“Eseta,” Autu ma Fesili (2023)
Vaaiga Aoao
Eseta
O le Eseta o le aso malolo faa-Kerisiano lea e faamanatu ai le Toetu o Iesu Keriso. Ina ua maliu Keriso i luga o le satauro, sa tuu Lona tino i se tuugamau, lea sa tumau ai, ma tuuaeeseina ai mai Lona agaga, seia oo i Lona Toetu, ina ua toe faatasia Lona agaga ma Lona tino. Ua faamautu ma molimau mai le Au Paia o Aso e Gata Ai na toetu Iesu Keriso ma o loo soifua i le asō ma se tino faamamaluina ma le atoatoa o aano ma ivi.
Ina ua mavae Lona Toetu, sa faaali muamua atu Iesu ia Maria le Makatala ona sosoo ai lea ma isi soo. O nisi sa le’i talitonu i Lona Toetu, ma talitonu o Ona faaali mai o ni agaga e leai se tino. Na faamautinoa atu e Iesu ia i latou, “Ia outou vaavaai mai i o’u lima ma o’u vae, aua o a’u lava lenei: ia outou tagotago mai ia te a’u, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai.” Ona ia taumafa lea i i’a ma le meli i o latou luma, ma atili aveesea ai lo latou masalosalo.
O le Eseta o se faamanatuga e le gata i le Toetu o Keriso ae faapea foi le Toetu lautele. Ona o le Togiola a Iesu Keriso, o le a toetutu tagata uma. O le a toe faatasia o latou tino ma agaga, e le toe tuueseeseina lava. Ua iloa e le Au Paia o Aso e Gata Ai le moni o le saunoaga a Paulo, “Ae o lenei ua toetu mai Keriso mai e ua oti, ma avea ma ulua’i fua o e ua momoe. … “Aua faapei ona oti uma ia Atamu e faapea foi ona faaolaina uma ia Keriso.”
E taitaia e le Au Paia o Aso e Gata Ai ia sauniga o le Aso Sa o le Eseta ae e le mulimuli i faiga faalelotu o le Aso Lulu o le Lefulefu, Sa i meaai, po o le Vaiaso Paia. O sauniga o le Eseta a le Au Paia o Aso e Gata Ai e masani ona iloiloina ai tala o le Feagaiga Fou ma le Tusi a Mamona e uiga i le faasatauroga o Keriso, Lona Toetu, ma mea na tutupu ai. Mo nei sauniga, e masani ona teuteuina falesa i lili papae ma isi faatusa o le ola. E masani ona faia e aufaipese a uarota ia pese o le Eseta, ma e usuina e faapotopotoga viiga o le Eseta. E pei o sauniga i isi Aso Sa, e tufatufa atu faatusa o le faamanatuga i le faapotopotoga.
O nisi aiga o le Au Paia o Aso e Gata Ai e aofia ai rapiti o le Eseta ma fuamoa i a latou faafiafiaga faaleaiga mo le faafiafiaina o tamaiti. O na tu ma aga masani e le o faasaina aloaia, e ui e leai so latou taua faalelotu i le Au Paia o Aso e Gata Ai. O le taulaiga o le aso malolo e faalelotu. Mo le Au Paia o Aso e Gata Ai, o le Eseta o se faamanatuina lea o le folafolaga o le ola e faavavau e ala mai ia Keriso. Latou te faasoa atu le molimau a Iopu: “Ua ou iloa o loo soifua le na te togiolaina a’u, o aso amuli foi e tulai mai ai o ia i luga o le eleele: e ui foi ina faaumatia lenei tino pe a mavae atu lo’u pau, ae ou te iloa atu le Atua i lou tino.”