A’oga

A o tatou masani i le moni o punavai lelei o soo se ituaiga, tatou te saunia lelei ai e galulue ma auauna i le malo o le Atua. Na faaali mai e le Alii, “O le mamalu o le Atua o le atamai lea, po o, i nisi upu, o le malamalama ma le upumoni.” O upumoni uma e sau mai le Tama Faalelagi ma ua mamanuina mo le manuia o Ana fanau. E finagalo le Atua ia aoao o tatou mafaufau, faaleleia o tatou tomai, ma faaatoatoa o tatou gafatia ina ia mafai ona avea i tatou ma ni faatosinaga lelei mo le manuia i le lalolagi, saunia mea mo i tatou lava, o tatou aiga, ma i latou e limavaivai, ma atinae ai le malo o le Atua.

O upumoni uma, e tusa pe faalelotu pe faalelalolagi, ua aofia uma i le fuafuaga a le Atua mo lo tatou faaolataga ma le fiafia. Na aoao mai le Perofeta o Iosefa Samita: “Soo se mataupu autu o le atamai tatou te maua i le olaga lenei, o le a tutu mai faatasi ma i tatou i le toetutu. Ma afai e maua e se tagata le poto ma le tomai sili atu i le olaga lenei … o le a maua e ia le avanoa tele atu i le lalolagi a sau.”

Ua tuuina mai e le Alii ia i tatou taitoatasi meaalofa ma uunaia i tatou ia faaleleia atili i luga o na meaalofa ma saili isi meaalofa. Ua Ia faatonuina foi i tatou ia “saili i le aoaoina, e ala lava lea i le suesue ma le faatuatua foi.” Ua uunaia e taitai o le Ekalesia ia tagata lotu ina ia auai i taumafaiga ia faateleina le iloa faitau ma tusitusi, aoaoina, ma aoaoga faamasani i tomai.

Ua faamalosiau mai perofeta a le Atua o aso nei, i alii ma tamaitai ia maua le a’otauina e mafai ona latou maua. Na tau atu e Peresitene Hinckley i alii talavou ia “galulue mo se aoaoga. Ia maua mai uma aoaoga e te mafaia.” Sa uunaia e Peresitene Thomas S. Monson ia tamaitai talavou o le Ekalesia ina ia “tulitulimatagauina a outou aoaoga—pe afai tou te le o faia pe lei faia foi.”

A’oga

Autu Fesootai

Anotusi Fesootai