O Iesu Keriso ua Filifilia e avea ma Faaola

Ina ua tuuina mai ia i tatou le fuafuaga mo lo tatou faaolataga i le muai olaga, sa tatou matua fiafia lava ma sa tatou “alalaga ai i le olioli.” Sa tatou malamalama lelei o le a tatau ona tatou tuua lo tatou aiga faalelagi mo se vaitaimi. A o tatou nonofo ese ai, o le a tatou agasala uma, ma o nisi o i tatou o le a se ese. Sa silafia e lo tatou Tama Faalelagi o le a tatou manaomia se fesoasoani, o lea na Ia fuafuaina ai se ala e fesoasoani ai ia i tatou.

Sa tatou manaomia se Faaola e totogia a tatou agasala ma aoao mai ia i tatou le ala e toe foi atu ai i lo tatou Tama Faalelagi. Sa fetalai lo tatou Tama, “O ai se ou te auina atu?” Na fetalai Iesu Keriso, o lē na ta’ua o Ieova, “O a’u lenei, auina atu a’u.”

Sa finagalo malie Iesu Keriso e afio mai i le lalolagi, e tuuina atu Lona soifua mo i tatou ma tauave i Ona luga a tatou agasala. Sa finagalo o Ia, e pei o lo tatou Tama Faalelagi, ia tatou filifili pe tatou te usiusitai i poloaiga a lo tatou Tama Faalelagi pe leai. Sa Ia silafia e tatau ona tatou saoloto e filifili ina ia mafai ona faamaonia lo tatou agavaa mo le faaeaga. Na fetalai mai Iesu, “Lo’u Tama e, ia faia Lou finagalo, ma ia ia te Oe pea le mamalu e faavavau.”

Sa alu ane foi Satani,, o le sa igoa ia Lusifelo, ma faapea mai, “Faauta, o a’u lenei, auina atu a’u, ia avea a’u mou atalii, ma o le a ou togiolaina le fanauga uma a tagata ina ia le se ese se agaga e toatasi, ma e moni o le a faapea lava ona ou faia; o le mea lea, ia tuu mai ia te a’u lou mamalu.” I le fuafuaga a Satani, o le a le faatagaina i tatou e filifili. O le a ia aveese le saolotoga e filifili ai lea na tuuina mai e lo tatou Tama ia te i tatou. Sa manao Satani ia maua e ia le mamalu uma mo lo tatou faaolataga. I lalo o lana talosaga, semanu e lē manuia ai lo tatou faamoemoega o le o mai i le lalolagi.

Ina ua maea ona faafofoga atu i atalii uma e toalua, ona tulei mai lea o lo tatou Tama Faalelagi, “O le a ou auina atu Lē na muamua.”