Faaaliga 15–22

Sa faaaoga e Ioane le fasifuaitau “o se sami tioata ua fefiloi ma le afi” e faamatala ai le mamalu selesitila. Na aoaoina e le Perofeta o Iosefa Samita o le “sami tioata” e faatusa i “le lalolagi, i lona tulaga faapaiaina, tino ola pea, ma le faavavau.” Na faamatalaina foi e Iosefa Samita le nofoaga o loo afio ai le Atua o se “kelope e pei o se sami tioata ma le afi.”

“Ua tofia e le Atua agelu e toafitu e faamalosia le faamasinoga. … O faifeau o le faamasinoga o agelu ia e sili ona lelei, e pei ona ta’u mai i fusi auro latou te ofuina e pei o le Atalii o le tagata.”

Na ta’ua e se tasi tagata atamai “le eseesega i le va o faamaufaailoga e fitu, pu e fitu, ma ipu e fitu [po o ‘fagu’]. O faamaufaailoga e faasilasila atu ai fuafuaga a le Atua, o pu e ilia ai le leo o le lapataiga, ma e faataunuu e ipu lana faamasinoga. … O lenei mataupu e le o le Atua o le alofa mutimutivale ae o le Atua o le faamasinoga tonu. Ua faaalia e Ioane e tatau ona i ai le aso o le faamasinoga tonu. … O le mataupu e sefululima o loo i ai ni manatu se lua: muamua, o mala e le mafai ona taofiofia pe a amata mai; ma lona lua, e fasiotia i latou e le Atua i le faamasinoga tonu ma le tauimasui i luga o le lalolagi. E ui lava e oo mai le faasalaga e aunoa ma le faaitiitia, ae e tonu ma amiotonu.”

I le lalolagi anamua, na avea Papelonia ma laumua o le malo o Papelonia i le taimi o le nofoaiga a Nepukanesa. A o faasolo ina mauoa Papelonia ona o le tele o ana manumalo, na amata ai e Nepukanesa se polokalame tele o le fausiaina o fale. Na avea Papelonia ma aai sili ona telē i ona aso. Na faamatalaina e perofeta o le Feagaiga Tuai lenei aai o “Papelonia tele,” “o le viiga o le lalolagi uma,” ma “le viiga o malo.”

O le mea e faanoanoa ai, o le tamaoaiga ma le mamalu o Papelonia na i’u atu ai i amioga pi’opi’o ma amioleaga. Na tusia e se tasi tusitala o talafaasolopito e faapea, ina ua faatoilaloina e Alesana le Sili Papelonia, sa “faateia o ia i amioga a Papelonia.” Sa matuai leaga lava Papelonia o lea na avea ai le igoa lava ia ma faatusa o mea faalelalolagi, amioleaga faaleagaga, ma le malo o Satani. Na matauina e se tasi tagata atamai e faapea, o Papelonia e faatusa i “malo amioleaga, faalapotopotoga, pisinisi, ma ekalesia o loo i ai i aso e gata ai, o nei mea uma, mo le tamaoaiga, ta’uta’ua, po o le pule, ua faaaoga sese ma faaleagaina ai i latou o loo i lalo o la latou puleaga po o faatosinaga.”

Sa mulimuli Ioane i le mamanu faaperofeta o loo maua i le Feagaiga Tuai o nisi taimi e faamatalaina ai malo po o vaega o tamaitai, faatoanofotane, po o fafine talitane. I lenei tulaga, o le fafine na vaai i ai Ioane i lana faaaliga o se fafine talitane. O le fafine talitane o se tagata e talia tupe e faia ai feusua’iga. O ofu matagofie ma taugata o le fafine talitane, ua faaalia ai lona tamaoaiga ma le “mana e faasesēina ai i latou e sili ona maualuga.” I lenei auala, o le fafine talitane “e fai ma sui o filosofia ma talitonuga sese na faasesēina, saisaitia, ma faatauasoina ai tagata mai le amataga.” O igoa o loo tusia i lona muaulu e ta’u mai ai lona fouvale i le Atua ma Ana feagaiga. O lenei fafine talitane o lo’o i ai le pule i totonu o atunu’u uma ma tagata. A o faagasolo taimi, o tagata na te pulea o le a liliu atu ia te ia ma le tasi ma le isi.

O le Tamai Mamoe e faatusa ia Iesu Keriso, o le faatoafaiava. O le taumafataga o le faaipoipoga e faatusa i Lona Afio Mai Faalua. O le faatoanofotane e faatusa i le Au Paia faamaoni o le Ekalesia a Keriso o e o loo tulimatai atu i le toe afio mai o le Faaola. O le tamaitai faaipoipo o loo ofuina ni ofu papa’e e fai ma sui o lona mamāa’ia’i. Na aoao mai Peresitene Jeffrey R. Holland e faapea, o tagata o le Ekalesia i aso nei “ua i ai se tiutetauave e saunia ai le Ekalesia a le Tamai Mamoe a le Atua ina ia talia le Tamai Mamoe a le Atua—i le tagata lava ia. … O ola tatou te tuuina atu ia te Ia i lena itula paia e tatau ona agavaa mo Ia!” Na aoao mai le Perofeta o Iosefa Samita, “O i latou o e tausia poloaiga a le Alii ma savavali i Ana tulafono e oo i le iuga, ua na o le pau ia o tagata e faataga e nonofo i lana tausamaaga mamalu.”

O le solofanua pa’epa’e e faatusa i le malo ma le manumalo. O le toto i luga o le ofu talaloa o le Faaola e mafai ona faasino i Ona fili faatoilaloina. Pe a tupu lenei mea, “o le a faalogoina lona siufofoga: Ua na o a’u ua soli le soligavine, ua ou aumai foi le faamasinoga i luga o tagata uma; … ma sa ou soli i latou i lo’u ita, ma sa ou soli i luga o i latou i lo’u ita, ma sa ou sausauina o latou toto i luga o o’u ofu, ma pisia o’u ofu uma; aua o le aso lenei o le tauimasui sa i lo’u loto. ” Talu ai o ofu ua pisia i le toto a o lei amataina le taua, e mafai foi ona faasino atu i puapuaga o Keriso i Ketesemane ma luga o le satauro. Na saunoa Elder Neal A. Maxwell: “I le sau o le toto i puafu uma, ai lava se mumu o Lona laei i Ketesemane, ai lava se mumu ulaula o lena ofu talaloa! E leitioa la, a afio mai Keriso i le mana ma le mamalu, o le a afio mai o Ia i se laei mumu e faamanatu (tagai MF&F 133:48), e le gata ina faatusa i le soligavine o le toasa, ae ina ia tatou manatua ai le ala na Ia tigaina ai mo i tatou taitoatasi i Ketesemane ma i luga o Kalevaria!”

O le pelu maai ma le tootoo uamea e faatusa uma i le afioga a le Atua. Na faamanino mai e le Perofeta o Iosefa Samita nei fuaiupu faapenei: “Ma e alu atu ai le afioga a le Atua, ma mai lona fofoga, ma o le a ia taia ai atunuu; ma o le a ia pulea i latou i le upu mai lona fofoga.”

I lana faaaliga, na vaai ai Ioane i le faaumatiaga o e amioleaga, lea sa faaalia i manulele na aai i o latou tino. Na faamatalaina e Esekielu le faaumatiaga o tagata amioleaga i se auala talitutusa. Ua faamanino mai e le Faaliliuga a Iosefa Samita o le “faigaai a le Atua silisili” o le faaumatiaga lea o i latou “o e tau faasaga i le Tamai Mamoe.” O lenei “talisuaga matautia a le Atua silisili” e matuai ese lava mai le “talisuaga o le faaipoipoga a le Tamai Mamoe” fiafia. O le Afio Mai Faalua o Iesu Keriso o le a avea ma se aafiaga e matua ese lava mo e amioleaga nai lo e amiotonu.

I lana faaaliga, na vaai ai Ioane o le a saisaitia Satani i le taimi o le Meleniuma. O le “to e le gata” e faatatau i le nofoaga o le a faafalepuipuiina ai Satani ma i latou o e mulimuli ia te ia. O le a tuuina atu i se agelu a le Alii le mana e tatala ai le lua ma tuu ai iina Satani. E leai se malosi o Satani e faasese pe faaosoosoina ai se tasi mo le afe tausaga. O le taimi lea, “o fanau e ola ae i le faaolataga e aunoa ma le agasala.” Na aoao mai le perofeta o Nifae o le a saisaitia foi Satani ona o le amiotonu o le Au Paia.

E le o faailoa mai e Ioane i latou o e sa nonofo i nofoalii e faamasino. Atonu o Aposetolo e Toasefululua na valaauina e Iesu i le taimi o Lana galuega i le olaga nei. Na fetalai Iesu o le a nonofo Ana Aposetolo i nofoalii ma faamasino Isaraelu. I o tatou aso, ua tuuina mai e le Alii ia i latou ua i ai ki o le perisitua le pule e avea ai ma faamasino i Isaraelu. I le iuga, o le a faamasinoina e le Tama Faalelagi ma Iesu Keriso tagata uma.

Na vaaia e Ioane i lana faaaliga e faapea, o le toatele o e ua maliliu o le a toetutu mai i le taimi ua ta’ua o le “ulua’i toetutu.” O Iesu Keriso lea na muamua ona toetu mai. Ina ua mavae le toetu mai o Ia, sa toetutu mai tagata amiotonu o augatupulaga ua mavae. O loo talanoa mai foi tusitusiga paia e uiga i le Uluai Toetu i se aso i le lumanai. Mai tusitusiga paia o le Toefuataiga ua tatou aoao ai o i latou ua fuafuaina mo le mamalu selesitila o le a tutulai mai i le Uluai Toetutu.

I lana faaaliga, na vaai ai Ioane i le aso o le a tutu ai fanau uma a le Atua i luma o Keriso ina ia faamasinoina mai tusi. Na aoao mai Peresitene Harold B.Lee: “O “tusi” o loo tautala i ai, o faamaumauga ia [o a tatou galuega] o loo teuina i le lalolagi. … O le tusi o le ola o le faamaumauga lea o loo teuina i le lagi.” O sauniga faaola ma isi faatinoga o le faatuatua ma le tuuto o loo faamaumauina i tusi. O “tusi” e mafai foi ona faasino i tusitusiga paia, lea o loo i ai afioga ma poloaiga a le Atua e tatau ona tatou ola ai. O igoa o e amiotonu o le a tusia foi i le tusi o le ola.

E avea o se vaega o le Pau o Atamu, na pau mai le lalolagi mai se tulaga faaparataiso i se tulaga faatelesitila. A toe foi mai Keriso ma ua faaumatia e amioleaga, “o le a nofotupu Keriso i le lalolagi; ma … o le a toe faafouina le lalolagi ma maua lona mamalu faaparataiso.” A mavae le afe tausaga o le nofotupu ai o Keriso, o le a toe suia foi le lalolagi. Na faamatalaina e le Perofeta o Iosefa Samita lenei suiga: “O lenei lalolagi o le a toe fuli atu i le afioaga o le Atua ma faapaleina i le Mamalu Selesitila.”

Na vaai Ioane i se faaaliga vaaia i se aai e ta’ua o le Ierusalema Fou, lea na afio ifo mai le lagi. Sa faaalia le aai o se pusa tele lea e manatua ai le tele kupita o le Paia o Paia i le malumalu o Solomona. Na vaaia e Ioane maa taua, penina, ma auro i le aai. O maa taua ua faaaogaina i tusitusiga paia e faatusa ia i latou o e mulimuli i le Alii i le amiotonu ma o e ua faamamaina e ala i puapuaga ma tofotofoga.

O le tauaveina o se igoa i le muaulu o se tasi, e mafai ona faaalia ai le faamaoni ma le tuuto. O le tauaveina o le suafa o loo fautuaina mai ai le tauaveina o uiga o le ona le suafa. O i latou o e ua i ai le suafa o le Atua i o latou muaulu e mafai ona faasino ia i latou o e ua tauaveina i o latou luga le suafa o Iesu Keriso e ala i feagaiga ma sauniga o le talalelei ma ua avea faapei o Ia.

Tagai foi “Faaaliga 7:2–3. O le ā le uiga o le tuu o se faamaufaailoga i muaulu o auauna a le Atua?”

I le faasino atu i le Faaaliga 22:11–12 ma fuaitau faapena, na aoao mai ai Peresitene Dallin H. Oaks: “Mai na aoaoga ua tatou faaiuina ai o le Faamasinoga Mulimuli e le na o se iloiloga o se aofaiga atoa o amioga lelei ma amioga leaga—o mea ua tatou faia. O se fa’ailoaga o le a’afiaga tupito o a tatou amioga ma mafaufauga—o ituaiga tagata ua avea ai i tatou. E lē lava mo soo se tasi le tau lava ina faatagāfai. O poloaiga, sauniga, ma feagaiga o le talalelei ua le o se lisi o ni faaputuga o mea e manaomia ona fai i se teugamea faalelagi. O le talalelei a Iesu Keriso o se fuafuaga lea ua faaali mai ai ia i tatou le auala e avea ai ma tagata ua finagalo lo tatou Tama Faalelagi e avea ai i tatou.”

I le talanoaina ai o se malamalama sese e uiga i lenei fuaitau, na aoao mai ai Peresitene Jeffrey R. Holland:

“O se tasi o finauga e masani ona faaaoga e taumafai ai e puipuia le faapea ua faasaina se tuufaatasiga o ni faaaliga faaauauina pea o loo tusia lea i se fuaiupu i le Feagaiga Fou i le Faaaliga 22:18: ‘Aua ou te tautino atu ia i latou uma o e faalogo i upu o … lenei tusi, Ai se tasi e faaopoopo mai se upu i nei upu, e faaopoopoina atu e le Atua ia te ia o mala ua tusia i lenei tusi.‘ Ae peitai, o loo maoae le maliliega auau faatasi i le au atamamai i tusi paia e faapea o lenei fuaiupu e na o le tusi o Faaaliga, ae le o le Tusi Paia atoa. E toetoe lava o le au atamamai uma i o tatou vaitaimi ua faailoa mai se aofaiga o ‘tusi’ o le Feagaiga Fou lea e toetoe lava a mautinoa na tusia ina ua mavae ona mauaina le faaaliga e Ioane i le Motu o Patamo. E aofia ai i le vaega lenei ia le tusi a Iuta, o tusi e tolu a Ioane, ma e toetoe lava foi o le Evagelia atoa a Ioane lava ia. Atonu e tele atu nisi tusi nai lo nei.

“Ae o loo i ai se tali faigofie i le mafuaaga e le mafai ai ona faatatau lena fuaiupu o loo i le tusi faaiu o le Feagaiga Fou i le Tusi Paia atoa. Aua o le Tusi Paia atoa e pei ona tatou iloa—o se aotelega e tasi o tusitusiga ua tuufaatasia i se voluma e tasi—e lei i ai ina ua tusia lena fuaiupu. Mo le tele o auga seneturi ina ua maea ona gaosia e Ioane lana tusiga, sa feaveai solo lava ia tusi taitasi o le Feagaiga Fou pe atonu foi sa na o ni nai tusi sa tuufaatasia, ae le ose voluma atoa. …

“O le mea moni o le mataupu e toetoe lava o perofeta uma o le Feagaiga Tuai ma le Feagaiga Fou ua faaopoopo tusitusiga paia i tusitusiga paia na maua e i latou na muamua atu ia te ia.”

• David A. Bednar, “Ofu Lou Malosi, E, Siona e,” Liahona, Nov. 2022, 92-95

• Autu ma Fesili, “Afio Mai Faalua o Iesu Keriso,” Gospel Library.

• Dallin H. Oaks, “The Challenge to Become,” Ensign, Nov. 2000, 32-34

• Tagai ia Dallin H. Oaks, “O Malo o le Mamalu,” Liahona, Nov. 2023, 26–29.