Galuega Faafaifeautalai

Na folafola mai e le Alii o le galuega faafaifeautalai o le tiutetauave a i latou uma e mulimuli atu ia te Ia. O tagata o le Ekalesia a le Alii e mafai, e ala i le lelei o o latou olaga ma le malolosi o a latou molimau, ona faasoa atu le savali o le talalelei ma fesoasoani e saunia tagata o aiga, uo, ma isi uo e le o ni Au Paia o Aso e Gata Ai ia aoaoina e faifeautalai faamisiona.

Pe a tatou aafia i faamanuiaga o le ola i le talalelei, e masani lava ona tatou mananao e faasoa atu na faamanuiaga i isi. Na fetalai mai le Alii e uiga i le olioli e oo mai i o tatou olaga pe a tatou faasoa atu Lana talalelei:

“Ma afai e faapea lua te galulue i o oulua aso uma i le alagaina o le salamo i lenei nuu, ma aumai, nao se agaga e toatasi ia te au, e matua tele lava lo oulua olioli faatasi ma ia i le malo o lo’u Tama!

“Ma o lenei, afai o le a tele lo oulua olioli faatasi ma se agaga e toatasi na oulua aumai ia te a’u i le malo o lo’u Tama, e matua tele atu lo oulua olioli pe afai lua te aumai ni agaga e toatele ia te a’u!”

Ina ua mavae Lona Toetu mai, na poloaiina e le Faaola Ona soo ia “o … atu e fai nuu uma lava ma soo, ma papatiso atu ia te i latou i le suafa o le Tama, ma le Alo, ma le Agaga Paia” I le faataunuuina o lenei poloaiga, o alii agavaa i le Ekalesia ua i ai se tiute ia saunia faaleagaga, faaletino, ma faalelagona e auauna atu o ni faifeautalai faamisiona. O tamaitai nofofua ma ulugalii matutua ua i ai foi le avanoa e auauna atu ai i ni misiona.

O le galuega faafaifeautalai e aofia ai foi le fesoasoani ma lagolagoina i latou e auai i le Ekalesia. E pei ona aoao mai Peresitene Gordon B. Hinckley, o tagata fou taitoatasi o le Ekalesia e manaomia ni mea se tolu: o se uo, se tiutetauave, ma le faafaileleina i “le afioga lelei a le Atua.”