Eperu 7–13

O Mekisateko o se faitaulaga sili, perofeta, ma se tupu i le Feagaiga Tuai. Sa soifua o ia i le taimi o le perofeta o Aperaamo. Sa ta’ua o ia o “le tupu o Salema … , o le tupu o le filemu, o le tupu o le amiotonu … , ma le ositaulaga o le Atua silisili.” Na maua foi e Mekisateko sefuluai mai ia Aperaamo. I se faaaliga na tuuina atu ia Iosefa Samita, na faaali mai ai e le Alii na faaee atu e Mekisateko le perisitua i luga o Aperaamo.

Na faamanino mai e le Perofeta o Iosefa Samita e faapea, o faamatalaga o le tino ola pea ma le leai o ni matua e le faatatau ia Mekisateko lava ia. O le Perisitua Mekisateko lea e “leai se tamā [ma] e aunoa ma se tina.” Na aoao mai foi Iosefa Samita o le Perisitua Mekisateko lea “sa i ai faatasi ma le Atua mai le vavau, ma o lona finagalo e oo i le faavavau, e aunoa ma se amataga o aso po o se faaiuga o tausaga.”

“O le Perisitua Mekisateko o le perisitua e maualuga atu pe sili atu foi.” Na faamalamalama mai e Paulo e faapea, o le Perisitua Arona e faaee atu e aunoa ma se tautoga, ae o le Perisitua Mekisateko e faaee atu faatasi ma se tautoga. Na aoao mai Elder Dale G. Renlund: “I alii taitoatasi o e mauaina le Perisitua Mekisateko, ua faamautu mai e le Atua Ana folafolaga o le feagaiga faatasi ai ma se tautoga. O lenei tautoga ua na o le Perisitua Mekisateko e faatatau i ai, ma o le Atua e tauto i le tautoga, ae le o lē umia le perisitua. Talu ai o lenei tulaga uiga ese e aofia ai Lona mana ma le pule faalelagi, e faaaoga e le Atua se tautoga, e faaaoga ai le gagana sili ona malosi e mafai ona ia faia, e faamautinoa mai ai ia i tatou le natura mausali ma lemasuia o Ana folafolaga.”

Ua aoao mai i tusitusiga paia o le Toefuataiga e faapea o le Perisitua Arona “o se faaopoopoga i le perisitua maualuga, po o le Perisitua Mekisateko.” Na faaali mai e le Alii e faapea “o i latou uma o e e mauaina le perisitua, e mauaina lenei tautoga ma le feagaiga a lo’u Tama [Faalelagi].” E ala i sauniga o le Perisitua Mekisateko, ua mafai ai e Iesu Keriso ona tuuina mai faamanuiaga o le faaeaga i fanau a le Atua.

O le fale fetafa’i o se malumalu feavea’i lea sa faaaogā e Isaraelu anamua se’ia oo ina latou fausia le malumalu o Solomona. O le fale fetafa’i o se malumalu feavea’i lea sa faaaogā e Isaraelu anamua se’ia oo ina latou fausia le malumalu o Solomona. E faatasi i le tausaga, i le Aso o le Togiola (Yom Kippur), ona ui atu ai le faitaulaga sili i le veli o le malumalu ma ulufale atu i le Nofoaga Aupito Paia, lea e ta’ua foi o le Paia o Paia, lea e faatusa i le afioaga o le Atua.

O Le Fale Fetafa’i o le Feagaiga Tuai

A o lei ulufale atu i le Paia o Paia, sa faia e le ositaulaga ni taulaga i manu. Sa ia sausauina le toto o manu i nofoaga faapitoa i le Paia o Paia e fai ma taulaga mo agasala e togiola ai agasala a Isaraelu. Ona ia tuuina atu lea faafaatusa o agasala a tagata i se ‘oti po’a, lea na ta’ua o le ‘oti togisala. Na auina atu lenei oti i le vao. Mulimuli ane, na ofoina atu e le ositaulaga taulaga mu o tamai mamoe e lua, mo ia lava ma lona nuu. O nei taulaga ma sauniga i le Aso o le Togiola sa faamoemoe e faatusa ma faatatau i le Togiola a le Faaola.

Sa ofoina atu e faitaulaga sili anamua ni ’oti po o ni tamai mamoe e fai ma taulaga; na ofoina atu ma le lotomalie e le Tamai Mamoe a le Atua o Ia lava e fai ma taulaga. Sa ofoina atu e faitaulaga sili taulaga i tausaga uma i le Aso o le Togiola; Sa na o le faatasi ona faia e Iesu Keriso Lana taulaga. O Iesu o lo tatou Ositaulaga Sili i le faia o le taulaga ma le taulaga lava ia. Na ulu atu faitaulaga sili anamua i le Paia o Paia i le lalolagi ma sausauina le toto o le ‘oti i luga o le nofoa alofa mutimutivale mo agasala a Isaraelu. Ona o Lana taulaga togiola, ua ulufale atu ai Iesu Keriso o le Puluvaga i le malutaga o le lagi i luma o le Tama Faalelagi e fai ma sui o i latou uma o e salamo.

Na aoao mai Peresitene Russell M. Nelson e faapea “O le Togiola a [Iesu Keriso] e le iu—e leai se iuga. E le i’u foi lea e mafai ai ona faaolaina tagata ola uma mai le oti e le iu. E le i’u pe a fuafua i Lona puapuagatia tele. Sa le i’u i le taimi, lea na faamuta ai uluai faiga o taulaga sa osi i manu. Sa le i’u i se tulaga—na faia i le taimi e tasi mo tagata uma.”

O le veli o le malumalu e faatusa i le “tuueseeseina i le va o le Atua ma le tagata.” I aso anamua, sa ui atu ai le faitaulaga sili i le veli i le Aso o le Togiola (tagai i le “Eperu 9. O le a le mea na faia e le faitaulaga sili i le Aso o le Togiola?”). Ua faatusa lenei mea i le ulufale atu i le afioaga o le Atua. Na aoao mai Paulo o le ie puipui e faatusa i le tino o Iesu Keriso. O le taulaga a Keriso e mafai ai ona tatou ulu atu i le afioaga o le Atua.

E pei lava ona tuuina atu e le ie puipui o le malumalu i le faitaulaga sili le avanoa e ulufale ai i le Paia o Paia, e faapena foi ona tuuina mai e le Togiola a Iesu Keriso ia i tatou le avanoa e oo atu ai i le afioaga o le Atua.

Na tusia e se tasi o tagata atamai, “O le faasatauroina o se ituaiga fasiotiga tagata saua ma tigā sa faaaogaina i aso anamua, ma i aganuu a le lalolagi o le Feagaiga Fou o se auala maasiasi ma le faalumaina lea e oti ai.” Na foliga mai sa tauivi nisi o ulua’i Kerisiano ma le manatu faapea na maliu Iesu Keriso, le Alo o le Atua, i se auala matagā faapena. E lē gata i lea, na faitioina ma tauemu tagata faapaupau i Kerisiano ona o le tapua’i i se Atua na maliu i le faasatauroga. Na faamalamalama mai e Paulo na onosaia e Iesu Keriso le maasiasi o le Faasatauroga ina ia avea ai ma taitai ma lē e faaatoatoaina lo tatou faatuatua.

Na aoao mai foi Paulo na onosaia e le Faaola le maasiasi o le satauro “ona o … le olioli.” Na aoao mai Peresitene Russell M. Nelson: “O Iesu Keriso o lo tatou faataitaiga sili, ‘o lē na onosai i le satauro, ona o le olioli sa tuu i ona luma’[Eperu 12:2]. Mafaufau i lena mea! Ina ia mafai ona Ia onosaia aafiaga aupito i sili ona tiga e le’i onosaia muamua i le lalolagi, na taulai atu ai lo tatou Faaola i le olioli!

“Ma o le a le olioli lea sa tuu i Ona luma? E mautinoa lava na aofia ai le olioli i le faamamāina, faamaloloina, ma le faamalosia o i tatou; o le olioli o le totogiina mo agasala a tagata uma o le a salamo; o le olioli o le a mafai e oe ma a’u ona toe foi atu—i le mama ma le agavaa—e mau faatasi ma o tatou Matua Faalelagi ma aiga.”

O le upu Eleni paideia ua faaliliuina o le “a’oa’i” i le King James Version o le Tusi Paia ma le “aoaiga” i isi faaliliuga. O le Paideia o lona uiga o le “aoaoina, faafaileleina o fanau, tausiga, aoaoga.” O le manatu autu lava “o le aoaoina atoa ma le aoaoga o tamaiti … faatonuga lea e taula’i atu i le faateleina o le mamā.”

O le faasino atu i le afi, afā, ma se pu i le Eperu 12:18–19 o se faatatauga lea i le afioaga o le Atua i luga o le Mauga o Sinai ina ua faalauiloa mai e le Atua le tulafono a Mose. O lenei aafiaga mata’ina musuia sa muamua ona oo mai. E tatau i e talitonu ona vaavaai atu i se isi mauga, o le Mauga o Siona, mo le mamalu sili atu. I le tusi o Eperu, o loo faasino atu ai le Mauga o Siona i le aai faalelagi o le Atua. I lenei aai o loo i ai “le faapotopotoga atoatoa ma le ekalesia o le ulumatua.”

I le saunoa ai e uiga i le Ekalesia a le Ulumatua, na folafola mai ai e Iesu Keriso, “Sa ou i ai i le amataga faatasi ma le Tama, ma o a’u o le Ulumatua; ma o i latou uma o e ua fanauina e ala mai ia te a’u, o i latou ia o e e mauaina le mamalu o lea lava mea, ma o i latou o le ekalesia a le Ulumatua.” O i latou o e mauaina le mamalu o le Ulumatua e olioli i se “atoatoa o le Tamā.” O lenei atoatoaga o le folafolaga “o le ola e faavavau, o le mamalu lava lea o le malo selesitila; o le mamalu lena o le ekalesia a le Ulumatua, o le mamalu lava lea o le Atua, o lē ua silisili lona paia i tagata uma, e ala ia Iesu Keriso lona Alo.”

Na tusia e se tagata atamai: “Ia Isaraelu anamua, o se tasi o vaega taua o le Atua o Lona tomai lea e faaali atu Lona mana e ala i le faaalia o le malamalama mumu. E moni lava, sa tutū Isaraelu ma le maofa i le faaalia o se susulu e pei o se afi e maamaai i luga o le tumutumu o Sinai (tagai i le Esoto 24:17). Na folafola atu e Mose, ‘O le Alii lou Atua o le afi maamaai ia’ (Teuteronome 4:24).” O lenei faaaliga o le afioaga ma le mana o le Atua e faaosofia ai le “migao ma le maofa.”

Na faalautele e le Perofeta o Iosefa Samitai le uiga o le afi maamaai e faapea: “O le Atua Silisiliese lava Ia e afio i le afi e faavavau; e le mafai e le tino ma le toto ona alu i ai iina, aua e faaumatia mea leaga uma e le afi. O Lo Tatou Atua o se afi maamaai ia. A segia o tatou tino e le Agaga, o le a le toe i ai se toto i lenei tino. O nisi e nonofo i le mamalu maualuga atu nai lo isi. … O le tino ola pea e nofo i le mumu e faavavau.”

• David Rolph Seely ma Jo Ann H. Seely, “Osigataulaga: I le Faatusa o le Faaola” (tusiga e na o le faatekinolosi), Liahona, Sete. 2022, Gospel Library

• Jeffrey R. Holland, “An High Priest of Good Things to Come,” Ensign, Nov. 1999, 36–38

• Dale G. Renlund, “O Le Perisitua ma le Mana Togiola o le Faaola,” Liahona, Nov. 2017, 64-67

• Jeffrey R. Holland, “Cast Not Away Therefore Your Confidence,” Ensign, Mar. 2000, 6–11

• Autu ma Fesili, “Faatuatua ia Iesu Keriso,” Gospel Library

• Camille N. Johnson, “Valaaulia Keriso e Taitaiina Lau Tala,” Liahona, Nov. 2021, 80–82