Galuega

O galuega o se vaega manaomia o o tatou olaga i le lalolagi; e aumaia ai ia i tatou le auala e tausia ai o tatou aiga. E manaomia e le Atua matua e tausia o latou aiga. Fai mai le “O Le Aiga: O Se Folafolaga i le Lalolagi” e faapea, “e tatau ona pulefaamalumalu tamā i o latou aiga i le alofa ma le amiotonu ma o i latou e tuuina atu mea e manaomia o le olaga ma le puipuiga mo o latou aiga. … E ao i tamā ma tina ona fesoasoani le tasi i le isi o se paaga tutusa. O manaoga faapitoa, oti, po o nisi mea e tula’i mai, e alagatatau ai ona fetuutuunai tagata taitoatasi.”

O le galue o se mataupu faavae taua o le talalelei. E faatupuina ai le tuputupu ae ma atiina ae ai i tatou. E tausalaina e le Atua le paie ma uunaia i tatou ia “faia mea e tele i [o tatou] lava loto fuatiaifo.” E le gata ina finagalo le Alii ia tatou tausia o tatou aiga ae ia “auai ma le naunautai i se faamoemoega lelei.” O galuega lelei e taua mo i tatou e mafai ai ona tausia lelei o tatou aiga ma auauna faamaoni atu ai i le Ekalesia.

Mai lava i le amataga, na poloaiina ai e le Alii Atamu e galueaiina le eleele ma ia pule i manu o le fanua, e ai lana areto i le afu o lona muaulu. Na saunoa Elder L. Tom Perry o le Korama a Aposetolo e Toasefululua: “Sa ou fiafia lava i taimi uma i le tele o taimi ua apoapoai mai ai tusitusiga paia ia i tatou ia tuu le paie ma ia faamanuiaina i a tatou galuega uma. … O le aoaoina o fanau i le olioli o le galue faamaoni o se tasi lea o meaalofa silisili o meaalofa uma e mafai ona e tuuina atu ia i latou.”

“Ia tatou iloa o le avanoa e galue ai o se meaalofa, o le mana e galue ai o se faamanuiaga, o le fiafia i le galue o le manuia lea.”