Efeso

O loo i ai se faamaoniga na tusia e Paulo lenei tusi mo le Au Paia sa nonofo i totonu ma autafa o Efeso, lea sa avea ma laumua o Paulo i lana malaga faafaifeautalai lona tolu. Sa alofa tele Paulo i tagata Efeso.

O Efeso o se aai tāua i Asia Itiiti. Sa i ai se uafu ma sa avea o se nofoaga autu tele mo fefaatauaiga. Ona o lona tulaga, na “avea ai ma nofoaga autu faalenatura mo le Ekalesia Kerisiano i Asia Itiiti.” Na asiasi atu Paulo i Efeso i le latalata i le faaiuga o lana malaga faafaifeautalai lona lua ma nofo ai iina mo le lua tausaga i lana malaga faafaifeautalai lona tolu.

E faigatā ona iloa le aso tonu na tusi atu ai Paulo i tagata Efeso. Na ta’ua e Paulo o ia o se pagota i le taimi na ia tusia ai. Atonu na tusia e Paulo le tusi i le taimi o lona faafalepuipuiina muamua i Roma, pe tusa o le 60 i le 62 T.A., i le taimi lava lea na ia tusi atu ai iā Filemoni ma tagata Kolose.

I lana tusi, na saunoa ai Paulo i tagata o Nuuese o le Ekalesia o e atonu o ni tagata fou e le’i leva ona liliu mai. O lona faamoemoega autu lava o lana tusiga o le fesoasoani lea ia i latou ia tuputupu ae i lo latou malamalama o le Atua ma le Ekalesia e ala i faaaliga. Sa popole Paulo i le leai o se lotogatasi i tagata o le ekalesia, aemaise lava i le va o le Au Paia Nuuese ma Iutaia, ma totonu o aiga. Sa ia uunaia le Au Paia e tetee atu i mana o le tiapolo.

Sa masani ona faasino atu Paulo i tagata o le Ekalesia o le Au Paia. O le upu Eleni mo le au paia o lona uiga o le “paia, … tuuto, faapaiaina, [po o] le tuuto.” O le upu au paia e faatatau ia i latou o e ua tuuto atu i se faamoemoega paia. O le faasino atu i tagata o le Ekalesia o le Au Paia, na aoao mai ai Paulo o tagata uma e mulimuli ia Iesu Keriso e faapaiaina e ala ia te Ia. E taumafai le Au Paia e ola i auala e sili atu ona paia.

O le upu Eleni mo le tofia anamua (proorizō) “e faamatala ai le faatinoga o le fuafuaina muamua o se mea.” I le Feagaiga Fou, o lenei faatinoga e na o le Atua lava e faatatau i ai.

Ua aoao mai lenei fuaitau e faapea, o e talitonu sa tofia anamua, pe muai faauuina, mo le vaetamaina e ala ia Iesu Keriso. Na a’oa’o atu e Paulo le uiga o le vaetamaina i tagata Roma. O iina na ia tusia ai “e faapea, ia Keriso, ua vaetamaina ai i tatou ma avea ai ma ‘fanau a le Atua’ (Roma 8:15–16; tagai foi Kala. 4:1–9) ma o lea o suli o le mamalu selesitila.” O faamanuiaga muai faauuina e le o faamaoniaina e aunoa ma se faatulagaga ae e faalagolago i le faaaogaina ma le amiotonu o le faitalia i lenei olaga.

“O se tisipenisione o le talalelei o se vaitaimi lea e i ai i le Alii ia le itiiti ifo ma le toatasi se auauna faatagaina i le lalolagi o lē o loo umia ki o le perisitua paia. O Atamu, Enoka, Noa, Aperaamo, Mose, Iesu Keriso, Iosefa Samita, ma isi sa latou taitasi ma taitaia se tisipenisione fou o le talalelei. A faatulaga e le Alii se tisipenisione, e toe faailoa mai le talalelei ina ia le faalagolago ai tagata o lena tisipenisione i tisipenisione ua mavae mo se malamalama i le fuafuaga o le faaolataga. O le tisipenisione na amata ia Iosefa Samita ua lauiloa o le ‘tisipenisione o le atoaga o taimi.’”

Na aoao mai Iosefa Samita o lenei tisipenisione “o le a aumaia ai i le malamalama o mea na faaalia mai i tisipenisione ua mavae; faapea foi isi mea e lei faaalia mai muamua. O le a Ia auina mai Elia, le Perofeta, ma isi, ma toefuatai mai mea uma ia Keriso.” O le tisipenisione o le atoaga o taimi o le tisipenisione faaiu lea, lea o le a tapena ai le lalolagi mo le Afio Mai Faalua o Iesu Keriso.

“O le Agaga Paia o le Folafolaga o le mana faamaonia lea o le Agaga Paia.” Pe a tatou mauaina ma tausia sauniga ma feagaiga i le amiotonu, e faamautu mai e le Agaga Paia e taliaina e le Alii. Na aoao mai Elder David A. Bednar e faapea o le mauaina o le Agaga Paia o Folafolaga e pei lava o le “mauaina o se ‘faailoga o le faamaoniga’ mai le Agaga Paia.” Na aoao mai Paulo o le Agaga Paia o Folafolaga e pei foi o se tautinoga po o se faamaoniga o le a tatou maua le ola e faavavau, o se tofi i le malo selesitila. I se isi faaupuga, ua tuuina mai e le Agaga Paia o Folafolaga se faamautinoaga o le a tatou maua le atoatoaga o se taui faalelagi.

“O se maa tulimanu o le maa muamua lea e tuu i luga o le faavae o se fale, i se tulimanu o le fale.

“… O se maa tulimanu e tauaveina le mamafa tele o le fausaga i fafo o se fale, ma e fesootai ma tuufaatasia ai puipui e lua. A uma ona tuu, ona fuaina lea o isi maa uma ma o latou tulaga mai ai.

“… I aso anamua, o se maa tulimanu e masani lava ona avea ma se tasi o maa aupito telē, ma sili ona mautu e tatau ona galue ai se faufale. E suesue ma le faaeteete e le faufale ana maa ma filifili le maa e sili ona lelei e fai ma maa tulimanu, ma teena ai soo se maa e foliga mai e le talafeagai.”

O le upu Eleni mo le mealilo o le mystērion, o lona uiga o se upumoni paia lea e na o faaaliga lava e mafai ona iloa ai. O le mealilo na tusi ai Paulo e faapea o Iutaia ma Nuuese e mafai ona avea ma suli o le feagaiga faa-Aperaamo e ala ia Keriso. O lenei mealilo na “faaalia ia Paulo i lena aso ofoofogia ina ua malaga atu o ia i Tamaseko (tagai Galuega 9:3–5).”

Na lisi mai e Paulo ia tofi o se tagata e folafola le talalelei ma sē e leoleo ma aoao o se vaega o le faataatiaga o le faatulagaga o le Ekalesia. O sē e folafola le talalelei o “ia lea e tauaveina pe folafolaina atu le tala fiafia o le talalelei a Iesu Keriso.” I faaaliga o aso e gata ai, o peteriaka ua faamatalaina o “faifeau faaevagelia.” Sa aoao mai e le Perofeta o Iosefa Samita: “O se faifeau faaevagelia o se Peteriaka. … Soo se nofoaga lava i luga o le fogaeleele e faavaeina ai le Ekalesia a Keriso, e tatau lava ona i ai se Peteriaka mo le manuia o fanau a le Au Paia, e pei ona i ai ia Iakopo i le tuuina atu o ana faamanuiaga faapeteriaka i ona atalii.”

O se faifeau o se leoleo mamoe, po o se tasi e taitaia se lafu. Na faasino atu Iesu Keriso ia te Ia lava o le Leoleo Mamoe Lelei aua e silafia ma alofa o Ia i Ana mamoe. I lenei tulaga, o faifeau o le Feagaiga Fou e talitutusa lava ma epikopo ma peresitene o paranesi i Le Ekalesia a Iesu Keriso o le Au Paia o Aso e Gata Ai.

Ua faamanino mai e le Faaliliuga a Iosefa Samita le Efeso 4:26 e faapenei: “Pe mafai ea ona outou ita, ae le agasala?” O lenei suiga ua aumaia ai le fuaiupu e ōgatusa ma isi aoaoga a Paulo e uiga i le ita.

Sa fautuaina e Paulo le Au Paia e le tatau ona latou malolo mo le afiafi sei oo ina latou faatoilaloina o latou mafaufauga ita. Na aoao mai e le Faaola ni upumoni faapena e uiga i le ita.

Na talanoaina e Paulo le gaua’i i ana tusitusiga uma. I lenei fuaitau, na talanoaina ai e Paulo le gaua’i i faiā faaleaiga, ma se faamamafa faapitoa i le faaipoipoga. Talu ai e mafai ona iai i le upu gaua’i atu ni uiga lelei ma ni uiga lē lelei, e tāua la ona manino le auala na faaaogā ai e Paulo le upu.

A o le’i talanoaina le faaipoipoga, na uunaʻia e Paulo tagata o le aiga ina ia gaua’i atu i le tasi ma le isi. O le a avea lenei mea ma se gauai atu talafeagai lea e atiina ae ai se agaga “faalelei” i totonu o aiga. Na valaaulia foi e Paulo tagata o le aiga ina ia vaai “i le tasi ma le isi i le vaai atu i le sootaga a tagata taitoatasi ma [le Atua].”

I lenei tulaga, e tatau i ulugalii faaipoipo ona “gauai atu le tasi i le isi ona o le migao ia Keriso.” Na valaaulia e Paulo avā ina ia gaua’i atu ma le lotomalie i a latou tane ona o lo latou alolofa iā Iesu Keriso, ae lē ona o le faamalosia po o le faiga faamalosi.

Sa faaaoga e Paulo le sootaga alofa a Iesu Keriso ma le Ekalesia e fai ma faataitaiga mo le faaipoipoga. O lea, e tatau i se tane ona alofa i lana ava i le ala lava e tasi e alofa ai Iesu Keriso ma ositaulaga mo Lana Ekalesia. Faatasi ai ma le Faaola o se faataitaiga, e leai lava se mafuaaga e taliaina ai le pulega faamalosi, lē faaaloalo, po o le sauaina i totonu o le faaipoipoga.

O le taula’i atu iā Iesu Keriso, na tuuina mai ai e Paulo se ta’iala manino i le auala e vaai ai i le gaua’i atu. Mai le soifuaga o Iesu Keriso, ua tatou iloa ai o le gaua’i atu e mafai ona avea ma uiga faaleatua pe a mana’omia ai le lotomaulalo, agamalu, faaeteete, ma le usiusitai i le Atua. I lenei tulaga, “o le gauai atu e manaomia ai le malosi ofoofogia o uiga, tuuto i feagaiga, poto e le masani ai, ma le alofa lē manatu faapito—e faamanatu ai le Toatasi e usiusitai i faataitaiga.”

I aganuu o aso o Paulo, sa masani ona faatapulaaina matafaioi a tamaitai, a o tane ma tamā sa manatu iai e faia le faaiuga mulimuli i totonu o se aiga. Na lu’ia e le feau a Paulo na tulaga faatonuina faaleaganuu. “E ui ina sa faaauau pea ona avea aiga Kerisiano ma ni tagata faapeteriaka ma faatulagaga, ae o nei suiga na uunaia ai i latou ia agai atu i le tulaga tutusa sili atu ma le faaaloalo mo tagata taitoatasi.”

I ona po o le Feagaiga Fou, o pologa o se faiga taatele i le Malo atoa o Roma. O le toatele o tagata o le Ekalesia a le o i latou o ni pologa, pe sa iai foi ni pologa o se vaega o o latou auaiga. E avea tagata ma pologa pe a pue faapagotaina i taua, pe faatauina atu e totogi ai aitalafu, pe ave faamalosi. O le fautuaga a Paulo e uiga i le auala e tatau ona galulue ai pologa e le faapea ai na ia faamaonia le faatulagaga o le nofopologa. Sa ia aoaoina tagata o le Ekalesia, o e sa ola i se aganuu faatasi ma pologa ma matai, i le auala e tatau ona taialaina ai e le talalelei a Iesu Keriso na sootaga.

• Steven R. Bangerter, “Na Muai Faauuina e Auauna Atu,” Liahona, Me 2024, 56–59

• John C. Pingree, Jr., “Ua ia te A’u Se Galuega mo Oe,” Liahona, Nov. 2017, 32-35

• Autū ma Fesili, ‟Mua’i Fa’au’uina,” Gospel Library

• Autu ma Fesili, “Perofeta,” Gospel Library

• Ulisses Soares, “Faapaaga ma le Alii,” Liahona, Nov. 2022, 42-45