“Iesu Keriso,” Autu ma Fesili (2023)
Vaaiga Aoao
Iesu Keriso
O Iesu Keriso o le Faaola o le lalolagi ma le Alo o le Tama Faalelagi. O Ia o lo tatou Faaola. O faalagiga taitasi nei e faasino atu i le upumoni e faapea, ua nao Iesu Keriso le ala e mafai ai ona tatou toe foi atu e nonofo faatasi ma lo tatou Tama Faalelagi.
Sa mafatia Iesu ma na faasatauroina mo agasala a le lalolagi, ua tuuina taitoatasi mai ai i fanau a le Atua le meaalofa o le salamo ma le faamagaloga. E na o Lona alofamutimutivale ma le alofa tunoa e mafai ona laveaiina ai se tagata. O Lona Toetu na mulimuli ane ai, na saunia ai le ala mo tagata uma e faatoilalo ai foi le oti faaletino. O nei mea na tutupu ua ta’ua o le Togiola. O le faapuupuuga, ua laveai i tatou e Iesu Keriso mai le agasala ma le oti. Ona o lena mea, ua avea moni ai o Ia ma o tatou Faaola ma le Togiola.
I le lumanai, o le a toe afio mai ai Iesu Keriso e nofotupu i le lalolagi i le filemu mo se afe tausaga. O Iesu Keriso o le Alo o le Atua, ma o le a avea o Ia ma o tatou Alii e faavavau. Ua tapuai i taimi uma tagata o Le Ekalesia a Iesu Keriso o le Au Paia o Aso e Gata Ai i le Atua le Tama Faavavau i le suafa o Iesu Keriso. Ina ua fesiligia po o le a le mea e talitonu i ai le Au Paia o Aso e Gata Ai, na tuu e Iosefa Samita ia Keriso i le ogatotonu: “O mataupu faavae autu o la tatou tapuaiga o le molimau a aposetolo ma perofeta e faatatau ia Iesu Keriso, ‘e faapea na maliu o ia, sa tanumia, ma toetu mai i le aso tolu, ma afio ae i luga i le lagi;’ ma o isi mea uma [e faatatau i la tatou tapuaiga] ua na o ni faaopoopoga i nei mea.” Na faamautuina e le Korama a Aposetolo e Toasefululua o aso nei lena molimau ina ua latou tautino mai: “O Iesu o le Keriso Soifua, o le Alo tino ola pea o le Atua. … O Lona ala o le auala e taitai atu i le fiafia i lenei olaga ma le ola e faavavau i le olaga a sau.”
I le aso 1 o Ianuari, 2020, na tuuina mai ai e le Au Peresitene Sili ma le Korama a Aposetolo e Toasefululua le folafolaga lenei. Ua faaautuina “O Le Keriso Soifuao lenei folafoalga o loo molimau mai i le Alii o Iesu Keriso ma auiliili mai ai Lona faasinomaga ma [Lana] misiona paia:
“A o tatou faamanatuina le soifua mai o Iesu Keriso i le lua afe tausaga talu ai, matou te tuuina atu la matou molimau i le moni o Lona soifua lē mafaatusalia ma le mama e lē gata o Lana taulaga togiola maoae. E leai lava se isi ua i ai se aafiaga matua loloto na’uā o i latou uma na soifua ma o le a soifua ai i luga o le fogaeleele.
“O Ia o le Ieova Silisili o le Feagaiga Tuai, o le Mesia o le Feagaiga Fou. O Ia o lē na foafoaina le lalolagi, i lalo o le taitaiga a Lona Tama. ‘Na ia faia mea uma lava; e leai foi se mea e tasi na faia e lei faia e ia.’ E ui ina leai se agasala, ae na papatisoina o Ia ina ia faataunuu ai le amiotonu uma. Sa ‘femaliuai o ia ma agalelei,’ ae na lē amanaiaina o ia. O Lana talalelei o se savali o le filemu ma le agalelei. Na ia augani mai i tagata uma ina ia mulimuli atu i Lana faataitaiga. Na ia femaliuai i auala o Palesitina, e faamalolo i e mama’i, faapupula i e tauaso, ma faatutu mai e na oti. Na ia aoao atu upumoni o le faavavau, o le tulaga moni sa tatou i ai i le muai olaga, o le faamoemoega o lo tatou ola ai i le fogaeleele, ma le tulaga e mafai ona ausia e atalii ma afafine o le Atua i le olaga a sau.
“Na Ia faatuina le faamanatuga e avea ma faamanatu o Lana taulaga togiola sili. Na pue faapagotaina o Ia ma faasalaina i ni tuua’iga sese, na ta’usalaina ina ia faamalie ai le motu o tagata, ma faasalaina i le oti i luga o le satauro i Kalevario. Na Ia tuuina atu Lona soifua e togiola ai agasala a tagata uma. O Lana [taulaga] o se meaalofa sili foaifua mo i latou uma e soifua mai i luga o le fogaeleele.
“Matou te ta’utino atu i upu ma le faamaoni a’ia’i, o Lona soifua, lea e totonugalemu i le talafaasolopito o tagata uma, e le’i amataina mai i Peteleema pe faaiuina foi i luga o Kalevario. O Ia o le Ulumatua a le Tama, o le Alo Pele e Toatasi i la le tino, o le Faaola ia o le lalolagi.
“Na toe tu mai o Ia mai le tuugamau e “avea ma faapolopolo o e ua momoe.’ I Lona tulaga o se Alii Toetu, na Ia asiasi atu ai ia i latou na alofagia e ia i le olaga nei. Na Ia auauna atu foi i Ana ‘isi mamoe’ i Amerika anamua. I le lalolagi o nei ona po, na faaali mai ai o Ia ma Lona Tama i le taulealea o Iosefa Samita, i le ta’imuaga mai o le ‘tisipenisione ua loa ona folafolaina mai o le atoaga o taimi.’
“Na tusia e le Perofeta o Iosefa e faatatau i le Keriso Soifua, ‘O ona fofoga sa pei o se afi mumū; o lauao o lona ao sa papaʼe e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova, ua fetalai mai:
“O a’u lē muamua ma lē mulimuli; o a’u o lē o loo ola, o a’u o lē na fasiotia; o a’u o lo outou fautua i le Tamā.’
“Na folafola mai foi e le Perofeta e uiga ia te Ia: ‘Ma o lenei, ina ua mavae le tele o molimau ua tuuina mai e uiga ia te ia, o le molimau mulimuli lenei, i molimau uma, ma te tuu atu e uiga ia te ia: O loo soifua o ia!
“‘Aua sa ma vaai ia te ia, i le lima taumatau lava o le Atua; ma sa ma faalogo i le leo o molimau mai o ia o le Toatasi na Fanaua e le Tamā—
“E faapea e mai ia te ia, ma ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua.’
“Matou te folafola atu i upu ma le faamaoni a’ia’i, ua toefuataiina mai i le fogaeleele Lana perisitua ma Lana Ekalesia na toefuatai mai i le fogaeleele— ‘o loo ua atiina a’e i luga o le faavae o le … au aposetolo ma le au perofeta, o le maa tulimanu o Iesu Keriso lava lea.’
“Matou te ta’utino atu o le a i ai se aso e toe afio mai ai o Ia i le lalolagi. ‘Ona faaalia mai ai lea o le pupula o Ieova, e vaaia lava e tagata uma faatasi.’ O le a pule o Ia o le Tupu o Tupu ma nofotupu foi o le Alii o Alii, ma o le a tootutuli tulivae uma ma tapuai laulaufaiva uma i Ona luma. O le a tatou tutu atu taitoatasi ina ia faamasinoina e Ia e tusa ma a tatou galuega ma manaoga o o tatou loto.
“Matou te molimau atu, i le avea ai ma Ana Aposetolo ua faauuina i le ala e tatau ai—o Iesu o le Keriso Soifua, o le Alo tino ola pea o le Atua. O Ia o le Tupu silisili o Emanuelu, o loo tu i le taimi nei i le itu taumatau o Lona Tama. O Ia o le malamalama, o le ola, ma le faamoemoe o le lalolagi. O Lona ala o le auala e tau atu i le fiafia i lenei olaga ma le ola e faavavau i le lalolagi a sau. Ia faafetaia le Atua mo le meaalofa lē mafaatusalia o Lona Alo paia lea.”