“Kerisimasi,” Autu ma Fesili (2023)
Vaaiga Aoao
Kerisimasi
“Pe a tatou faatumauina le agaga o le Kerisimasi, tatou te faatumauina le Agaga o Keriso, aua o le agaga o le Kerisimasi o le Agaga o Keriso. O le a poloka ai mea faalavefau uma o loo siomia ai i tatou lea e mafai ona faaitiitia ai le Kerisimasi ma tofatumoana ai lona uiga moni.
“E leai se isi taimi e sili atu nai lo le taimi nei, le vaitau lenei o le Kerisimasi, mo i tatou uma e toe tuuto atu ai i tatou lava i mataupu faavae na aoao mai e Iesu Keriso.
“Ona sa afio mai o Ia i le lalolagi, ua ia i tatou se faataitaiga atoatoa e mulimuli ai. A o tatou taumafai ia avea atili e pei o Ia, o le a tatou maua le olioli ma le fiafia i o tatou olaga i aso taitasi o le tausaga. O Lana faataitaiga lea, afai e mulimulitaia, e faaoso ai i totonu o i tatou le agalelei ma le alofa sili atu, ia faaaloalo atili ma popole mo isi.
“Ona sa afio mai o Ia, ua i ai le uiga taua o lo tatou ola faaletino.
“Ona sa afio mai o Ia, ua tatou iloa ai le ala e aapa atu ai ia i latou o fememea’i pe faanoanoa, i soo se mea o latou i ai.
“Ona sa afio mai o Ia, ua leai se tui o le oti, o lea ua manumalo ai le tuugamau. O le a tatou toe ola ona sa afio mai o Ia.
“Ona sa afio mai o Ia ma totogi mo a tatou agasala, ua tatou maua ai le avanoa e maua ai le ola e faavavau.”
O le vaitau o le Kerisimasi o se taimi e tomanatu ai ma galulue i luga o faamanuiaga ma avanoa ua tatou maua ona o le soifua mai, soifuaga, Togiola, ma le Toetu o lo tatou Faaola o, Iesu Keriso. E pei o lo tatou Tama Faalelagi “ua faapea lava ona alofa mai i le lalolagi, ua ia auina mai ai lona Alo e toatasi,” tatou te faailoa atu lo tatou alolofa i le tasi ma le isi ma le Atua ma Lona Alo pele e ala i le tuuina atu o i tatou lava.