Galuega 1–5

I se faamatalaga e uiga i le ulutala o lenei tusi, na tuuina mai ai e Peresitene Jeffrey R. Holland le malamalamaaga lenei i le uiga o le tusi o Galuega: “E moni lava, o se faalaniga e sili atu ona atoatoa mo le tusi o Galuega e mafai ona avea ma se mea e pei o le ‘O Galuega a Keriso Toetu o loo Galue e ala i le Agaga Paia i Olaga ma Galuega a Ana Aposetolo Faauuina.’” O Galuega a le Au Aposetolo ua fau ai se sootaga taua i le va o le soifua ma aoaoga a Iesu Keriso ma tusitusiga ma galuega a Ana Aposetolo. E aofia ai aafiaga paia na taitai atu ai i le tuputupu ae o le Ekalesia a le Faaola. I le Galuega, tatou te vaaia ai le auala na foia ai e taitai ma tagata o le ekalesia feteenaiga i totonu ma tali atu ai i sauaga mai le sosaiete tele. O le tele o le tusi o loo faamaumauina ai le galuega a Paulo i le tele o atunuu.

O le tusi o Galuega “o le lona lua lea o se tusi e lua vaega na tusia e Luka ia Teofilo. O le vaega muamua ua lauiloa o le Evagelia e Tusa ai ma le tala a Luka.” O nisi o fuaitau i le Galuega ua tusia i le tagata muamua, e ta’u mai ai o Luka o se tagata na auai i na vaega o le tala. O mea na tutupu o loo faamaumauina i le Galuega na tutupu i le va o le 30 T.A. ma le 62 T.A. Ua fuafaatatau e tagata atamamai e faapea, na tusia le Galuega i se taimi i le va o le 60 T.A. ma le 90 T.A.

O le upu tigā i le Lomiga a King James e faatatau i le puapuagatia ogaoga o le Faaola o se vaega o Lana Taulaga Togiola. E toatele Kerisiano e faasino i le vaiaso mulimuli o le Faaola o le Vaiaso o le Tigā.

A o lei maliu o Ia, sa folafola atu e Iesu Keriso i Ana Aposetolo o le a auina atu e le Tama ia i latou le Agaga Paia. Ina ua mavae Lona Toetu, sa poloaiina e le Faaola Ana Aposetolo e faatalitali mo le faataunuuina o lenei folafolaga a o lei tuua Ierusalema. Sa faataunuuina i le aso o le Penetekoso ina ua liligi ifo le Agaga Paia i luga o le Toasefululua. Na aoao mai le Perofeta o Iosefa Samita o lenei “faaeega paia faaleagaga o le saunia lea o soo mo la latou misiona i le lalolagi.”

E tusa ai ma Evagelia a Mataio ma Mareko, e toafā uso ma tuafāfine o Iesu. O atalii ma afafine nei o Maria ma le tamā fai o le Faaola, o Iosefa. E ui lava e le’i talitonu Ona uso ma tuafafine i taimi uma i le paia o Iesu, ae ua faitauina nei i latou faatasi ma e talitonu. O le uso o Iesu o Iakopo o le a avea mulimuli ane ma se taitai o le Ekalesia i Ierusalema ma se Aposetolo. O lona uso o “Iuta” e foliga mai o le tusitala o le Tusi a Iuta.

I aso anamua, o le faia o se vili sa avea ma auala e faia ai faaiuga. E le o iloa atoatoa faamatalaga auiliili o le faagasologa, ma atonu e tele ni auala na faia ai. Atonu na lafoina pe se’iina ni mea faitino laiti, pe na mafai foi ona tusia igoa i luga o nutigā omea. Sa talitonu tagata Iutaia o le a faatonuina e le aao o le Atua le i’uga. E le o iloa pe na faapefea ona faia le vili i lenei tulaga.

I le tasi le vaiaso talu ona afio a’e Iesu Keriso i le lagi, na faapotopoto ai le faitau afe o tagata i Ierusalema e faamanatu le Tausamiga o le Penetekoso. O se faamanatuga lenei o le seleselega ma na tupu i le limasefulu o aso talu ona uma le Paseka. I le taimi o lenei tausamiga, sa tatau ona o mai alii o le feagaiga i luma o le Alii i Ierusalema. E ono auai tagata Iutaia ma tagata liulotu mai atunuu i Sasa’e Latalata anamua, e tautatala i le tele o gagana eseese. (O se tagata liulotu o se tasi e le o le gafa Iutaia a ua liliu mai i le lotu Iutaia.) I le aso lenei, sa i ai se liligi tele mai o le Agaga Paia. O i latou na auai na faalogo i le tautatala o Aposetolo i a latou lava gagana. Ina ua latou faailoa atu lo latou ofo, sa tautino atu e Peteru o se faataunuuga lenei o valoaga, molimau atu ia Iesu Keriso, ma valaaulia i latou e papatiso. Pe tusa ma le tolu afe agaga na faaopoopo i le Ekalesia.

O aafiaga faaleagaga e masani ona faigata ona faamatalaina. O le mea na tupu i le aso o le Penetekoso o se tasi lea o na aafiaga. Sa faapotopoto Aposetolo ma isi i se nofoaga e tasi i Ierusalema. Na faafuasei ona sau mai le lagi se leo e pei o se matagi tele. Na faatumulia ai le nofoaga atoa ma faailogaina ai le taunuu mai o le Agaga Paia. Ona faaali mai lea o le Agaga Paia o ni laulaufaiva afi ua vaevaeina. I Isaraelu anamua, o le afi e tele ina faatusa i le afio ai o le Atua. Na pauu ifo nei laulaufaiva afi i luga o Aposetolo. E ui ina faigata ona vaai faalemafaufau i ai, ae o nei laulaufaiva afi o se molimau lea na maua e Aposetolo le Agaga Paia. Na faatagaina e le Agaga Paia ia Aposetolo e iloa le meaalofa o gagana. O lea, na faalogo i latou na auai i le tautatala a Aposetolo i a latou lava gagana. E uiga i lenei mea na tupu, na aoao mai ai Peresitene Boyd K. Packer e faapea, faatasi ai ma lenei faaaliga a le Agaga Paia “sa matuai faamamanaina ai le Toasefululua.”

O nei uluai tagata talitonu i Ierusalema na faavaeina se nuu o le lagolagosua ma le faaaumea. Sa tuuto atu i latou i aoaoga a Aposetolo, tapuai faatasi, ma “sa tutusa mea uma.” E ala i le faatauina atu ma le lotomalie o fanua po o fale ma tuuina atu tupe maua i Aposetolo, na taulimaina ai manaoga autu o uso talitonu.

Ua tuuina mai i tusitusiga paia tala o le nuu o Enoka, sa Lamanā ma sa Nifaē, ma uluai tagata o Le Ekalesia a Iesu Keriso o le Au Paia o Aso e Gata Ai o e na nonofo faatasi ma “sa tutusa mea uma.”

E faaopoopo atu i isi tatalo na faia i le aluga o le aso, sa avea o se tu masani mo tagata Isaraelu le faia o tatalo i taimi patino e tolu o le aso: i le taimi o le itula lona tolu, ono, ma le iva (pe tusa o le 9:00 i le taeao, 12:00 aoauli, ma le 3:00 i le afiafi). O le tatalo i le itula lona iva sa faia faatasi ma le taulaga o le afiafi i le malumalu. O i latou sa nonofo latalata i le malumalu sa masani ona tatalo i lotoa o le malumalu. Sa i ai Peteru ma Ioane i le malumalu e tatalo i le itula lona iva o le aso.

A o faasino atu i perofeta o e na molimau ia Keriso, sa faaaoga e Peteru ia fuaitau “taimi o le faafouina” ma le “toe fuatai [toefuataiga] o mea uma.” O nei fuaitau e foliga mai e faatatau i lenei “tisipenisione mulimuli ma le Afio Mai Faalua o Iesu Keriso.”

E ui o loo faaaogā e le Tusi Paia a King James le upu toe faaleleia, o le tele lava o isi faaliliuga e faaaogā ai le upu toefuataiga. I le saunoa ai e uiga i lenei toefaaleleia po o le toefuataiga, na tusia ai e le Au Peresitene Sili ma le Korama a Aposetolo e Toasefululua: “I le lotomaualalo, matou te tautino atu ai, i le tali atu i lana tatalo, na faaali mai ai le Atua le Tama ma Lona Alo, o Iesu Keriso, ia Iosefa [Samita] ma faavaeina le ‘toefuataiga o mea uma’ (Galuega 3:21) e pei ona valoia i le Tusi Paia. I lenei faaaliga, sa ia aoao ai ina ua mavae le maliliu o ulua’i Aposetolo, sa leiloa ai le Ekalesia a Keriso o le Feagaiga Fou mai le lalolagi. O le a avea Iosefa ma mea faigaluega i le toefo’i mai o le Ekalesia.”

Sa tautino atu e Peteru sa faamaloloina le tagata pipili i le suafa o Iesu Keriso. Ua aoao mai tusitusiga paia o loo i ai le mana ma le pule i le suafa o Keriso. Na molimau mai foi Peteru e na o le suafa lava o Keriso e mafai ai ona faaolaina se tasi. O loo faamautinoa mai lenei upumoni i tusitusiga paia uma. Na aoao mai Elder Paul B. Pieper, “E finagalo lo tatou Tama Faalelagi ina ia malamalama atoatoa o le suafa o Lona Alo, o Iesu Keriso, e lē na o se suafa e tasi mai le toatele. O le suafa o le Faaola e tulaga ese ma e i ai le mana taua. Ua na o le pau lea o le suafa e mafai ai ona maua le faaolataga.”

Na aoao mai Peresitene Jeffrey R. Holland: “Na aumai le motu o tagata i [le Toasefululua] ma sa faamaloloina i latou ‘taitoatasi.’ (Galuega 5:16.) O le faatuatua i le faatuatua o Peteru na aumaia ai le au mama’i i magaala i o latou moega o mafatiaga ‘tau lava ina ia faapaoloina ai nisi o i latou i le atalafoia o Peteru pe a ui ane.’ (Galuega 5:15.) E taumafaufau se tasi pe i ai lava se laina se tasi o tusia i se isi faamaumauga e avea o se maa faamanatu e sili atu o le faatuatua ma le mana o se tagata soifua e toatasi sa tauaveina le perisitua paia a le Atua.”

O Kamalielu o le atalii o le atalii o le a’oa’o lauiloa o Hileli. O ia o se sui o le au Saneterini ma o se sikola iloga o le tulafono a Iutaia. Sa aoaoina Paulo e lenei faiaoga lauiloa. O le fautuaga poto a Kamalielu atonu na faasaoina ai soifua o Aposetolo, o e sa toe aumaia foi i luma o le aufono a Iutaia ina ua uma ona faasaoloto mai le falepuipui e se agelu.

• Reyna I. Aburto, “Ma Le Lotogatas,” Liahona, Me 2018, 78–80

• “O le Toefuataiga o le Atoatoaga o le Talalelei a Iesu Keriso: O le Folafolaga i le Lalolagi mo le Lua Selau Tausaga,” Gospel Library

• Ronald A. Rasband, “Faataunuuga o le Valoaga,” Liahona, Me 2020, 75–78

• Amy A. Wright, “E Faamalolo e Keriso Mea Ua Gauia,” Liahona, Me 2022, 81–84