2 Korinito 1–7

Faatoa uma ona tusia e Paulo le 1 Korinito, ae tulai mai se fevesia’iga i Efeso e tetee atu ai i ana aoaoga. O le mea lea, na alu ai o ia i Maketonia. Atonu na ia tusia le 2 Korinito a o i ai o ia i inā. O lenei tusi e foliga mai na tusia i le va o le TA 54 ma le TA 56.

I se tulaga lautele, o lenei tusi e faamoemoe e:

• Faaali atu ai le loto faafetai mo ma faamalosia ai na Au Paia o e sa tali lelei atu i lana tusi muamua.

• Lapataia ai a’oa’o pepelo o e sa faapiopioina mataupu mama a Keriso.

• Puipuia ai uiga ma le pule a Paulo i le avea ai ma se Aposetolo a le Alii o Iesu Keriso.

• Uunaia ai taulaga limafoai o mea tautupe mai le Au Paia i Korinito i le Au Paia matitiva o Ierusalema.

O le tele o lenei tusi o loo faamamafaina ai le alofa ma le popole o Paulo mo le Au Paia i Korinito. E ui ina sa mausali Paulo i lona tetee atu i faitioga, ae ua tatou vaaia ai o ia o se taitai agamalu, e manatu mo le fiafia ma le soifua manuia o le Au Paia.

I lenei tusi, na ta’ua ai e Paulo se taimi sili ona paia i lona olaga. I le 2 Korinito 12:2–4, sa faamatala ai e Paulo ia lava o “le tasi tagata o Keriso,” o le sa “segia o ia i le lagi tua tolu.” I lenei faaaliga sa ia vaai ma faalogo ai i mea e le mafaamatalaina.

O nei fuaiupu e foliga mai o le tali lea a Paulo i se tuuaiga e faapea sa ia faaalia le manatu māmā i le folafola atu o le a asiasi atu i Korinito ona suia lea o ana fuafuaga o le malaga. Fai mai nisi ua le toe faatuatuaina o ia—o le isi aso sa ia fai mai “ioe” (“ioe, ou te alu atu”), ae o le isi aso sa ia fai mai “leai” (“leai, ou te le alu atu”). Sa foliga mai i le aufaitio ia Paulo ua fai mai, “afai e le mafai ona matou talitonuina Paulo, e mafai la faapefea ona matou talitonuina mea na ia aoao mai ai i matou e uiga i le Atua?” I le tali atu i ai, na fai mai Paulo e moni le savali na ia aoao atu ma ana soa. Sa ia tautino mai o le Atua ma Iesu Keriso e faatuatuaina ma e le fesuisuia’i.

Sa ta’ua e Paulo o ia ma ana soa faifeautalai sa “faauuina” ma “faamaufaailogaina” e le Atua O le upu Eleni na faaaoga e Paulo e faailoa mai ai le faamaufaailogaina e le Atua o lona uiga sa tuu e le Atua Lana faailoga o le e ona i ona luga.

E tusa ai ma lenei faauuga ma le faamauga, na faaaoga ai e Paulo le upu Eleni arrabōn, lea e mafai ona faaliliuina o le “faamaoni,” “tautoga,” “teuina,” “vaega muamua,” po o le “faamaoniga.” O le upu o se faaupuga faapisinisi e faasino i se tagata faatau ua faia se tupe teu o se vaega o se maliega mo le totogiina atoa mulimuli ane. Sa faaaoga e Paulo lenei faaupuga o lona uiga “ua foaiina mai e le Alii ia i tatou lona Agaga Paia i lenei olaga e muai tofo i le olioli o le ola e faavavau. O le Agaga foi o le faamautinoaga lea a le Alii o le a Ia faataunuuina Lana folafolaga o le tuuina atu o le ola e faavavau i e faamaoni.” A tatou lagonaina le faatasi mai o le Agaga o le Alii, e mafai ona tatou iloaina o lo o taliaina i tatou e le Alii ma e aoga Ana folafolaga i o tatou olaga.

Ina ia faamatalaina le Au Paia, sa faaaoga e Paulo le faatusa o taulaga ma mea manogi na susunuina i totonu o le malumalu. E pei lava ona faamatalaina le asu o taulaga o le malumalu o se nanamu suamalie po o se manogi i le Atua, o olaga o le Au Paia amiotonu sa faatusa i se taulaga sa fiafia i ai le Atua.

O leFuaiupu 16o lo o faamatala ai aafiaga na i ai i le Au Paia ma le talalelei a Iesu Keriso i luga o e faalogologo. I fili o Keriso, o le nanamu suamalie o le Au Paia ma la latou molimau ia Keriso sa pei o le manogi o le oti. Ae peitai, ia i latou o e na taliaina le Aposetolo ma a latou aoaoga, o le nanamu lea o le ola.

I le tali atu ia i latou o e na taumafai e tauleaga o ia, sa fesili atu ai Paulo, ma le mautinoa, pe na te manaomia moni lava ni tusi o le fautuaina e faamaonia ai o ia o se Aposetolo aloaia. Sa faasino atu Paulo i le faiga anamua o le aveina o tusi fautuaina pe a asiasi atu i se nuu fou. O na tusi e masani ona faailoa atu ai tagata, e molimau atu ai i o latou uiga, ma molimau atu ai e le o i latou o ni tagata taufaasese.

Na aoao mai Paulo o le suia o olaga o tagata o le Ekalesia o ana tusi sili ia o le fautuaga. O nei tusi e lē tusia i le vaitusi, a o le Agaga o le Atua i o latou loto. Na faamalamalama mai e Peresitene Russell M. Nelson e faapea, pe a tusia upumoni o le talalelei i papa faaletino o o tatou loto, “e avea ma se vaega taua o lo tatou natura.”

O le upu Eleni metamorphoō e mafai ona faaliliuina o le “suiga, suia, liua” po o le “suiga i foliga.” I lenei fuaitau, o le metamorphoō o loo faaaogaina e faailoa ai se suiga faifai malie i se tagata mamalu i le foliga o le Atua. Sa faapena foi ona aoao mai Alema e faapea, pe a fanauina faaleagaga i tatou i la le Atua, tatou te maua Lona faatusa i o tatou foliga.

O le upu Eleni ua faaliliuina o le lalolagi “e masani lava ona faasino i se vaitau po o se vaitaimi o le talafaasolopito.” I le fasifuaitau “atua o lenei lalolagi,” o loo faailoa mai ai “le vaitau ma le nofoaga e pulea ai e le tiapolo mafaufauga ma galuega a tagata—o le mea lea, o le lalolagi o loo i ai nei.” O le atua o lenei lalolagi o Satani, lea ua saili e taitaisese fanau a le Atua. E ui o loo i ai ia Satani le mana i luga o “le lalolagi,” ae o lona mana i le lalolagi e faatapulaaina. Ua faamautinoa mai e Iesu Keriso ia i tatou, “O A’u o le Atua o Isaraelu, ma le Atua o le lalolagi uma,” ma “o le lagi ma le lalolagi ua i o’u lima.”

Na aoao mai Paulo o le a tatou tutu uma i luma o Keriso ina ia faamasinoina mo mea ua tatou faia i o tatou olaga faaletino. O se faitauga ma le faaeteete o le mau faa-Eleni ua fautua mai ai e faapea “e ui lava e faamasinoina tagata taitoatasi e faavae i lana amio, ae o amioga masani a le tagata, ae le o ana amioga taitoatasi, o le faavae lea o le faamasinoga.” I le saunoa ai e uiga i le Faamasinoga Mulimuli, na aoao mai ai Peresitene Dallin H. Oaks: “O le a faamasinoina i tatou e tusa ai ma a tatou amioga, manaoga o o tatou loto, ma le ituaiga tagata ua avea ai i tatou. O lenei faamasinoga o le a mafai ai e fanau uma a le Atua ona agai atu i se malo o le mamalu na agavaa ai i latou e tusa ma lo latou usiusitai ma le mea o le a latou toafimalie ai. O le faamasino o nei mea uma o lo tatou Faaola, o Iesu Keriso … . O Lona silisili ese ua Ia maua ai se silafia atoatoa i a tatou amioga ma manaoga uma, e aofia uma ai ē lē salamo pe lē suia ma ē ua salamo po o ē amiotonu. O le mea lea, i le mavae ai o Lana faamasinoga o le a tatou ta’utino atu “ua tonu ana faamasinoga” (Mosaea 16:1).”

Na aoao mai Paulo e mafai ona avea i tatou ma tagata po o foafoaga fou “ia Keriso.” I le gagana Eleni, o le “ia Keriso” o loo faailoa mai ai se “sootaga vavalalata ma Keriso,” e oo lava i se “feagaiga tuufaatasi ma le Alii.” Na aoao mai Elder David A. Bednar e tatau ona tatou “suia faaleagaga ma liua e ala i le Togiola a Iesu Keriso. … Ua faatonuina i tatou … ina ia avea ma ‘tagata fou’ ia Keriso (tagai 2 Korinito 5:17), ia tuu ese “le tagata natura” (Mosaea 3:19), ma ia iloa ai “se liuga tele i totonu o i matou, po o totonu o o matou loto, ua le toe i ai so matou manao e fai mea leaga, ae ia faia mea lelei e le aunoa” (Mosaea 5:2). Faamolemole ia matau o le liua o loo taua i nei fuaiupu e maoae, e lē laitiiti—o se toe fanauina faaleagaga ma se suiga faavae o mea tatou te lagonaina ma naunau i ai, o mea tatou te mafaufau i ai ma fai, ma o tatou ituaiga tagata. Ioe, o le ute moni o le talalelei a Iesu Keriso e aofia ai se suiga taua ma le mautu i o tatou lava natura, e mafai i lo tatou faalagolago i ‘galuega, ma le alofa mutimutivale ma le alofa tunoa o le Mesia Paia’ (2 Nifae 2:8). A tatou filifili e mulimuli i le Matai, ua tatou filifili ina ia suia—ia toefanauina faaleagaga.”

O le uiga autu o le upu Eleni katallassō (“faaleleiga”) o le fesuiaiga o le ita mo le faauoga. O a tatou agasala e vavaeeseina ai i tatou mai le Atua ma faavaivaia ai la tatou sootaga ma Ia. I lenei lagona, “O le Atua [o] le paaga manu’a o loo sailia pea le faaleleiga ma i tatou. Na ia faia lenei mea e ala i le auina mai o lona Alo.” Ina ia tuuina mai ia i tatou se faaleleiga, ua saunia ai e Iesu Keriso “le mea e mafai ona ta’ua ‘o le fesuiaiga tele.’ … O [Iesu Keriso] na afio mai e fesuiai ma i tatou. I Ketesemane ma luga o le satauro, na tauave ai e lo tatou Alii i ona luga a tatou agasala. Ua Ia ofoina mai e faailoa mai ia i tatou—ia tuu i luga o a tatou aitalafu faaleagaga, o se vaega o a tatou aseta e faavavau—lana amiotonu.” O le upu togiola ua “faamatalaina ai le tulaga o le ‘ia tasi’ o i latou o e ua vavaeeseina, ma faatusa i ai le faaleleiga a le tagata ma le Atua. O le agasala o le mafuaaga lea o le vavaeeseina, ma o lea, o le faamoemoega o le togiola ia faasa’o pe faatoilalo ai taunuuga o le agasala.”

Sa faaaoga e Paulo le faatusa o manu e le tutusa o loo amo faatasi e faalotovaivaia ai tagata o le Ekalesia mai le “amo faalegatasi ma e le talitonu.” O le tulafono a Mose na faasa ai le amo o se povi ma se asini e suatia faatasi. O le amo o se povi ma se asini o le a mafua ai ona taofia e le asini (le manu vaivai) le povi (o le manu e sili atu ona malosi). E lē gata i lea, e mafai e le manu e sili atu ona malosi ona faatigā po o le lē mautonu ai o lē e vaivai pe afai e amo faatasi.

O se tasi o faaliliuga o le Tusi Paia o loo ta’ua ai le popolega o Paulo e faapea: “Aua toute amo faalegatasi ma ē e lē talitonu. Auā o le ā le mafutaga e iai iina i le va o le amiotonu ma le amioleaga? Po o le a le mafutaga e iai iina i le va o le malamalama ma le pogisa? O le ā le maliega a Keriso ma Satani? Po o le a se mea e faasoa atu e se tagata talitonu i le tagata le talitonu? O le ā le ioega o le malumalu o le Atua faatasi ma tupua?”

I se faaupuga faigofie, sa faalotovaivaia e Paulo le Au Paia mai le faia o ni mafutaga ma tagata tapuai i tupua po o le auai i a latou faiga le mamā. Na faaiuina e Paulo i le faamautuina o se folafolaga na tuuina mai e le Alii e ala ia Isaia: afai e vavaeeseina e tagata talitonu i latou lava mai faiga sese ma mea le mamā, o le a talia i latou e le Alii.

Na aoao mai Elder Neil L. Andersen:

“[O le tiga e tusa i le Atua o lona uiga] o le lagonaina o le faanoanoa loloto ma le loto ootia mo amioga na faaopoopo ai le tigā ma puapuaga i le Faaola, a o aveesea e o tatou agaga soo se faafitiga po o se ‘alofaga. …

“Atonu o le fanuga sili o lenei olaga i se atalii po o se afafine maaleale faaleagaga o le Atua, o le iloa patino o tulaga ese o le totogiina o le agasala e Iesu Keriso e moni lava ma o Lona puapuagatia e le mo na o tagata uma—ae faapea foi mo oe ma au! … A o tatou malamalama faaleagaga sa puapuagatia o Ia mo a tatou agasala, tatou te lagona le faanoanoa mo la tatou vaega o Ona tigā. Ua tatou iloa o se vaega o le fuafuaga a lo tatou Tama, ae ua tatou maofa i le meaalofa ua Ia ofoina mai ia i tatou. O lenei ofo, o lenei talisapaia, o lenei faamemelo o se Faaola na faia lenei mea mo i tatou, e aveina ifo ai i tatou i o tatou tulivae a o faatumulia o tatou agaga i le tiga faaleatua.”

O le faanoanoa faalelalolagi e mafai ona aofia ai lagona o le faanoanoa mo taunuuga le lelei o a tatou amioga. Mo se faataitaiga, faanoanoa mo le “maua ma faasalaina ona o a [tatou] amioga.” Na matauina e Peresitene Dieter F. Uchtdorf, a o avea ma se tasi o le Au Peresitene Sili, “O le faanoanoa faalelalolagi e toso ifo ai i tatou i lalo, tineia le faamoemoe, ma faatauanau i tatou e gauai atu i nisi faaosoosoga.”

• Rebecca L. Craven, “Tuu ma Oe le Sui,” Liahona, Nov. 2020, 59.

• Autu ma Fesili, “Liua,” Gospel Library.

• Dieter F. Uchtdorf, “Tiga e Tusa i le Atua,” Liahona,Nov. 2013, 32-33.

• Jeffrey R. Holland, “O le Galuega o le Faaleleiga,” Liahona, Nov. 2018, 77--79