Feagaiga Tumau e Faavavau

O la tatou feagaiga fou ma e le muta ma le Atua

Pe na folafola atu ea e se tasi e pele ia te oe e faia se mea mo oe lea o le a faamanuiaina moni ai lou olaga? O a ni ou lagona na i ai ina ua latou tausia lena folafolaga?

E faia foi e le Tama Faalelagi ni folafolaga ofoofogia ia i tatou. E tupu lenei mea pe a tatou faia ni folafolaga paia, po o ni feagaiga, ma Ia a o tatou maua sauniga faaola ma faaeaga o Lana talalelei. Talu mai lava a o lei foafoaina le lalolagi, ua folafola mai e le Atua e mafai ona tatou toe foi atu ma nonofo faatasi ma Ia pe afai tatou te mulimuli i Lona Alo, o Iesu Keriso. O lenei feagaiga tumau faavavau na muamua osia ma Atamu ona faafouina lea i tisipenisione mulimuli ane.

Na aoao mai e Peresitene Russell M. Nelson le auala e faamanuiaina ai i tatou pe a tatou filifili e ulu atu i se sootaga o le feagaiga ma le Atua: “O le taimi lava tatou te osia ai se feagaiga ma le Atua, tatou te tuua ai le faavaeluātai e faavavau. O le a le lafoaia e le Atua Lana sootaga ma i latou o e na faia se sootaga faapena ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. … Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou.”

O Le A le Feagaiga Tumau e Faavavau?

O le feagaiga tumau e faavavau, ua lauiloa foi o le feagaiga Faa-Aperaamo, o le atoatoaga lea o le talalelei a Iesu Keriso ma e aofia ai sauniga ma feagaiga uma tatou te manaomia ina ia maua ai le faaolataga ma le faaeaga (tagai i le Mataupu Faavae ma Feagaiga 66:2). “E ‘fou’ i soo se taimi e faafou ai pe toefuatai mai ai e le Alii, ma e ‘faavavau’ aua e le suia.” O le feagaiga tumau e faavavau na faavaeina i le lalolagi faatasi ma Atamu ma sa faafouina lata mai nei e le Atua e ala mai i le Perofeta o Iosefa Samita o se vaega o le Toefuataiga o le talalelei i aso e gata ai (tagai i le Mataupu Faavae ma Feagaiga 1:17–23).

Vaaiga aoao o le autu: Feagaiga faa-Aperaamo

Taiala e faatatau i le suesueina o le talalelei: Toefuataiga o le Talalelei, Feagaiga ma Sauniga, Malumalu, Faaipoipoga, Faamanuiaga Faapeteriaka, Faapotopotoga o Isaraelu

Vaega 1

O Le Tausia o le Feagaiga Fou ma le Tumau e Faavavau e Saunia ai i Tatou mo le Ola e Faavavau

Ua toefuatai mai e le Alii le feagaiga tumau e faavavau, o le atoatoaga lea o le talalelei a Iesu Keriso, “e avea ma malamalama i le lalolagi” ma “ia saunia le ala” mo Lona afio mai (Mataupu Faavae ma Feagaiga 45:9). Ina ia maua le feagaiga tumau e faavavau, tatou te faamuamua le Atua ma osia ma tausia feagaiga o le talalelei ma Ia. Na aoao mai Peresitene Nelson o a tatou feagaiga, e amata i le feagaiga tatou te osia i le papatisoga, “o le a taitai atili ai i tatou ma latalata atili atu i le [Atua]” ma e mafai ona fusia ai i tatou ia te Ia i “fusi e faavavau.”

O le feagaiga tumau e faavavau tatou te osia ma le Atua e faamauina e faavavau pe a tatou tausia. Afai tatou te tumau faamaoni i lenei feagaiga i o tatou olaga atoa, e mafai ona faaeaina i tatou ma toe foi atu e nonofo i le afioaga o le Tama Faalelagi faatasi ma o tatou aiga.

Mea e mafaufau i ai

Suesue le Mataupu Faavae ma Feagaiga 133:57–62, e uiga i le toefuataiga mai e le Alii o le atoatoaga o le talalelei a Iesu Keriso. O le a le uiga o le faapea na aumai “i le manino ma le faigofie”? Mafaufau pe faapefea e lenei feagaiga faigofie ae matagofie e faavavau ona saunia oe e maua ai le ola e faavavau. E faapefea e le malamalama i lenei gafatia ona uunaia oe e fesoasoani i le Alii i Lana galuega o le faaolataga ma le faaeaga?

Gaoioiga mo le aoao faatasi ma isi

I le Mataupu Faavae ma Feagaiga 22:1–4, ua taua ai e le Alii na Ia faafouina Lana feagaiga tumau e faavavau ma le Au Paia anamua. Faitau faatasi le ulutala o le vaega ma fuaiupu nei, ma talanoaina mea ua e aoaoina e uiga i le taua o se feagaiga “fou”. O le a le uiga o “galuega mamate”? Talanoa e uiga i mea ua e aoaoina mai le fuaiupu e 3 e uiga i le taua o le Toefuataiga o le talalelei ma le feagaiga tumau e faavavau.
Ona o Iesu Keriso ma Lana Togiola, e mafai ai ona tatou maua le ola e faavavau pe afai tatou te tausia a tatou feagaiga ma Ia. Na aoao mai Peresitene Nelson: “O i latou o e osia feagaiga paia ma tausia i latou ua folafola atu i ai le ola e faavavau ma le faaeaga, ‘o le meaalofa silisili lea o meaalofa uma a le Atua’ (Mataupu Faavae ma Feagaiga 14:7). O Iesu Keriso o le e faamaonia na feagaiga (tagai i le Eperu 7:22; 8:6). O tagata tausi feagaiga o e alolofa i le Atua ma faatagaina o Ia e manumalo i isi mea uma i o latou olaga ua avea o Ia ma faatosinaga sili ona mamana i o latou olaga.” Talanoa e uiga i le auala e mafai ona e faatagaina ai le Atua e “manumalo i isi mea uma” i lou olaga. E faapefea ona fesoasoani lena mea ia te oe e maua ai le ola e faavavau, ma aisea e aoga ai taumafaiga uma i le mauaina o le faaeaga?

Aoao atili

Isaia 55:1–3; Ieremia 32:37–40; 2 Nifae 31:17–21; Mataupu Faavae ma Feagaiga 49:9–14
Marcus B. Nash, “The New and Everlasting Covenant,” Ensign, Dec. 2015, 40–47

Vaega 2

Ua Toefuatai Mai e le Atua ia Folafolaga o le Feagaiga Faa-Aperaamo i o Tatou Aso

O le feagaiga Faa-Aperaamo o se isi igoa lea mo le feagaiga tumau e faavavau. Na faavaeina a o lei faavaeina le lalolagi ma e faatatau i feagaiga e osia e le Atua ma Ana fanau. O lona igoa e sau mai le feagaiga na osia e Ieova ma Aperaamo (tagai i le Kenese 17:1–8; Aperaamo 2:6–11). I lena feagaiga, na folafola atu ai e le Atua ia Aperaamo ni faamanuiaga silisili mo le ola amiotonu. O na faamanuiaga na aofia ai se fanau e faavavau, le aia tatau i le perisitua, ma se laueleele o le tofi i le faavavau atoa (tagai i le Kenese 13:14–17; Aperaamo 2:8–11).

O le feagaiga Faa-Aperaamo na tuufaasolo mai e ala mai i le atalii o Aperaamo o Isaako (tagai i le Kenese 26:1–4) ona sosoo ai lea ma le atalii o Isaako o Iakopo (tagai i le Kenese 28:1, 13–14). Na suia e le Alii le igoa o Iakopo ia Isaraelu (tagai i le Kenese 32:28) o se faailoga o Lana feagaiga faifai pea ma Iakopo ma lana fanau. Ua toefuatai mai e le Atua folafolaga o le feagaiga faa-Aperaamo i o tatou aso (tagai i le Mataupu Faavae ma Feagaiga 38:17–20; 86:8–11; 132:29–33).

Mea e mafaufau i ai

O le a le uiga ia te oe, o le avea ma se vaega o le feagaiga Faa-Aperaamo? Mafuafau i upumoni nei: Na e osia se feagaiga ma le Atua ina ua e papatiso. E te faafouina lena feagaiga ma osia se feagaiga fou i taimi uma e te aai ai i le faamanatuga. E mafai faapefea ona e faia le malumalu o se taulaiga i lou olaga ina ia mafai ona e auai atoatoa atili i le atoatoaga o le talalelei?
Faitau le Aperaamo 1:2, ma mafaufau i mea ua e aoaoina e faatatau i uiga o Aperaamo. O le a le uiga o le avea ma se “soo sili atu o le amiotonu” i o tatou aso? Aisea e te manatu ai na “saili [Aperaamo] i faamanuiaga a tamā”? Ua faapefea ona faamanuiaina oe e ala i le feagaiga faa-Aperaamo? O le a ni mea e mafai ona e faia e maua ai faamanuiaga o lenei feagaiga?

Gaoioiga mo le aoao faatasi ma isi

Suesue i faataitaiga faamaoni o le ola ai i le talalelei mai ia Aperaamo ma Sara ma lo la aiga amiotonu (mo se faataitaiga, e mafai ona e faitauina faatasi nisi o fuaitau nei: Kenese 17:1–19; 18:1–19; 22:1–18; 24; 32:1–28; 33; 46:1–7; Isaia 51:1–3; Kalatia 3:27–29; 2 Nifae 8:1–3). Ona faitau lea o le Ioane 8:39. E mafai ona taitoatasi outou ona tusia pe vali se ata pe tusi se solo e faailoa atu ai lou agaga faafetai mo faamanuiaga ua oo mai ia te oe pe e mafai ona oo mai i le tausia o le feagaiga o le talalelei e faavavau e pei ona faia e Aperaamo ma Sara. Ona mafai lea ona fefaasoaai a outou ata i le tasi ma le isi.

Aoao atili

Teuteronome 7:6–9; 2 Nifae 29:14; Aperaamo 2:6–12
Russell M. Nelson, “Feagaiga,” Liahona, Nov. 2011, 86–89
“O Le Feagaiga faa-Aperaamo,” Liahona, Fep. 2022, 47
“Abraham” (vitio), Potutusi o le Talalelei

Vaega 3

O I Latou ua Papatisoina e Avea ma Fanau o le Feagaiga

O i latou uma o e ua papatisoina i Le Ekalesia a Iesu Keriso o le Au Paia o Aso e Gata Ai, ua avea ma fanau a Aperaamo, po o “fanau o le feagaiga” (tagai i le 3 Nifae 20:25–26). E mafai e nei tagata o le Ekalesia ona mautofi i folafolaga lava ia na faia ia Aperaamo, Isaako, ma Iakopo (Isaraelu) a o latou saili e osia ma tausia feagaiga paia i le maota o le Alii (tagai ie Mataupu Faavae ma Feagaiga 132:29–32).

Ua tauaveina e fanau a Aperaamo se tiutetauave e auauna atu ai i fanau a le Atua ina ia mafai e tagata uma ona olioli i faamanuiaga o le faaolataga ma le ola e faavavau (tagai i le Aperaamo 2:9–11). Soo se taimi lava tatou te fesoasoani ai e faapotopoto Isaraelu i itu uma e lua o le veli, tatou te fesoasoani i tagata taitoatasi ia maua faamanuiaga o le feagaiga tumau e faavavau ma fesoasoani e faataunuu le folafolaga na faia e le Atua ma Aperaamo (tagai i le 1 Nifae 22:8–12; 3 Nifae 20:29–31).

Mea e mafaufau i ai

I le Mosaea 5:1–8, tatou te aoao ai i le auala na talia ai e le nuu o le Tupu o Peniamina ana aoaoga e uiga i le talalelei a Iesu Keriso. O ā mea sa latou naunau e fai i lena taimi? O le a le uiga ia te oe o le avea ma se tasi o “fanau a Keriso”? Mata o le a le uiga o le ua “fanauina outou faaleagaga” e Keriso? Ua faapefea ona “suia lou loto e ala i le faatuatua i lona suafa”?
Sa saunoa Peresitene Emily Belle Freeman e uiga i le taua o le savavali i se sootaga o le feagaiga ma Keriso ma aoteleina le folafolaga na faia e le Atua ma Iakopo: “Ou te faatasi ma oe. Ou te tausi ia te oe. Ou te toe faafoisia mai oe i le nuu nei. Ou te le tuua oe. Ou te faia le mea ua ou fai atu ai ia te oe.” Ona ia faamatala mai lea: “Sa i ai se filifiliga a Iakopo e fai. Sa mafai ona ia filifili e ola i lona olaga e na ona ogatusa ma le Atua o lona tama, pe sa mafai foi ona ia filifili e ola i le olaga i se sootaga tuuto i le feagaiga ma Ia.” Mafaufau loloto po o le a le uiga ia te oe o le ola i lou olaga i se sootaga tuuto i le feagaiga ma Keriso. O le a se mea e te naunau e amata ona fai pe taofi le faia ina ia mafai ona e faamalosia ai lau sootaga o le feagaiga ma Ia?

O Gaoioiga mo le aoao faatasi

Faitau le Helamana 5:12 ma upu nei mai ia Brother Jan E. Newman: “Tatou te aoao foi a tatou fanau ia fusia i latou lava ia [Keriso] e ala i sauniga ma feagaiga paia, a o’o ai ina oo mai afa ma lologa faafeagai, aua o le a oo mai lava, o le a le tele so latou aafiaga i o latou luga ‘ona o le papa o loo atia’e ai [i latou].’” O a nisi o “afā ma lologa faafeagai” e ono oo mai i o tatou ala? Talanoaina pe mafai faapefea e au feagaiga ona fesoasoani e puipuia oe ma lou aiga mai “afa tetele” o le fili.
Faitau le saunoaga lenei mai ia Elder Neil L. Andersen: “O i tatou uma o ‘fanau o le feagaiga’ ua salalau solo i le lalolagi i malo ma aganuu i konetineta uma, ua faitauina faatasi ma fia miliona, a o tatou faatalitali ai i le toe afio mamalu mai o lo tatou Alii ma le Faaola. O le susulu atu o lo tatou malamalama ia i latou o siomia ai i tatou, tatou te mamanuina ai ma le loto o tatou naunauga, mafaufauga, filifiliga, ma amioga. O le sailia ma o tatou loto atoa ia iloa ma alolofa i le Faaola, tatou te tuuese ai i tatou lava mai le lalolagi e ala i feagaiga ma le Atua, e ala i le tulagaese, e lē taatele, ma faapitoa a o tatou faamamaluina o Ia ma Ana aoaoga e aunoa ma le faaesea o i tatou lava mai isi o ē e ese o latou talitonuga.” Talanoaina pe faapefea ona tatou “[saili] ma o tatou loto atoa ia iloa ma alolofa i le Faaola” ma tausia a tatou feagaiga ma le Atua.

Aoao atili

Kenese 12:1–3; Kalatia 3:7–9; 1 Nifae 15:13–18; Mataupu Faavae ma Feagaiga 124:58
Russell M. Nelson, “O Fanau o le Feagaiga,” Liahona, Iulai 1995, 32-34