Roma 7–16

Sa faaaogaina e Paulo se faatusa o le faaipoipoga e faamatala ai o Isaraelu sa noatia i le tulafono a Mose, e pei ona noatia se ava i lana tane. Ae o lenei ua maliu le tane (ua faataunuuina le tulafono), o le a fusia Isaraelu i se sootaga fou o le feagaiga ma Iesu Keriso.

O nisi o Iutaia tuuto sa tuuaia Paulo i le upuvale i le tulafono a Mose. I le Roma 7–8, o loo faamanino mai ai e Paulo lona tulaga e ala i le faamatala mai o le tulafono a Mose sa lelei ae sa i ai ona tapulaa. Na aoao mai Paulo o le tulafono a Mose sa “paia” aua sa fesoasoani i tagata taitoatasi ia malamalama po o le a le agasala. Ae sa le’i i ai i le tulafono a Mose le mana e faatoilalo ai aafiaga o le Pa’ū po o vaivaiga faaletagata pe saunia ai se auala mo tagata e liua ai e le Agaga Paia. O lea, tatou te manaomia ai le alofa tunoa lea ua mafai ai ona maua e ala i le Togiola a Iesu Keriso.

O le perofeta o Apinati i le Tusi a Mamona na faasoa mai se molimau tutusa ina ua ia aoao mai, e lē ala mai le olataga i le nao le tulafono; ma ana leai le togiola, lea o le a faia e le Atua lava ia mo agasala ma amioletonu a ona tagata, e lē maʼalofia lava le tatau ai ona latou fano, e ui i le tulafono a Mose.”

E lua auala eseese e talanoa mai ai tusitusiga paia e uiga ia i tatou o fanau a le Atua. Muamua, o tagata soifua uma o se atalii/afafine faapelepele agaga a lo tatou Tama oi le Lagi. Lona lua, ua tatou toe fanauina o ni fanau a le Atua e ala mai ia Iesu Keriso ma Lana Togiola.

O le talaaga o le Roma 8:16 ua faamanino mai ai sa talanoa Paulo e uiga i le uiga lona lua ina ua ia fai mai, “O fanau i tatou a le Atua.” Na aoao mai Paulo o i latou o e taitaia e le Agaga o le Atua e mafai ona avea ma fanau vaetamaina, ma mafai ai ona latou alaga, “Apa, Tama.” Ona o le matafaioi taua a Iesu Keriso i le faagasologa o le liua, o i latou o e ua toe fanauina e mafai foi ona manatu i ai o Ona atalii ma afafine, aua e toe fanauina faaleagaga i latou e ala ia te Ia.

Na aoao mai Peresitene Russell M. Nelson: “Pe a tatou taliaina le talalelei ma papatisoina, tatou te tauaveina i o tatou luga le suafa paia o Iesu Keriso. Ua vaetamaina ai i tatou o ni Ona atalii ma afafine ma ua ta’ua o uso ma tuafafine. O Ia o le Tama o lo tatou olaga fou.”

Na faasoa mai Elder Neil L. Anderson: “O tagata uma i le lalolagi o ‘fanau’ [Galuega 17:28] mai le Atua, ae o le faaigoaina o ‘fanau a le Atua’ e matuai tele atu sona uiga. A o tatou o mai ia Iesu Keriso ma osia feagaiga ma Ia, e avea i tatou ma ‘ana fanau’ ma ‘suli i lona malo’ [Mosaea 15:11], ‘o fanau a Keriso, o ona atalii ma ona afafine’ [Mosaea 5:7].”

I le avea ai ma Ulumatua a le Tama ma le Alo e Toatasi na Fanaua i le tino, O Iesu Keriso o le suli faalenatura lea o le Tama Faalelagi. Ua ia “mauaina se atoatoaga o le mamalu o le Tama; ma sa ia mauaina le mana uma, i le lagi ma le lalolagi.”

Na aoao mai Paulo o i latou o e ua toe fanauina o ni fanau o le feagaiga a le Atua o le a avea ma “suli a le Atua, ma suli faatasi ma Iesu Keriso.” E ala mai i le Faaola, e mafai ai ona tatou maua mea uma ua i ai i le Tama, e aofia ai le meaalofa o le ola e faavavau.

Na aoao mai le Perofeta o Iosefa Samita, “E ala i le togiola a Keriso ma le toetu, ma le usiusitai i le talalelei, o le a tatou toe tuuina atu ai i le faatusa o lona Alo, o Iesu Keriso; ona tatou oo ai lea i le faatusa, mamalu, ma uiga o le Atua.”

O le upu Eleni proorizō, ua faaliliuina o le “muai faamoemoeina” i le King James Version o le Tusi Paia, o lona uiga o le “fuafuaina muamua o se mea.” O le faaaogaina e Paulo o le upu proorizō i le Roma 8 e faatatau i le aoaoga faavae o le muai faauuina. “I le muai olaga o agaga, sa tofia ai e le Atua ni agaga faapitoa e faataunuuina ni misiona patino i le lalolagi. Ua taua lenei o le muai faauuina. O le muai faauuina e le faapea ua mautinoa ai o ia tagata o le a latou maua ni valaauga po o ni tiutetauave faapitoa. O nei avanoa e oo mai i lenei olaga o se taunuuga o le faaaogaina ma le amiotonu o le faitalia, e faapei foi ona oo mai le muai tofia o se taunuuga o le amiotonu i le muai olaga.”

O le toatele o Kerisiano Iutaia i aso o Paulo sa i ai ni atugaluga e uiga i le aluese mai le tulafono a Mose. O nisi foi sa mumusu e talia tagata liliu mai o nuu ese i le Ekalesia. O popolega uma e lua e faatatau i o la talitonuga e uiga i le uiga o le avea ma se vaega o le aiga o Isaraelu. Sa talitonu tagata Iutaia na filifilia e le Atua Isaraelu e avea ma Ona tagata filifilia ma o le usiusitai i le tulafono a Mose na tulaga ese ai i latou o e na filifilia. E le gata i lea, sa manatu nisi tagata Iutaia o Nuuese e itiiti se matafaioi i le malo o le Atua aua e le o i latou o se vaega muamua o le aiga o Isaraelu.

Na talanoaina e Paulo nei popolega i le Roma 9–11. Sa ia faamamafa mai e le o le gafa e agavaa ai se tasi e avea ma se vaega o le nuu o le feagaiga a le Atua; o le faamaoni ia Iesu Keriso ma Ana poloaiga. Sa ia aoao mai na filifilia e le Atua ia Isaraelu e avea ma Ona tagata o le feagaiga i aso anamua, ae sa latou faamaaaina o latou loto e faasaga ia te Ia. Na folafola mai foi e Paulo o le teenaina e Isaraelu o le feagaiga o le a le tumau. Sa ia molimau mai o le a manatua e le Alii Lana feagaiga ma o isaraelu—e aofia ai Nuuese o e na taliaina le talalelei—o le a faaolaina.

O le filifiliga o loo faatatau i le filifilia e le Atua o le aiga o Isaraelu ia avea ma nuu o le feagaiga faatasi ai ma avanoa ma tiutetauave, ina ia avea i latou ma auala o faamanuiaga i le lalolagi atoa.

“O e filifilia na tofia ‘a o lei faavaeina le lalolagi,’ ae e leai se tasi ua filifilia ma le le faatuaoia i le ola e faavavau. E tatau i tagata taitoatasi, mo ia lava, ona faalogo ma usitai i le talalelei ma maua ona sauniga ma feagaiga i aao o auauna a le Alii ina ia maua ai le faaolataga. Afai e filifilia se tasi ae le galue, e mafai ona faapea ua le aoga le filifiliga.”

A leai se talaga, o upu a Paulo i le Roma10:9 e fai mai ai na pau lava le mea e fai e se tagata ina ia faaolaina ai o le tautau gutu atu o se talitonuga ia Iesu Keriso. Ae peitai, e pei ona faamaumauina i isi fuaitau, na aoao mai Paulo o le salamo, papatisoga, mauaina o le Agaga Paia, ma le taumafai e mulimuli i aoaoga a Iesu Keriso e taua foi.

I le Roma 10:4–13, o le faamoemoega o Paulo o le le tuuina mai lea o se faamalamalamaaga lavelave o le faagasologa o le faaolataga. Ae, sa lagolagoina e Paulo le manatu lea sa ia taua i le fuaiupu 4: “O le iuga o le tulafono o Keriso lea e oo mai ai le amiotonu i e faatuatua uma lava.” Sa sii mai e Paulo le Teuteronome 30:12–14 e faamamafa mai ai le manatu e faapea e le manaomia e se tasi ona “alu ae i le lagi” pe“ alu ifo i le mea loloto” e sue ai Keriso. Nai lo lena, o tagata uma—pe o Iutaia po o Eleni—e mafai ona maua le Faaola i totonu o o latou loto pe a latou tautau atu o Ia o le Faaola ma i ai le faatuatua ia te Ia.

Ina ua tautala Paulo i le tuuina atu o o tatou tino “o se taulaga ola,” sa ia faatusaina i le faiga i le Feagaiga Tuai o le taulagaina o manu. Na aoao mai Elder Russell M. Nelson: “O loo poloaiina pea foi i tatou e ositaulaga, ae le o le faamaligiina o le toto o manu. E faataunuuina le taulaga silisili e mafai ona tatou avatu, i le tatou taumafai lea ia avea i tatou ma tagata e sili ona paia.

“Tatou te faia lena mea e ala i le usiusitai i poloaiga a le Atua. O lona uiga, ua felavesai tumau le tulafono o le usitai ma le taulaga. A tatou usiusitai i ia tulafono faapea ma isi poloaiga, e i ai se mea matagofie e oo ia i tatou. Tatou te pulea lelei i tatou lava! E avea i tatou ma soo! E avea i tatou ma ni tagata paia—faapei o lo tatou Alii!”

A o tuputupu a’e le Ekalesia i le taimi o Paulo, sa iloagofie eseesega i le olaga i le va o tagata Iutaia ma tagata liliu mai o nuu ese. Na mātauina e Paulo le eseesega o meaai e fiafia i ai, aganuu, faiga masani, ma aso mālōlō. O nei olaga eseese na taitai atu ai i fevaevaeaiga i le Au Paia i Roma ma isi nofoaga.

Sa aoao atu e Paulo le Au Paia o lo latou uunaiga mo filifiliga e faatatau i meaai paleni ma isi faiga masani e tatau ona auauna atu ma faafiafia le Alii. Sa ia aoao mai foi e le tatau ona latou faamasinoina i latou o e na eseese o latou olaga. Sa ia faaopoopo mai e tatau i le Au Paia ona naunau e lafoai nisi o faatinoga pe afai latou te ono faatupuina se isi e tautevateva faaleagaga. O le faateleina o le filemu ma le faagaeetia i le Ekalesia o se faamuamua maualuga lea nai lo le mulimuli i faamuamua faaletagata lava ia.

I le faaiuga o lana tusi, sa maualuga ona fautuaina atu e Paulo se tagata o le Ekalesia e igoa ia Fipe, o le ua faamaonia o le avefeau lea sa aveina atu le tusi a Paulo i le Au Paia i Roma. Mai le faamatalaga a Paulo e uiga ia Fipe, ua tatou aoao ai sa auauna atu o ia i le Ekalesia ma sa lagolagoina le toatele o le Au Paia, e aofia ai ma Paulo. O le faamaoniga o tusitusiga a Paulo o Fipe o se faataitaiga lea o le faiga a Kerisiano anamua o le tauaveina o tusi faataga pe a malaga atu i se isi faapotopotoga Kerisiano.

I le faaiuga o le Tusi i roma, na tuu ai e le tusiupu na tusia le tusi i lalo o le taitaiga a Paulo lana lava faafeiloaiga i le Au Paia i Roma. Atonu na faaaoga e Paulo ni tusiupu e fatuina le tele o ana tusi uma. Sa i ai i le au tusiupu anamua ni fuataga o le faatosinaga i mea latou te tusia.

Sa felafolafoai nisi o sikola o le Feagaiga Fou pe o nisi o nei tusi o loo i ai le igoa o Paulo, na tusia moni e Paulo. O le tele lava o lenei felafolafoaiga e faatatau i eseesega maaleale i mamanu ma faaupuga o tusi. Peitai, o nisi o nei eseesega e mafai ona faamatalaina i le faaaogaina e Paulo o tusiupu eseese i taimi eseese faatasi ai ma ituaiga eseese o manatu patino.

• M. Russell Ballard, “Tuuina Atu i o Tatou Agaga le Puleaina o o Tatou Tino,” Liahona, Nov. 2019, 106–9

• James B. Martino, “E Galulue Faatasi Mea Uma mo le Lelei,” Liahona, Me 2010, 101–3

• Camille Fronk Olsen, “Fipe,” Ensign, Aok. 2019, 38–39