Perofeta

Na valaauina le Perofeta o Iosefa Samita e le Atua e talai atu le talalelei toefuataiina a Iesu Keriso ma fesoasoani i fanau a le Atua ia maua sauniga o le perisitua e manaomia mo le faaolataga ma le faaeaga. O e na suitulaga ia te ia, e aofia ai ma le Peresitene o le Ekalesia i le asō, ua mauaina lea lava pule ma le tiutetauave e tasi e faaauau ai o ni sui o le Alii. Faitau le Mataupu Faavae ma Feagaiga 107:91–92. O le a le mea ua faailoa mai e lenei fuaitau ia te oe e uiga i le matafaioi taua a le perofeta a le Alii i Le Ekalesia a Iesu Keriso o le Au Paia o Aso e Gata Ai?

O tagata o le Ekalesia o e saili e mulimuli i auauna filifilia a le Alii e faamanuiaina. Valaaulia tagata o lau vaega e faatusatusa upumoni o loo aoaoina i le Helamana 13:24–28 ma le 3 Nifae 12:1–2. Aisea e faaaloalo ai nisi tagata i perofeta ua mavae ae teena perofeta soifua? O a ni faamanuiaga ua e iloaina ona ua i ai a tatou perofeta ma aposetolo soifua i le lalolagi i aso nei?

Esekielu 2:7; Luka 1:70; 6:12–13; 1 Nifae 22:2; 3 Nifae 20:24; Mataupu Faavae ma Feagaiga 107:23

Russell M. Nelson, “Lagolagoina o Perofeta,” Liahona, Nov. 2014, 74–76

Na faamalamalama mai e Peresitene Russell M. Nelson: “Ona o le popole loloto o [taitai o le Ekalesia a le Alii] i fanau uma a le Atua tatou te folafola atu ai Lana upumoni. Atonu tatou te le ta’uina atu i taimi uma i tagata mea latou te fia faalogo i ai. O perofeta e seāseā ona lauiloa. Ae o le a matou aoao atu e le aunoa le upumoni!” O anafea na fesoasoani ai lou naunautai e faatuatuaina le perofeta a le Alii e te iloa ai le moni o lana savali?

Ua lapatai mai tusitusiga paia e uiga i perofeta pepelo o e o le a tulai mai i aso e gata ai ma o le a taumafai e faasese fanau a le Atua (tagai i le Mataio 24:24). Na faamalamalama mai e le Alii o le a Ia faatuina e le aunoa Ana perofeta e ala i le mamanu ua faatulagaina ua iloa i le Ekalesia. Faitau le Ioane 10:1–2 ma le Mataupu Faavae ma Feagaiga 43:7. O le a le uiga o le sau o le auauna a le Alii i totonu i le faitotoa? E faapefea ona fesoasoani le iloaina o faaaliga mai le Atua e oo mai i taimi uma lava, e ala i faasologa faamaonia o le perisitua, e te aloese ai mai le faaseseina?

Faitau le saunoaga lenei a Peresitene Russell M. Nelson faatasi ma tagata o lau vaega: “O lo tatou lagolagoina o perofeta o se tautinoga patino lea o le a tatou faia le mea sili tatou te mafaia e lagolago ai mea latou te faamuamua faaperofeta. O la tatou lagolago o se faailoga e faapei o se tautoga ua tatou iloa lo latou valaauga o se perofeta ina ia faamaoni ma noatia ai i tatou.” Faitau le Mataupu Faavae ma Feagaiga 107:22. O a ni auala e mafai ona tatou lagolagoina le Au Peresitene Sili e ala i lo tatou “talitonuga, faatuatua, ma le tatalo”?

Mataio 10:40; 3 Nifae 28:34; Mataupu Faavae ma Feagaiga 1:14; 112:20, 30–32

“Mataupu 11: Mulimuli i le Perofeta Soifua,” Aoaoga a Peresitene o le Ekalesia: Ezra Taft Benson (2014), 147–54.

Na faamalamalama mai e le Aposetolo o Paulo o aposetolo ma perofeta o le faavae lea o le Ekalesia (tagai i le Efeso 2:19–20). Faitau le Efeso 4:11–14. E faapefea ona taofi i tatou e aposetolo ma perofeta mai le “felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga”? (fuaiupu e 14).

Faitau faatasi ma tagata o lau vaega le saunoaga lenei mai i a Elder Neil L. Andersen:

“E toalaiti nisi e fesiligia lo latou faatuatua pe a latou maua se saunoaga sa faia e se taitai o le Ekalesia i ni tausaga ua mavae lea e foliga mai e lei ogatusa ma la tatou aoaoga faavae. O loo i ai se mataupu faavae taua o loo puleaina ai le aoaoga faavae o le Ekalesia. O le aoaoga faavae e aoaoina e uso uma e toa 15 o le Au Peresitene Sili ma le Korama a le Toasefululua. E le o natiaina i se parakalafa faigata o se lauga se tasi. O mataupu faavae moni e aoaoina soo e le toatele. O la tatou aoaoga faavae e le faigata ona maua.”

Valaaulia tagata o le vaega e talanoaina pe faapefea ona tatou iloa mataupu faavae moni o le talalelei ma aoaoga faavae aloaia a le Ekalesia.

Amosa 3:7; Mataupu Faavae ma Feagaiga 124:125–26

Dallin H. Oaks, “O Le Molimau Mautinoa a Perofeta o Ona Po Nei,” Liahona, Oke. 2023, 5–7

D. Todd Christofferson, “O Le Aoaoga Faavae o Keriso,” Liahona, Me 2012, 86–89

I le Feagaiga Tuai, tatou te faitau ai e uiga ia Naamanu—o se taitai au o le autau a le tupu o Suria. Sa mafatia o ia i se ma’i na ta’ua o le lepela. Sa ia iloaina sa i ai se perofeta i Isaraelu o lē sa i ai le mana e faamalolo ai, ma sa malaga atu Naamanu e feiloai ia te ia (tagai i le 2 Tupu 5:1–9). Suesue le 2 Tupu 5:10–14. Aisea na le fiafia ai Naamanu i faatonuga na tuuina mai e le perofeta a le Alii? O le a le mea na tupu na iu ai ina taitai atu Naamanu e faalogo ma ua’i atu i upu a le perofeta ma faamaloloina ai? E mafai faapefea ona e faaaogaina lenei tala i lou lava olaga?

O le filifili e mulimuli i fautuaga a perofeta a le Alii e aumaia ai le saogalemu. Faatasi ma tagata o lau vaega, faitau le faamatalaga lea a Peresitene Henry B. Eyring:

“O le filifiliga e aua nei taliaina fautuaga faaperofeta e suia ai le faavae o loo tatou tutu ai i luga. O le a matuai sili lava ona matautia. O le le taliaina o fautuaga faaperofeta e faaitiitia ai lo tatou malosiaga e talia ai fautuaga musuia i le lumanai. …

“O taimi uma i lo’u olaga pe a ou filifili ai e faatuatuai ona mulimuli i se fautuaga musuia pe filifili faapea e le aofia ai au, sa oo ina ou iloa ai sa ou tuuina au lava i se ala e pagatia ai. O taimi uma lava na ou faalogo ai i fautuaga a perofeta, ma lagonaina i se tatalo e faamautu ai, ma mulimuli i ai, na ou iloa ai lo’u agai atu i le saogalemu. I le ala, sa ou maua ai sa saunia le ala mo au ma sa faamolemoleina vaega gaoa. Sa taitaiina au e le Atua i le saogalemu i se ala sa saunia ma le tausiga alofa, o nisi taimi na leva ona saunia.”

Valaaulia tagata o le vaega e faasoa mai ni auala atonu na latou maua ai le saogalemu ma le puipuiga faateleina ona sa latou filifili e mulimuli i fautuaga a se perofeta.

Isaia 55:8–9; Mamona 9:7–9; Mataupu Faavae o le Faatuatua 1:9

M. Russell Ballard, “O le Atua o loo i le Foeuli,” Liahona, Nov. 2015, 24–27