Luka 12–17; Ioane 11

I taimi o le Tusi Paia, sa ofuina e alii ofu talaloa uumi. Pe a faia galuega, e tuu e se tamāloa le siusiu o lona ofu (ofutalaloa) i totonu o lona fusipau ina ia mafai ona feoai saoloto ona vae. O le uiga lenei o le fuaitau “ia fusia o outou sulugatiti.” O se faatusa “e faasino i le saunia mo le faatinoga.” I lenei faataoto, o le fusi o o outou sulugatiti ma tuu atu i o outou moli e mumū o lona uiga o le faatalitali ma saunia mo le toe foi mai o le Alii.

Ina ua uma ona aoao atu faapea e tatau i tagata uma ona salamo a leai o le a fano, , sa faasoa e le Faaola se faataoto e uiga i se laau o le mati e le fua. Mo tagata Iutaia, o se mati o se faatusa masani lea mo Isaraelu, le nuu o le feagaiga a le Atua.

I lenei faataoto, o le “tasi tagata” e suitulaga i le Atua. O le tovine e suitulaga i le lalolagi, ma o le “galue vine” e suitulaga i le Faaola. Ina ua uma ona tuuina atu lenei faataoto, sa faaauau ona faamamafa atu e le Faaola faapea sa lei fua mai ia Isaraelu le amiotonu i lona taimi o avanoa.

Tagai i le “Mataio 13:31-32. O le a le fua o le sinapi?”

Tagai “Mataio 13:3–9, 18–33, 43–50. O le a se mea e mafai ona tatou aoaoina mai faataoto o le faapotopotoina?”

O upu Eleni ua faaliliuina o le ”faitotoa va apiapi” i le Lomiga a King James o le Tusi Paia e mafai foi ona faaliliuina o le ”faitotoa vaiti.” O lenei ”faitotoa va apiapi” ua faatusa i tulaga manaomia maoti o le avea ma soo. O isi tusitusiga paia e faaaoga ai le faatusa o se faitotoa va apiapi po o se auala vaapiapi e aoao ai i tatou e tatau ona tatou maua sauniga taua ma faamamaluina feagaiga e ulufale atu ai i le malo o le lagi. Na saunoa mai Elder D. Todd Christofferson: ”I se tala faafaatusa, o lenei faitotoa e matuai vaitiiti tele ma e faataga ai na o le toatasi i le taimi e ulu atu i ai. E faia e tagata taitoatasi se tautinoga a ia lava i le Atua, ae e maua mai ai ia te Ia se feagaiga patino, i le igoa, lea e mafai ai e ia ona faalagolago i lona atoatoa i le olaga nei ma le faavavau.”

”A o agai atu i Ierusalema, sa talia e le Faaola se valaaulia e taumafa i le Sapati i ‘le fale o le tasi alii o le au faresaio’ (Luka 14:1). A o i ai iina, sa ia matauina ai o isi malo ‘ua filifili i mea sili e taoto ai’ (Luka 14:7), po o nofoaga o le mamalu. E tusa ai ma le agaifanua, o le au valaaulia e sili ona faaaloalogia sa faanonofo latalata i le ulu o le laulau. Sa faaaoga e le Faaola lenei vaaiga e aoao atu ai ‘se faataoto’ (Luka 14:7) lea na faailoa mai ai se mataupu faavae e faavavau e uiga i le sootaga i le va o le lotomaualalo ma le faaeaga.”

I le anotusi o le Luka 14:26, o le upu Eleni ua faaliliuina o le “‘ino’ino” e mafai ona faailoa atu ai le faaitiitia o le manatu mamafa i le tasi mea nai lo le isi. E lei faaleaogaina e le Faaola le poloaiga ia ”ava i lou tamā ma lou tina.” Ae, sa Ia aoao atu e uiga i mea e faamuamua. Mo se soo, o le tuuto atu ia Iesu Keriso e tatau ona muamua i le tuuto atu i le aiga.

Tagai i le “Mataio 5:13. O le a le uiga o le avea ma ‘masima o le lalolagi’?”

I taimi o le Tusi Paia, o le leoleoina o mamoe o se mea masani lea e ola ai. Sa taitai e leoleo mamoe a latou mamoe i mea’ai ma vai, taofia a latou lafu mai le se ese, ma puipuia i latou mai tulaga lamatia. I lenei aganuu, o leoleo mamoe o ni ”taitai tuuto, galulue malosi, ma agaalofa o e na tausia ma puipuia ma taialaina a latou lafu. O le tausia faatasi o se lafu sa taua i le faataunuuina o lenei misiona.”

Talu ai sa taatele le leoleo mamoe i taimi o le Tusi Paia, na avea ai o se faatusa talafeagai ma faigofie ona malamalama i ai le a’oa’oina o upu moni faaleagaga. Sa faatusaina leoleo mamoe i taitai ma e oo lava i le Atua, na leoleoina Ana mamoe—o Lona nuu o le feagaiga.

Tagai i le ”Ioane 10:1–18. Na faapei leoleo mamoe i le taimi o Iesu Keriso?”

”O le fasi siliva i lenei faataoto o se tupe siliva Eleni e ta’ua o le drachma. Sa itiiti lava se aoga, ae sa mafai lava e se tagata mativa ona faaaogaina e totogi ai le tau o meaai mo aso e lua. O le totogi o se tagata faigaluega i aso taitasi e ono tusa ma le tasi le drachma, ae atonu e itiiti ifo ma le afa le aofaiga o le totogi o se tamaitai mo le galuega i le aso.”

E ui e le o aumaia i le tusiga a Luka se igoa o le faataoto, ae ua lauiloa o le faataoto i le atalii faamaumau oa. O le upu faamaumau oa o lona uiga o le faamaumauina ma le matua le mafaufau.

E tusa ai ma agaifanua i le taimi o le Faaola, e maua e se atalii lona tofi pe a se’iloga e maliu lona tamā. O le a avea ma se mea e ”matua le masani ai lava” mo se atalii le manaomia o lona tofi a o lei maliu lona tama.

Na aoao mai Elder Robert D. Hales, ”I upu a le Faaola, ‘ona atamai ai lea o ia’ [Luka 15:17]. Sa ia manatuaina pe o ai o ia, iloaina le mea o loo misi ia te ia, ma amata ai ona manao i faamanuiaga o loo maua fua i le fale o lona tama.” Na ala ae le atalii faamaumau oa i se faailoaga o le tulaga matautia na pau ai o ia ona o lana solitulafono.

O le faataoto i le tagata mauoa ma Lasalo e faasino i tulaga eseese e lua i le lalolagi o agaga pe a mavae le olaga nei: “Fatafata o Aperaamo” ma ”seoli.” O nei tulaga ua ta’ua foi o le ”parataiso” ma le ”falepuipui.” O le vanu i le va o le fatafata o Aperaamo ma seoli i lenei faataoto, ua faatusa i le tuueseeseina o i latou o loo i le parataiso o agaga ma le falepuipui o agaga.

E ala mai i se faaaliga na tuuina atu ia Peresitene Iosefa F. Samita, ua tatou aoao ai sa auauna atu le Faaola i le lalolagi o agaga i le taimi o le va o Lona Faasatauroga ma Lona Toetu. Sa Ia faatulagaina avefeau mai le parataiso o agaga ma faamalosia i latou e talai atu le talalelei ia i latou o loo i le falepuipui o agaga. O loo faaauau pea i aso nei le galuega o le talaiina atu o le talalelei i agaga i le falepuipui.

”Afai [latou o loo i le falepuipui o agaga] talia le talalelei ma sauniga ua faia mo i latou i malumalu, e mafai ona latou tuua le falepuipui o agaga ma o atu e nonofo i le parataiso.”

”Ina ia malamalama lelei i le manatu faavae o auauna e le aoga, e tatau ona tatou taulai atu i le upu tupe mama. O le tupe mama o lona uiga o le faateleina o aseta, tulaga, po o faamanuiaga patino. O le faavae lena o le manatu faavae o lo tatou avea ma auauna e le aoga.” I lenei faataoto, e tusa lava po o le a le lelei o le faatinoina e le auauna o ona tiute, o loo nofo aitalafu pea o ia i lona matai. E faapena foi, pe a tatou faia o tatou tiute i luma o le Atua, na te faamanuiaina i tatou, ma o loo tatou nofo aitalafu pea ia te Ia. ”E atoatoa le Atua i lona malamalama, mana, faatosinaga, ma uiga. O Ia o le Foafoa o mea uma! O le a se mea e mafai e soo se tasi o i tatou—po o i tatou uma—ona faia e aumaia ai se tupe mama (o lona uiga, o le faateleina o aseta, tulaga, po o faamanuiaga) i le Atua?”

O le tele o faaliliuga o le Feagaiga Fou ua faaliliuina ai le fuaitau ”ua i ai lava ia te outou le malo o le Atua” e pei ”ua i ai le malo o le Atua i totonu ia te outou.” Ua suia e le Faaliliuga a Iosefa Samita lenei fuaitau e faitau ai, ”O le malo o le Atua ua oo mai ia teoutou.” O faaliliuga uma e lua o le fuaitau e faasino atu i le upumoni faapea na faatuina e Iesu Keriso le malo o le Atua, po o le Ekalesia, i lena taimi. Ua toe faatuina foi lena lava malo i o tatou aso.

Sa i ai ni taimi na toe faatūina ai e perofeta a le Atua tagata taitoatasi mai le oti a o lei oo i le soifuaga o le Faaola. Ae o e ua maliliu i na tulaga na toe faatūina ina ua faatoa maliliu. O se talitonuga masani i tagata Iutaia e faapea, o le agaga o se tagata ua maliu e nofo latalata i le tino mo aso e tolu ma o le a taunuu le oti i le aso lona fā. O le faamalologa a le Faaola ia Lasalo i le aso lona fa na faaalia ai Lona mana atoatoa i le oti.

• Melvin F. Hammond, ”Faataoto a Iesu: O Le Talisuaga Tele,” Liahona, Ape. 2003, 51–53

• Dieter F. Uchtdorf, “O Le A Ia Tuu Oe i Luga o Ona Tauau ma Ave Oe i le Aiga,” Liahona, Me 2016, 101–4

• Dieter F. Uchtdorf, ‟O Le Atalii Faamaumau Oa ma le Auala e Taitai atu ai i le Aiga,” Liahona, Nov. 2023, 86-89.

• Tsung-Ting Yang, ”Faataoto a Iesu: O Le Tausimea Amioletonu,” Liahona, Iulai 2003, 28–31