Tauagafau

O la tatou gagana ma amioga e mafai ona avea ma faailoaga o o tatou tagata. E mafai ona faaali atu o tatou lava lagona e ala i gagana mama, lelei, agalelei, ma faagaeetia. E moni foi lenei mea i le ala tatou te talanoa atu ai i lo tatou Tama Faalelagi ma Iesu Keriso. O se tasi o Poloaiga e Sefulu o le, tatou te le ta’u fua le suafa o le Alii.

E faamanuiaina foi i tatou a o tatou taumafai e amio i auala e siitia ma faamanuia ai i latou o siomia i tatou. O a tatou taumafaiga ia tauagafau i mea tatou te tautatala ai ma faia e mafai ona taitai atu ai i le taitaiga ma le faamafanafanaga sili atu mai le Agaga Paia.

O o tatou foliga vaaia, e aofia ai lavalava tatou te ofuina, e mafai foi ona avea ma se faailoaga o o tatou tagata. E auina atu ai savali e uiga ia i tatou, ma e mafai ona aafia ai le ala tatou te amio ai. O le lelei ona teuteuina ma laei tauagafau e mafai ona fesoasoani ia i tatou e valaaulia ai le mafutaga a le Agaga.

Na aoao atu e le Aposetolo o Paulo le Au Paia anamua e faapea, “o lo outou tino o le malumalu lea o le Agaga Paia ua i totonu ia te outou” ma valaaulia i latou e “vivii atu i le Atua i o outou tino, ma o outou agaga.” Ua fautuaina foi i tatou e perofeta o aso e gata ai ina ia laei tauagafau e faamamalu ai o tatou tino o se foafoaga paia a le Atua. E mafai ona tatou filifili ia tauagafau aua ua tatou iloa o o tatou tino o se malumalu ma tatou te mananao e faaali atu le faaaloalo ma le alofa i ai ma mo lo tatou Tama o le na tuuina mai ia i tatou.

Tatou te aoao foi mai le Mo le Malosi o le Autalavou: O Se Taiala mo le Faia o Filifiliga e faapea “e finagalo le Tama Faalelagi ia tatou vaai i le tasi ma le isi po o ai moni lava i tatou: ae le na o ni tino faaletino ae o Ana fanau pele e i ai se taunuuga paia.” O le faia o laei tauagafau, lea e aofia ai le aloese mai sitaili e faamamafaina pe tosina atu ai le gauai le talafeagai i o tatou tino faaletino, e mafai ona fesoasoani tatou te vaai ai ia i tatou lava o ni fanau a le Atua ma taulai atu i mea e taua e faavavau.

E mafai ona tatou mulimuli i uunaiga a le Agaga e fesoasoani ia i tatou ia tauagafau i o tatou olaga atoa. Afai tatou te le o mautinoa pe tauagafau la tatou gagana ma amioga, atonu tatou te fesili ifo ia i tatou lava, “O le a le faailoga o le a ou auina atu i le Atua pe afai ou te faia nei upu pe auai i nei gaoioiga?” Atonu tatou te fesili ifo ia i tatou lava i se fesili talitutusa e uiga i o tatou lavalava po o teuga: “O le a le faailoga o loo ou auina atu i le Atua e ala i o’u lavalava po o foliga vaaia?” O a tatou tali faamaoni i nei fesili e ono taitai atu ai i tatou i le faia o suiga taua i o tatou olaga.

O le a faamanuiaina i tatou pe a tatou faatagaina le amio mama ma le alofa mo le Atua e taiala a tatou filifiliga.

• Ola Mama

• Lotomaualalo

• Tataina o Pe’a ma le Tatuiina o le Tino

• Tusitusiga Paia

• Savali mai Taitai o le Ekalesia

• Punaoa mo tamaiti