Mataio 13; Luka 8; 13

“O le upu faataoto e sau mai le upu Eleni paraballo, o lona uiga ‘ia tuu i autafa’ po o le ‘faatusatusa.’ O le mea lea, o se faataoto, o se tala faigofie lea e faatusatusa ai e le faamatalaupu ia aafiaga masani o e faalogologo ia te ia i nisi o upumoni paia.”

Ina ua fesiligia pe aisea na Ia aoao atu ai i faataoto, sa tali atu Iesu, “Ua foaiina atu ia te outou ia outou iloa mealilo a le malo o le lagi, a ua le foaiina atu ia te i latou.” O lea, o se faataoto e faaalia ai le upumoni e faalagolago i sauniuniga faaletagata lava ia. Na maitauina e Elder David A. Bednar e faapea: “O le uiga faamoemoeina po o se savali o se faataoto e masani lava e le faamaninoa lona faamatalatalaina. Ae, o le tala e na ona avatu ai o se upumoni paia i se tagata e tuu atu i ai e tusa ma lona faatuatua i le Atua, tapenaga patino faaleagaga, ma le loto ia aoao. O le mea lea, e tatau ai i se tagata ona faaaoga le faitalia ma ‘ole atu, saili, ma tuitui atu’ [tagai Mataio 7:7–8; Luka 11:9–10] ia iloa ai upumoni o loo i ai i se faataoto.

Mafaufau pe mafai faapefea e manatu nei ona fesoasoani ia te oe e malamalama ai ma maua ai le uiga patino i faataoto.

• Mafaufau i le talaaga. O le a le talaaga o le faataoto? O le a le mea na tupu po o fesili na uunaia ai?

  Sa aoao mai e le Perofeta o Iosefa Samita: “Ua ia te au se ki ua ou malamalama ai i tusitusiga paia. Ou te fesili atu, o le a le fesili sa aumaia ai le tali, pe na afua ai ona fetalai Iesu i le faataoto? ” Ina ia faamautinoa lona uiga, e tatau ona tatou eliina i luga le a’a ma ia iloa ai po o le a le mea sa mafua ai le fetalaiga a Iesu”

• Otooto le faataoto e ala i le tusia i lalo o faamatalaga taua. O nei mea e mafai ona aofia ai mea faitino po o tagata e aofia ai, faatinoga, ma taunuuga o faatinoga.

• Vaavaai mo uiga o mea faitino po o tagata i le faataoto. E mafai ona maua nei mea i le anotusi, vaefaamatalaga, e ala i le mulimuli i mau fefaasinoai, po o le mafaufau i le tulaga po o le fesili na uunaia ai le faataoto.

• Fai ni faatusatusaga a o e mafaufau pe faapefea ona fesootai tagata ma mea faitino i le tasi ma le isi i le faataoto.

• Mafaufau po o le a le fetalaiga a Iesu Keriso ma Ana perofeta e uiga i le faataoto.

O faataoto e fitu o loo tusia i le Mataio 13 o loo aoao mai ai e uiga i le faapotopotoina e ala i le faatusatusaina o le “malo o le lagi” i mea faitino. Na aoao mai le Perofeta o Iosefa Samita, “O fetalaiga a le Faaola, o loo tusia i le mataupu 13 o Lana Evagelia e tusa ai ma Sagato Mataio, ” i lo‘u mafaufau, ia tatou maua se malamalama manino e uiga i le mataupu taua o le faapotopotoina e pei o soo se mea o loo tusia i le Tusi Paia.”

O le siata lenei o loo aotele ai nisi o aoaoga a le Perofeta o Iosefa Samita i faataoto o le faapotopotoina o loo i le Mataio 13. O nei aoaoga e aofia ai autu e pei o le faapotopotoina o Isaraelu ma le tuputupu ae ma le taunuuga o le Ekalesia mai aso o Iesu Keriso e oo mai i le Meleniuma.

I le faataoto i le lulu saito (ua faaigoaina foi o le faataoto i le eleele), o le fanua e faatusa i le lalolagi, a o e lulu saito e faatusa i auauna a le Alii. O ituaiga esese o eleele e faatusa i tulaga o loto o tagata:

• O le auala o se ala lea po o se auala taamilo pe ui atu ai foi i totonu o fanua. Ua oo ina ua malō aua e savalia so’o e le au faifaatoaga ma tagata malaga. O le maaa o le auala na taofia ai fatu na pa‘u‘u i ai mai le magoto ifo i totonu o le eleele ma mauaa ai. O lenei mea na mafai ai e manulele ona faigofie ona vaai ma aai i fatu.

• O le mea papa o laualuga maamaa e ufitia i se lau manifi o le eleele lafulemu. E ui ina mafai ona ola ni aa papa’u o fatu, ae o le pala o loo i lalo tonu ifo o le paega laualuga e taofia ai a’a mai le oo ifo i le loloto. E aunoa ma ni aa loloto, sa le mafai e le laau ona tatupu i le vevela aasa o le aso.

• O le eleele e i ai le vao tuitui o se eleele lafulemu; peitai, sa ufituia i le vaotuitui ma isi vao ua fetinai ai laau fua ma ua le mafai ai ona latou maua le vai ma meaai lelei e manaomia.

• O le eleele lelei o se eleele lea e lafulemu ma e lava le loloto mo aa maloloina ina ia mafai ai ona ola laau ma fua mai.

O le titania o se vao oona ua ta‘ua foi o le togalaau urosa. “O se limu oona e mafai ona pisia ai fatu o le urosa, ma avatu ai ni falaoamata e faia mai urosa oona ua faaleagaina. O le faaaogaina o falaoamata ua faaleagaina e mafai ona mafua ai se tulaga o le onana, tauaso, po o le oti foi.

A o lei matutua ma maua mai tumutumu o fatu, o le titania e tutusa lava le foliga ma le saito. Ae o le taimi lava e matutua ai, e faigofie ai ona iloa le eseesega o le saito ma le titania. O lea, na pau lava le ala e tuueseese ai ma le saogalemu le saito mai le titania o le faatali seia oo i le taimi o le seleselega.

E foliga mai, o lenei faataoto e faasino i le fatu o le sinapi uliuli. O lenei laau sa taatele i Kalilaia i le taimi o le Faaola. E ui ina laiti tele fatu, ae o le laau ua matua “ua lipotia e ola ae i le sefulu futu [pe tusa ma le 3 mita] ma e masani lava ona oo atu i le tolu i le ono futu le maualuga.” I ona lala, e mafai e manulele laiti ona ofaga i ai mo ni fatu ma maua ai se sulufaiga. Sa faaaoga e le Faaola le faataoto i le fatu o le sinapi e aoao atu ai o Lana Ekalesia o le a i ai se amataga laitiiti ae o le a tuputupu ae ma avea o se nofoaga o le sulufaiga ma le puipuiga mo Lona nuu.

O faataoto i le oa natia ma le penina tau tele e tele auiliiliga e tutusa ai. I ia faataoto taitasi, sa faatau atu ai e se tagata mea uma sa ia te ia ina ia faatau mai ai se mea taua—o se oa ma se penina. I mea taitasi uma na tutupu, o le oa taua e faatusa i le talalelei a Iesu Keriso. O le faitauina faatasi o nei faataoto e faamamafa ai le taua tele o le talalelei a Iesu Keriso.

O le eseesega e tasi o nei faataoto e lua o le auala na maua ai le oa ma le penina. I se tasi faataoto, e foliga mai na faafuasei lava ona maua e le tagata oa i le fanua. I le isi faataoto, sa saili malosi le tagata faipisinisi mo penina. Ua faapupula mai ai ii, e le afaina pe faapefea ona tatou mauaina le talalelei a Iesu Keriso, pe sa galue ai pe faafuasei foi pe ala mai i se sailiga ma le naunautai, e aoga lava le ositaulagaina o mea uma ina ia tatou maua ai.

O Maria Le Makatala o se soo tuuto o Iesu Keriso. O lona tuuto atu i le Faaola atonu na amata ina ua Ia tuliesea temoni e toafitu mai ia te ia. Sa ia molimauina le Faasatauroga o le Faaola ma sa i ai i le taimi na faataatia ai Lona tino i le tuugamau. O Maria o le tagata muamua lea na vaai i le Keriso toetu.

Sa i ai Ioana faatasi ma Maria le Makatala ma isi fafine o e sa saunia mea manogi ma u‘u falelauasiga e uu ai le tino o Iesu ina ua mavae Lona Faasatauroga. Sa molimauina e Ioana le tuugamau avanoa ma faatasi ai ma isi fafine na taufetuli e lipoti atu le talafou i Aposetolo.

O se fafine e igoa ia Susana sa malaga faatasi foi ma Iesu i Ana malaga, e pei foi o isi fafine o e na faamaloloina e le Faaola. O nei tamaitai faamaoni na tuuina atu le auaunaga ma le lagolago tautupe mo le Faaola.

O se talitonuga masani i ona po o Iesu na tupu mafatiaga faaletino ia i latou na tausalaina i agasala matuia. Sa faaaoga e Iesu tala ia Kalilaia na fasiotia e Pilato ma isi na fasiotia e se olo paū e luiina ai lenei talitonuga. Na aoao mai foi e Iesu e ui e lei taitai atu e le agasala i le oti o nei tagata Kalilaia, sei vagana ua tatou salamo, o le a tatou fano uma faaleagaga.

• Neil L. Andersen, “Faalatalata Atili atu i le Faaola,” Liahona, Nov. 2022, 73-76

• Dallin H. Oaks, “O Le Faataoto i le Lulu Saito,” Liahona, Me 2015, 32-35

• Frank F. Judd Jr., “Parables of Jesus: The Priceless Parables,” Ensign, Jan. 2003, 59–61

• Lani ma John Hilton, “iO Fafine Na Mulimuli ia Iesu Keriso mai Kalilaia,” Liahona, Mat. 2022, 14–17