Mataio 3; Mareko 1; Luka 3

O nisi taimi e ta’ua ai le Ekalesia a le Faaola o le malo o le lagi. O le faapea atu “ua latalata mai le malo o le lagi” o lona uiga o le a i ai iinei i se taimi vave. Ina ua valaauina e Iesu Keriso Ana Aposetolo e Toasefululua, sa Ia tuuina atu ia i latou “ki o le malo o le lagi” ina ia mafai ai ona latou taitaia Lana Ekalesia i le lalolagi. I le Mataio 13 tatou te maua ai upumoni faaopoopo na aoao mai e le Faaola e uiga i le malo o le lagi.

O le gata feai Palesitina o le gata taatele e aupito oona i Isaraelu. E feoai ia gata feai i le po. E masani lava ona latou saili e ala i le lalafi ona sosolo atu ai lea i luga o a latou meaai. A latou lagona le faamatauina, ona taaiai lea e gata feai o latou tino, sisī, ma osofaia o latou fili. O le fasifuaitau Eleni ua faaliliuina o le “fanau a gata feai” e mafai foi ona faaliliuina o le “toloai o gata feai” (po o le vaega o fuamoa na fananau mai e se gata tina) ma ua ta’u mai ai le pepelo ma le amioleaga o le au Satukaio ma le au Faresaio.

O le “asu” o se tui lea sa faaaoga e togi ai le saito i le ea. O lenei faiga e mafai ai ona tuueseese le saito mai le aputi e le manaomia. O lenei vaega e le manaomia ua ta’ua foi o le aputi. Ona toe toulu ifo ai lea o le saito i le eleele ae feulaina ese e le matagi le aputi saito māmā. Ona faaputuputu lea o le saito i se faleteusaito, po o se faleteuoloa. Soo se aputi na totoe sa susunuina i le afi. Sa aoao atu e Ioane le Papatiso e faapea o le Faaola, o le o le a mulimuli mai ia te ia, o le a tuueseeseina le au talitonu mai ia i latou e le talitonu e pei ona tuueseese ai le saito ma le otaota.

Na faamatala mai e le Perofeta o Iosefa Samita faapea o le Agaga Paia e lei faaali mai o se lupe ina ua uma ona papatisoina Iesu Keriso. Ae, o le faapepepepe ifo o le lupe na ta’u atu ai sa i ai le Agaga Paia i lena sauniga: “O le faailoga o le lupe sa faia a o lei foafoaina le lalolagi, o se molimau mo le Agaga Paia, ma e le mafai e le tiapolo ona sau i le faailoga o se lupe. O le Agaga Paia o le peresona, ma”.e le mafai ona faaliliu ma avea o se lupe; peitai o le faailoga o se lupe sa tuuina atu ia Ioane e tau atu ai le moni o le mea ua fai, aua o le lupe o se faatusa po o se faailoga o le upumoni ma le mama aiai.”

Sa manatulia le au tusiupu o ni tagata popoto faapitoa i le itu faaletulafono o le tulafono a Mose. A folafola atu ma faaliliu le tulafono, e masani ona latou faaopoopo le mamafa tele ma le pule i la latou aoaoga e ala i le ta’u ma sii mai o upu a taitai ua mavae ma tagata popoto faapitoa. I se faatusatusaga, e fetalai Iesu ma le pule o Le e tuuina mai le tulafono, aua o Ia o le na aumaia le tulafono a Mose.

O le faaupuga Eleni ua faaliliuina o le “agaga leaga” e mafai foi ona faaliliuina o le “agaga tiapolo.” O agaga leaga e saili e nofoia tino faaletino o i latou ia e mulimuli ia Lusifelo. Sa latou nonofo i le afioaga o le Tama Faalelagi ma Iesu Keriso a o le i lafoai ese mai le lagi ona o le tetee. Ua tatou iloa mai tala faatusi paia e mafai e agaga leaga ona nofoia mo se taimi le tumau ia tino o alii ma tamaitai. Peitai, na aoao mai le Perofeta o Iosefa Samita e faapea ua ia i tatou le mana e tetee atu ai i le tiapolo ma agaga e mulimuli ia te ia.

I le Tusi Paia, o le lepela e faasino i tulaga eseese o le pau. I o tatou aso, o le lepela e masani ona ta’ua o le faama’i o Hansen. E mafai e le lepela ona faaleagaina le pa’u, neura, mata, isu, faai, ma ponaivi. Afai e tuu e le togafitia, e iu i se oti tiga.

O lepela i taimi faatusi paia na vavaeese mai faalapotopotoga o tagata. Sa poloaiina i latou e valaau atu “Le mama!” e lapataia ai soo se tasi o latalata atu ia i latou. Sa talitonu o lo latou le mama o le a salalau atu i soo se tasi e fesootai ma i latou. Ona o tagata na afaina i le lepela sa tuua na o i latou ma tuuatoatasi, o lea sa manatu ai Iutaia o se oti o loo ola.

O le faamaloloina o le tamaloa lepela, e le gata ina sa faamalolo e le Faaola lona tino faaletino, ae sa toe faafoi ai o ia i lona tulaga i le nuu. Ina ua uma ona faamalolo e le Faaola le tamaloa, sa Ia faatonuina le tagata e usitai i le poloaiga faaMose mo lepela faamaloloina. O le lepela e tatau ona tuuina atu o ia lava i se ositaulaga, osi atu taulaga, ma faia se sauniga o le faamamaina.

I lalo o le tulafono a Mose, o le faitaulaga sili o le taitai pulefaamalumalu i le Perisitua Arona. Sa pulefaamalumalu o ia i isi ositaulaga uma. E ui o Ana ma Kaiafa o ni faitaulaga sili i le taimi o le galuega a Ioane le Papatiso, e lei oo mai le afioga a le Atua ia i laua. Ae, na oo mai ia Ioane. Ua ta’u mai i lenei mea o taitai o Isaraelu i lena taimi sa le agavaa.

Na oo ina pi’opi’o le tofi o le faitaulaga sili. E tele tausaga, sa tofia e Herota ma isi taitai Roma ia faitaulaga sili e fua i le faiga sese faalemalo po o faiga faaalatua. Sa le i ai i Iutaia se taitai perisitua a faamamaluina faalelagi ma sa latou manaomia lava le toefanauina faaleagaga.

O Ioane le Papatiso na filifilia e le Atua ma faauuina lelei e avea ma sui o le Atua. Sa tatau ona ia talai atu le salamo ma faatino le sauniga o le papatisoga.

Sa faamatala mai e le Perofeta o Iosefa Samita: “O Ioane i le taimi lena, na pau lea o le taitai faaletulafono mo mataupu o le malo sa i ai i lena taimi i le fogaeleele, ma sa umia ki o mana. E tatau ona usitai tagata Iutaia i ana faatonuga a leai o le a malaia, i a latou lava tulafono. ” Na maua e le atalii o Sakaria ia ki, le malo, le mana, le mamalu mai tagata Iutaia, e ala i le faauuga paia ma le poloaiga a le lagi.”

Tagai i le “Mataio 1:1–17. Aisea ua saunia ai e Mataio ma Luka ni gafa eseese o Iesu?”

• Aoaoga a Peresitene o le Ekalesia: Iosefa Samita (2007), 79–87

• J. Devn Cornish, “The Gate Called Baptism,” Ensign, Feb. 2015, 44–47

• Dale G. Renlund, “Mauaina o le Mana o le Atua e ala i Feagaiga,” Liahona, Me 2023, 35-38