Ioane 14–17

Na aoao mai le Perofeta o Iosefa Samita e faapea o “maota e tele” na fetalai ai Iesu e tatau ona malamalama i ai o ni malo—i se isi faaupuga: “‘O le malo o lo’u Tamā e tele malo,’ ina ia mafai ona avea outou ma suli o le Atua ma suli faatasi ma a’u. … E i ai malo e nonofo ai i latou o e usiusitai i se tulafono selesitila, ma e i ai foi malo e nonofo ai i latou e le atoatoa i le tulafono, o alii [ma tamaitai] uma i lana lava faatulagaga.”

Na aoao mai Peresitene Dallin H. Oaks: “Mai faaaliga i ona po nei, ua tatou iloa ai le taunuuga taualuga o i latou uma o ē ola i le lalolagi, e le o le manatu papa’u faapea o le lagi e mo le au amiotonu ma mafatiaga e faavavau o seoli mo isi o totoe. O le fuafuaga alofa a le Atua mo Ana fanau e aofia ai le mea moni lenei na aoao mai e lo tatou Faaola, o Iesu Keriso: ‘E tele mea e nonofo ai i le maota o lo’u Tamā.’ [Ioane 14:2]. O le aoaoga faavae ua faaalia mai e le Ekalesia toefuataiina a Iesu Keriso o Le Aupaia o Aso e Gata ai ua aoao mai ai e faapea, o fanau uma a le Atua—faatasi ma ni tuusaunoaga e matua faatapulaaina iinei—o le a iu ina mautofi i le tasi o malo e tolu o le mamalu, e oo lava i se aupito itiiti lea e ‘sili mamao atu i malamalamaaga uma’ [Mataupu Faavae ma Feagaiga 76:89].”

Sa fia iloa e le Aposetolo o Toma le auala e oo atu ai i le mea o loo alu i ai Iesu. I le tali atu i ai, na fetalai ai Iesu, “O A’u nei le ala.” O le upu “ala” ua faaliliuina mai le upu Eleni hodos. E mafai ona faauigaina o se auala, ala, ulufale, taitaiga, malaga, po o le ala e faatino. Na aoao mai Elder Dieter F. Uchtdorf: “O le Faaola o le mana uunai lea o loo i tua atu o mea uma tatou te faia. E le o Ia o se nofoaga malolo i ai i la tatou faigamalaga. E le o ia o se mataaga po o se faailo fanua iloga. O Ia o ‘le ala, ma le upu moni, ma le ola: e le alu atu lava se tasi i le Tamā, pe a le ui mai ia [Iesu Keriso]’ [Ioane 14:6]. O le Ala lena ma o lo tatou taunuuga mulimuli. … Ou te … molimau atu o Iesu Keriso o lo tatou Matai, o lo tatou Togiola, ma e na o le pau lea o lo tatou Ala e tasi e toe foi atu ai i lo tatou Tamā pele o i le Lagi.”

Mo nisi malamalamaaga, tagai i le ”Galuega 24:14, 22. O le a ‘le ala’?”

I le tali atu i le aioiga a Filipo, “Ia e faailoa mai le Tamā ia te i matou,” sa faamatala atu e Iesu faapea o le iloaina o Ia o le iloa foi lea o le Tamā. O mea tatou te iloa e uiga i le natura o le Atua le Tamā o le mea silisili lea e mafai ona tatou aoaoina mai le galuega ma aoaoga o Lona Alo e Toatasi na Fanaua, o Iesu Keriso. … O loo i ai i le Tusi Paia se molimau faaaposetolo o Iesu o le faatusa manino o le peresona o Lona Tamā (Eperu 1:3, lea e faamanino atili ai le aoaoga a Iesu lava ia e faapea ‘o le ua vaai mai ia te a’u ua vaai o ia i le Tamā’ (Ioane 14:9).”

I le King James Version o le Tusi Paia, o le upu Eleni paraklētos ua faaliliuina o le “Faamafanafana” i le Ioane 14 ma le 15. O se paraklētos o se fesoasoani, faatoga, po o se fautua. O se tasi foi e faamafanafana ma faamalosiau. Na folafola atu e le Faaola i Ona soo, pe a alu ese atu o Ia, o le a le tuua na o i latou. O le a Ia auina atu ia i latou “se isi Faamafanafana.” O lenei Faamafanafana o le Agaga Paia. O le folafolaga a le Faaola o le a Ia tuuina atu i Ona soo se isi Faamafanafana ua faaataata mai ai o le Faaola lava Ia o se Faamafanafana. Na saunoa mai le Perofeta o Iosefa Samita: “E toalua Faamafanafana o loo ta’ua. O le tasi o le Agaga Paia. … Ia [o ai] la le isi Faamafanafana? E le sili atu pe itiiti ifo foi nai lo le Alii o Iesu Keriso lava Ia.”

O le fuaitau “o le alii o lenei lalolagi” e faatatau i le tiapolo. E tele lona mana ma le faatosinaga i lenei lalolagi paū. Ae na aoao mai Iesu Keriso o le a aveesea le tiapolo ma “tuli ese” mai lenei lalolagi i le taimi o le faamasinoga.

Sa masani ona faaaoga e perofeta o le Feagaiga Tuai le faatusa o le vine e faamatala ai Isaraelu, le nuu o le feagaiga a le Atua. Sa i ai iā Isaraelu le gafatia e matua fua mai ai, ae sa masani ona lē lava ma fua mai ai fua oona. I lenei tala, o le Atua o le faifaato’aga, po o le galue vine, o le togavine. O Iesu Keriso o le “vine moni.” E faamoemoe le faifaato’aga mo vine e fua mai ai fua lelei. Ina ia fua mai fua lelei, e tatau i se lala ona “tumau i le vine.” Na aoao mai Elder David A. Bednar: “Ua tuuina mai e le Alii o Iesu Keriso ia i tatou taitoatasi le valaaulia ia tumau ia te Ia [tagai i le Ioane 15:4–9]. Ae faapefea ona tatou aoao moni ma o mai e mau ia te Ia?

“O le upu tumau o lona uiga o le tumau o le pipii po o le mautu ma onosai e aunoa ma le faamatuu atu. Na faamatala e Elder Jeffrey R. Holland e faapea o le “tumau” o se faatinoga o lona uiga “‘[ia] nofo ai--ae [ia] nofo ai e faavavau.” O le valaau lena o le savali o le talalelei i … tagata uma … i le lalolagi. Ia o mai, ae o mai ma tumau ai. O mai ma le talitonuga ma le mausali. O mai e nofomau, mo lo outou manuia ma le manuia o tupulaga uma o e e tatau ona mulimuli mai ia te outou.’ O le mea lea, tatou te tumau ia Keriso a o tatou mautu ma mausali i lo tatou tuuto i le Togiola ma Ona faamoemoega paia, i taimi lelei ma taimi leaga [tagai i le Ioane 15:10].”

“Mo se mafuaaga e le o faamtalaina atoa i tusitusiga paia, e lei galue le Agaga Paia i le atoaga i tagata Iutaia i le taimi o le femaliuai ai o Iesu i le tino (Ioane 7:3916:7). O faamatalaga i le aafiaga o le Agaga Paia e lei oo mai seia vagana ai ina ua toetu Iesu atonu na tatau ai ona faasino na o lena tisipenisione faapitoa, aua ua matua manino lava na galue le Agaga Paia i tisipenisione na muamua atu.”

A o lei alu atu i le Faatoaga o Ketesemane, sa tatalo le Faaola i Lona Tamā mo Ana Aposetolo ma i latou uma o e talitonu ia te Ia. E masani ona ta’u lenei mea o le Tatalo Faatoga. E taliaina lautele o se tatalo faatoga o se talosaga “e ofoina atu mo” se tasi ma valaaulia ai “le Atua e galue e tali mai.”

I lenei tatalo, na faaalia ai e le Faaola Lana matafaioi o lo tatou Puluvaga, po o le Fautua, faatasi ma le Tamā Faalelagi. Na aoao mai Peresitene Russell M. Nelson: “O le upu fautua e sau mai le pogai faa-Latina o lona uiga o se “leo mo,’ po o le ‘o se e aioi atu mo se tasi.’ O isi faaupuga e fesootai i ai o loo faaaoga i tusitusiga paia, e pei o le fautua po o le puluvaga (tagai i le 1 Timoteo 2:5; 2 Nifae 2:28; MF&F 76:69). Mai le Tusi a Mamona ua tatou aoao ai o lenei tiutetauave sa muai vaai i ai a o lei fanau mai o Ia: ‘O le a faia e [Iesu] le faatoga mo le fanauga a tagata uma; ma o i latou o e talitonu ia te ia o le a faaolaina’ (2 Nifae 2:9). O lenei misiona sa manino lava le iloagofie i le tatalo faatoga agaalofa a Iesu.”

I lenei fuaiupu, o le veape Eleni ginōskō ua faaliliuina o le “ia iloa.” O le upu ginōskō ua fautuaina mai ai le malamalama na maua e ala i le poto masani ma le usiusitai. Na aoao mai Iesu, “Ai se tasi e fia fai lona finagalo, e iloa ai e ia le mataupu, pe mai le Atua, pe ou te tautala fua lava a’u.” O le mauaina o lenei ituaiga o malamalama “e manaomia ai se loto naunautai, se mafaufau e auai, taliga malolosi, ma ola moni ai i lena malamalama i le olaga i aso uma.” I se faamatalaga e uiga i lenei ituaiga o aoaoga, na tusia ai e Elder David A. Bednar, “I le avea ai ma soo o le Faaola, e le na ona tatou taumafai ia iloa atili; ae, e tatau ona tatou faia pea lava pea le tele o mea ua tatou iloa e sa’o ma avea ma tagata e sili atu ona lelei.”

Na aoao mai Elder D. Todd Christofferson:

“O le avea ia tasi o se autu faifaipea i le talalelei a Iesu Keriso ma i feutaga’iga a le Atua ma Ana fanau. Ma e faatatau i le aai o Siona i ona po o Enoka, o loo faapea mai ai ‘sa tasi o latou loto ma tasi le mafaufau.’ [Mose 7:18]. O le Aupaia i le Ekalesia anamua a Iesu Keriso, o loo faamauina i le Feagaiga Fou, ‘Ua tasi lava le loto ma le manatu o e faatuatua uma lava.’[Galuega 4:32].

“I la tatou lava tisipenisione, sa apoapoai mai ai le Alii, ‘Ou te fai atu ia te outou, ia tasi outou; ma afai tou te lē tasi e lē a a’u outou.’ [Mataupu Faavae ma Feagaiga 38:27]. …

“Pe a manumalo le Atua i loto ma mafaufau uma, ua faamatalaina tagata ua ‘tasi i latou, o le fanau a Keriso.’[4 Nifae 1:17; faaopoopo le faamamafa]. …

“…ua na o lo tatou tuuto faamaoni lava ma le alofa ia Iesu Keriso e mafai ai ona tatou faamoemoe ia tasi—tasi i totonu, tasi i le aiga, tasi i le Ekalesia, ma i’u ai ina tasi i Siona, ma e sili atu i mea uma, tasi ma le Tamā ma le Alo ma le Agaga Paia.”

I le Tatalo Faatoga, sa tatalo ai Iesu mo Ana Aposetolo, “o i latou na foaiina mai e [le Atua] ia te Ia.” O le “tagata o le malaia” o le na leiloa e faatatau ia Iuta le Sekara, o le na faalataina Iesu. O le upu Eleni ua faaliliu mai ai le “malaia” o le (apōleia) e ta’u mai ai se tulaga o le leiloa po o le faaumatia. E faatatau ia Iuta le Sekara, na saunoa ai Peresitene Jeffrey R. Holland e faapea: “O se matua tigā o le loto le mafaufau faapea o se tasi o Ana molimau faapitoa o le sa nofo i Ona vae, faalogo ia te Ia o tatalo, matamata o Ia faamalolo, ma lagonaina Lana pa’i, o le a faalataina o Ia mo na o le 30 tupe siliva. E leai se mea o le talafaasolopito o lenei lalolagi ua faatauina ai e se tupe itiiti naua se tauvalea ua matua tele naua. E le o tatou e faamasinoina le malaia o Iuta, ae na fetalai Iesu e uiga i le e faalataina o Ia, ‘Sa sili ai mo lena tagata pe ana le fanau mai.’ [Mataio 26:24].”

O le faapaiaina o “le faagasologa o le tuusaolotoina mai le agasala, atoatoa, mama, ma paia e ala i le togiola a Iesu Keriso” Na aoao mai Elder D. Todd Christofferson: “O le faapaiaina e aveesea ai pisipisia po o aafiaga o le agasala. …

“[E] faataunuuina e ala i le alofa tunoa o Keriso, o le alofa tunoa lea o se meaalofa ia [i tatou] e faavae i le faatuatua. Ae o la tatou filifiliga saoloto o se elemene manaomia foi i lenei faagasologa paia. E tatau ona tatou loto e salamo ma galulue ia salamo. E tatau ona tatou filifili e papatiso ma maua le Agaga Paia, ma e tatau ona tatou filifili e tumau faamaoni i a tatou feagaiga mulimuli ane. Ina ia maua le meaalofa e tatau ona tatou galulue i le ala ua Ia faauuina ai.”

• Lawrence E. Corbridge, “O Le Ala,” Liahona, Nov. 2008, 34–36

• Henry B. Eyring, “O le Faamafanafana,” Liahona, Me 2015, 17–21

• Russell M. Nelson, “Lesona mai Tatalo a le Alii,” LiahonaMe 2009, 46–49.