Roma 1–6

O le tusi i Roma o loo faatuatusi i tagata o le Ekalesia i Roma. E lē tele ni mea ua iloa e uiga i le amataga o le faaKerisiano i Roma. Na tusia e Paulo lenei tusi pe tusa o le 57 T.A., i le latalata i le faaiuga o lana malaga faafaifeautalai lona tolu. E lei oo i le taimi e asiasi atu ai Paulo i le Au Paia i Roma.

E foliga mai a itiiti pe tolu ni mafuaaga autu na ala ai ona auina atu e Paulo lenei tusi:

Ia sauniuni ai mo lona taunuu atu i Roma i le lumanai. Mo le tele o tausaga, sa manao Paulo e talai atu le talalelei i Roma. Sa faamoemoe o ia o le a saunia e le Ekalesia i Roma se fesoasoani mo ia ma avea o se nofoaga autu e mafai ai ona ia faia se misiona i Sepania.

Ina ia faamanino ma puipuia ana aoaoga. Sa feagai Paulo ma tetee faifai pea mai tagata o ē na lē malamalama pe faaseseina ana aoaoga e faatatau i le tulafono a Mose ma le faatuatua ia Keriso. Na tusi Paulo e talanoaina na popolega a o le’i taunuu mai.

Ina ia faateleina le lotogatasi i le va o tagata o le Ekalesia i Iutaia ma Nuuese. Na tuliaese tagata Iutaia mai Roma e le Ao o le Malo o Claudius pe tusa o le 49 T.A. E manatu na toe foi atu tagata Iutaia i Roma ina ua mavae le maliu o Claudius, lea na tupu i le 54 T.A. E ono toe foi Kerisiano Iutaia i faapotopotoga Kerisiano e toatele tagata o nuu ese i Roma. I ni nai tausaga mulimuli ane, na manao ai Paulo ia lagona e tagata liliu mai o nuu ese ma Iutaia ua latou auai i le Ekalesia a le Alii. Na faalauiloa e Paulo le lotogatasi o le Ekalesia e ala i le aoao atu o le auala e faatatau ai le aoaoga faavae o le talalelei i le Au Paia uma.

O tagata Iutaia o tagata o le nuu o le feagaiga a le Atua, po o le aiga o Isaraelu. Sa faaaoga e Paulo ia faaupuga Eleni ma Nuuese e faasino ai i tagata e lei fananau mai i le aiga o Isaraelu. O aoaoga a Paulo i lenei fuaiupu ua faasino atu i le manatu faapea o le talalelei a Iesu Keriso o le a muamua alu atu i tagata Iutaia, ona sosoo ai lea ma Nuuese. I le taimi o le galuega faalelalolagi a le Faaola, sa ia taulai muamua atu i le talaiina atu o Lana talalelei i tagata o le aiga o Isaraelu. Ina ua mavae Lona Toetu, sa faatonuina e Iesu Keriso Ana Aposetolo e ave le savali o le talalelei i atunuu uma, o Iutaia ma Nuuese.

Na tautino mai e Paulo sa “saunia o ia e talai atu le talalelei ia te outou o e o i Roma.” Ona ia faailoa mai lea o le mea ua ta’ua e le toatele o le autu o lana tusi i le au Roma: o le talalelei a Iesu Keriso o le a aumaia ai le faaolataga i tagata uma o e ola e ala i le faatuatua ia Iesu Keriso. O le tele o le aano o le tusi e faatatau i faaupuga autu ma manatu o lo o maua i fuaiupu 16–17:

• Talalelei. Sa talai atu e Paulo le savali o le talalelei. “O le upu talalelei o lona uiga o tala fiafia.’” O le tala fiafia o le “ata o le faaolataga a le Atua, ua mafai ona o le Togiola a Iesu Keriso.”

• Faaolataga. Na aoao mai Paulo o le faaolataga o lona uiga o le toetu ma le faamagaloga o agasala.

• Talitonuga ma le Faatuatua. “Talitonu” (fuaiupu 16ma le “faatuatua” (fuaiupu 17o faaliliuga o le veape Eleni pisteuō ma le nauna o le pistis. E mafai ona faauiga uma faaupuga nei o le “faatuatua” ma le “faamaoni.” I le manatu o Paulo, o le faatuatua ia Iesu Keriso sa lē na o se maliega faalemafaufau. Na faaataata mai ai “se tulaga loloto o le talitonuga e taunuu i tautinoga ma faatinoga patino.” O lenei faatuatuaina loloto e taitai atu ai i se olaga o le faamaoni, e faaalia e ala i le salamo i agasala, papatisoina, ma taumafai e ola e pei ona aoao mai e Iesu Keriso.

• Amiotonu ma le ta’uamiotonuina O le upu Eleni ua faaliliuina o le “amiotonu” o le dikaiosunē. E vavalalata lava le fesootaiga ma le dikaioō, o le a’a o upu ua faaliliuina o le “ta’uamiotonuina” ma le “faamaonia.” O lenei aa e faatatau i le “folafola atu pe faamasinoina (e pei o se faamasinoga faaletulafono) e amiotonu.” E ta’uamiotonuina se tagata i le alofa tunoa o le Faaola e ala i le faatuatua ia te Ia.

Ua aoao manino mai e tusitusiga paia e alofa le Atua i Ana fanau uma. O le toasa o le Atua e le o mateletele i le tagata; ae, o le teena o le agasala. Ona e amiotonu atoatoa le Atua, e le mafai ona Ia faapalepale i soo se agasala. Na fai mai Paulo o le toasa o le Atua e faasino atu ia i latou “o e lē alolofa i le upumoni, ae tumau i le amioletonu.” Ona ia lisiina lea o faatinoga ma uiga faaalia o le amioletonu ia, afai e le salamo i ai, e aumaia ai i luga o tagata taitoatasi le faamasinoga a le Atua.

O nei fuaiupu o se faataitaiga o se talanoaga, o se sitaili anamua o le tusitusi po o le tautala lea e finauina ai e le tusitala se tagata e tetee i le teori (e le o se mea moni). I lenei auala, e faia ai e le tusitala se faamatalaga, ma faapea mai e tetee se tasi, ona tali atu lea i lena tetee.

Tagai i le “Acts 10:34–35. O le a le uiga o le e le faailoga tagata le Atua’?”

O le upu Eleni ua faaliliuina o le “ta’uamiotonuina” (dikaioō) o lona uiga “ua folafola atu ua amiotonu.” Na aoao mai Elder D. Todd Christofferson, “Ona o le mama o Lana taulaga togiola,’ ua mafai ai e Iesu Keriso ona faamalieina pe tali le iuga o le tulafono’ mo i tatou. … Ua Ia aveesea o tatou ta’usalaga e aunoa ma le aveeseina o le tulafono. Ua faamagaloina i tatou ma tuu ai i se tulaga o le amiotonu faatasi ma Ia. Ua avea i tatou, e faapei o Ia, e aunoa ma le agasala. Ua lagolagoina ma puipuia i tatou e le tulafono, e le faamasinoga tonu. I se faaupuga, o i tatou ua, ta’uamiotonuina.”

Na faamanino mai e Paulo i le Roma 3 e faapea, o tagata uma lava o ni tagata agasala. Na ta’ua e se tagata atamai o le Tusi Paia, “O se tasi o matafaioi autu o le tulafono … o le faaalia lea o le le gafatia e le tagata ona ola atoatoa i tulaga manaomia uma o amioga mama. O se tasi o faaliliuga o le Roma 3:20 e faapenei: ‘E moni lava o le faatausiusiuga sao o le Tulafono ua faaalia ai ia i tatou lo tatou piopio.’ (Faaliliuga Phillips.) Na tuuina mai le tulafono a Mose ‘e faamaoti ai solitulafono’ (Jerusalem Bible), o lona uiga, e faatulaga ai le sa’o ma le sese ae ia faataatia ai foi le tapulaa o tagata ma faasino atu ai le manaomia o le fesoasoani faalelagi.” O le nofouta tatou te le atoatoa e mafai ona musuia ai i tatou e saili le togiolaina e ala ia Iesu Keriso.

O le “Alofa Tunoa o le isi faaupuga lea na faaaogaina e Paulo e faamatala ai le galuega faaola a Iesu Keriso. O le upu alofa tunoa sa lē o se faaupuga faalelotu muamua. I le taimi o Paulo, o le alofa tunoa (i le faa-Eleni, charis) sa masani ona faaaoga e faamatala ai le sootaga i le va o se tagata e tuuina atu le lagolago ma se tagata o loo tausia. Sa i ai se tagata e tuuina atu le lagolago le mana, pule, po o mea tautupe e tuuina atu se meaalofa i tagata e le mafai ona latou mauaina mo i latou lava pe toe totogi atu i se foai alofa.”

Na aoao mai Peresitene Dieter F. Uchtdorf, o le sa avea ma se tasi o le Au Peresitene Sili: “O le taulaga a le Faaola na tatalaina ai le faitotoa o le faaolataga mo tagata uma e toe foi atu ai i le Atua. … O Lona alofa tunoa o le mana gafatia lea e mafai ai ona ulufale atu i malo o le faaolataga a le Atua. …

“Ae o le alofa tunoa o le Faaola e mafai ona faia le tele o mea mo i tatou. I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou mananao ai i se mea e lē mafaamatalaina lona maoae atu. O le faaeaga lea i le malo selesitila. …

“… Ou te tatalo o le a faapea ona tatou “… faatagaina le alofa tunoa o [Keriso] e siitia ma tauave i tatou i le taimi o la tatou malaga mai le mea ua tatou i ai nei i lo tatou taunuuga mamalu i le afioaga o lo tatou Tama.”

O le togiola o lona uiga “o le laveai, faatau, po o le togiola, e pei o le faasaolotoina o se tagata mai le pologa po o le totogiina.” Na aoao mai Elder D. Todd Christofferson e uiga i le matafaioi a le Faaola o lo tatou Togiola: “O se tasi o faalagiga aupito sili ona taua o le faamatalaina o Iesu Keriso o le Togiola. … O le upu togiola o lona uiga o le totogiina o se noataga po o se aitalafu. Laveai e mafai foi ona faauigaina o le laveai pe faasaoloto e ala i le totogiina o le tau. Afai e faia e se tagata se mea sese ma toe faasa’o pe faia ni fetuunaiga, tatou te faapea ua ia faaolaina o ia lava. O nei uiga taitasi ua fautuaina mai ai vaega eseese o le Togiola sili na faataunuuina e Iesu Keriso e ala i Lana Togiola. …

“E lua vaega o le Togiola a le Faaola. Muamua, ua togiola ai le solitulafono a Atamu atoa ai ma le Pa’ū o le tagata lea na sosoo ai e ala i le faatoilaloina o le mea e mafai ona ta’ua o aafiaga fitoitonu o le Pa’ū—o le oti faaletino ma le oti faaleagaga. …

O le vaaiga lona lua o le Togiola a le Faaola o le togiola mai le mea e mafai ona faaupuina o taunuuga fitoitonu o le Pa’ū—o a tatou lava agasala e ese mai le solitulafono a Atamu.”

I le Roma 3:9–10, 23,, sa faaaoga ai e Paulo le gagana o le potu faamasino e faamatala ai le auala e faasalaina ai i tatou taitoatasi i le oti ona o a tatou agasala. Sa ia aoao mai ua togiolaina i tatou mai lenei fuaiupu e ala i le alofa tunoa o le Faaola. I le fuaiupu e 25, na faaaoga ai e Paulo le upu Eleni hilasterion e faamatala ai le auala na totogi ai e Iesu Keriso le tau mo a tatou agasala. O lehilasterion e masani ona faaliliuina o le “taulaga o le togiola.” I le King James Version o le Tusi Paia, o le hilasterion ua faaliliuina o le “propitiation.” A tatou faatuatua ia Iesu Keriso, e “ta’uamiotonuina” i tatou e Ia e ala i Lana taulaga togiola. I se isi faaupuga, e ala mai i Lona alofa tunoa “ua tuuina mai ai ia i tatou le faamasinoga o le le tausalaina.”

O se tasi o faamoemoega o Paulo mo le tusi atu i le au Roma o le talanoaina lea o feeseeseaiga i le va o Kerisiano Iutaia ma nuu ese e uiga i mea e manaomia mo le faaolataga. Na teena e Paulo le aoaoga faapea na oo mai le faaolataga e ala i galuega o le tulafono a Mose. I le fai atu o lenei mea, e le’i faapea mai ai Paulo e lē mana’omia ona faia e se tagata galuega amiotonu. Nai loo lea, sa ia faamamafa mai e lē mafai e se tagata ona faalagolago i a latou galuega amiotonu e faaolaina ai i latou. Na aoao mai Peresitene Dieter F. Uchtdorf lea na avea ma sui o le Au Peresitene Sili, “E le mafai ona faatauina le faaolataga i tupe o le usiusitai; ae e faatauina i le toto o le Alo o le Atua. … O le mafaufau ai e mafai ona tatou faafesuiaia a tatou galuega lelei mo le faaolataga e pei o le faatauina o se pepa malaga o le vaalele ona manatu lea tatou te pule i le ofisa vaalele. Pe manatu foi pe a uma ona totogiina le pili o loo mautotogi ai i lo tatou fale, ua tatou pule ai i le paneta o le lalolagi atoa.”

O leRoma 3–5 ua tuuina mai ai se faamamafa malosi i le alofa tunoa ma le faatuatua, ma na o se fautuaga o le taua o galuega lelei. O le “manaomia o le papatisoga ma galuega amiotonu” o loo talanoaina mulimuli ane i le roma.

Talu ai sa soifua Aperaamo i le tele o seneturi a o le’i tuuina mai le tulafono a Mose, o ia o se fataitaiga lelei o se tasi sa ta’uamiotonuina e ala i le faatuatua ia Iesu Keriso ae le o le tulafono a Mose. Na sii mai i le Kenese, na taua ai e Paulo e faapea “sa talitonu Aperaamo [sa faatuatua i le] Atua, ma sa faitaulia ai o ia o le amiotonu.” Na maua e Aperaamo lenei faamautinoaga a o le’i peritomeina o ia. I lalo o le tulafono a Mose, o le peritomeina o le sauniga lea e “talia ai ia tiutetauave o le feagaiga e tamatane Isaraelu.” O le mea lea, sa mafai ai e Paulo ona faaali atu mai i le mau e faapea o tagata taitoatasi sa le’i ta’uamiotonuina e ala i le usiusitai i le tulafono a Mose—sa ta’uamiotonu e ala i le faatuatua i folafolaga a le Atua.

O le upu Eleni katallagē ua faaliliuina o le “togiola” i le Tusi Paia a King James. I isi faaliliuga e masani ona faaliliuina o le “faaleleiga.” “Katallagē ma ona veape e faatatau i ai … e sefululua isi taimi e faaaoga ai i le Feagaiga Fou, ma o mau faasino uma e faatatau i le faaleleiga. I le Tusi a Mamona, na fesootai ai e Iakopo le Togiola i le faaleleiga ina ua ia aoao mai ua ‘faalelei … e ala i le Togiola a Keriso’ (Iakopo 4:11). Na tusi atu Paulo i tagata Eperu o le a ‘faia e Keriso le faaleleiga mo agasala a tagata’ (Eperu 2:17). Pe fesootai i upu po o se faagasologa, e manino lava e le mafai e se tasi ona tuueseeseina le faaleleiga mai le Togiola. E manino lava, o se malamalamaaga sili atu i le faaleleiga e maua ai foi se malamalamaaga sili atu i le Togiola.

“O le upu faaleleiga e sau mai le faa-Latina reconciliare, o lona uiga ‘ia toe tuufaatasia, toe faatasia, pe faaleleia.’”

O nisi taimi na faaaogā ai e Paulo le upu Eleni mo le pologa. O le faatusa o le nofopologa ua aoao mai ai e uiga i taunuuga faaleagaga o le filifili e faataga le agasala e pule i luga o ia lava. Talu ai o le fai ma pologa o se faiga taatele i le malo o Roma, o lona uiga ua masani lelei le aufaitau a Paulo i upu valiata e pei o le tuuina atu i le Atua e faapei ona tuuina atu e auauna i lo latou matai ma le fai ma pologai le agasala.

• D. Todd Christofferson, “Togiola,” Liahona, Me 2013, 109–12

• Dieter F. Uchtdorf, “O Le Meaalofa o le Alofa Tunoa,” Liahona, Me 2015, 107-110

• (Dale G. Renlund, “E tele Mea e Manuia ai,” Liahona, Me 2019, 70–72