Mataio 19–20; Mareko 10; Luka 18

O le fesili a le au Faresaio e uiga i le tatalaina o faaipoipoga na atagia mai ai se finauga i le va o le au Faresaio. Na talitonu nisi e lē tatau ona faatagaina le tatalaina o faaipoipoga mo soo se mafuaaga vagana ai le solitulafono faalefeusuaiga. O isi sa talitonu o le tatalaina o faaipoipoga sa taliaina mo “soo se mafuaaga,” e pei o le “leai o se fanau, finauvale, po o le le tausia lelei o le fale.”

Na tali mai le Alii i le teenaina o le faiga o le tatalaina o faaipoipoga mo soo se mafuaaga e ese mai le solitulafono faalefeusuaiga. Sa ia faamanatu atu foi i le au Faresaio le uluai faamoemoega o le faaipoipoga e pei ona aoao mai i le Kenese 1:27–28; 2:22–24. Sa ia faamamafa mai “o le faaipoipoga sa fuafuaina e faatuina ai se mafutaga tumau.” O lenei aoaoga na teena ai le “sauaina amioletonu o tamaitai” lea na mafua mai i le tatalaina o faaipoipoga mo mafuaaga faatauvaa.

Atonu e lē fiafia le ‘aufaitau i aso nei i le aoaoga a Iesu e faapea, o so o se tasi e faate’a se avā ona toe faaipoipo lea, ua mulilua o ia iā te ia. Ae atonu na mātauina e i latou i aso o Iesu, o lenei aoaoga na siitia ai le tulaga o fafine. I taimi faatusipaia, sa manatu ai i se tamaitai faaipoipo o se tagata e “pulea” e lana tane. O lea, na manatu ai i le mulilua o se solitulafono e faasaga i se tamāloa. “O le aoao atu faapea o le mulilua o se alii o se solitulafono lea faasaga i lana ava, na tuu ai e Iesu le tane i lalo o ‘le tiute tauave e tasi e pei o le ava’ ma ‘siitia ai le mamalu ma le tulaga o tamaitai.’ O le ava e le na ona ‘pulea’ e lana tane e pei o se meatotino, ae o le tasi e ana le isi ma sa i ai le faamaoni o le isi (tagai 1 Korinito 7:3–4).”

I se faamatalaga e uiga i le Mataio 19:8–9, na aoao mai ai Peresitene Dallin H. Oaks: “O le ituaiga faaipoipoga e manaomia mo le faaeaga—e faavavau i le umi ma le faale-atua i le tulaga lelei—e le mafaufauina ai le tete’a. I malumalu sa o le Alii, e faaipoipo ai ulugalii mo le faavavau atoa. Ae o nisi faaipoipoga e le agai i luma i lena tulaga. Talu ai ‘le maaa o o [tatou] loto, ua le o faamalosia ai e le Alii i le taimi nei ia taunuuga o le tulaga faaselesitila. Ua Ia faatagaina tagata ua tatalaina faaipoipoga e toe faaipoipo e aunoa ma le pisipisia i le le mama o loo faamaoti mai i le tulafono maualuga atu. Sei vagana ua faia e se tagata ua tatala le faaipoipoga se solitulafono matuia, ae e mafai e ia ona agavaa mo se pepa faataga o le malumalu i lalo o tulaga agavaa lava e tasi lea e faatatau i isi foi tagata o le ekalesia.”

O se eunuka o se alii e vaivai. E mafai ona avea se tagata ma se eunuka e ala i le fanau mai, e ala i le faaesea, po o le filifiliga “ona o le malo o le lagi.” O le vaega mulimuli e sili ona malamalama i ai faafaatusa. E mafai ona aofia ai i latou o ē e ‘alofia ma le lotomalie le faaipoipoga po o feusua’iga ina ia auauna ai i le Atua. Mo se faataitaiga, sa vavaeeseina Peteru ma isi soo mai a latou ava mo se taimi e mulimuli ai i le Faaola ma faia Lana galuega. Nai lo le faamaoniaina o le nofo toatasi i le olaga atoa, atonu na aoao mai le Faaola e manaomia e nei soo ona ositaulagaina mo se taimi lē tumau ia sootaga faaleaiga ma faaipoipoga a o latou malaga faatasi ma Ia.

O le valaau mo le aluese mo se taimi lē tumau e mulimuli i le Faaola e lei suia ai le taua o le faaipoipoga. Ua faamautu mai e faaaliga anamua ma aso nei o le faaipoipoga ma le foafoaina o fanau o poloaiga ia a le Atua ma o vaega taua o Lana fuafuaga o le faaolataga.

E foliga mai sa faaaogā e Iesu le faaupuga faatele (o le faateleina ma le loto i ai) e aoao ai e faapea, o le tagata mau’oa e ono faigatā tele ona ulu atu i le lagi. Ua faaopoopo mai le Faaliliuga a Iosefa Samita, “O tagata e faatuatua i oa, e le mafai; ae e le o se mea e le mafaia e tagata o e faatuatua i le Atua ma tuua mea uma ona o au, aua o i latou faapena o mea uma nei e mafai ona fai.”

Na saunoa Peresitene Jeffrey R. Holland e uiga i lenei faataoto: “E taua le matauina e leai se tasi na le tonu le taulimaina iinei. Sa malilie le au faigaluega muamua i le totogi atoa o le aso, ma sa latou mauaina. E le gata i lea , sa latou, e mafai ona mafaufauina, faafetai tele i le mauaina o le galuega. I taimi o le Faaola, e le mafai e se tagata masani ma lona aiga ona faia ni mea se tele atu nai lo le ola ai i mea latou te maua i lena aso. Afai e te le galue pe faifaatoaga pe fagota pe faatau atu, masalo lava e te le ai. I le tele atu ai o tagata faigaluega faamoemoe nai lo galuega, o nei uluai alii na filifilia sa sili ona faamanuiaina i le galuega mai i le toatele i lena taeao. …

“Ae i le faaiuga o le aso, sa maofa ai i le toe foi mai o le pule o le fanua i le taimi lona lima ma se ofo mataina o le sefulutasi itula! O nei tagata faigaluega mulimuli ma sili ona lotovaivai, na o le faalogo o le a taulimaina i latou i se tulaga tonu, sa latou taliaina le galuega e aunoa ma le iloaina o le totogi, o le iloaina o le i ai o se mea e sili atu nai lo le leai, aua o le mea lena na latou maua i le taimi nei. Ae a o latou faapotopoto mo lo latou totogi, sa matua faateia i latou i le mauaina o le totogi lava e tasi pei o isi tagata uma o le au faigaluega! Ma’eu lo latou maofa ma lo latou matua loto faafetai! E mautinoa lava latou te lei lagonaina se alofa faapenei i o latou aso faigaluega uma.

“O le faitau lena o le tala ou te lagona ai le muimui na vaaia i le au faigaluega muamua. “A o ta’u atu e le pule o le fanua i le faataoto ia i latou (ma ou te toe faaupuina teisi ): ‘Au uo, e le o ou le faamaoni ia te outou. Sa outou malilie i le totogi mo le aso, o se totogi lelei. Sa outou fiafia tele lava i le mauaina o le galuega, ma sa ou fiafia tele foi i le auala sa outou galulue ai. Ua totogi atu le tau atoa ia te outou. Ave lo outou totogi ma olioli i le faamanuiaga. Ae mo isi, e mautiona lava ou te saoloto e fai le mea ou te manao e fai i a’u lava tupe.’ Ona tulai mai lea o lenei fesili e tuia ai le loto o soo se tagata i lena taimi po o le taimi nei e fia faalogo i ai: ‘Aisea e te lotoleaga ai ina ua ou filifili e agalelei atu?’”

O le “tau” ua faaliliuina mai le upu Eleni lytron, o lona uiga o se tau o le faasaolotoina po o se auala e mafai ai ona faasaolotoina. I taimi o le Feagaiga Tuai, a o nofo pologa se tasi, sa faamoemoeina lona aiga e totogi le tau o le faasaolotoina. I le avea ai ma Ulumatua a lo tatou Tamā Faalelagi, sa totogi ai e Iesu Keriso le tau na manaomia e faasaoloto ai tagata uma mai le pologa i le agasala. O lenei tau sa le’i totogiina i tupe po o auro ae o le “toto taua o Keriso.”

O le “toatele” o e o le a togiolaina e ese mai le Toatasi, o Iesu Keriso, o le na totogiina lo latou togiolaina. Na aoao mai le perofeta o Isaia: “Ua faaee ia te ia [Iesu Keriso] e Ieova le amioleaga o i tatou uma. … O le malamalama mai ia te ia e tauamiotonuina ai tagata e toatele; aua e tauave e ia a latou amio leaga.”

Na ta’ua e Luka o le savali autu o le faataoto i le faamasino amioletonu e faapea o tagata e tatau ona “tatalo soo e tatau ai, a e aua le faavaivai.” O le upu Eleni ua faaliliuina o le “faavaivai” o lona uiga o le lotovaivai po o le leai o se loto. I le faataoto, o le tatalo e aunoa ma le fiu e faatusa i se fafine ua oti lana tane, sa talosaga atu faafia i se faamasino ina ia foia se faamasinoga le tonu.

O lenei faataoto o se tasi foi lea o le tele o taimi na aoao mai ai le Faaola e uiga i le atoatoa o le Atua e ala i le faatusatusaina i le le atoatoa o le tagata. Afai o le a iu ina tali mai se faamasino amioleaga i se fafine ua oti lana tane o lē na te le popole i ai, o le a le tele o le tali mai o le Atua, le Faamasino amiotonu o tagata uma, i tatalo a Lona nuu ma tuuina atu ia i latou le faamasinoga tonu?

O le Faresaio sa masani ona faaaloalogia ona o le usiusitai atoatoa i le tulafono. Sa latou atiina ae le tele o tulafono ma tu ma aga masani, ua lauiloa o le tulafono tuugutu, ina ia mautinoa ai ua tausia le tulafono a Mose. Ae paga lea, o a latou aoaoga sa i ai le aafiaga o le faaitiitia o le “lotu i le tausiga o tulafono ma uunaia ai le faamaualuga faaleagaga.” O lenei mea na taitai atu ai i se uiga faaalia o le faafiaamiotonu o le tagata ia te ia lava. I se faatusatusaga, o Telona o tagata e aoina lafoga, o ē na inosia ma manatu i ai o ni tagata amio pi’opi’o. Sa masani ona faavasegaina i latou faatasi ma fafine talitane ma tagata agasala. Ae o le toatele o telona na taliaina ma le lotomaualalo aoaoga a Iesu. E le o faamaumauina i Evagelia soo se taimi na aoaiina ai e Iesu i latou o e na naunau e faalogo ma faaleleia o latou olaga.

• Dallin H. Oaks, “Tatalaina o Faaipoipoga,” Liahona, Me 2007, 70--72

• M.Russell Ballard, “A Matou O Ea Ia Te Ai?” Liahona, Nov. 2016, 90–92

• Dallin H. Oaks, “Soo o Keriso,” Liahona, Me 2013, 96-99

• Larry R. Lawrence, “Se A se Mea e Toe Ou Te Lei Faia?,” Liahona, Nov. 2015, 33-35

• Jeffrey R. Holland, “O Le Au Faigaluega i le Tovine,” Liahona, Me 2012, 31-33