Mataio 28; Mareko 16; Luka 24; Ioane 20–21

Ina ua mae’a le Sapati, sa o atu se vaega o soo tamaitai i le tuugamau o le Faaola. Na faaali mai agelu ma ta’u atu ia i latou e le o i ai Iesu Keriso iina ae ua “toetu.” Sa alu atu Maria le Makatala ia Peteru ma Ioane ma fai atu ua leai se tino o le Faaola “ma ua matou lē iloa le mea ua latou tuu ai o ia.” Sa o atu Peteru ma Ioane i le tuugamau e vaai mo i laua lava. Ina ua o ese atu i la’ua, sa nofo na o Maria i le tuugamau ua gaogao. Ina ua mavae se talanoaga puupuu ma ni agelu se toalua, sa faaali atu le Keriso Toetu ia te ia. Na avea Maria ma uluai tagata na vaai ia te Ia. Ona faaali atu ai lea o le Faaola i isi tamaitai faamaoni. Ona latou molimau atu ai lea i Aposetolo sa latou vaai ia te Ia ma pa’i atu i Ona vae. I lalo o le tulafono a Iutaia, sa masani lava ona lē faatagaina fafine e avea o ni molimau. O le i ai o ni tamaitai se toatele i totonu o uluai molimau o le Toetu o le Faaola ua faaalia ai le faatāua ua tuuina e Iesu Keriso i tamaitai i totonu o Lona malo.

I taimi o le Feagaiga Tuai, sa tausia e tagata o le feagaiga le Sapati i le Aso Toonai. Na faia lenei mea ona sa malolo le Atua mai le galuega o le foafoaga i le aso fitu ma “faapaiaina ai.” E ui e le o talanoa mai le Feagaiga Tuai e uiga i le tausia o le Sapati a o lei oo i le taimi o Mose, “o le Sapati o se mataupu faavae e faavavau ma semanu e i ai mai ona po o Atamu.” Talu ai ona sa toetu Iesu Keriso i le aso muamua o le vaiaso, sa faapotopoto ai uluai Kerisiano i le Aso Sa e faamanatu Lona Toetu. Na oo ai ina lauiloa o le Aso o le Alii. Sa fevaevaeai nei uluai Kerisiano pe tatau ona tausia le Sapati i le Aso Toonai po o le Aso Sa. Ina ia iloa le eseesega o i latou mai le FaaIutaia, na oo ai ina fiafia Kerisiano i le Aso Sa.

Na aoao mai Peresitene James E. Faust: “Atonu e le tatau foi ona faitioina tele le Au Aposetolo i le le talitonu faapea, o Iesu lea sa faasatauroina, ma tanumia i le tuugamau, ua toe afio mai i le lalolagi o se tagata ua faamamaluina. I mea uma ua oo i tagata, e lei tupu mai lava se mea faapenei muamua. O lenei mea o se mea fou. O lenei mea e ese lava mai le mea lea na faatuina mai ai le afafine o Iairo (tagai Mareko 5:22, 24, 35–43, o le taulealea Naina (tagai Luka 7:11–15, po o Lasalo (tagai Ioane 11:1–44). Sa toe feoti uma i latou nei. Peitai o Iesu, na avea ma tagata ua toetu mai.”

Na aoao mai Peresitene Russell M. Nelson, “A o lei oo i lona faasatauroga, na fetalai mai [Iesu Keriso] e faapea, ‘o le aso lona tolu o le a faaatoatoaina ai A‘u’ [Luka 13:32, faaopoopo le faamamafa]. Mafaufau i lena mea! O le Alii e leai se agasala, leai se sese—ua uma ona atoatoa ona o o tatou tulaga faaletino—ua folafola mai lona lava tulaga o le atoatoa ae o le a i ai i le lumanai. O Lona atoatoaga e faavavau o le a mulimuli mai i lona toetu ma maua ai le ‘mana uma … i le lagi ma le lalolagi’ [Mataio 28:18; tagai foi Mataupu Faavae ma Feagaiga 93:2–22].”

O uluai tusitusiga e sili ona faatuatuaina o le Evagelia a Mareko e le o i ai le Mareko 16:9–20. O le sitaili o le gagana Eleni na faaaoga i nei fuaiupu e ese mai le isi vaega o Mareko. Ua ta’u mai ai atonu na tusia e se isi tagata ia fuaiupu. O lenei faaopoopoga atonu o se taumafaiga e faaogatusa le tala a Mareko ma isi evagelia e tolu. Po o a lava mafuaaga o le eseesega o le tusiga, ua taliaina e le Ekalesia le savali a le Mareko 16 o se tusi paia musuia.

I taimi o le Feagaiga Fou, “o le toatele lava o tagata na teena le manatu o se toetu faaletino ma le faavavau.” E oo lava i soo sili ona vavalalata o le Alii sa faigata ona malamalama i le uiga o le Toetu. Ina ia faamautuina le moni o Lona toetu faaletino, sa faatagaina ai e Iesu Keriso molimau e pa’i atu i Lona tino. Mai le Evagelia a Luka, ua tatou aoao ai na valaaulia e Iesu Ona soo e pa’i atu i Ona lima ma vae e fai ma faamaoniga o Lona toetu faaletino. Ina ua taumafa o Ia i o latou luma, sa latou taliaina atoatoa le moni o Lona Toetu. I le valu o aso talu ona mavae lenei mea na tupu, sa pa’i atu ai foi Toma i le tino o le Alii.

Ua ta’ua i le Tusi Paia a King James na ta’u atu e Iesu Keriso ia Maria le Makatala e aua le pa’i atu ia te Ia. O isi faaliliuga o le Tusi Paia, e aofia ai le Faaliliuga a Iosefa Samita, ua ta’u mai ai na ta’u atu e Iesu ia Maria e aua le taofia o Ia. O se faaliliuga e sili atu ona moni o le faa-Eleni o le, “Tuu le taofiao a’u.” O lea, atonu sa na ona faatonuina ai o ia e le Faaola e tuu o Ia e alu ina ia mafai ona Ia faaali atu o Ia lava i Lona Tama.

I le gagana Eperu ma le Eleni, o le upu mo le “agaga” e tauaveina ai foi le uiga o le “mānava” po o le “matagi.” Na aoao mai Peresitene Harold B. Lee e faapea, o lenei mea na tupu atonu e faatatau i “le faamauga ma le poloaiga ia talia le Agaga Paia … e ala i le faaee o lima.” Na liligi ifo le Agaga Paia i luga o le au soo i le aso o le Penetekoso

E uiga i lenei fuaitau, na aoao mai ai Peresitene Lorenzo Snow, “O aposetolo ma fitugafulu na faauuina e Iesu Keriso e faatautaia sauniga o le Talalelei. … O le mea lea, ua fetalai atu ai Keriso i aposetolo, O soo se agasala lava tou te faamagaloina, o le a faamagaloina i latou; ma o soo se agasala tou te taofia, e taofia i latou [tagai Ioane 20:23]: o lona uiga, o tagata uma e o mai i le lotomaualalo, salamo ma le faamaoni i ana agasala, ma maua le papatisoga mai aposetolo, e tatau ona faamagaloina ana agasala e ala i le toto togiola o Iesu Keriso, ma e ala i le faaee o lima e tatau ona maua le Agaga Paia; ae o i latou o e mumusu e maua lenei faatulagaga o mea mai le au aposetolo, o le a tumau pea a latou agasala i o latou luga.” Na tuuina mai e le Faaola lenei mana i Ana Aposetolo i aso anamua ma aso nei.

Ua ta’ua i nisi faaliliuga o le Tusi Paia e faapea, sa lē lavalavā Peteru a o fagota. O le faaupuga Eleni mo le “lē lavalavā” e lē faauigaina i taimi uma o le “telenoa” [tulou] ae e mafai ona faauigaina “e valavala se laei” po o le “e leai se ofu i tua.” Atonu sa fai e Peteru na o se ofu i totonu po o se ie i ona sulugtiti a o ia faia le galuega faigata o le fagota. Talu ai ona sa manatu tagata Iutaia o le faafeiloaia o se tasi o se “gaoioiga faalelotu,” atonu na ofuina e Peteru lona ofu pito i fafo e saunia ai e faafeiloai le Faaola.

I le tolu tausaga a o lumanai lenei feiloaiga ma le Faaola, sa fagogota ai Peteru ma Aneterea i le Sami o Kalilaia. A o valaau atu ia i la’ua, sa fetalai atu Iesu, “Mulimuli mai ia te a’u.” Ia, ina ua mavae le maliu ma le Toetu o le Faaola, sa toe foi atu Peteru ma ni isi o Aposetolo i le sami lava lea e tasi e o e fagogota. Na toe afio mai foi Iesu iā i latou ma aai faatasi ma i latou. I le taimi o le taumafataga, na tuuina atu ai e Iesu ni valaaulia se tolu ia Peteru. I le tuuina o lenei aafiaga i ana lava upu, na faamalamalama mai ai e Peresitene Jeffrey R. Holland le faamoemoega o le valaaulia a le Faaola faapenei: “Peteru e, aisea ua e i ai iinei? Aisea ua tatou toe foi mai ai i lenei lava matafaga e tasi, i nei lava upega e tasi, ma toe faia foi lenei lava talanoaga e tasi? Pe le i manino ea i lena taimi ma pe lei manino ea foi i lenei taimi afai ou te manao i se i’a, e mafai lava ona ou maua se i’a? O le mea lea ou te manaomia Peteru, o ni soo—ma ou te manaomiaina e faavavau. Ou te manaomia se tagata e fafagaina a’u mamoe ma laveai a’u tamai mamoe. Ou te manaomia se tagata e tala’i atu la’u talalelei ma puipuia le faatuatua. Ou te manaomia se tagata e alofa ia te a’u, e moni, ma faamaoni lona alofa ia te a’u, ma e alofa i le mea ua poloaiina a’u e lo tatou Tama i le Lagi e fai. …’ O lea la Peteru, mo le taimi lona lua ma atonu o le taimi mulimuli, ou te fai atu ia te oe ia tuua nei mea uma ma ia e alu atu e aoao atu ma molimau atu, galue ma auauna atu ma le faamaoni seia oo i le aso o le a latou faia ai ia te oe le mea tonu sa latou faia ia te a’u.”

I lenei fuaitau, e foliga mai na ta’u atu iā Peteru e faapea, o le mulimuli atu iā Iesu o le a ia tuuina atu ai o ia lava i le faasatauroga mulimuli ane i lima o tagata Roma. O le uluai tu masani faa-Kerisiano e faapea na faasatauroina Peteru i le taimi o sauaga i le Ekalesia i le taimi o le pulega a Nero (atonu i le va o le 64 ma le 68 T.A.) E tusa ai ma le tu masani, na faasatauroina Peteru i le faau i lalo [lona ao].

Na ta’ua muamua e le Faaola e faapea, e i ai nisi o e o le a le tofo i le oti seia latou vaai atu ia te Ia ua toe afio mai. Ina ua uma ona valoia e Iesu le maliu o Peteru, sa fesili Peteru e uiga i le taunuuga o Ioane. Na foliga mai na faailoa mai e le Faaola o le a tumau pea Ioane seia oo i le Afio Mai Faalua. Ua aoao mai i faaaliga i ona po nei e faapea, e lei maliu le soo o Ioane ma o le a tumau pea seia toe foi mai Keriso.

• D. Todd Christofferson, “O Le Toetu o Iesu Keriso,” Liahona, Me 2014, 111–14

• Ina ia faitauina saunoaga faaopoopo a taitai o le Ekalesia e uiga i le Toetu, tagai i le autu “Toetū” i le aofaga o le Konafesi Aoao i le Gospel Library.

• Jeffrey R. Holland, “O Le Poloaiga Muamua ma le Sili,” Liahona, Nov. 2012, 83–85

• Robert D. Hales, “Avea o se Kerisiano Moni e Faapei o Keriso,” Liahona, Nov. 2012, 90–92

“Mauaina o le Faamoemoe e Ala i le Toetu o Keriso” (4:41)

4:42

“Ua Toetu Iesu” (4:15)

4:1

“Fafaga A’u Mamoe” (5:47)

5:47

Mo nisi vitio, tagai i le “Easter” i le Media Library.