Mataio 1; Luka 1

Sa manao Mataio i le aufaitau ia iloa na faataunuuina e Iesu ia valoaga o le Feagaiga Tuai e uiga i le Mesia. Na tautino mai e valoaga o le a avea le Mesia ma se e tupuga mai ia Aperaamo ma o le a aumaia le faaolataga i le lalolagi atoa. O le a avea foi le Mesia ma se fanau a le Tupu o Tavita. O le gafa na tuuina mai e Mataio ua faaalia ai o Iesu o se e tupuga mai ia Aperaamo ma le Tupu o Tavita.

Ina ua tusia e Mataio faapea o Iesu foi sa “ta‘ua o Keriso,” sa ia faamanino mai o Iesu o le faataunuuga o le folafolaga a le Atua i le Tupu o Tavita o le a afio mai le Keriso e ala mai i lona tupuaga. Na folafola mai e le Atua e faatuina le nofoalii o Tavita e faavavau. O Keriso o le upu faa-Eleni o le upu Aramaika Mesia, o lona uiga o le “faauuina” po o le “filifilia.”

O tupu Isaraelu ma faitaulaga sili sa faauuina i aso anamua. Sa filifilia e auauna atu i nei matafaioi, sa latou galulue o ni “mesia.” E oo mai i ona po o Iesu, o le Alo folafolaina o Tavita, o le o le a avea ma tupu mulimuli ane i le lumanai, na afio mai ina ia vaaia o le Mesia. O Iesu Keriso o le tupu faale-mesia o le a pule ma nofotupu e faavavau ma faataunuu le folafolaga a le Atua ia Tavita. I le avea ai ma Keriso ma le Mesia, o Iesu o le na filifilia ma faauuina e le Tama Faalelagi e fai ma Ona sui ma aumaia le faaolataga i Ana fanau.

E i ai ni nai faamalamalamaga talafeagai mo gafa eseese. Ua fautuaina mai e nisi sikola e faapea ua saunia e Mataio le faasologa o le gafa o Iosefa, ae ua saunia e Luka ia le gafa o Maria. Ua manatu o Heli o loo ta‘ua i le Luka 3:23 o le tama o le ava a Iosefa.

O le isi faamalamalamaga e ono i ai e faapea na tuuina atu e Mataio le laina tautupu o le faasologa i le nofoalii o le Tupu o Tavita. Na tuuina atu e Luka se gafa e sili ona patino ma sa‘o atoatoa e toe faaauau atu i tua ia Atamu. O gafa uma e lua ua faatuina ai Iesu o le Alo o Tavita ma o le suli faaletulafono i le nofoalii.

O le vaega aupito taua o le gafa o Iesu Keriso na tautino mai e le Tama Faalelagi: “O lo‘u Atalii pele lenei, o lē ua ou fiafia lava i ai.”

E toalima fafine o loo ta‘ua i le gafa o Iesu Keriso a Mataio. E pei ona faamoemoeina, ua faaaofia ai Maria le tina o Iesu. Atonu e lei faamoemoeina, o le gafa foi e aofia ai ni tamaitai se toafa e le o ni Isaraelu, e fesootai ma tagata e le o ni Isaraelu, pe sa fesiligia foi ni uiga tauleleia.

O Tamara, sa i ai se aafiaga e le masani ai. Sa faaipoipo o ia i le atalii ulumatua o Iuta, o le na maliu. Ona tuu atu lea e Iuta lona atalii matua e sosoo ai e faaipoipo i ai. Sa maliu foi o ia. Sa amioleaga nei alii uma e toalua, ma sa la tuua o ia e aunoa ma se fanau. Ina ua le tausia e Iuta se folafolaga e tuuina atu lona atalii laitiiti ia Tamara e faaipoipo i ai, sa ia tuua o ia e aunoa ma se tane po o se avanoa e maua ai se fanau. I le manao ai i se fanau, sa ia faafoliga o se fafine talitane, faasese Iuta, ma sa maitaga i le masaga—o Faresa ma Sera. O Faresa o se tuaa o Iesu.

O Raava, po o Rakaava sa nofo i Ieriko a o lei faatoilaloina e Isaraelu. Sa ia faaalia le agaalofa i sipai Isaraelu ma fesoasoani e faalafi i la’ua. E ui i lona tuanai o se fafine talitane sa Kanana, sa viia o ia e Kerisiano anamua mo lona faatuatua.

O Ruta o se fafine Moapi. Ina ua maliu lona toalua, sa ia filifili e tuua lona fanua ma tagata e tausia lona tina faaletulafono.

Sa faaipoipo Patisepa ia Uria, o se fitafita ese i le autau a le Tupu o Tavita. Sa faia e i la‘ua ma Tavita le mulilua. Mulimuli ane sa avea o ia ma se ava i le Tupu o Tavita ma o le tina o le Tupu o Solomona.

O se tasi o mea e mafai ona tatou aoao mai le faaaofia e Mataio o nei fafine i le gafa o le Faaola o le, e mafai ona galue le Atua ma tagata uma ma e ala i auala e lei faamoemoeina. O se faataitaiga foi o le mea moni e faapea, o le tagata e avea ai i tatou e le fuafuaina i amioga a o tatou tuaa. O le faaaofia ai o tamaitai i le talafaasolopito o aiga o le Faaola o loo atagia mai ai foi le taua o le matafaioi a tamaitai i le faataunuuina o le galuega a le Atua.

I taimi o le Feagaiga Fou, o le faaipoipoga sa masani ona faatulagaina e ulu o aiga—e masani lava o tamā. Ina ua uma ona malilie aiga i le faaipoipoga, sa faamauina le ulugalii, pe “faufautane.” O lona uiga sa la faamau ina ia faaipoipo. Sa noatia faaletulafono le ulugalii i le tasi ma le isi ae sa lei nonofo faatasi o se tane ma se ava. Sa manaomia se tulafono maualuga o le ola mama i le va o le taimi o le faamau ma le sauniga o le faaipoipoga.

Ina ua iloa e Iosefa le maitaga o Maria, sa ia iloa e le o ia o le tamā o lana pepe. I lalo o le tulafono a Iutaia, sa ia te ia filifiliga nei:

• Sa mafai ona ia tatalaina faalauaitele le faaipoipoga ma Maria ma faasalaina o ia. Semanu e manatu tagata ua tausalaina Maria i le mulilua—o se solitulafono e faasalaina i le oti i lalo o le tulafono a Mose.

• Semanu e mafai ona ia faaleaogaina le la faamau ma Maria na o ia i luma o molimau e toalua.

• E mafai ona ia faaauau pea i le faaipoipoga.

Sa manao Iosefa e faaali atu le alofa mutimutivale ia Maria. Sa ia fuafua e faaleaogaina faalilolilo le faamauga. O lenei mea o le a faasaoina ai le faalumaina faalauaitele o Maria ma le avanoa e faasalaina ai. Peitai, ina ua faamautinoa mai e se agelu sa tumau pea le mama o Maria ma o lana tama o le Alo o le Atua, sa filifili Iosefa e faaauau pea le faaipoipoga. Sa tusia e se tasi o sikola, “O se taunuuga o le tulaga ese o le faaautamaina o Iesu, o le manatu e uiga i le le aloaiaina o punaoa ma mafua ai ona mafatia uma ia Maria ma Iesu (ma atonu foi o Iosefa) i o latou olaga atoa.”

Tagai i le “Luka 1:34–35. ‘A faapefea le mea nei, aua ou te lei iloa se tane?’”

O le igoa Iesu e sau mai le Iēsous, o le faa-Eleni o le igoa Eperu Yeshua. O Yeshua o lona uiga “Ua laveai e Ieova.” O le faaumi o le igoa, Yehoshua, o lona uiga “O Ieova o le faaolataga.” O ituaiga uma e lua o le suafa e molimau i le faasinomaga ma le misiona a Iesu Keriso. O Iesu o Ieova i le muai olaga. Sa faamatala e Mataio le misiona a le Faaola o le faaolataga i le tautino mai, “E togiola e Ia lona nuu mai a latou agasala”

O Emanuelu e sau mai upu Eperu o lona uiga “ua faatasi le Atua ma i tatou.” I le fuaiupu mulimuli o le Mataio, ua folafola atu ai e le Faaola i Ona soo, “Ou te ia te outou i aso uma lava, e oo lava i le gataaga o le lalolagi.” O nei tautinoga tutusa i le amataga ma le faaiuga o le Evagelia a Mataio o loo aumaia ai le savali faapea o le a le faagaloina lava i tatou e le Atua. O loo faatasi pea o Ia ma i tatou.

E lei faia e le Ekalesia se faamatalaga aloaia e uiga i le tausaga na soifua mai ai le Faaola. O le kalena o loo faaaogaina i le taimi nei i le tele o le lalolagi sa foafoaina i le tele o seneturi ina ua mavae le soifua mai o Iesu Keriso. E le malilie le au atamamai i le auala e faaaoga ai faamatalaga faasolopito o loo i ai e fuafua ai le tausaga o le soifua mai o Iesu. E ui e leai ni a tatou aso tonu, ae o loo i ai sa tatou faamaumauga o le tele o mea na tutupu i le soifuaga ma le galuega a Iesu Keriso.

I le Feagaiga Tuai, na vaevaeina ai e le Tupu o Tavita ia faitaulaga a Isaraelu i ni aiga e 24 (sa ta‘ua o “vasega”). O aiga taitasi, po o se vasega, sa valaauina e auauna atu i le malumalu e faalua i le tausaga mo le vaiaso e tasi i taimi taitasi. Fai mai le Luka 1:5 sa i ai Sakaria “i le vasega,” po o le aiga o le ositaulaga, o Avia. O le Faaliliuga a Iosefa Samita mo le Luka 1:8 ua suia ai le upu vasega i le perisitua.

Sa faia e faitaulaga le vili e filifili ai po o ai o i latou e mauaina le faamamaluga o le susunuina o mea manogi i totonu o le malumalu. Ona o le toatele o le aofai o ositaulaga, o le avanoa e susunu ai mea manogi o se avanoa e seasea ona maua. Semanu o se vaega maualuga lea i le olaga o Sakaria o le auauna atu o se ositaulaga.

I Isaraelu anamua, o le lē mauaina o ni fanau a ulugalii faaipoipo sa manatu i ai o se pagatia matuia. O nisi foi sa talitonu sese o se faasalaga mo le agasala. Sa tatalo Sakaria ina ia maua e i la‘ua ma Elisapeta ni fanau. Sa lei i ai ni fanau a Sakaria e faaauauina lana laina o le perisitua. Ina ua iloa e Elisapeta ua maitaga o ia, sa ia fai mai o le i ai o se tamaitiiti o le a aveesea ai lona “luma i tagata.”

E ui i lo la‘ua tofotofoga, ae sa tumau pea le faamaoni o Sakaria ma Elisapeta i le Alii. O se tasi lea o taimi o le tele o mea sa tusia ai i le Evagelia a Luka o loo faaalia ai le alofa mutimutivale o le Alii mo i latou o e tigaina pe mafatia.

E faaaoga e tusitusiga paia i le tele o auala le igoa po o le faalaniga o Elia I lenei tulaga, o le mau faasino ia Elia e foliga mai e ta‘u mai ai le manatu o se tagata teuteuala. I aso anamua, o teuteuala “e tamomoe i luma o le kariota a le tupu ma tafitafi mama le ala mai maa po o isi faalavefau, ma valaau male leotele atu le afio mai o le tupu. ” O Ioane o se teuteuala ma se fofoga valaau a Iesu. O ia o le avefeau na tofia mai le lagi.

Sa ta‘u atu e le agelu o Kaperielu ia Sakaria o le a muamua atu Ioane i luma o le Faaola “i le agaga ma le mana o Elia.”

Na aoao mai le Perofeta o Iosefa Samita le faasinomaga o le agelu o Kaperielu: “O Noa ” o Kaperielu; ua tu o ia i autafa o le pule ia Atamu i le Perisitua; sa valaauina o ia e le Atua i lenei tofi, ma o ia o le tamā o tagata ola uma i ona aso.”

A o lei taitai fanau mai Maria, sa silafia e perofeta lana matafaioi paia o le tina o Iesu Keriso. Sa faailoa mai e nisi perofeta o ia i lona igoa. Ua faaalia mai e le Tusi a Mamona o ia o le “ipu pele ma filifilia” o le o le a “fanau mai se atalii, ioe, o le Alo lava o le Atua.”

Sa faamalamalama mai e Elder Bruce R. McConkie: “Ona e na o le tasi lava le Keriso, o lea la e na o le tasi lava le Maria. Ma talu ai sa filifilia e le Tama le tagata aupito sili ona tamalii ma amiotonu o ona atalii agaga uma e sau i le olaga nei o lona Alo Pele e Toatasi i le tino, ina ia mafai ai ona tatou faia se faaiuga mautinoa na ia filifilia le aupito sili ona agavaa ma talenia faaleagaga o ona afafine agaga uma e avea ma tina faaletino o lona Alo e Faavavau”

Na aoao Peresitene Russell M. Nelson : “Na soifua mai Iesu i se Tama tino ola pea ma se tina faaletino. Mai Lona Tama faavavau tino ola pea, na mautofi ai Iesu i le mana e soifua ai e faavavau. Mai Lona tina faaletino sa Ia maua mai ai le tulaga le maalofia o le oti faaletino.

“O na uiga tulaga ese sa tatau ai mo Lana misiona e togiola mo agasala a tagata uma. O le mea la na soifua mai Iesu le Keriso ina ia maliu (tagai 3 Nifae 27:13–15). Na maliu o Ia ina ia mafai ona tatou ola. Na fanau mai o Ia ina ia mafai e tagata uma ona ola i tala atu o le tuugamau.”

Sa fesili Maria i le agelu o Kaperielu pe mafai faapefea ona avea o ia ma tina o Iesu “aua ou te lei iloa se tane,” po o i se isi faaupuga, talu ai o ia o se taupou. Sa ta‘u atu e Kaperielu ia te ia “E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese” ma o lana tama o le Alo o le Atua. O isi mau o loo faasino i le faaautamaina o Iesu Keriso o loo faapupula mai ai foi o Ia o le Alo o le Atua. Peitai, o nei mau, e le o faaalia mai ai pe na faapefea ona tupu lenei vavega. Ua lapataia i tatou e taitai o le Ekalesia e faasaga i le taumatemate pe na faapefea ona fanau mai le Faaola.

Ina ua mavae le fanau mai o Ioane, sa viia e Sakaria le Atua ma vavalo atu e uiga i le misiona a Ioane. E pei ona tusia i le Luka 1:69, sa ta‘ua e Sakaria faapea sa “faatuina e le Atua se nifo o le olataga” (faaopoopo le faamamafa), o se faalaniga faalemesia lea e faasino ia Iesu Keriso. O le nifo o se faatusa o le mana—o se talafaatusa i le malosi o manu fai seu i le Nuu Paia.

• Dallin H. Oaks, “Valoaga Faa-Perofeta i le Soifua mai o KerisoFaigalotu o le Kerisimasi a le Au Peresitene Sili, 4 Tes., 2016), Gospel Library

• Becky Craven, “Mulimuli i le Faataitaiga a Maria,” New Era, Tes. 2018, 24–27

• Gaye Strathearn, “Maria, le Tina o Iesu,” Ensign, Ian. 2019, 12–17

• Margot Hovley, “Maria, Tina o le Faaola,” Ensign, Tes. 2019, 22–23