia Onesemo i le faasalaga masani o se pologa ua sola ese. Nai lo lea, na fautuaina e Paulo ia Filemoni ina ia talia o ia o se uso pele ma o se uso auauna a Iesu Keriso. O le igoa o Onesemo o lona uiga o le “aogā” po o le “faasiliga.” Na faamatala atu e Paulo iā Filemoni e faapea sa lē aogā Onesemo. Peita’i, i le taimi nei, i le avea ai ma soo o Keriso, sa mafai ai e Onesemo ona aogā ia Filemoni ma Paulo i le fesoasoani atu i le galuega o le faaolataga.

• Autu ma Fesili, “Tamaitai i le Ekalesia,” Gospel Library

• M. Russell Ballard, “O Le Matafaioi Taua a Tamaitai,” Liahona, Mat. 2021, 9–11

• Jean B. Bingham, “Tutu Faatasi i le Faataunuuina o le Galuega a le Atua,” Liahona, Me 2020, 60-63

• Ulisses Soares, “Faapaaga ma le Alii,” Liahona, Nov. 2022, 42-45

• Quentin L. Cook, “Epikopo—Leoleo Mamoe i luga o le Lafu a le Alii,” Liahona, Me 2021, 56–60